Ai
25 di Zenâr il relatôr speciâl de ONU su lis minorancis, Fernand
de Varennes, al à presentât lis sôs osservazions preliminârs su
la visite fate tal ream di Spagne par racuei informazions su la
situazion des minorancis nazionâls, linguistichis e religjosis che a
vivin ta chest stât. De Varennes al à segnalât la diference che si
à tra i dirits ricognossûts e lis pratichis concretis intal ûs des
lenghis couficiâls – o sei catalan, basc e galizian – massime
tai setôrs de justizie e de educazion e tai orghins statâi
decentrâts. Inmò plui grivie la situazion ta chês realtâts là
che lis lenghis propriis no àn ancjemò un statût di couficialitât
tant che l’asturian e il basc intune part de Navare. Il relatôr
speciâl de ONU al ricuarde ancje cemût che te Costituzion e ancje
te leç organiche dal 2000 cuintri de discriminazion no si vedi
nissun riferiment esplicit a chê linguistiche.
Cundut di cierts pas
indenant, e reste grivie la situazion des comunitâts gjitanis (tra
lis plui grandis de Europe) che a van dilunc a confrontâsi cun
prejudizis e discriminazions tal cjamp de educazion, des politichis
abitativis e dal lavôr. In cualchi câs si cjatisi denant fintremai
di situazions di segregazion cun scuelis dome par gjitans. Cheste
comunitât, intune cun migrants e minorancis religjosis, e reste la
vitime principâl de intolerance e dai discors di odi. Dut câs, dal
2017 indenant, ancje i catalans a son stâts simpri di plui al centri
di atacs di cheste fate. De Varennes al
invide duncje a meti in at sfuarçs plui fuarts par combati dutis
chestis espressions di intolerance e di xenofobie cun misuris sei di
prevenzion, sei di repression. Il relatôr
speciâl de ONU al à ancje condanât lis azions penâls metudis in
at cuintri de dissidence politiche no violente catalane. La relazion
conclusive e sarà presentade tal Març dal 2020 e fin al mês di
Setembar di chest an e je la pussibilitât di fâ rivâ al relatôr
gnovis segnalazions su chescj temis.
Font:
ONU,
25/01/19
Nessun commento:
Posta un commento