Pal secont an di file i cors estîfs a imersion che a permetin a cuasi 27 mil students ogni an di perfezionâ lis lôr competencis linguistichis par gaelic irlandês a saran scancelâts. La gnove e je stade comunicade dal ministri irlandês pal Gaeltacht, Jack Chambers, che le à justificade cu la crisi sanitarie in at. I cors si davuelzin intal Gaeltacht, o sei lis areis là che l’irlandês al è inmò doprât in maniere significative, par permeti ai students di vivi par cualchi setemane tal mieç di comunitâts là che la lenghe e je vive e miorâ lis lôr competencis. La scancelazion dai cors ju disprive duncje di une ocasion impuartantone par cjapâ sù la lenghe e tal stes timp e da un colp dûr ae economie locâl. A son centenârs, di fat, lis fameis che a dan alozament ai students vie pal Astât e si stime che lis scuelis estivis a movin un zîr economic di 50 milions di euros ad an, come a dî la jentrade principâl par tantis comunitâts dal Gaeltacht che pe plui part a vivin une situazion di disvantaç economic. Il guvier di Dublin al dite che si è daûr a resonâ suntun sisteme di compensazions che però nol è stât ancjemò cuantificât.
28/05/21
Norvegje: non dal stât ancje tes lenghis minorizadis
Il Parlament norvegjês al à fate buine une leç che e ricognòs e i da uficialitât ai nons dal stât intes lenghis minorizadis feveladis intal paîs. Par infuartî il significât de decision la stesse propueste di leç presentade dal guvier e jere scrite par norvegjês, par sami (te sô varietât setentrionâl che e je la plui fevelade) e par kven. Cheste ultime e je une varietât finlandese fevelade tune aree setentrionâl de Norvegje de comunitât kven e che e je stade ricognossude come lenghe minoritarie tal 2005. Cui che al rivarà de Svezie, de Finlande o de Federazion Russe tune des areis de Norvegje là che a vivin comunitâts minorizadis si cjatarà i cartei cul non dal stât in dutis lis lenghis ricognossudis (a seconde de aree duncje, dongje di Norge, si podarà lei Vuoda, Nöörje, Norga o Norja): un at simbolic che però al vûl dâi uficialitât e dignitât compagne a chestis lenghis.
Font: The Barents Observer, 06/05/21
Corsiche: si fâs indenant il FLNC “Maghju 21”
Cuntune conference stampe clandestine che si è tignude ai 5 di Mai, a 45 agns di distance de nassite dal Front di Liberazion Nazionâl Cors (FLNC), un gnûf grup armât al à comunicât la sô creazion. Intal 2014 la part principâl dal Front e veve dismetût lis armis e, subite dopo, il rest dal moviment armât al veve inviât un fermait il fûc par lassâ ae politiche il protagonisim inte lote nazionâl. Cheste smilitarizazion dal conflit cors no à puartât però a nissun pas significatîf dal guvier francês in direzion di une soluzion politiche. Militants dai diviers grups dal Front a àn duncje decidût di formâ chel che al è stât batiât FLNC “Maghju 21” par contribuî a di une riorganizazion dal moviment patriotic che e meti al centri il dirit dal popul cors ae autodeterminazion. Intal document di presentazion dal grup no si lamente dome la inazion di Parîs ma ancje il fat che la maiorance nazionalitarie che e guvierne la isule (Pe a Corsica) si contentarès de gjestion aministrative de Coletivitât teritoriâl impen di continuâ a lotâ pal progjet nazionâl. Il gnûf grup armât al segnale ancje il pericul rapresentât dai grups finanziaris che a son daûr a espropriâ la isule ae sô int e des mafiis che si fasin ogni dì plui agressivis.
