A
son 161 lis personis che a àn otignût pe prime volte une
certificazion uficiâl in lenghe aragonese. Il procès che al à
permetût di svilupâ i percors di formazion e di esaminazion al jere
stât inviât de direzion gjenerâl di politiche linguistiche dal
guvier dal Aragon intal Novembar dal 2015. Aes primis provis di esam
uficiâls che si son tignudis tra Fevrâr e Març inte scuele uficiâl
di lenghis (EOI) di Zaragoza a àn partecipât uns cinccent
candidâts. Lis certificazions a interessin i nivei B2, B1 e A2 dal
cuadri comun european di riferiment pes lenghis.
A
son però ancje altris lis iniziativis inviadis par promovi e svilupâ
la lenghe proprie. Tra chestis o cjatìn la partence dal prin program
par aragonês su la television publiche regjonâl Aragón
TV. “Charrín Charrán” – chest
il non de trasmission – al fevelarà cuntun tai zovanîl di temis
sociâi e culturâi di interès comun, ma al proponarà ancje spazis
cui fruts di scuele e cartons animâts. A condusi la trasmission a
saran une youtuber
di tindince, un zovin laureât in dirit e un professôr universitari.
Tra lis novitâts o cjatìn po ancje il dizionari in rêt
“Aragonario” che al permet di voltâ dal castilian al aragonês e
che al ufrìs informazions gramaticâls su lis peraulis cirudis.
Font:
Ara.info,
17/04/19
e 02/05/19; Heraldo, 20/04/19
Nessun commento:
Posta un commento