Paîs Basc: ETA e à consegnât dutis lis sôs armis

Chê dai 8 di Avrîl e je une date che e jentre a plen dirit inte storie dal Paîs Basc. Cun di fat, ta chê zornade la comission internazionâl di verifiche e à consegnât aes autoritâts di polizie francese lis informazions sui arsenâi che la organizazion armade basche ETA e veve ancjemò ator par Ipar Euskal Herria, il Paîs Basc francês. Si trate di armis di fûc, munizionaments e esplosîfs platâts in vot sîts che a son stâts vuardeâts di cuasi dusinte volontaris di Bakegileak, i artesans de pâs, in spiete che a rivassin i agjents inviâts dal ministeri de difese par metilis in sigurece. Intant dal davuelzisi di cheste operazion, miârs di personis si son dadis adun a Baiona / Bayonne par compagnâ la azion dai artesans de pâs, rapresentants de societât civîl basche che si son metûts in zûc par sigurâ il procès di disarmament decidût in maniere unilaterâl di ETA.

Irlande: faliment dal sisteme dai plans linguistics

Il comissari pe lenghe irlandese, Rónán Ó Domhnaill, al à dât fûr un document là che al denuncie il faliment dal sisteme dai plans linguistics pe promozion dal gaelic. Che la situazion e sedi une vore serie si lu capìs ancje dal fat che, di cuant che e je stade metude sù cheste figure tal 2004, cheste e je a pene la seconde volte che e dopre il so podê di coment public su la situazion de normative linguistiche. Dopo di vê esaminât ducj i plans linguistics fats bogns o rignuvîts intal 2015 e intal 2016 des diviersis istituzions publichis de Republiche irlandese, il comissari al à dite a clâr che il sisteme in vore nol funzione e che par incressi i servizis publics par gaelic al covente un implant gnûf. Plui de metât dai plans fats bogns a mostrin pas indaûr inte tutele dal irlandês, intant che doi tierçs dai plans rignuvîts a mostrin une riduzion dai servizis par gaelic e dai impegns cjapâts par promovi la lenghe nazionâl. Par tacâ daurman a cambiâ cheste situazion, Rónán Ó Domhnaill al propon dai nivei di tutele standard par ducj i ents publics che a sedin indipendents dai plans linguistics e une politiche di assunzions che e garantissi pardut almancul un nivel minim di personâl bon di fevelâ par gaelic.

Font: An Coimisinéir Teanga, 04/04/17

Bulgarie: minorance turche rapresentade tal gnûf Parlament

Al sarà Boyko Borissov il gnûf prin ministri de Bulgarie, ae vuide di une coalizion formade dal partît di centri diestre GERB (Citadins pal Svilup European de Bulgarie) e de aleance ultranazionaliste dai Patriots Unîts (formade di Front Nazionâl pe Salvece de Bulgarie, VMRO e ATAKA). I doi moviments a puedin contâ su 122 dai 240 deputâts jessûts des elezions dai 26 di Març, là che GERB al à otignût il 33,4% dai vôts e i Patriots Unîts il 9,3%. La fuarce principâl di oposizion e je invezit rapresentade dal Partît Socialist che al à cjapât il 27,9% des preferencis, dopleant i consens rispiet al 2014. Intal Parlament a son po rapresentâts ancje il partît Volya dal imprenditôr Veselin Mareshki e il Moviment pai Dirits e pe Libertât che al rapresente il partît principâl de minorance turche dal paîs. Nol à passât invezit il soiâr par jentrâ te Assemblee chel altri partît leât ae comunitât turche, DOST, di plui bandis acusât di jessi il braç operatîf dal president turc Erdogan in Bulgarie.

Font: Balkan Insight, 04/04/17

Paîs Catalans: bloc judiziari pai fonts pal referendum

Il tribunâl costituzionâl spagnûl, in riunion straordenarie, al à acetât il ricors di incostituzionalitât fat indenant dal guvier di Madrid cuintri des vôs dal belanç de Catalogne che a fasin riferiment ae organizazion di un referendum su la indipendence. I judiçs a àn decidût di suspindi chestis vôs in maniere cautelâr par sîs mês in spiete di esaminâ il ricors in detai e decidi sul mert de cuistion. L’esecutîf spagnûl al à ancje domandât al costituzionâl di visâ il president Carles Puigdemont e chei altris membris dal guvier catalan che se a laran indenant cul percors sovranist a varan di frontâ un procès penâl. I doi partîts che a poin l’esecutîf indipendentist catalan – Junts pel Sí e CUP – a àn però za sclarît che il referendum si davuelzarà distès, cun o cence dal acuardi cu lis autoritâts statâls. Si trate cumò di capî se il guvier catalan al decidarà di doprâ chês vôs di belanç e disubidî al tribunâl, o pûr di poiâsi su altris risorsis par imbastî il vôt su la indipendence.

Font: Naiz:, 04/04/17; VilaWeb, 04/04/17

Romanie: universitâts ongjaresis sot atac

La normative che il guvier ongjarês vuidât di Viktor Orbán al è daûr imbastî par sierâ la Universitât de Europe Centrâl, leade a George Soros, e podarès vê un efiet negatîf ancje pes universitâts privadis finanziadis di Budapest in Romanie e che a permetin ogni an a passe doi mil students de comunitât magjare che e vîf in Transilvanie di completâ i studis inte lôr lenghe proprie. Cun di fat l’ex prin ministri rumen, Victor Ponta, al à dite che al presentarà in curt un progjet di leç che si ispire a chel dal guvier ongjarês par colpî lis universitâts che no jentrin intal sisteme di ricognossiment e di reciprocitât in vore a nivel european. Daûr di cheste definizion gjeneriche al è però un atac clâr ae Universitât Ongjarese Sapientia de Transilvanie e ae Universitât Cristiane Partium di Nagyvárad / Oradea, istitûts privâts finanziâts dal guvier di Budapest par ufrî une istruzion universitarie te lôr lenghe ai students de comunitât ongjarese de Romanie. La iniziative e vûl jessi une ritorsion cuintri des politichis nazionalistis di Orbán e di ducj chei che, framieç de minorance ongjarese de Romanie, i dan la lôr poie.

Font: Hungarian Free Press, 02/04/17

France: letare ai candidâts presidents su lis lenghis minorizadis

Ai 31 di Març lis organizazions leadis a ELEN – la rêt europeane pe avualiance des lenghis – a àn inviât ai candidâts pes elezions presidenziâls francesis une letare là che i domandin la lôr posizion in mert a sîs obietîfs judicâts prioritaris pe tutele e pe promozion des lenghis minorizadis. I prins doi ponts frontâts intal document a son la ratifiche de bande dal guvier francês dai documents europeans e internazionâi sui dirits des minorancis linguistichis e dai popui natîfs, e il svilup di une suaze normative e costituzionâl che e ricognossi chescj dirits e la pluralitât linguistiche e culturâl dal stât francês. Po dopo si fevele di cjoli in caric i istitûts scolastics parificâts che a doprin il sisteme a imersion intune lenghe minorizade, di garantî il servizi public radiotelevisîf intes lenghis propriis, di slargjâ l’ûs di chestis lenghis tes istituzions e la lôr couficialitât là che la societât locâl lu domande e, in fin, di imbastî regjons o istituzions teritoriâls che a rispietin lis comunitâts storichis dal stât francês. Tra ducj i candidâts, il document nol è stât mandât a Marine Le Pen (FN) par vie che no à mai platât la sô posizion contrarie a ducj chescj temis.

Font: Ouest France, 31/03/17

Europe: in Slesie la 15e assemblee gjenerâl de EFA

Tra i 30 di Març e il prin di Avrîl si è davuelt a Katowice, in Slesie, la diesime cuinte assemblee gjenerâl de Aleance Libare Europeane (EFA) che e met adun cuasi uns cincuante tra lis plui impuartantis organizazions politichis autonomistis o indipendentistis de Europe e che e conte ancje cinc europarlamentârs. Intant de assemblee si à fate buine une risoluzion che e domande aes istituzions polachis di ricognossi i slesians tant che minorance, di cjapâ misuris concretis pal decentrament dai podês e, in particolâr, pe autonomie de Slesie. Intant dai lavôrs si à frontât temis tant che la jessude dal Ream Unît de UE, la crisi dai dispatriâts, la sovranitât energjetiche e il svilup sostignibil par meti jù lis fondis di chel che al sarà il manifest politic de Aleance pes elezions europeanis dal 2019. La assemblee gjenerâl e à ancje fatis buinis lis domandis di adesion di altris trê moviments politics: Oljka (autonomiscj de Istrie slovene), Inseme (nazionaliscj cors) e Patrie Furlane (autonomiscj furlans).

Font: EFA, 31/03/17

Paîs Basc: ancje la Navare si zonte al protocol pes lenghis

Il guvier de Navare al à aderît al protocol gjenerâl di colaborazion su lis politichis linguistichis dal 2007 che al meteve za adun i esecutîfs de Comunitât Autonome Basche, de Catalogne, de Galizie e des Baleârs. A rapresentâlu sul plan operatîf al sarà Euskarabidea, l’istitût navarês de lenghe basche. L’acuardi al previôt di colaborâ par promovi l’ûs des lenghis propriis dentri des istituzions dal stât spagnûl e di chês europeanis, par svilupâ suazis comunis pal svilup des politichis linguistichis e di scambiâsi pratichis e informazions su lis azions di svilup e di promozion des lôr lenghis intai diviers cjamps de societât.

Font: Ultima Hora, 30/03/17

Europe: vie libare de CE ae iniziative pai dirits des minorancis

Ai 3 di Avrîl si à inviât il percors istituzionâl de iniziative citadine batiade “MinoritySafePack” che si propon di difindi i dirits des personis che a partegnin a comunitâts nazionâls e linguistichis minorizadis e di infuartî la diversitât linguistiche e culturâl europeane. Cun di fat, dopo che il tribunâl di justizie de Union Europeane al veve anulât la sô prime decision negative, la Comission Europeane e à vût di acetâ di regjistrâ la propueste e di inviâ il so percors istituzionâl che al previôt un an di timp par cjapâ sù un milion di firmis. Se si ves di rivâ a chest risultât lis istituzions comunitariis si cjataressin a vê di tignî cont, intes lôr azions politichis e legjislativis, des misuris domandadis de propueste. La iniziative e à par riferiment la FUEN, o sei la Union Federâl des Nazionalitâts Europeanis, che pe ocasion e à fat di coordenament par realtâts associativis e citadins di comunitâts minorizadis di Gjermanie, Austrie, Belgjiche, Paîs Bas, Danimarcje, Romanie e dal stât talian. Il nestri obietîf – al à comentât il president de FUEN, Loránt Vincze – nol è dome di racuei un milion di firmis, ma ancje di inviâ un dibatiment framieç de societât europeane su chescj temis. Un prin confront public su la propueste al è in program ai 3 di Mai intal Parlament european.

Font: FUEN, 29/03/17; La Vanguardia, 29/03/17; European Commission, 03/04/17

Scozie: il Parlament al vûl che si torni a votâ pe indipendence

Ai 28 di Març, cui vôts dal SNP e dai Verts, il Parlament scozês al à fate buine une mozion là che si domande al Parlament britanic là metude in vore de cussì clamade “sezion 30”, o sei il mecanisim che al permet ae Assemblee scozese di votâ su materiis che par solit a son risiervadis a Westminster, in maniere di podê inmaneâ un gnûf referendum su la indipendence. Otignude la poie dal Parlament, l’esecutîf scozês al à inviade domande formâl aes autoritâts britanichis par vê la autorizazion a imbastî la consultazion. La propueste fate indenant dal guvier di Edimburc e je chê di tornâ a votâ tra l’Autun dal 2018 e la Vierte dal 2019. La prime ministre inglese, Theresa May, e il segretari di stât pe Scozie, David Mundell, a àn però za dite che cumò nol è il moment par un altri vôt su la indipendence. In mancjance di une rispueste positive la prime ministre scozese Nicola Sturgeon e à fat savê che e tornarà in Parlament par presentâ lis alternativis pussibilis. Une e podarès jessi chê di une “vuerilie” parlamentâr. Cun di fat, se la cort supreme e à za sclarît che lis istituzions scozesis no puedin impedî il procès pe jessude dal Ream Unît de UE, a puedin però pidimentâlu e slungjâlu cun problemis no di pôc par Theresa May e pal so esecutîf.

Font: The Guardian, 28/03/17; BBC, 31/03/17

Cossovo: la Srpska Lista e torne in Parlament

La Srpska Lista, moviment di riferiment de comunitât serbe dal Cossovo, e à decidût di meti fin al boicotaç des istituzions cossovanis che e puartave indenant zaromai di sîs mês. La decision e je stade cjapade par sblocâ il percors par inviâ la Associazion dai Comuns Serps che si veve fermât dopo de lôr decision di bandonâ il Parlament di Pristina. La lôr partecipazion ai lavôrs de Assemblee ur permetarà ancje di pidimentâ la trasformazion des fuarcis di sigurece cossovanis intun esercit vêr e propri.

Font: Balkan Insight, 27/03/17

Irlande: muart Martin McGuinness, figure clâf dal procès di pâs

Ai 21 di Març, ae etât di 66 agns, al è muart Martin McGuinness, un dai personaçs clâf dal procès di pâs in Irlande dal Nord. Nassût a Doire / Derry di une famee catoliche nazionaliste cence leams direts cul moviment republican irlandês, a front dai abûs e des violencis metudis in at cuintri de popolazion nazionaliste dai unioniscj e po ancje dal esercit britanic inte seconde metât dai agns ’60 al jere jentrât intal IRA – l’Esercit Republican Irlandês – prime te sô rame Official e po ta chê Provisional. In curt al jere deventât un dai oms plui impuartants de organizazion, prime come comandant de brigade di Doire / Derry – forsit la plui letâl intal colpî lis trupis britanichis – po come responsabil de organizazion intal Nord e in fin tal diretîf nazionâl. Tra la fin dai agns ’80 e i ’90 McGuinness al jere deventât, intune cun Gerry Adams, un dai riferiments dal moviment republican irlandês ancje sul plan politic, rapresentât dal Sinn Féin. Incjariât di tratâ cu lis autoritâts britanichis, al è stât un dai protagoniscj dal procès di pâs che al à puartât intal 1998 ai cussì clamâts acuardis dal Vinars Sant (Good Friday Agreement). Une volte lassade la lote armade, cemût che i ven ricognossût ancje dai siei aversaris, al à rapresentât une figure centrâl inte costruzion des istituzions democratichis condividudis di unioniscj e republicans. Ta cheste suaze al è stât ancje prin ministri vicjari tal guvier de Irlande dal Nord, incarghe di dulà che si à dimetût sul principi di chest an.

Font: The Guardian, 21/03/17

Gales: 10 milions di prestit statâl par infuartî S4C

La segretarie britaniche pe culture, Karen Bradley, e à comunicât che il guvier al à decidût di imprestâ 10 milions di sterlinis ae television in lenghe galese S4C par finanziâ il spostament dal cuartîr gjenerâl de emitente a Caerfyrddin / Carmarthen, intant che par ridusi lis spesis gjenerâls si varà une condivision des tecnologjiis cu la sede di Caerdydd / Cardiff de BBC. Il guvier di Londre al metarà po 350 mil sterlinis par inzornâ la strumentazion in ûs inte television galese. In dì di vuê il grues dai finanziaments par S4C al rive dal paiament dal cjanul televisîf che i si zontin risorsis metudis dal guvier britanic.

Font: Cable.co.uk, 21/03/17

Serbie: presidenziâls, inmò in dubi il vôt dai serps dal Cossovo

Lis elezions presidenziâls in program in Serbie ai 2 di Avrîl a son daûr a scjaldâ il dibatiment politic ancje in Cossovo, là che il teme al è chel de partecipazion al vôt de minorance serbe che e vîf alì. Il prin ministri di Belgrât e candidât ae presidence, Aleksandar Vučić, al à fat savê che al à chê di visitâ il Cossovo intant de sô campagne eletorâl, dant par scontât che la minorance serbe e parteciparà al vôt compagn di ce che al jere sucedût tes elezions parlamentârs serbis dal 2016. La comission eletorâl cossovane e à fat savê di no vê nuie a ce fâ cun chel procès eletorâl, il guvier di Pristina par cumò al à decidût di no fâ declarazions, intant che i nazionaliscj albanês di Vetevendosje a àn acusât la Serbie di violâ la sovranitât dal Cossovo. Su la cuistion e je daûr a lavorâ la OSCE che l’an passât e veve za rivât a otignî un acuardi par permeti ai passe 100 mil serps dal Cossovo di votâ pal Parlament di Belgrât.

Font: Balkan Insight, 21/03/17

Paîs Basc: si slargje in Navare la aree linguistiche miste

Il procès al è inmò in vore, ma a son za un biel pôcs i Comuns de Navare che a àn domandât di jessi cjapâts dentri te cussì clamade “aree miste” dulà che si à acès a dute une serie di servizis par euskara. Daûr de leç su lenghe basche dal 1986 la Navare e je dividude in trê areis – chê bascofone, chê miste e chê no bascofone – là che te prime, almancul su la cjarte, ducj i servizis publics a son bilengâi e te ultime l’ûs dal euskara nol è garantît inniò. Jentrâ te aree miste, duncje, al permet di viodisi garantîts almancul un pôcs di dirits linguistics, par esempli tal cjamp de istruzion. Dopo agns di bloc totâl, la modifiche de leç su la lenghe basche metude in vore dal gnûf guvier nazionalitari progressist de Navare e à vierzût la puarte pal cambi di aree pûr che si vedi un vôt maioritari dai conseis comunâi. Cheste oportunitât e je stade cjapade za di uns trente Comuns che a rapresentin passe 33 mil citadins, là che o cjatìn ancje localitâts impuartantis tant che Tafalla e Zangoza / Sangüesa.

Font: Noticias de Navarra, 20/03/17

Sápmi: solidarietât cu la lote dai Lakota

Intun at di solidarietât internazionâl, il Parlament sami de Norvegje al à rivât a convinci KLP, il secont font pensionistic dal paîs, a gjavâ ducj i invistiments che al veve fat intes compagniis impegnadis te costruzion di un oleodot di 1.900 chilometris contestât dai ativiscj des comunitâts nativis americanis. La opare e varès di fat di scjavaçâ ancje lis tieris sacris de nazion Lakota menaçant lis aghis dal Missouri e par chest i ativiscj di cheste comunitât a son impegnâts intune lote dure cuintri de sô costruzion che ju à viodûts scuintrâsi ancje cu la vuardie nazionâl. Intune logjiche di solidarietât tra popui natîfs, lis organizazions sami de Norvegje, plui voltis impegnadis in bataiis pe difese de lôr tiere dai interès des multinazionâls, a àn inviât diviers azions par poiâ la lote dai Lakota. Ancje in gracie di cheste mobilitazion, a son za diviers i grups finanziaris e i istitûts bancjaris norvegjês che a vevin invistît ta chel progjet che si son gjavadis fûr.

Font: The Guardian, 17/03/17

Paîs Basc: ai 8 di Avrîl il disarmament totâl di ETA?

Dopo de fin definitive de lote armade tal 2014, la organizazion armade basche ETA e va dilunc a mantignî une part significative dal so arsenâl che pe plui part al è platât in sîts sparniçâts ator par Ipar Euskal Herria, il Paîs Basc francês. Dopo di diviers contats cu lis istituzions francesis par consegnâur lis armis, e je stade une rapresentance de societât civîl di Ipar Euskal Herria a fâsi indenant par facilitâ il disarmament. Un prin tentatîf metût in at ai 16 di Dicembar dal an passât, pôc lontan di Baiona / Bayonne, al à puartât al arest di cinc personis – un sindacalist, un agricultôr, un viticultôr e doi gjornaliscj – che a vevin chê di consegnâ aes autoritâts dîs cassis di armis. Invezit di discoragjâju, il mûr tirât sù des autoritâts francesis e i arescj a àn incressût la partecipazion direte de societât basche al percors par rivâ al disarmament totâl di ETA. Cussì la stampe francese e fevele di centenârs di citadins pronts a metisi in zûc in prime persone par consegnâ ce che al vanze dal arsenâl di ETA intune azion publiche che e podarès davuelzisi ai 8 di Avrîl.

Font: Le Monde, 17/03/17; Naiz:, 17/03/17

Irlande: leç pal gaelic tal Nord, propueste di CnaG

La organizazion Conradh na Gaeilge e à presentât ae societât e aes fuarcis politichis de Irlande dal Nord une propueste par svilupâ une leç organiche pe lenghe irlandese. Il document al è dividût in undis sezions che a frontin ognidune un aspiet specific des politichis linguistiche di meti in vore, dal ûs de lenghe tes aministrazions locâls ae toponomastiche, de presince dal irlandês te radiotelevision publiche ae istruzion gaeliche. Dongje des azions di inviâ, la organizazion e à fat ancje un calcul di trop che a costaressin. Al ven fûr cussì che la metude in vore di une leç di cheste fate e domandarès un invistiment complessîf di 9 milions di sterlinis tai prins cinc agns che i si zontarès une spese di sù par jù 2 milions ad an pes azions specifichis (cuntun totâl di uns 19 milions in cinc agns). Pal segretari gjenerâl di Conradh na Gaeilge, Julian de Spáinn, si trate di une propueste realistiche che e ven incuintri aes dibisugnis di fonde de comunitât di lenghe irlandese. Il president de organizazion, Niall Comer, al invide duncje i partîts che si son declarâts a pro di une leç organiche pal gaelic, e che vuê a ocupin 50 dai 90 puescj de Assemblee de Irlande dal Nord, a fâle lôr.

Font: CnaG, 15/03/17

Paîs Basc: presentade la gnove edizion de Korrika

Ai 15 di Març a Iruñea / Pamplona e je stade presentade la edizion numar vincj de Korrika, la corse inmaneade ogni doi agns de AEK (coordenament pe alfabetizazion e pe baschizazion) cun chê di cjapâ sù fonts pe promozion e pal insegnament dal euskara e par slargjâ te societât l’ûs di cheste lenghe. Chest an la manifestazion si inviarà ai 30 di Març di Otxandio par sierâsi ai 9 di Avrîl propite te capitâl de Navare dopo di vê scjavaçât dutis lis provinciis che a formin il Paîs Basc.

Font: Naiz:, 15/03/17

Gales: decidude la revision dai plans educatîfs par galês

Il guvier galês, par bocje dal ministri pe lenghe Alun Davies, al à comunicât che i darà al ex parlamentâr Aled Roberts la incarghe di revisionâ i plans pe educazion in lenghe galese svilupâts dai ents locâi dal Gales. Un tant al è stât decidût dopo che la comissarie pe lenghe e veve segnalât che diviersis autoritâts locâls no vevin rispietât la leç intal metiju jù. Ancje la Cymdeithas yr Iaith Gymraeg, di agns in prime linie te bataie pai dirits linguistics, e veve denunciât che cetancj ents locâi no vevin tignût cont, par esempli, de volontât dal guvier galês di rivâ intal 2021 a di un percors di formazion unic che al superàs la division cumò in vore tra insegnament a imersion e insegnament dal galês come lenghe seconde.

Font: Cymdeithas , 14/03/17