Paîs Basc: iniziativis pe Zornade internazionâl dal euskara

La Zornade internazionâl dal euskara, metude sù bielzà ai timps de Republiche spagnole e uficializade dal guvier de Comunitât Autonome Basche intal 1995, e je stade celebrade ancje chest an ai 3 di Dicembar cun cetantis manifestazions e iniziativis svilupadis sei a nivel istituzionâl che de bande di diviersis associazions. Pe ocasion e par celebrâ i 30 agns de leç di normalizazion de lenghe basche, il guvier de CAB al à inviât dai 24 di Novembar ai 3 di Dicembar une campagne, batiade Euskararen Aurpegiak (lis musis de lenghe basche), cun chê di mostrâ la grande pluralitât di sogjets che si movin cun, par e ator de lenghe basche. Un dai obietîfs al è chel di sburtâ l’ûs dal euskara: cun di fat se la cognossince de lenghe intai ultins vincj agns e je cressude di 181 mil unitâts inte Comunitât Autonome, l’ûs de lenghe nol è cressût cu la stesse proporzion. In dì di vuê, dome il 20% de popolazion al fevele par basc plui o compagn che par spagnûl e pôc mancul dal 9% lu dopre, ma mancul de lenghe di stât.
Te direzion di sburtâ l’ûs dal euskara e va ancje une altre iniziative dal guvier basc, simpri compagnade di une campagne che si è sierade ai 2 di Dicembar. Si trate di Klik Euskaraz, che e met a disposizion ducj i struments informatics che a permetin di scrivi, navigâ, lavorâ, zuiâ o doprâ in cualsisei maniere la lenghe basche. Ducj a son a disposizion sore nuie e cumò a son stâts racuelts intun sît internet unic ae direzion www.euskara.euskadi.net .

Font: Europa Press, 26/11/12; Euskara Euskadi Net, 30/11/12