04/06/19

Stât spagnûl: ecuilibris dificii tes Comunitâts autonomis

Ai 26 di Mai, intune cu lis elezions europeanis, intal stât spagnûl si à votât ancje par rignuvî cetantis aministrazions locâls e diviersis comunitâts autonomis. Tra chestis ultimis si vevin ancje realtâts teritoriâls che a partegnin a nazions cence stât o là che si àn comunitâts linguistichis o nazionâls minorizadis.
In Navare i eletôrs a àn premiât massime la coalizion des diestris spagnolistis e regjonalistis Navarra Suma (NA+), che e à otignût 20 deputâts a front dai 17 de volte stade, e i socialiscj (PSN-PSOE) che a son passâts di 7 a 11 elets. Il vôt al à punît Podemos che di 7 deputâts al è colât a 2. La incressite di vôts no à zovât masse ai nazionalitaris bascs, cui moderâts di Geroa Bai che a àn confermât i 9 deputâts che a vevin e cui indipendentiscj di EH Bildu che a àn fintremai pierdût un dai 8 elets otignûts la volte stade. La formazion di çampe Izquierda-Ezkerra e je lade jù di 2 a 1 deputât. I risultâts eletorâi a metin tes mans dai socialiscj il balin par decidi se a guviernâ, magari cuntune poie esterne o cuntune astension strategjiche, a saran lis diestris spagnolistis o ben une coalizion progressiste nazionalitarie.
Intes isulis Baleârs i socialiscj (PSIB-PSOE) a son stâts la fuarce plui votade e a àn cressût la lôr rapresentance di 14 a 19 deputâts e a, almancul su la cjarte, a àn la pussibilitât di vuidâ une maiorance progressiste nazionalitarie che e cjapi dentri ancje Podemos-EUIB, passât di 10 a 6 elets, la çampe nazionalitarie di Més e di Més per Menorca, cui prins passâts di 6 a 4 deputâts e i seconts di 3 a 2, e i autonomiscj progressiscj di Gent per Formentera (GxF), che a àn confermât il deputât che a vevin. Lis diestris spagnolistis a infuartissin, ancje se di pôc, la lôr presince tal Parlament des isulis, cui popolârs (PP) che a van jù di 20 a 16 elets, intant che Ciudadanos (C’s) al passe di 2 a 5 deputâts e Vox cun 3 parlamentârs al jentre pe prime volte te Assemblee des Baleârs. A completâ il cuadri a son i 3 elets dal moviment autonomist di centri diestre El Pi.
Ancje tes Asturiis i socialiscj (PSOE) a son il partît plui votât e a puartin i lôr parlamentârs di 14 a 20. Te aree progressiste a calin invezit sei Podemos Asturies, che di 9 al va jù a 4 elets, e IU-IAS, che e passe di 5 a 2 deputâts. A son in cressi, ancje se lontanis dal vê la maiorance, lis diestris spagnolistis cui popolârs (PP) che a pierdin un dai 11 deputâts che a vevin, cun Ciudadanos (C’s) che al passe di 3 a 5 elets e cun Vox che al jentre pe prime volte te Assemblee asturiane cun 2 parlamentârs. I regjonaliscj conservadôrs di Foro Asturias (FAC) a pierdin invezit un dai 3 elets cjapâts la volte stade.
Intal Aragon a jessi decisîfs pe formazion dal gnûf guvier a son i regjonaliscj conservadôrs dal Partido Aragonés (PAR), cundut che a pierdin 3 dai 6 deputâts che a vevin. Framieç des diestris spagnolistis, Ciudadanos (C’s) al fâs il salt indenant plui marcât e al passe di 5 a 12 elets, Vox al jentre in Parlament cun 3 deputâts, intant che i popolârs (PP) a van jù di 21 a 16 parlamentârs. Inte aree progressiste i socialiscj (PSOE) a cressin la lôr rapresentance di 18 a 24 elets, Podemos-Equo al cole jù di 14 a 5 deputâts, IU e conferme un parlamentâr e i nazionalitaris de Chunta Aragonesista a passin di 2 a 3 elets.