Corsiche: cun Setembar si inviin lis primis scuelis imersivis
Cul mês di Setembar si inviaran lis primis dôs scuelis imersivis in lenghe corse. Il progjet al jere za stât anticipât di cualchi timp ma e mancjave inmò la sigurece su la pussibilitât di partî cul prossim an scolastic. La gnove e je stade confermade tune conference stampe che si è tignude sul principi di Mai. La associazion Scola Corsa e à fat savê che si tacarà cun dôs scuelis de infanzie a Biguglia e a Bastia, là che a saran ativis la sezion pai plui piçui e chê mezane. A Biguglia, là che i locâi a son stâts metûts a disposizion de aministrazion comunâl, si varan disevot puescj e si àn za cuindis iscrits. A Bastia a son invezit ancjemò dai detais tecnics di viodi ma, chel istès, lis primis iscrizions a son za rivadis. Lis scuelis parificadis come chestis a àn un periodi di prove (par solit di trê agns) par viodi che a rispietin i programs ministeriâi e dutis lis regulis domandadis ai istitûts scolastics. Par garantî une scuele laiche e vierte a ducj, Scola Corsa e inviarà diviersis iniziativis par tirâ sù fonts, compagn di ce che si fâs ancje ta chês altris scuelis imersivis parificadis che a operin intal stât francês.
11/05/21
Gales: al è di 200 milions l’impat economic de tv par galês S4C
Cuâl isal l’impat economic de television publiche galese S4C? Une ricercje che e cjape in esam dodis mês a cjaval tra 2019 e 2020 e fevele di une cifre che e sfilie i 200 milions di sterlinis. Plui tal specific si fevele di une spese direte di 96,7 milions par paiis, servizis e bens di consum, di une spese indirete di 800 mil sterlinis par fits e di un zîr di indot leât a chestis spesis di 99,9 milions. La plui part di chestis risorsis, o sei passe 141 milions, e reste in Gales. Sul plan dal lavôr la television in lenghe galese e da di vore a 101 dipendents e a 56 lavoradôrs autonoms cuntun indot di passe 2.300 personis.
Font: BusinessLive Wales, 27/04/21
Paîs Basc: Gara e paie i “debits” di Egin e si salve de sierade
Vie pal mês di Avrîl il cuotidian basc Gara, cence nissune poie istituzionâl e cul jutori de int, al à rivât a completâ il paiament dai 3 milions di euros di debit “ereditâts” di Egin. Intal 1998, inte suaze de sô ofensive cuintri de çampe indipendentiste basche acusade di jessi leade a ETA, il judiç Batasar Garzón al veve ordenât di sierâ Egin, il cuotidian di riferiment pe part nazionalitarie de societât basche, e di arestâ i siei dirigjents.
Galizie: il model scolastic al infuartìs il disecuilibri linguistic
Ai 27 di Avrîl a son stâts presentâts i risultâts di un progjet di verifiche des competencis linguistichis puartât indenant de Real Academia Galega che al à interessât i students de 4e ESO, o sei la ultime classe des secondariis obligatoriis. Daûr dal studi al ven fûr che ae fin des secondariis, i students che a rivin di un contest familiâr o teritoriâl che al à il galizian di prime lenghe a paronin te stesse maniere castilian e galizian. Divierse la situazion pai fantats che a rivin di fameis o areis, in primis chês urbanis, là che il castilian al fâs di paron: tal 35% dai câs a àn une competence par galizian cetant plui basse di chê te lenghe dal stât. Un altri element che al pese su la competence linguistiche al è il gjenar di scuele che si frecuente, ta chês publichis di fat la paronance dal galizian e je sigurade plui dispès che no ta chês privadis. Pai autôrs de ricercje, impen di garantî une competence compagne tes dôs lenghis, il model linguistic doprât in dì di vuê tal sisteme educatîf galizian al infuartìs il disecuilibri che al esist jenfri castilian e galizian.
Font: Real Academia Galega, 27/04/21
Europe: solidarietât al HDP di çampe e nazionalitaris
Il Grup Unificât de Çampe Europeane (GUE UEL) e chel dai Verts – Aleance Libare Europeane (Greens - EFA) a àn domandât cun fuarce aes istituzions comunitariis di intervignî par condizionâ ogni rapuart cu la Turchie al rispiet dai oblics internazionâi sul plan dai dirits civîi e di chei umans, e a àn manifestât la lôr solidarietât al Partît Democratic dai Popui (HDP), moviment che al racuei une part significative dai vôts de comunitât curde e dai progressiscj turcs. Une posizion similâr e je rivade ancje dal grup de Aleance Progressiste dai Socialiscj e dai Democratics dal Parlament European. Ai 26 di Avrîl, di fat, si à viert a Ankara un procès penâl cuintri di 108 curdis che tal 2014 a vevin manifestât in solidarietât cui lôr conazionâi impegnâts a difindi la citât di Kobanê dal assedi dal Stât Islamic.
Irlande: cubie cinese e oten i modui pe citadinance par gaelic
A partî dai 26 di Avrîl la modulistiche par domandâ li citadinance irlandese e je disponibile ancje te lenghe nazionâl. Un tant al è il risultât di une bataie puartade indenant dal professôr Fangzhe Qiu e de sô femine Lijing Peng, doi citadins cinês che a vivin in Irlande di une disine di agns. Intal Setembar dal 2020 i doi a vevin inviât il percors di naturalizazion ma in Març ur jere stât domandât di tornâ a fâ domande però par inglês. Cun di fat, i doi, che a fevelin ben ancje par gaelic irlandês, a vevin presentât la domande ta cheste lenghe. A front dal paradòs di un stât che nol garantìs il dirit di doprâ la lenghe proprie di chê tiere, i doi a àn segnalât la cuistion al ministeri in cuistion, a diviers parlamentârs e al comissari pe lenghe. Cheste azion e à permetût di comedâ la situazion e cumò la modulistiche par domandâ la citadinance irlandese e je disponibile ancje par gaelic.
Font: RTÈ, 26/04/21
Paîs Catalans: propuestis par cressi l’ûs de lenghe te Rêt
La direzion gjenerâl pe politiche linguistiche dal guvier catalan e à dât fûr un decalic di azions par saborâ l’ûs de lenghe proprie tal setôr digjitâl daûr dal slogan «Som digitals i ho sem en català». Si trate di dîs azions concretis che a puedin favorî la presince dal catalan intun cjamp dominât di pocjis lenghis maioritariis. Se la azion plui fuarte e reste di creâ e di fâ ûs di contignûts par catalan, a son ancje altris lis robis di podê fâ. Par esempli doprâ lis versions par catalan par navigâ su la Rêt ancje cuant che no je la lenghe di vierzidure dal sît, doprâ cheste lenghe par cirî sui motôrs di ricercje in maniere di rindile plui visibile tai algoritmis doprâts, o ancje doprâ la version catalane di Wikipedia (Viquipèdia) che, par altri, e je une des miôr par cualitât certificade dai contignûts.
Font: Generalitat de Catalunya, 26/04/21
Stât francês: ricors costituzionâl cuintri de leç Molac
Une sessantine di deputâts francês, pe plui part dal partît di guvier La République en Marche (LRM), e à presentât un ricors denant de cort costituzionâl cuintri de prime leç organiche su la valorizazion e la promozion des cussì clamadis “lenghis regjonâls” (cognossude come leç Molac) che e jere stade fate buine dal Parlament ai 8 di Avrîl. Cuintri dal parê dal guvier e, massime, dal ministri pe educazion Jean-Michel Blanquer, il test al jere passât a grande maiorance (247 vôts a pro e 76 cuintri) inte sô forme integrâl, o sei cun diviers pas indenant impuartants in particolâr sul front dal insegnament des lenghis propriis. Il ricors al à jevât cetantis protestis soredut framieç dai rapresentants politics e istituzionâi, e i operadôrs culturâi des comunitâts minorizadis. Pe riviste di inchieste La Lettre A il ricors, ancje se presentât dai deputâts a titul individuâl, al sarès stât saborât propit dal ministeri pe educazion. La riviste e fevele di «colp bas cuintri de democrazie» dal moment che al varès di jessi il guvier a sigurâ la difese de leç denant dal tribunâl costituzionâl cuintri dal atac rivât dal so stes di dentri. Dal sigûr al è alc dal dut straordenari che il ricors, pensât come strument di garanzie pes oposizions, al rivi di rapresentants de maiorance di guvier. A fâ pensâ al è ancje il fat che, contrari di altris câs, il president al vedi spietât fin sul ultin di promulgâ la leç lassant ai membris dal so partît dut il timp par presentâ il ricors.
Font: Le Figaro, 22/04/21; France Bleu, 23/04/21; Jornalet, 24 e 28/04/21
Galizie: manifestazion ai 17 di Mai pai dirits linguistics
La plateforme pe lenghe Queremos Galego e à clamât adun une manifestazion par rivendicâ il dirits a vivi ad in plen e in maniere normâl par galizian. La iniziative si davuelzarà ai 17 di Mai a Sant Jacum di Galizie in ocasion de Zornade de leterature galiziane. Cu la manifestazion si vûl ancje recuperâ la mobilitazion di place che, par fuarce di robis, zaromai di mês e veve vût di jessi fermade. La organizazion de iniziative e à dut câs di adatâsi aes limitazions in vore par vie de crisi sanitarie. In particolâr, par partecipâ, si varà di notâsi in maniere di podê distribuî i puescj disponibii e mantignî lis distancis di sigurece.
Font: Galicia Confidencial, 21/04/21
Aragon: aplicazion par fâ cognossi la leterature par aragonês
Ai 21 di Avrîl, inte suaze de Zornade dal Aragon, si à presentade la aplicazion LiteARAtura che si propon di slargjâ l’acès ae leterature in lenghe aragonese. La iniziative e nas de colaborazion jenfri la direzion pe politiche linguistiche dal guvier dal Aragon e une aziende informatiche. La aplicazion e met a disposizion dutis lis oparis par aragonês za disponibilis in formât digjitâl, lis biografiis di passe tresinte autôrs e un spazi di pueste pes cjasis editoris che a lavorin par fâ cognossi la leterature aragonese. L’archivi al sarà integrât cun gnovis oparis a man a man che a saran digjitalizadis e, tra chestis, ancje chês de colezion Isabel de Rodas che e cjape dentri tescj classics voltâts par aragonês. L’intervent dal guvier locâl al à permetût intai ultins agns di moltiplicâ lis iniziativis par meti a disposizion dai citadins materiâi e servizis linguistics par aragonês.
Font: Heraldo, 21/04/21
Bosgne: invît a discuti la separazion pacjifiche de federazion
Lis vôs suntun document confidenziâl presentât al Consei European che al previôt la implosion de Bosgne e la revision dai confins tra i stâts de ex Jugoslavie, a àn tornât a alçâ la tension framieç des trê comunitâts principâls che a formin cheste realtât, o sei bosgnacs, cravuats e serps. I rapresentants dai partîts di riferiment de Republika Srpska si son dâts adun par frontâ la cuistion e ae fin si son cjatâts in cunvigne tal domandâ in maniere formâl di discuti dal avignî dal paîs cui delegâts des formazions politichis de Federazion bosgnache cravuate. Su la taule a metin la propueste di une tratative che e permeti une separazion pacjifiche de Bosgne. Une strade che però no plâs ae cuintripart, cul rapresentant dal principâl partît bosgnac che al à fintremai declarât ae stampe di no podê escludi la pussibilitât di un gnûf conflit armât. Che a sedin o no jessudis pensadis par sviâ la atenzion di altris problemis, cemût che a stimin diviers osservadôrs internazionâi, chel istès a palesin une situazion di tension che invezit di cuietâsi e somee scjaldâsi cul passâ dal timp.
Font: Balkan Insight, 20/04/21
Irlande: servizi public intal Nord par voltâ par gaelic e scots
L’esecutîf nordirlandês al à inviât un servizi di traduzions par gaelic irlandês e pe varietât di scots fevelade tal Ulster. La ativitât, che si compagne a chê di revision di tescj, e je disponibile par ducj i dipartiments ministeriâi, lis aministrazions locâls, lis agjenziis e lis aziendis publichis. Si ocuparà duncje di voltâ ancje leçs, documents legâi e sanitaris. Il servizi al jere previodût intal pat di legjislature (New Decade, New Approach) fat bon dai partîts de Irlande dal Nord inmò tal Zenâr dal 2020. La gnove e à cjatât il bon acet de organizazion pe lenghe Conradh na Gaeilge che e à però segnalât cemût che la plui part dai impegns pal irlandês cjapâts cun chel acuardi a sedin ancjemò su la cjarte.
Font: BBC, 20/04/21
27/04/21
Paîs Basc: in 3 comuns progjet pilote pai dirits linguistics
Trê comuns che a partegnin aes diviersis areis aministrativis che al è dividût il Paîs Basc – ven a dî chel sot aministrazion francese (Ipar Euskal Herria), la Navare e la Comunitât Autonome Basche – a àn sotscrit une convenzion cu la organizazion Kontseilua par disvilupâ un progjet pilote intal cjamp dai dirits linguistics. Hendaia / Hendaye, Uharte / Uhart e Arrigorriaga si impegnin di fat a meti in vore tai lôr teritoris il Protocol pai dirits linguistics (presentât a Donostia tal 2016 e sotscrit di uns 120 realtâts associativis espression di passe 25 nazionalitâts minorizadis europeanis) daûr dal so adatament specific pes aministrazions comunâls. Zaromai di agns i trê comuns a son impegnâts intal disvilupâ politichis linguistichis a pro dal euskara e cun cheste convenzion a pontin a fâ un altri pas indenant par garantî ai lôr citadins la plene garanzie dai dirits linguistics. L’obietîf al è ancje chel di tirâsi daûr altris aministrazions locâls che, si ben che a àn aderît al protocol, no àn ancjemò tacât a metilu in vore.
Font: MediaBask, 14/04/21
Scozie: il SNP al propon di meti sù areis gaelichis ricognossudis
Il SNP al à manifestât la intenzion di invistî su la lenghe gaeliche inte prossime legjislature. In particolâr si ponte a lavorâ su trê liniis principâls, a partî di une riorganizazion des funzions e des struturis dal Bòrd na Gàidhlig, la agjenzie che e coordene la politiche linguistiche pal gaelic. La seconde linie di azion si centrarès invezit su la educazion cul sburtâ la nassite di gnovis scuelis a imersion ator pe Scozie e cul aumentâ i insegnants e i materiâi educatîfs par gaelic. Une tierce ipotesi di azion e je di creâ des areis gaelichis ricognossudis (Gàidhealtachd), sul stamp di chês che za a esistin in Irlande, là che il gaelic al sedi prime lenghe e al sedi disponibil in ducj i servizis pai citadins. Al è di dî però che si trate di declarazions fatis in plene campagne eletorâl e che, di plui bandis, si a metût in dubi la volontât di metilis pardabon in vore a elezions finidis.
Font: The Herald, 14/04/21
Scozie: pai sondaçs si varà un Parlament pro indipendence
Cul svicinâsi dai 6 di Mai, in Scozie e jentre tal vîf la campagne pes elezions che a varan di decidi la composizion dal Parlament nazionâl e puartâ ae formazion dal gnûf guvier. I sondaçs fats vie pal mês di Avrîl a son avonde dacuardi tal assegnâi al SNP une maiorance relative che e varès di puartâi un numar suficient di deputâts par guviernâ la Scozie ancje te prossime legjislature. Il Partît Nazionâl Scozês si cjate ben denant di chei altris massime tes proiezions pal vôt circoscrizionâl, intant che tal vôt regjonâl al pararès che une part dai siei eletôrs si spostin in part sui Verts – moviment aleât di guvier dal SNP e a pro de indipendence – e in part sul gnûf partît Alba, vuidât dal ex leader dal SNP Alex Salmond. La nassite di chest partît intal Fevrâr dal 2021 e ven cjalade cun interès propit par capî trop consens che al pues spostâ dal Partît Nazionâl Scozês. Pal moment i sondaçs a dan indicazions contrastantis tra cui che lu met fûr dal Parlament e cui che i assegne fintremai cinc elets che a podaressin meti a risi la maiorance dal SNP. Par chel che al rivuarde i partîts unioniscj, i scandais eletorâi a metin denant i Conservadôrs ancje se di pôc rispiet ai Laburiscj, cui Liberâi Democratics avonde indaûr. Par cumò, dut câs, nissun di lôr al menaçarès la maiorance dal front indipendentist.
Font: BBC, 13/04/21; Daily Record, 14/04/21
Cravuazie: minorance serbe inmò vitime di intolerance
Ai 13 di Avrîl il Consei Nazionâl Serp al à presentât il rapuart anuâl che al met adun i episodis di violence fisiche, intolerance, menacis, ofesis, discors di odi e revisionisim storic indreçâts cuintri de minorance serbe de Cravuazie. I câs denunciâts vie pal 2020 a son stâts 214 a front dai 400 dal 2019 e dai 381 dal 2018. Il dât al è però falsât dal fat che, par vie de pandemie, cetantis ativitâts no jerin pussibilis e duncje si à vude ancje une strente su lis ocasions – tant che lis partidis di balon – là che i atacs cuintri de comunitât serbe a jerin frecuents. Il president dal Consei, Milorad Pupovač, al à segnalât cemût che, cundut che la legjislazion cravuate e calcoli di reât i discors di odi, inte plui part dai câs cuant che a son indreçâts ai serps no ven metude in vore. Chel istès, al à zontât, si viodin ancje segnâi di riconciliazion tra lis dôs comunitâts, massime sul plan istituzionâl. Par esempli, a ocupâ la incarghe di prin ministri vicjari al è Boris Milosevič dal Partît Indipendent Democratic Serp (SDSS).
Font: Balkan Insight, 13/04/21
Paîs Basc: pas indenant pal euskara come lenghe di lavôr
L’esecutîf de Comunitât Autonome Basche al vûl che l’euskara al deventi lenghe di servizi e di lavôr in dute la aministrazion publiche. Par lâ ta cheste direzion a son stâts fats bogns i criteris pal ûs des lenghis uficiâls intal guvier basc. A son trê i obietîfs che si vûl rivâi cun cheste azion, ven a stâi: lâ indenant cu la normalizazion linguistiche trasformant la aministrazion publiche tun referent centrâl di chest procès, rispietâ i dirits linguistics dai citadins e favorî une comunicazion di cualitât. L’intindiment primari al è chel di garantî simpri la pussibilitât di doprâ la lenghe uficiâl che si à miôr – euskara o castilian – e, par fâlu, al covente infuartî l’ûs dal basc sei te comunicazion interne, sei ta chê cul public e cun chês altris aministrazions. In chest sens, ancje daûr de specifiche situazion sociolinguistiche dai teritoris, si varà di definî cuant che al è pussibil prontâ documents dome par euskara o ben bilengâi. Cun di plui, cun cheste operazion, si vûl ancje promovi une comunicazion di cualitât che e sedi direte, corete e comprensibile.
Font: EiTB, 13/04/21