La
organizazion Collectiu Occitan,
che e ten adun lis realtâts politichis e associativis plui
rapresentativis de Ocitanie, e à inmaneât pai 6 di Jugn une gnove
mobilitazion par domandâ une television plui ocitane. Ancje in
considerazion de riforme dal setôr audiovisîf che e varès di rivâ
al esam dal Parlament francês chest Astât, si domande une presince
cuotidiane de lenghe proprie te programazion de television publiche
che cumò e ufrìs a pene 17 oris di emissions par ocitan intun an. A
son in program presidis in contemporanie denant dai uficis di France
3 a Tolosa / Toulouse, Montpelhièr /
Montpellier, Rodés / Rodez, Carcassona / Carcassonne e Nîmes.
A
mobilitâsi par inviâ un percors educatîf bilengâl al è invezit
un grup di gjenitôrs che i lôr fîs a frecuentin lis scuelis
publichis intai comuns di Ibòs e Aussun de Tarba / Ossun, intal
dipartiment dai Alts Pireneus. A front dal dinei dal ministeri pe
educazion francês di vignîur incuintri cumò a àn inviât une
racuelte di firmis in linie cun chê di slargjâ la poie pe lôr
iniziative.
Font:
Jornalet,
01-02/06/18
Nessun commento:
Posta un commento