04/03/19

Sardegne: sucès dal centri diestre talian intes regjonâls

Domenie ai 24 di Fevrâr si son tignudis in Sardegne lis elezions par rignuvî la Assemblee e il guvier de Regjon autonome. La partecipazion al vôt e je stade dal 53,75%. Cuntun sisteme eletorâl che e met al centri la figure dal president dal esecutîf, la vitorie e je lade a Christian Solinas e ae coalizion che e met adun lis fuarcis dal centri diestre statâl e regjonalist. Solinas – che al rive dal Partito Sardo d’Azione ma che al è il responsabil de aleance tra i regjonaliscj de isule e la Leghe (al pont di jessi stât elet senatôr propit cun chest partît) – al à otignût il 47,81% des preferencis intant che la coalizion che lu poiave e à cjapât il 51,76% e a varan duncje a disposizion la maiorance assolude te Assemblee regjonâl.
La coalizion di centri diestre e jere formade di dîs partîts ma dome la plui part dai vôts si à centrade su cinc di lôr, trê di dimension statâl (Leghe cul 11,34%, Forza Italia cul 8,07% e Fratelli d’Italia - AN cul 4,73%) e doi di implant regjonalist (Partito Sardo d’Azione cul 9,89% e Riformatori Sardi cul 5,02%). Daûr di cheste aleance si à plaçade la coalizion formade dal centri çampe statâl e regjonalist che e veve guviernât la isule te legjislature stade. Il so candidât – il sindic di Casteddu / Cagliari, Massimo Zedda – al à vût il 32,91% des preferencis a front dal 30,17% de aleance eletorâl che lu compagnave. Ta chest câs la coalizion e jere formade di vot partîts ma, fale il PD che al à otignût il 13,48% dai vôts, ducj chei altris a son restâts sot dal 4%. Tierç tra i siet candidâts presidents in corse al è rivât, cul 11,18% dai consens, Francesco Desogus che al rapresentave il MoVimento 5 Stelle (che come liste al à cjapât il 9,72% dai vôts). Simpri tun implant politic talian al jentrave il candidât Vindice Lecis, che al rapresentave une coalizion formade di Rifondazione Comunista, Comunisti Italiani e Sinistra Sarda e che nol à rivât a lâ plui innà dal 0,60%. La aree sovraniste e nazionalitarie sarde – che in totâl e à sfiliât il 8% dai consens – si presentave invezit dividude in trê. Achì il risultât miôr al è stât chel di Paolo Giovanni Maninchedda dal Partito dei Sardi che al à cjapât il 3,34% des preferencis cuntun 3,69% di vôts di liste. Di aree indipendentiste e progressiste al jere ancje Andrea Murgia che al è otignût l’1,82% dai consens in rapresentance dal progjet Autodeterminatzione (1,91%). Il candidât dal moviment sovranist conservadôr Sardi Liberi (2,14%), Mauro Pili, al à invezit cjapât il 2,30% des preferencis.
Font: RAS, 25-26/02/19

Nessun commento: