Il guvier britanic al à decidût di boçâ il progjet par meti sù des juriis bilengâls in Gales. La decision e je stade criticade cun fuarce dal deputât dal Plaid Cymru, Hywel Williams. Il guvier di Londre al à motivât cheste sô decision cul fat che previodi la presince di personis bilengâls al varès alterât i mecanisims di sielte des juriis popolârs, ancje par vie dal numar limitât di personis cuntune vere capacitât bilengâl. Par Williams no je cussì par vie che i câs là che si varès vude la dibisugne di juriis bilengâls a saressin stâts pôcs e, duncje, nol sarès coventât un numar masse alt di personis cu lis carateristichis justis par podê fâ i zurâts. Tant plui che in dì di vuê intal Ream Unît e esist za une discriminante linguistiche inte sielte dai zurâts, ven a dî chê de cognossince dal inglês. Cun di plui, pal parlamentâr dal Plaid Cymru, la presince di juriis bilengâls e varès permetût di sparagnâ i bêçs des traduzions e al varès garantît une justizie miôr par vie de pussibilitât di vê un acès diret sei aes testemoneancis par galês che a chês par inglês.
Font: Plaid Cymru, 09/03/10
Nessun commento:
Posta un commento