Al è po il câs particolâr de Val di Aran – regjon di lenghe ocitane cjapade dentri tal principât di Catalogne – che, cundut che no je une Comunitât par so cont, e gjolt di un bon nivel di autonomie. Lis elezions pal Consei gjenerâl di Aran a àn dât la maiorance ae coalizion Unitât di Aran, referente locâl dal partît socialist (PSOE / PSC), che e à sfiliât il 50% des preferencis e cjapât 9 dai 13 puescj di conseîr a disposizion. Chei altris 4 a son lâts al moviment conservadôr Convergjence Democratiche Aranese. Aran Amassa, la gnove organizazion politiche che e met adun lis diviersis animis de çampe ocitaniste e catalaniste e che si presentave pe prime volte, e à cjapât cuasi l’11% dai vôts ma, par vie dal sisteme eletorâl in vore, no à otignût nancje un elet.
Par chel che al rivuarde lis comunâls o segnalìn juste pôcs câs. A Barcelone la formazion plui votade e je stade la indipendentiste ERC (21,35% dai vôts) che e passe di 5 a 10 elets. A son 10 i conseîrs, un in mancul des elezions stadis, ancje pe coalizion progressiste Barcelona en Comù. I socialiscj (PSC-CP) a cressin di 4 a 8 conseîrs. Junts, formazion dal indipendentisim centrist, si ferme invezit a 5 elets. Lis diestris spagnolistis no rivin in dut nancje al 20% cun Ciudadanos che al oten 6 elets (a ‘nt veve 5), il PP 2 (a ‘nt veve 3) e Vox nissun. Simpri tai Paîs Catalans, ma a València e je pussibile une coalizion progressiste cui 10 conseîrs dai nazionalitaris ecologjiscj di Compromís (a ‘nt vevin 9) e cui 7 dal PSOE (a ‘nt vevin 5). A diestre il PP al va jù di 10 a 8 conseîrs, Ciudadanos al conferme i siei 6 rapresentants e Vox al jentre in consei cun 2 elets. In dutis lis trê capitâls de Comunitât Autonome Basche i nazionaliscj moderâts a son la fuarce plui votade. A Bilbo/Bilbao il PNV al cres e al rive cuasi ae maiorance assolude cun 14 conseîrs su 29, intant che i socialiscj (PSE-EE) a passin di 4 a 5 elets e i indipendentiscj di EH Bildu a mantegnin i 4 conseîrs che a vevin. A cressin di 2 a 3 i rapresentants de coalizion progressiste formade di Podemos-Ezker Anitza-Equo-Berdeak e i popolârs (PP), unics rapresentants de diestre spagnoliste, a van jù di 4 a 3 elets. A Donostia/San Sebastián plui de metât dai eletôrs e à votât par une fuarce nazionaliste, cul PNV che al passe di 9 a 10 conseîrs e EH Bildu che al manten i siei 6 elets. La capitâl de Gipuzkoa e je une des pocjis realtâts là che i socialiscj (PSE-EE) a calin passant di 7 a 5 conseîrs, intant che la aleance Podemos-Ezker Anitza-Equo-Berdeak e va sù di 2 a 3 elets e il PP al manten 3 conseîrs. A Gasteiz/Vitoria il PNV al passe di 5 a 7 conseîrs e al devente la fuarce plui votade de capitâl alavese. EH Bildu al manten 6 rapresentants e la aleance Podemos-Ezker Anitza-Equo-Berdeak e cres di 2 a 3 elets. Une part significative dal vôt spagnolist e passe dai popolârs (PP), che a van jù di 9 a 5 conseîrs, ai socialiscj (PSE-EE) che a cressin di 4 a 6 elets. A Iruñea/Pamplona la diestre regjonaliste e spagnoliste di Navarra Suma (NA+) e cjape il 40% dai vôts e si ferme a di un conseîr de maiorance assolude passant di 10 a 13 elets. A cressi in maniere marcade, ancje se a distance, a son ancje la çampe indipendentiste di EH Bildu, che e sfilie il 25% dai consens e che e passe di 5 a 7 elets, e il partît socialist (PSN-PSOE) che al va sù di 3 a 5 conseîrs. A pierdin ogni rapresentance in consei comunâl sei Podemos che Izquierda-Ezkerra, intant che i nazionaliscj moderâts di Geroa Bai a pierdin plui de metât des preferencis e a van jù di 5 a 2 conseîrs.
Font: El País, 27-28/05/19; Naiz:, 27-28/05/19; Jornalet, 28/05/19

Nessun commento: