Cuasi il 75% dai citadins che ai 18 di
Fevrâr a son lâts a votâ intal referendum par decidi sul ricognossiment dal rus
tant che seconde lenghe uficiâl de Letonie, al à dite di no. Cundut che il rus
al è la lenghe native di plui di un cuart dai 2 milions di abitants de
republiche baltiche e che chei che lu cognossin a son la maiorance, il vôt al à
confermât la volontât di mantignî il leton tant che uniche lenghe uficiâl.
No
si trate dome di un simbul di indipendence dal paîs – a àn spiegât i
rapresentants dal front dal no – se a vessin vinçût i sì, cui che cumò al
fevele dome par rus nol varès mai sintût la dibisugne di imparâ la lenghe
letone. Za intal Dicembar stât il Parlament de Letonie al veve boçât une
propueste di leç par rindi il rus seconde lenghe uficiâl dal stât. Dopo de
indipendence i rus che a son restâts in Letonie no àn vût la citadinance in
maniere automatiche, cui che nol è stât bon di dimostrâ di cognossi il leton al
à podût restâ intal paîs ma cu la citadinance russe o di une altre republiche
ex sovietiche o fintremai cence nissun ricognossiment. Si calcole che in Letonie
a sedin 300 mil lis personis che si cjatin ta cheste condizion, là che no àn
dirit di vôt e no gjoldin dai stes dirits dai citadins letons. Il referendum al
à tornât a jevâ il nivel de tension e il stes prin ministri, Valdis
Dombrovskis, al à dite che cumò a coventin dai pas indenant sul plan de
riconciliazion interne.
Font: RFE RL, 18/02/12;
The New York Times, 19/02/12
Nessun commento:
Posta un commento