Ai
2 di Jugn si à vût l’insedament uficiâl dal gnûf guvier catalan
vuidât Quim Torra. Cu la jentrade in vore dal esecutîf e ven a colâ
la gjestion direte esercitade tai ultins siet mês dal guvier spagnûl
par mieç dal articul 155 de Costituzion che al à dispueât la
Catalogne di ogni forme di autoguvier. Lis autoritâts di Madrid a àn
cirût di pidimentâ fin sul ultin la nassite dal guvier catalan. Cun
di fat, dome il prin di Jugn il boletin uficiâl de Generalitat
al à publicât il decret cu la nomine dai membris dal esecutîf,
dopo che la publicazion dal prin decret firmât di Torra ancjemò ai
19 di Mai e jere stade blocade par vie che te liste dai membris dal
guvier si vevin ancje cuatri conseîrs che si cjatin in preson
preventive o in esili (Josep Rull, Jordi Turull, Lluís Puig e Toni
Comín). Torra, in acuardi cui partîts indipendentiscj che lu
sostegnin, al à duncje vût di sostituîju par vê il vie libare di
Madrid e par meti fin al 155.
La sospension dal autoguvier e je lade
indenant par 221 zornadis, un timp che il guvier di Madrid al à
profitât par licenziâ 259 funzionaris dal guvier catalan judicâts
incompatibii par resons ideologjichis, par sierâ 24 uficis o
organisims publics, par fâ colâ passe un centenâr di iniziativis
legjislativis e par taiâ 25 liniis di finanziament. Cun di plui, il
guvier spagnûl al à profitât dal control des istituzions catalanis
par blocâ il lavôr dal ufici legâl de Generalitat
e impedî cussì che lis leçs autonomichis impugnadis di Madrid
denant de cort costituzionâl a vessin cualsisei forme di difese.
Font:
VilaWeb,
01-02/06/18;
Naiz:, 01-02/06/18
Nessun commento:
Posta un commento