Paîs Basc: i comuns bascofons a domandin servizis par euskara

Intant de audizion che si è tignude ai 19 di Novembar intal Parlament de Navare, i rapresentants des cutuardis aministrazions locâls che a formin la Comunitât dai Comuns di lenghe basche, là che il 72% dai 35 mil abitants al fevele par euskara, a àn denunciât che a 28 agns di distance de sô aprovazion cetantis des misuris previodudis de leç pe lenghe basche a restin dome su la cjarte.
I aministradôrs locâi a àn segnalât in particolâr la violazion de leç intal cjamp dai servizis sociosanitaris e di chei bibliotecaris. Tal prin câs, su 111 lavoradôrs de sanitât che a operin inte aree bascofone, a cognossi l’euskara a son a pene 31, cun dut ce che chest al compuarte ancje sul plan de assistence ai malâts; intai centris pe assistence des feminis, invezit, su 16 operadôrs no ‘nd è nancje un che al fevele par basc. Intal setôr bibliotecari, invezit, il guvier de Navare nol ten cont dal element linguistic ni pal profîl dai lavoradôrs e nancje par chel che al rivuarde libris e materiâi informatics. Sul front des bibliotechis, ducj i parlamentârs a àn mostrât di poiâ lis domandis dai aministradôrs locâi par che la leç su la lenghe basche e vegni metude in vore, fale chei de diestre navare e spagnoliste che a àn dome dite che a laran plui a fonts inte cuistion. Sul plan sanitari i sindics a àn cjatât dome il supuart dai nazionalitaris di Bildu e Aralar; invezit i partîts di çampe a àn dite che al è di fâ miôr ma a àn cirût di separâ la cualitât de assistence de cognossince de lenghe, e chei di diestre a àn declarât che si fâs za dut ce che si pues.

Font: Noticias de Navarra, 20/11/13