A
man a man che si svicine la date dal vôt, il scuintri tra lis
autoritâts catalanis e chês spagnolis pal referendum su la
indipendence de Catalogne al va indenant a cressi. Ai 6 di Setembar,
dopo oris di ostruzionisim de bande dai partîts unioniscj, il
Parlament catalan al à fate buine (cul vôt a pro di JxS e CUP, la
astension di CSQP e la jessude de aule di C’s, PSC e PP) la leç
sul referendum che e fisse un regjim juridic ecezionâl che i
garantìs la prevalence su cualsisei altre leç che e puedi jentrâ
in conflit cun jê. La stesse sere, su la fonde di chê leç, il
guvier catalan al à firmât i decrets pe convocazion dal vôt
referendari il prin di Otubar, pal so davuelziment e pe nomine de
zonte eletorâl. La dì dopo il Parlament catalan al à aprovade
ancje la leç di transitorietât juridiche che, tal câs di vitorie
dal sì tal referendum, e à di sigurâ il passaç ordenât de
legalitât spagnole a chê catalane e fâ di Costituzion provisorie
pe Republiche catalane in spiete che i citadins a ratifichin chê
metude jù de Assemblee costituente.
La rispueste di Madrid e je
rivade daurman. Za ai 7 di Setembar il tribunâl costituzionâl al à
acetât i ricors presentâts dal guvier spagnûl cuintri de leç sul
referendum e dai trê decrets fats bogns dal esecutîf catalan la dì
prime e al à decretât la sospension cautelâr dai proviodiments. Il
tribunâl superiôr di justizie de Catalogne al à tacât a indagâ
su la fonde des denunciis presentadis dal procuradôr gjenerâl dal
stât cuintri di ducj i rapresentants dal guvier catalan e cuintri
dai membris pro referendum dal ufici di presidence dal Parlament
catalan pai reâts di disubidience, abûs e malversazion. Acuse,
cheste ultime, leade aes spesis sostignudis par une votazion judicade
fûr leç e che e compuarte la preson. Il procuradôr gjenerâl al à
po domandât aes procuris catalanis e a ducj i cuarps di polizie di
intervignî cuintri di ogni azion des autoritâts publichis o di
privâts par davuelzi o facilitâ il davuelzisi dal vôt referendari.
Di chê strade a son stâts difidâts i 947 sindics de Catalogne par
che no metin a disposizion i locâi par votâ e i diretôrs dai media
catalans par che no dedin spazi ai avîs istituzionâi e ai messaçs
de campagne referendarie. La guardia
civil e à za tacât a percuisî
impresis e mieçs di comunicazion par cirî materiâi pe
consultazion. Chel istès in mancul di 48 oris plui di 600 sindics a
àn metût a disposizion i locâi pal vôt e 26 mil citadins si son
notâts come volontaris pal referendum. A front de repression
menaçade dal stât centrâl e des primis azions intimidatoriis, i
partîts indipendentiscj a àn invidât ae disubidience e ae
mobilitazion continuade par garantî il dirit al vôt.
Font:
VilaWeb,
06-09/09/17;
El Punt Avui, 06-09/09/17;
Naiz:, 06-09/09/17; El Pais, 06-09/09/17
Nessun commento:
Posta un commento