Gales: al cres il numar di cui che al fevele par galês

Un scandai dal ufici nazionâl di statistiche al mostre une incressite de popolazion in stât di fevelâ par galês. In dì di vuê lis personis che a fevelin ta cheste lenghe a saressin 874.700 cuintri dai 726.600 di dîs agns indaûr, ven a dî il 29,3% de popolazion dal Gales, cuntun aument dal 3,5% rispiet al 2008. La provincie là che la lenghe e je plui fuarte e je chê dal Gwynedd, cun plui di trê cuarts dai residents che a fevelin par galês. Il dât al larès duncje a confuartâ lis politichis linguistichis puartadis indenant intai ultins agns. Il guvier galês dut câs al invide ae prudence dal moment che l’unic dât uficiâl al rivarà cul censiment dal 2021. I risultâts dal censiment dal 2011 a vevin invezit mostrât une colade significative tal numar des personis buinis di doprâ la lenghe proprie.

Font: BBC, 22/09/18

Irlande: proteste pal tai di servizis intal Gaeltacht

Lis Puestis Irlandesis (An Post) a àn inviât un plan di riorganizazion che al previôt di taiâ diviers dai siei uficis locâi. La organizazion pe lenghe Conradh na Gaeilge e à rispuindût cuntune letare vierte ae direzion de aziende publiche e al ministeri pes comunicazions là che e domande di evitâ di taiâ i uficis logâts intal Gaeltacht, o sei tes areis de isule là che la lenghe irlandese e je ancjemò doprade in maniere significative. La sierade dai uficis, in plui di meti a risi une serie di servizis linguistics sigurâts des puestis, e ridusarès inmò di plui lis infrastruturis disponibilis in areis che a son za disvantazadis e che a riscjaressin di pierdi altris residents cun efiets impuartants ancje su la salût de lenghe.

Font: CnaG, 05/09/18

Paîs Catalans: bataie sul catalan te aministrazion valenziane

La Intersindical Valenciana e à clamât dongje une manifestazion denant dal palaç di justizie di València par protestâ cuintri de sentence dal tribunâl superiôr di justizie che e boce undis dai vincjesiet articui dal decret sui ûs linguistics inte aministrazion publiche de Comunitât Autonome Valenziane. Sîs articui a son stâts anulâts par vie che il tribunâl nol à ricognossût la ecuivalence jenfri valenzian e catalan, chei altris invezit a son stâts boçâts parcè che, a parê dai judiçs, a varessin metût il valenzian intune posizion prevalente rispiet al castilian. Il sindacât al à za fat savê che al presentarà ricors al tribunâl suprem che, compagn dal tribunâl costituzionâl spagnûl, a àn za ricognossût in altris sentencis che valenzian e catalan no son lenghis diferentis ma dome nons diviers par clamâ la stesse lenghe.

Font: VilaWeb, 05/09/18

Paîs Catalans: novitâts pai cors di catalan dal CNL

Il Consorzi pe Normalizazion Linguistiche de Catalogne al à viert lis iscrizions pai cors autunâi di catalan. Tra lis novitâts di cheste butade si à la ufierte di modui di catalan di base sore nuie pai gnûfs residents che a son vignûts a stâ in Catalogne e la diminuzion dal numar di arlêfs par cors in maniere di miorâ la cualitât dal aprendiment. La ufierte e cjape dentri cors di ducj i nivei di podê frecuentâ intun dai 22 centri gjestîts dal Consorzi o ancje in linie. I cors che si son tignûts inte prime metât dal an a àn vût 43.520 iscrits, il 4,5% in plui dal an prime.

Font: Generalitat de Catalunya, 05/09/18

Ocitanie: publicât un tradutôr automatic francês - ocitan

Su la plateforme di codiç libar Apertium e je stade publicade la prime version dal tradutôr automatic dal francês al ocitan. Il lavôr, partît intal mês di Mai, al è stât finanziât cuntune borse di studi dal program “Google Summer of Code”. Si fonde suntun dizionari bilengâl di 27 mil lemis e al presente un nivel di erôr dal 10% su la traduzion di articui divulgatîf: nivel calcolât acetabil par publicâ une prime version vierte cumò al contribût dai utents. Su la plateforme a jerin za stâts publicâts intal 2006 i tradutôrs automatics ocitan – catalan e catalan – ocitan e intal 2008 chei ocitan – castilian e castilian – ocitan. Si trate di imprescj che a funzionin sei cul ocitan standard che cu la varietât aranese.

Font: Jornalet, 03/09/18

Moldove: a cressin lis tensions tra filorumens e filorùs

La situazion in Moldove e je simpri plui tirade, cul cressi des tensions tra la part de popolazion che e domande la unificazion de Republiche nassude de implosion de Union Sovietiche cu la Romanie e chê che invezit no vûl la anession e e cjale cun plui simpatie ae Federazion Russe. Il prin di Setembar miâr di personis si son dadis adun te capitâl Chisinau par domandâ la unificazion, intant che i partidants de indipendence a àn comunicât dome sul ultin la rinuncie a manifestâ tal stes puest. Juste une setemane prime, di fat, lis manifestazions des dôs fazions si vevin cjatadis inte stesse place e dome l’intervent de polizie al veve evitât che si rivàs al scuintri fisic tra i partidants dai doi grups. Il procès di unificazion cu la Romanie, se al ves di concretizâsi, al oblearès ancje la Union Europeane a confrontâsi cu la situazion de Transnistrie, regjon a maiorance russe che, si ben no ricognossude sul plan internazionâl, si guvierne di bessole come se e fos un stât indipendent. Juste ai 2 di Setembar lis autoritâts di chest teritori a àn celebrât i 28 agns de proclamazion de indipendence. La cussì clamade Republiche moldave dal Dniester, nassude tal 1990, e veve otignût la sô indipendence di fat intal 1992 dopo cuatri mês di conflit in gracie dal intervent massîf dal esercit rus. Inmò in dì di vuê la Transnistrie i da acet a 1.500 soldâts rus che a vegnin calcolâts di Mosche tant che fuarce di pâs.

Font: Balkan Insight, 02-03/09/18

Scozie: la Brexit e favorìs l’indipendentisim

Il procès di jessude dal Ream Unît de Union Europeane – la cussì clamade Brexit – al larès a favorî la disunion statâl. Al è ce che al ven fûr dai ultins sondaçs sul teme davuelts de agjenzie Deltapoll su comission dai grups “Our Future Our Choice” e “Better for Britain” che a sburtin par davuelzi un secont referendum su la jessude de Union. La Brexit, massime cul risi simpri plui concret di une roture cence acuardi, e sburte insù la voie di indipendence dai scozês che e rive cumò al 47%, in cressi dal 4% rispiet a cualchi timp indaûr, a front di un 43% a pro de union e di un 10% di malsigûrs. La situazion e somee fintremai plui penze in Irlande dal Nord là che il sondaç al mostre un 52% di citadins che al votarès a pro de riunificazion des sîs conteis dal Nord cu la Republiche di Irlande.

Font: The Scotsman, 02/09/18

Paîs Basc: proteste di Seaska par vê plui professôrs

I lavoradôrs di Seaska a àn tentât di ocupâ la scuele di formazion di Pau par protestâ cuintri de scjarsetât di professôrs. Seaska e je la organizazion di racuelte des scuelis in lenghe basche in vore te part setentrionâl dal Paîs Basc sot aministrazion francese. Intant de azion si àn vûts diviers moments di tension dopo che ai manifestants ur è stât impedît di jentrâ te sede de scuele. Ae fin une delegazion di lavoradôrs di Seaska e je stade ricevude de direzion dal istitût che si è impegnade a inmaneâ un gnûf confront cu lis istituzions centrâls par sblocâ la situazion. I membris de organizazion a domandin di vê altris 25 puescj di insegnant dal moment che cul gnûf an scolastic a varan 230 arlêfs in plui e a riscjin di no podê ufrî une educazion di cualitât. Il ministeri francês pe istruzion al à invezit autorizât un aument di dome 5 puescj e mieç. Lunis ai 3 di Setembar, in ocasion de partence dal gnûf an scolastic, gjenitôrs, insegnants e students des scuelis a imersion baschis a àn blocât lis lezions e a àn inmaneâts des manifestazions par riclamâ la atenzion su lis lôr domandis. La rêt Seaska e à fat savê che lis protestis a laran indenant ancje tes prossimis setemanis.

Font: EiTB, 31/08 e 03/09/18; MediaBask, 03/09/18

Scozie: clopadice la leç par inviâ percors educatîfs par gaelic

La gnove legjislazion scozese e ufrìs aes fameis il dirit di domandâ aes aministrazions locâls che a inviin percors educatîfs in lenghe gaeliche tes scuelis primariis dal lôr teritori, ancje fûr des areis là che cheste lenghe e je inmò fevelade in maniere significative. La normative, fate buine ancjemò tal 2016, e je jentrade in vore chest an. Ae prove dai fats però la leç e à mostrât la sô debolece par vie che, se lis fameis a àn il dirit di domandâ che l’insegnament al sedi par gaelic, lis aministrazions a àn la pussibilitât di poiâsi su diviers elements par dineâlu. Cussì lis primis domandis presentadis no son ladis a bon fin. In dì di vuê des 32 aministrazions teritoriâls scozesis mancul de metât a ufrissin percors educatîfs in lenghe gaeliche tai lôr istitûts primaris o secondaris. I students che ju frecuentin a son sù par jù 5.600.

Font: Tes Scotland, 31/08/18

Paîs Basc: euskara pai adults, gnove campagne in Navare

Il guvier e 35 aministrazions locâls de Navare si son dâts adun cu la rêt dai euskaltegis par promovi la gnove stagjon 2018-2019 dai centris di insegnament de lenghe basche pai adults. Pe seconde volte duncje i sogjets publics e privâts cjapâts dentri tal insegnament dal euskara framieç de popolazion adulte a promovin une campagne unitarie. La campagne e je presinte su internet e su lis rêts di comunicazion sociâl cun informazions sui euskaltegis atîfs e sui jutoris par cui che ju frecuente. Vie pal mês di Setembar al sarà in vore ancje un numar telefonic di pueste par ufrî dutis lis informazions in proposit. La campagne promozionâl e cjape dentri ancje i cuotidians e lis radios de Navare. Il teme de campagne di chest an al è “Eman like Euskarari / Dai un like ae lenghe basche”. Vie pal an 2017-2018 i iscrits ai euskaltegis a jerin stâts 5.931, il 7,5% in plui dal an prime.

Font: Diario de Navarra, 31/08/18

Paîs Catalans: inchieste sui ûs linguistics tal Paîs Valenzian

Daûr di une inchieste davuelte dal guvier de Comunitât Autonome Valenziane e de universitât di València l’88,3% de popolazion al declare di capî il catalan (te sô varietât valenziane) e il 54% di jessi in stât di fevelâlu cence problemis. Chei che però lu fevelin in maniere preferenziâl e continuative a son dome il 37%. Par chel che al rivuarde invezit l’acès ae produzions culturâls, il 19% al declare di frecuentâ ativitâts artistichis par catalan e il 10,7% di lâ a concierts di musiciscj che a cjantin ta cheste lenghe. Par chel che al rivuarde i media, il 7,4% al à miôr scoltâ programs radiofonics par catalan.

Font: Les Muntanyes, 29/08/18

Ocitanie: tentatîf in Setembar par un gnûf gjornâl par ocitan

In Setembar l’Ufici Public de Lenghe Ocitane (ÒPLO) al darà fûr un avîs par progjets par tornâ a lançâ un gjornâl par ocitan. A dîlu al è stât il vicepresident dal ent, Patric Roux, che al à confermât la volontât di sostignî un periodic in stât di clamâ dongje letôrs e abonâts. La declarazion e je rivade cualchi zornade dopo che e jere stade metude in licuidazion la societât cooperative Vistedit che di 23 agns e publicave il setemanâl in lenghe ocitane La Setmana e lis rivistis pai plui piçui Papagai e Plumalhon. La sierade di chestis publicazions e jere leade ancje ae decision dal Ufici di no finanziâ plui Vistedit cu la motivazion che il progjet nol jere sostignût dai letôrs. Tal moment de sierade La Setmana e veve 700 abonâts, Plumalhon 500 e Papagai 300.

Font: Jornalet, 23/08/18

Letonie: la russe Ždanoka escludude des elezions parlamentârs

La comission eletorâl centrâl de Letonie e à decidût di escludi Tatjana Ždanoka de liste dai candidâts pes elezions parlamentârs. Une des politichis plui cognossudis de minorance russe dal paîs, la Ždanoka e veve rinunciât al so puest di deputade europeane propit par podê cori tes elezions dal Parlament de Letonie. La sô esclusion e je stade motivade cul fat che e jere restade membri dal partît comunist ancje dopo dal 1991 cuant che e jere stade formalizade la indipendence de Letonie. Pes fuarcis di maiorance e saveve za che e sarès stade escludude, ma e varès decidût distès di presentâsi dome par dâi visibilitât ae opression che e vivarès la minorance russe de Letonie.

Font: LSM, 21/08/18

Sápmi: a risi l’orghin sorestatâl di politiche linguistiche

Il Sámi Giellagáldu – l’ent fondât intal 2013 par coordenâ i servizis e lis politichis linguistichis pes diviersis varietâts sami feveladis in Finlande, Norvegje e Svezie – al riscje di meti fin aes sôs ativitâts chest an che al ven par vie dal sotfinanziament. Cun di fat il ministeri des financis finlandês al à fat savê che tal 2019 al finanziarà l’ent cun mancul di 200 mil euros cundut che, dome par cuvierzi lis ativitâts davueltis in Finlande, si stime che a coventin almancul 370 mil euros. L’organisim al colabore ancje cul Parlament Sami de Finlande par difindi e par promovi la culture sami tai progjets di cooperazion internazionâl. Chel dal sotfinanziament al è un probleme che al tocje diviersis realtâts espression des comunitâts sami, comprendûts i Parlaments Sami de Norvegje e de Svezie.

Font: YLE, 21/08/18

Paîs Basc: passe 600 mil euros in Navare ai media par euskara

Il guvier de Navare al à assegnât sù par jù 630 mil euros pai mieçs di comunicazion che a doprin la lenghe basche. Si fevele di cuasi 305 mil euros pai periodics locâi, 180 mil pes radios, 118 mil pe stampe cuotidiane e 26 mil pai media digjitâi. I contribûts a son stâts dividûts tra 24 beneficiaris. Il plui grues al è stât assegnât ae fondazion Ttipi-Ttapa.

Font: La Vanguardia, 20/08/18

Norvegje: scuintri istituzionâl tra guvier centrâl e Finnmark

A deventin inmò plui tiradis lis relazions tra la regjon plui setentrionâl de Norvegje e il guvier centrâl di Oslo, dopo che la presidente dal Consei regjonâl dal Finnmark, Ragnhild Vassvik, e à refudât di incuintrâsi cu la ministre pai afârs regjonâi, Monica Mæland. Al centri dal contindi e je la decision dal esecutîf norvegjês di procedi cu la fusion dal Finnmark cu la regjon dal Troms. Il Parlament de Norvegje al à za votât a pro de misure, ma il Consei dal Finnmark al refude di acetâ la decision e al à inmaneât un referendum popolâr là che la plui part de popolazion si à mostrade cuintri de decision dal guvier centrâl. Il Finnmark al è part de Tiere dai Sami (Sápmi), al confine cu la Federazion Russe e cu la Finlande e al à duncje une lungje tradizion di rapuarts internazionâi. Cheste regjon i da acet al Parlament Sami de Norvegje e la plui part des monts e dai boscs di cheste regjon a son gjestîts in maniere unitarie propite dal Consei dal Finnmark e dal Parlament Sami. In plui di sami e di norvegjês, intal so teritori e vîf ancje une impuartante comunitât finlandese (Kven) ricognossude come minorance. Par dutis chestis resons – e à spiegât Ragnhild Vassvik – no si intint di fâ nissun pas indaûr su la autonomie dal Finnmark.

Font: The Barents Observer, 19/08/18

Serbie: al reste cjalt il teme des minorancis

Il teme des minorancis al va dilunc a movi la discussion politiche e lis tensions tra Serbie, Cossovo e Albanie. E reste in pîts, di fat, la cuistion de Zajednica, la Associazion dai Comuns Serps dal Cossovo, che il stampon dal so statût al varès vût di jessi pront ai 4 di Avost ma che ancjemò no si sa nuie di precîs in merit. Ta chestis zornadis il ministri pai forescj de Albanie, Ditmir Bushati, si è cjatât cuntune delegazion de minorance di lenghe albanese che e vîf in Serbie, te aree di Preševo / Presheva, e al à garantît l’impegn par che la lôr tutele e sedi almancul compagne di chê dai serps cossovans. Il president de Serbie, Aleksandar Vučić, al à invezit fat savê che ai 9 di Setembar al sarà in Cossovo e che ta chê ocasion al presentarà lis sôs propuestis par une soluzion dai contrascj tra i guviers di Pristina e Belgrât e pai problemis de minorance serbe dal Cossovo: temis che a saran al centri ancje di un incuintri tra lis parts che al varès di davuelzisi ai 7 di Setembar a Bruxelles.

Font: Balkan Insight, 17 e 24/08/18

Galizie: in 1.500 ai cjamps estîfs par galizian

A son stâts uns 1.500 i fruts e i fantacins tra i 9 e i 17 agns che a àn partecipât al program di promozion linguistiche svilupât dai 26 Lui ai 13 di Avost in cuindis cjamps estîfs inmaneâts de Comunitât Autonome de Galizie. Chest an il program si disvilupave su doi temis, chel de citadinance mondiâl declinade par galizian e chel des abilitâts di scolte e di interazion par miorâ lis capacitâts e la sigurece tal fevelâ in lenghe proprie.

Font: Lingua.gal, 14/08/18

Stât spagnûl: il basc “Handia” preselezionât pai Oscars

Il cine in lenghe basche “Handia” di Jon Garaño e Aitor Arregi al è stât preselezionât, intune cui films “Campeones” di Javier Freser e “Todos lo saben” di Asghar Farhadi, par rapresentâ il stât spagnûl inte novanteunesime edizion dai premis Oscar te categorie di “miôr cine in lenghe no inglese”. Cheste prime selezion e je stade fate framieç di 43 luncmetraçs. E je la seconde volte che un film par euskara al ven selezionât de academie spagnole dal cine pai Oscars. La prime volte al jere sucedût intal 2015 cun “Loreak”. L’an passât la sielte e jere colade su “Estiu 1993”, pelicule zirade di plante e fûr par catalan.

Font: EiTB, 14/08/18

Scozie: confermâts i fonts par formâ i insegnants gaelics

Il Bòrd na Gàidhlig, la agjenzie scozese pe lenghe gaeliche, al à confermât ancje par chest an i contribûts par sostignî cui che al frecuente i percors di formazion post diplome par insegnants in lenghe gaeliche pes scuelis primariis e secondariis o par chei professôrs za abilitâts che a vuelin passâ al insegnament par gaelic. L’an passât i contribûts, che a puedin rivâ a diviers miârs di sterlinis, a son lâts a 33 personis. La formazion di chescj gnûfs professôrs e cîr di dâ rispueste al cressi de domande che e rive des fameis scozesis par percors di insegnament in lenghe gaeliche.

Font: Bòrd na Gàidhlig, 10/08/18