22/11/13

Paîs Catalans: sierade la tv publiche valenziane Canal 9

La television publiche Canal 9 e chei altris media dal grup de Radiotelevisió Valenciana (RTVV), inviade dal guvier de Comunitât Autonome Valenziane intal 1989, a son stâts sierâts. La decision e je stade comunicade ai 5 di Novembar dal guvier locâl vuidât di Alberto Fabra dal PP (diestre spagnoliste). Par agns, cemût che a denunciin rapresentants sindacâi e de oposizion, la radiotelevision publiche e jere stade doprade di cui che al jere al guvier sei par dâi un puest di vore ai amîs al pont di rivâ a di un organigram dal dut soredimensionât di cuasi 2 mil dipendents, sei tant che casse par paiâ plasês politics e par fâi propagande al guvier fintremai a passâ il miâr di milions di debit.
Subissât dai scandui e dai debits, il guvier di diestre al veve decidût di privatizâ tocs de radiotelevision publiche e di taiâ doi tierçs dai siei dipendents. Il tribunâl superiôr di justizie valenzian al à però declarât che i licenziaments no vevin mani e cussì Fabra al à decidût di sierâ Canal 9 e chei altris media publics. In buine sostance, a disin i opositôrs, il guvier dal PP prime al à doprât la radiotelevision publiche par fâsi propagande e par paiâ i siei amîs e cumò le siere mandant a cjase ancje chei professioniscj che a fasevin ben il lôr lavôr. La sierade di Canal 9, tra lis altris, e disprive la int dal Paîs Valenzian de informazion publiche par catalan, lenghe proprie di cheste comunitât (ancje se clamade cul non di “valenzian”).
Font: Naiz:, 07/11/13

Nessun commento: