Ai
5 di Otubar, une volte sierât il prin zîr di consultazions cun chei
altris partîts, i rapresentants dal Partît Nazionalist Basc (PNV) a
àn fat il pont su lis prospetivis pe formazion dal prossim guvier de
Comunitât Autonome Basche dopo des elezions dai 25 di Setembar che a
àn viodût propit il PNV tant che fuarce plui votade (37% dai vôts
e 28 elets) e clamade duncje a imbastî il gnûf esecutîf.
Sei
Elkarrekin-Podemos
(14,74%, 11) che il PP (10,1%, 9) no àn
escludût la pussibilitât di acuardis su ponts specifics, ma a àn
pandût la intenzion di restâ ae oposizion. Discors diferent par EH
Bildu (21,1%, 18) e PSE (12%, 9) che a àn lassade vierte la strade
par acuardis struturâi. Al è duncje su chescj doi partîts che si
centrarà la seconde part des consultazions, ancje se il PNV al à
sclarît che il percors al è plui facil cui socialiscj dal moment
che cun lôr si veve za vude une buine condivision politiche te
legjislature stade e che a son in vore pats di guvier in diviersis
aministrazions locâls. Ancje adun però, PNV e PSE no àn la
maiorance assolude intal Parlament de Comunitât. Cun di fat,
contrari dai prins risultâts, une conte plui precise dai vôts e à
gjavât un deputât al PNV par assegnâlu a EH Bildu. Il confront al
larà duncje indenant par cirî di formâ il gnûf guvier e par
assegnâ lis incarghis dentri dal prossim Parlament. Daûr des stimis
dal PNV il prossim esecutîf al varès di jentrâ in carghe te
seconde metât di Novembar.
Font:
Naiz:, 05/10/16
Nessun commento:
Posta un commento