01/03/12

Paîs Basc: une propueste gnove par sburtâ il procès di pâs

Intun incuintri public che si è tignût ai 26 di Fevrâr a Donostia, i rapresentants de çampe indipendentiste basche, adun cun Eusko Alkartasuna, Aralar, Alternatiba, LAB e altris sogjets dal front nazionalitari, a àn presentât une propueste che e vûl dâ un sburt al procès di pâs intal Paîs Basc. Il document, che al è stât clamât “Konponbide haizea dabil” (L’aiar de soluzion al sofle), al propon une schirie di intervents politics e juridics par svilupâ un procès democratic in stât di puartâ a di une pâs juste e definitive.
Par chest si ricognòs il dolôr e i patiments causâts des diviersis formis di violence che a àn segnât il Paîs Basc ta chescj agns e si propon la creazion di une comission che e rivi a recuperâ la veretât dai fats. Si domande di superâ la logjiche dai sconfits e dai vincidôrs, par che a vinci al sedi il paîs intîr. Par rivâ a di une riconciliazion vere, dongje dal ricognossiment mutuâl, e à però di finî ogni forme di violence, ancje chê statâl. Ta cheste suaze si à di rivâ ae liberazion dai presonîrs politics e ae pussibilitât pai esiliâts di tornâ. Intal document si torne a proponi un percors che al ledi daûr dai principis di Mitchell, za doprâts par superâ il conflit nordirlandês, e che al sedi viert a ducj i sogjets e a dutis lis ideis, ancje chê de autodeterminazion. La declarazion e je stade judicade positive de direzion dal PNV (Partido Nacionalista Vasco), ma no suficiente par superâ lis divisions che si àn sul svilup dal procès di pâs. De bande dai partîts spagnoliscj (PP e PSOE), invezit, i prins coments a son stâts negatîfs.
Propit popolârs e socialiscj, adun cun CiU (Convergència i Unió), PNV, UPN (Unión del Pueblo Navarro), CC (Coalinción Canaria), Foro Asturias, IU (Izquierda Unida), ICV-EUiA (Iniciativa per Catalunya Verds - Esquerra Unida i Alternativa) e CHA (Chunta Aragonesista), juste ai 21 di Fevrâr a vevin votât intal Parlament spagnûl une mozion unitarie che e domandave la disparizion complete di ETA, di incressi la poie dome pes vitimis de organizazion armade basche e di sburtâ un superament dal conflit dentri de suaze des leçs cumò in vore. Cheste cjolte di posizion e nas tant che rispueste a di une mozion fate indenant dal grup di estreme diestre UPyD (Unión Progreso y Democracia) là che si domandave di meti fûr leç Bildu e Amaiur, i doi sogjets politics nassûts de aleance des diviersis fuarcis de çampe nazionalitarie basche. In plui di Amaiur, cuintri des dôs mozions a àn cjapât posizion ancje ERC (Esquerra Republicana de Catalunya), BNG (Bloque Nacionalista Galego) e Geroa Bai. La mozion maioritarie, sburtade massime dal PP, no mostre nissun segnâl di spostament rispiet ae posizion dai partîts spagnoliscj in mert ae soluzion dal conflit basc.
Font: Gara, 22-27/02/12

Nessun commento: