Intal Paîs
Basc ancje la evoluzion dal mont de informazion e je leade aes
diviersis fasis dal conflit in at. Il cuotidian Gara al jere nassût
intal 1999 come rispueste popolâr ae fin di Egin, sierât par ordin
de magjistrature spagnole come part de strategjie repressive che e
veve chê di meti fûr leç ducj i sogjets leâts ae çampe
indipendentiste basche. Il prin di Jugn al è stât presentât al
public Naiz: un progjet informatîf multimediâl metût in pîts de
societât editore EKHE, la stesse di Gara. I obietîfs di chest gnûf
sogjet a son plui di un, cemût che si à spiegât intant de sô
presentazion intal Ensanche di Bilbo / Bilbao. Un di chescj al è
propit chel di rispuindi cuntun imprest gnûf aes sperancis e aes
prospetivis che si son vierzudis pal Paîs Basc dopo de decision di
ETA di meti fin ae lote armade.
Un altri obietîf al è chel di doprâ
pal miôr lis gnovis tecnologjiis e ducj i struments a disposizion de
informazion multimediâl, in maniere ancje di slargjâ la
partecipazion popolâr al progjet. Par finî, e je ancje la
necessitât di frontâ lis sfidis viertis de riduzion progressive des
venditis dai gjornâi su cjarte. Par chest, cul 4 di Jugn, sul sît
internet di Gara a son restadis dome lis informazions che si puedin
cjatâ inte edizion su cjarte, intant che i contignûts multimediâi
e i inzornaments minût par minût a àn cjatât acet dentri dal sît
di Naiz:. Gnovis e aprofondiments a saran tratâts cun materiâl
testuâl e audio, imagjins e video, e a saran a disposizion no dome
sul sît, ma daûr des carateristichis di ognidun ancje par twitter,
facebook, iPad, android e v.i. Cuatri lis sezions principâls: la
informazion basche e internazionâl compagnade di spazis di
aprofondiment; une sezion dedicade ai blogs e aes opinions di
comentadôrs e di esperts; une agjende siore di apontaments cuntun
spazi specific pe musiche; e une sezion metude adun dute cui
contribûts dai letôrs e di colaboradôrs esternis. Il dut in
maniere plurilengâl, cun parts par basc, par spagnûl e par francês.
Ce isal duncje Naiz:? Pal so diretôr Iñaki Altuna al è “un mieç
di comunicazion complet, cu lis virtûts di simpri dal gjornalisim e
la frescjece dai mûts gnûfs di comunicâ”.
Font:
Gara, 01 e 02/06/12; Naiz:, 01/06/12
Nessun commento:
Posta un commento