17/12/12

Stât spagnûl: e monte la proteste cuintri de riforme de scuele

Ai 4 di Dicembar il ministri spagnûl pe educazion, José Ignacio Wert (PP), al à presentât ai rapresentants des comunitâts autonomis il test de leç che e mude lis politichis scolastichis in vore intal stât. Tra i mudaments principâi si à: la creazion di une jerarchie tra lis materiis che e penalize lis lenghis propriis des comunitâts autonomis; la incressite dal podê decisionâl dal guvier centrâl sui contignûts dai programs scolastics a dam des autonomiis locâls; e une poie plui fuarte aes scuelis privadis e confessionâls. L’aspiet che plui di ducj al à jevât lis protestis des comunitâts autonomis al è l’oblic di garantî la presince dal spagnûl tant che lenghe veicolâr par ducj chei che lu domandin e, tal câs che te localitât di residence dai arlêfs chest model nol sedi disponibil intal sisteme public, se i gjenitôrs a sielzin di iscrivi i lôr fîs intai istitûts privâts i tocjarà aes autonomiis locâls paiâ i coscj. Se la leç e ves di jentrâ in vore cussì cemût che e je e larès a colpî massime il sisteme scolastic catalan che al previôt pardut l’ûs veicolâr de lenghe proprie de comunitât.
Che la justificazion doprade par sburtâ la leç, o sei miorâ la cualitât dal insegnament, e sedi dome une scuse al è dimostrât dal fat che la medie dai risultâts dai students catalans intai esams par spagnûl e je plui alte di chê dai students che a rivin di comunitâts là che il spagnûl al è lenghe veicolâr. A confermâ che lis resons che a son daûr de iniziative a son altris a jerin stadis lis stessis peraulis dal ministri Wert che al veve fevelât de volontât di “spagnolizâ i students catalans”. Cussì, se la iniziative dal guvier spagnûl e à jevât protestis ancje intal Paîs Basc e in Galizie, il proviodiment al incrès soredut il nivel dal scuintri za in at cu la Catalogne. La ministre catalane pe istruzion, Irene Rigau (CiU), e à rispuindût che il test fat indenant dal PP al è “la agression piês al catalan dal 1978 incà” o sei dai timps de ditature franchiste. Inte comunitât autonome catalane, fale la diestre spagnoliste (PP e Ciutadans), la proteste e cjape dentri ducj i partîts che cumò a lavorin par creâ un bloc unitari cuintri dal proviodiment. I eurodeputâts catalans di CiU, ERC, PSC e ICV a àn za domandât un incuintri urgjent cu la comissarie europeane pe educazion Androula Vassilioiu par denunciâ chel che al ven definît “un assedi ae lenghe catalane”. In Catalogne partîts tant che ERC e CUP e organizazions tant che Somescola a invidin za ae disubidience civîl, intant che lis primis manifestazions di proteste a son za stadis clamadis dongje intes placis catalanis, ma ancje ta chês valenzianis e des isulis Baleârs.
Font: RTVE, 04/12/12; Gara, 05/12/12; VilaWeb, 07/12/12

Nessun commento: