Irlande: muart Martin McGuinness, figure clâf dal procès di pâs

Ai 21 di Març, ae etât di 66 agns, al è muart Martin McGuinness, un dai personaçs clâf dal procès di pâs in Irlande dal Nord. Nassût a Doire / Derry di une famee catoliche nazionaliste cence leams direts cul moviment republican irlandês, a front dai abûs e des violencis metudis in at cuintri de popolazion nazionaliste dai unioniscj e po ancje dal esercit britanic inte seconde metât dai agns ’60 al jere jentrât intal IRA – l’Esercit Republican Irlandês – prime te sô rame Official e po ta chê Provisional. In curt al jere deventât un dai oms plui impuartants de organizazion, prime come comandant de brigade di Doire / Derry – forsit la plui letâl intal colpî lis trupis britanichis – po come responsabil de organizazion intal Nord e in fin tal diretîf nazionâl. Tra la fin dai agns ’80 e i ’90 McGuinness al jere deventât, intune cun Gerry Adams, un dai riferiments dal moviment republican irlandês ancje sul plan politic, rapresentât dal Sinn Féin. Incjariât di tratâ cu lis autoritâts britanichis, al è stât un dai protagoniscj dal procès di pâs che al à puartât intal 1998 ai cussì clamâts acuardis dal Vinars Sant (Good Friday Agreement). Une volte lassade la lote armade, cemût che i ven ricognossût ancje dai siei aversaris, al à rapresentât une figure centrâl inte costruzion des istituzions democratichis condividudis di unioniscj e republicans. Ta cheste suaze al è stât ancje prin ministri vicjari tal guvier de Irlande dal Nord, incarghe di dulà che si à dimetût sul principi di chest an.

Font: The Guardian, 21/03/17

Gales: 10 milions di prestit statâl par infuartî S4C

La segretarie britaniche pe culture, Karen Bradley, e à comunicât che il guvier al à decidût di imprestâ 10 milions di sterlinis ae television in lenghe galese S4C par finanziâ il spostament dal cuartîr gjenerâl de emitente a Caerfyrddin / Carmarthen, intant che par ridusi lis spesis gjenerâls si varà une condivision des tecnologjiis cu la sede di Caerdydd / Cardiff de BBC. Il guvier di Londre al metarà po 350 mil sterlinis par inzornâ la strumentazion in ûs inte television galese. In dì di vuê il grues dai finanziaments par S4C al rive dal paiament dal cjanul televisîf che i si zontin risorsis metudis dal guvier britanic.

Font: Cable.co.uk, 21/03/17

Serbie: presidenziâls, inmò in dubi il vôt dai serps dal Cossovo

Lis elezions presidenziâls in program in Serbie ai 2 di Avrîl a son daûr a scjaldâ il dibatiment politic ancje in Cossovo, là che il teme al è chel de partecipazion al vôt de minorance serbe che e vîf alì. Il prin ministri di Belgrât e candidât ae presidence, Aleksandar Vučić, al à fat savê che al à chê di visitâ il Cossovo intant de sô campagne eletorâl, dant par scontât che la minorance serbe e parteciparà al vôt compagn di ce che al jere sucedût tes elezions parlamentârs serbis dal 2016. La comission eletorâl cossovane e à fat savê di no vê nuie a ce fâ cun chel procès eletorâl, il guvier di Pristina par cumò al à decidût di no fâ declarazions, intant che i nazionaliscj albanês di Vetevendosje a àn acusât la Serbie di violâ la sovranitât dal Cossovo. Su la cuistion e je daûr a lavorâ la OSCE che l’an passât e veve za rivât a otignî un acuardi par permeti ai passe 100 mil serps dal Cossovo di votâ pal Parlament di Belgrât.

Font: Balkan Insight, 21/03/17

Paîs Basc: si slargje in Navare la aree linguistiche miste

Il procès al è inmò in vore, ma a son za un biel pôcs i Comuns de Navare che a àn domandât di jessi cjapâts dentri te cussì clamade “aree miste” dulà che si à acès a dute une serie di servizis par euskara. Daûr de leç su lenghe basche dal 1986 la Navare e je dividude in trê areis – chê bascofone, chê miste e chê no bascofone – là che te prime, almancul su la cjarte, ducj i servizis publics a son bilengâi e te ultime l’ûs dal euskara nol è garantît inniò. Jentrâ te aree miste, duncje, al permet di viodisi garantîts almancul un pôcs di dirits linguistics, par esempli tal cjamp de istruzion. Dopo agns di bloc totâl, la modifiche de leç su la lenghe basche metude in vore dal gnûf guvier nazionalitari progressist de Navare e à vierzût la puarte pal cambi di aree pûr che si vedi un vôt maioritari dai conseis comunâi. Cheste oportunitât e je stade cjapade za di uns trente Comuns che a rapresentin passe 33 mil citadins, là che o cjatìn ancje localitâts impuartantis tant che Tafalla e Zangoza / Sangüesa.

Font: Noticias de Navarra, 20/03/17

Sápmi: solidarietât cu la lote dai Lakota

Intun at di solidarietât internazionâl, il Parlament sami de Norvegje al à rivât a convinci KLP, il secont font pensionistic dal paîs, a gjavâ ducj i invistiments che al veve fat intes compagniis impegnadis te costruzion di un oleodot di 1.900 chilometris contestât dai ativiscj des comunitâts nativis americanis. La opare e varès di fat di scjavaçâ ancje lis tieris sacris de nazion Lakota menaçant lis aghis dal Missouri e par chest i ativiscj di cheste comunitât a son impegnâts intune lote dure cuintri de sô costruzion che ju à viodûts scuintrâsi ancje cu la vuardie nazionâl. Intune logjiche di solidarietât tra popui natîfs, lis organizazions sami de Norvegje, plui voltis impegnadis in bataiis pe difese de lôr tiere dai interès des multinazionâls, a àn inviât diviers azions par poiâ la lote dai Lakota. Ancje in gracie di cheste mobilitazion, a son za diviers i grups finanziaris e i istitûts bancjaris norvegjês che a vevin invistît ta chel progjet che si son gjavadis fûr.

Font: The Guardian, 17/03/17

Paîs Basc: ai 8 di Avrîl il disarmament totâl di ETA?

Dopo de fin definitive de lote armade tal 2014, la organizazion armade basche ETA e va dilunc a mantignî une part significative dal so arsenâl che pe plui part al è platât in sîts sparniçâts ator par Ipar Euskal Herria, il Paîs Basc francês. Dopo di diviers contats cu lis istituzions francesis par consegnâur lis armis, e je stade une rapresentance de societât civîl di Ipar Euskal Herria a fâsi indenant par facilitâ il disarmament. Un prin tentatîf metût in at ai 16 di Dicembar dal an passât, pôc lontan di Baiona / Bayonne, al à puartât al arest di cinc personis – un sindacalist, un agricultôr, un viticultôr e doi gjornaliscj – che a vevin chê di consegnâ aes autoritâts dîs cassis di armis. Invezit di discoragjâju, il mûr tirât sù des autoritâts francesis e i arescj a àn incressût la partecipazion direte de societât basche al percors par rivâ al disarmament totâl di ETA. Cussì la stampe francese e fevele di centenârs di citadins pronts a metisi in zûc in prime persone par consegnâ ce che al vanze dal arsenâl di ETA intune azion publiche che e podarès davuelzisi ai 8 di Avrîl.

Font: Le Monde, 17/03/17; Naiz:, 17/03/17

Irlande: leç pal gaelic tal Nord, propueste di CnaG

La organizazion Conradh na Gaeilge e à presentât ae societât e aes fuarcis politichis de Irlande dal Nord une propueste par svilupâ une leç organiche pe lenghe irlandese. Il document al è dividût in undis sezions che a frontin ognidune un aspiet specific des politichis linguistiche di meti in vore, dal ûs de lenghe tes aministrazions locâls ae toponomastiche, de presince dal irlandês te radiotelevision publiche ae istruzion gaeliche. Dongje des azions di inviâ, la organizazion e à fat ancje un calcul di trop che a costaressin. Al ven fûr cussì che la metude in vore di une leç di cheste fate e domandarès un invistiment complessîf di 9 milions di sterlinis tai prins cinc agns che i si zontarès une spese di sù par jù 2 milions ad an pes azions specifichis (cuntun totâl di uns 19 milions in cinc agns). Pal segretari gjenerâl di Conradh na Gaeilge, Julian de Spáinn, si trate di une propueste realistiche che e ven incuintri aes dibisugnis di fonde de comunitât di lenghe irlandese. Il president de organizazion, Niall Comer, al invide duncje i partîts che si son declarâts a pro di une leç organiche pal gaelic, e che vuê a ocupin 50 dai 90 puescj de Assemblee de Irlande dal Nord, a fâle lôr.

Font: CnaG, 15/03/17

Paîs Basc: presentade la gnove edizion de Korrika

Ai 15 di Març a Iruñea / Pamplona e je stade presentade la edizion numar vincj de Korrika, la corse inmaneade ogni doi agns de AEK (coordenament pe alfabetizazion e pe baschizazion) cun chê di cjapâ sù fonts pe promozion e pal insegnament dal euskara e par slargjâ te societât l’ûs di cheste lenghe. Chest an la manifestazion si inviarà ai 30 di Març di Otxandio par sierâsi ai 9 di Avrîl propite te capitâl de Navare dopo di vê scjavaçât dutis lis provinciis che a formin il Paîs Basc.

Font: Naiz:, 15/03/17

Gales: decidude la revision dai plans educatîfs par galês

Il guvier galês, par bocje dal ministri pe lenghe Alun Davies, al à comunicât che i darà al ex parlamentâr Aled Roberts la incarghe di revisionâ i plans pe educazion in lenghe galese svilupâts dai ents locâi dal Gales. Un tant al è stât decidût dopo che la comissarie pe lenghe e veve segnalât che diviersis autoritâts locâls no vevin rispietât la leç intal metiju jù. Ancje la Cymdeithas yr Iaith Gymraeg, di agns in prime linie te bataie pai dirits linguistics, e veve denunciât che cetancj ents locâi no vevin tignût cont, par esempli, de volontât dal guvier galês di rivâ intal 2021 a di un percors di formazion unic che al superàs la division cumò in vore tra insegnament a imersion e insegnament dal galês come lenghe seconde.

Font: Cymdeithas , 14/03/17

Paîs Catalans: decidude la inabilitazion par Mas, Ortega e Rigau

Ai 13 di Març il tribunâl superiôr di justizie de Catalogne al à fat cognossi la sentence dal procès cuintri dal ex president dal guvier catalan Artur Mas, de ex presidente vicjarie Joana Ortega e de ex assessore pe educazion Irene Rigau. I trê a jerin acusâts di vê disubidît al tribunâl costituzionâl spagnûl e di abûs aministratîf pal rûl vût intal inmaneâ la consultazion su la indipendence de Catalogne dai 9 di Novembar dal 2014. I judiçs a àn condanât Mas a doi agns di inabilitazion di ogni incarghe publiche, e Ortega e Rigau a un an e nûf mês. Si trate di penis plui bassis di chês domandadis dal public ministeri par vie che si à ricognossût dome la disubidience e no l’abûs aministratîf. I avocats de difese a àn za fat savê che a presentaran apel denant dal tribunâl suprem in maniere di vê po la strade vierte par rivâ ae cort di justizie europeane. Chê judiziarie e je une des stradis cjapadis des autoritâts spagnolis par fâi cuintri al percors di autodeterminazion catalan che, chel istès, nol mostre segnâi di fermâsi.

Font: El Punt Avui, 14/03/17

Galizie: si slargje la ufierte linguistiche tes scuelis dal Bierzo

Inte suaze de novesime edizion des Zornadis Martín Sarmiento dedicadis al patrimoni culturâl de minorance galiziane che e vîf inte comunitât di Castilie e León, si à fat savê che cul an 2017/2018 un altri istitût scolastic si zontarà al program di promozion de lenghe galiziane. Si trate di une iniziative che, in gracie di un acuardi cul guvier de Galizie, e permet ai fruts che a vivin intes regjons dal Bierzo e de Sanabria di studiâ il e par galizian e di perfezionâ la lenghe cun viaçs di studi in Galizie. In dì di vuê a son passe un miâr i arlêfs des scuelis primariis e secondariis che a gjoldin di cheste pussibilitât. L’insegnament al è disponibil in 18 tra centris scolastics infantîi, primaris e secondaris. Cul prossim an scolastic si ur zontarà ancje la scuele primarie di Cubillos del Sil.

Font: Lingua.gal, 14/03/17

Ream Unît: cuarte opinion sul stât des minorancis nazionâls

Il Comitât consultîf dal Consei de Europe pe Convenzion cuadri pe protezion des minorancis nazionâls al à dade fûr la sô cuarte opinion su la metude in vore di chest acuardi tal Ream Unît. Tra i elements critics plui pençs segnalâts intal document si à la mancjance di une legjislazion in stât di garantî l’ûs e la promozion de lenghe irlandese tes sîs conteis de Irlande dal Nord cjapadis dentri tal stât britanic e par chest si invide il guvier di Londre a impegnâsi par creâ lis cundizions par garantî i dirits linguistics ancje ta cheste part dal Ream Unît. Si domande po aes autoritâts britanichis di tornâ indaûr su la decision di taiâ i fonts pe lenghe corniche. Il Comitât consultîf al sburte ancje par che si intervegni cun urgjence par fâi cuintri ae incressite dai prejudizis e dai discors che a favorissin l’odi etnic, e par garantî sîts pe soste dai grups di Rom o cjaminants che a àn ancjemò un stîl di vite nomadic.

Font: Council of Europe, 09/03/17

Cravuazie: in cressi la intolerance cuintri de minorance serbe

Ai 7 di Març il Consei Nazionâl Serp, che al rapresente la comunitât serbe de Cravuazie, al à dât fûr il so rapuart anuâl su la situazion che si cjate a vivi la minorance. Daûr dai dâts publicâts, vie pal 2016 i câs di incidents leâts ae intolerance etniche, discors publics violents, menacis o agressions cuintri di membris de comunitât serbe a son stâts 331, a front dai 189 segnalâts intal 2015 e dai 82 dal 2014. Plui in detai, rispiet al an prime i câs di agressions fisichis a son passâts di 9 a 16, intant che lis menacis a son passadis si 20 a 62. A favorî cheste clime no son dome i ambients politics plui nazionaliscj, ma ancje i mieçs di comunicazion, cun diviers câs di discors di odi etnic dâts fûr fintremai de radiotelevision di stât (HRT). La realtât e riscje però di jessi inmò piês dal moment che plui di cualchidun nol denuncie i abûs patîts par pôre di vê consecuencis ancjemò plui penzis. Il cuadri al ven confermât ancje dal rapuart su la Cravuazie dal Dipartiment di Stât dai Stâts Unîts che al marche la discriminazion sociâl e i episodis di violence cuintri des minorancis, a partî di serps e rom.

Font: Balkan Insight, 07/03/17

Paîs Basc: l’euskara al cres te sanitât, te scuele, su Internet

Intant di une audizion denant dal Parlament, il diretôr gjenerâl dal servizi sanitari de Comunitât Autonome Basche, José María Armentia, al à fat il pont su la metude in vore dal plan di normalizazion dal euskara dentri dal servizi. Tal 2016 cuasi il 34% dai lavoradôrs de sanitât a vevin un nivel di cognossince de lenghe basche adate al lôr puest di vore, a front dal 11,2% di dîs agns prime. La incressite progressive des competencis linguistichis e diven sei de jentrade di personâl gnûf che al à fat i siei studis par euskara, sei dai percors di formazion dai lavoradôrs che l’an passât a àn interessât il 10% dal organic.

Macedonie: crisi istituzionâl, partîts albanês cu la oposizion

E je plene crisi istituzionâl in Macedonie là che il president Gjorge Ivanov si refude di dâi la incarghe di formâ il gnûf guvier al leader de oposizion, il sociâl democratic Zoran Zaev, cundut che al gjolt de maiorance in Parlament in gracie de poie dai trê partîts de minorance albanese (Union Democratiche pe Integrazion, Besa e Aleance pai Albanês). Ivanov al dopre propit l’acuardi cui partîts di riferiment de comunitât albanese par refudâi la incarghe, dal moment che la disponibilitât di Zaev a acetâ i ponts di fonde dal lôr program – tant che la estension de couficialitât de lenghe albanese a dute la Macedonie – e ven considerade une menace ae unitât statâl. Denant dal refût di dâi la incarghe, Zaev al à acusât il president di tentâ un colp di stât. Ancje la Union Europeane, la OSCE e la NATO a àn domandât a Ivanov di rispietâ i principis democratics e di tornâ sui siei pas. A front di cheste crisi, diviers juriscj a sostegnin che il Parlament al à il podê di nomenâ un guvier cence abadâ al veto imponût dal president.

Font: Balkan Insight, 04 e 07/03/17

Romanie: propueste di leç cuintri dai autonomiscj magjârs

In Romanie il Senât al è clamât a discuti une propueste di leç che e previôt penis di 6 mês a 3 agns di preson par cui che al sfide l’ordin costituzionâl par mieç di ativitâts di stamp politic o di manifestazions. I ativiscj che tes ultimis setemanis a àn jemplâts lis placis des citâts plui impuartantis de Romanie par protestâ cuintri de depenalizazion di une serie di reâts leâts ae coruzion che il guvier al veve iniment di meti in vore, a àn tornât a mobilitâsi cuintri di chel che a calcolin un tentatîf par limitâ il dirit di espression. Il prin firmatari de propueste – il deputât sociâl democratic Todor Ciuhodaru – al à però spiegât che il proviodiment no si propon di limitâ i dirits dai ativiscj rumens, ma di colpî i militants de minorance ongjarese de Transilvanie che zaromai di agns a van dilunc a domandâ plui autonomie pes areis là che la comunitât magjare e je maioritarie (Székelyföld). La posizion ultranazionaliste di Ciuhodaru e à però metût in dificoltât il so stes partît che al à sotscrit un acuardi politic propit cu la Union Democratiche dai Magjârs de Romanie. Il puartevôs dal PSD, Adrian Dobre, al à vût duncje di intervignî in maniere uficiâl par dî che il partît nol condivît lis posizions di Ciuhodaru e che nol votarà la propueste di leç.

Font: Balkan Insight, 04/03/17

Irlande: nuie maiorance pai unioniscj te Assemblee dal Nord

Al è un risultât storic chel jessût des elezions anticipadis pe Assemblee nordirlandese che si son tignudis ai 2 di Març. Cun di fat, pe prime volte lis fuarcis unionistis no son plui maiorance. Il Democratic Unionist Party (DUP) al è lât jù al 28,1% des preferencis e al à otignût 28 deputâts, pierdint cussì ancje il podê di veto garantît aes fuarcis che a àn plui di 30 elets e che fin cumò i veve permetût di imponi la sô linie dentri de Assemblee ancje su temis che a gjoldevin di maiorancis alternativis. Il Sinn Féin, che al rapresente l’eletorât nazionalitari irlandês, cuntun salt indenant di cuasi il 4% al rive al 27,9% dai consens e a 27 deputâts.

Irlande: guvier dal Nord condanât pe sô inerzie sul gaelic

Ai 3 di Març il tribunâl superiôr di Béal Feirste / Belfast al à comunicât la sô decision su la cause inviade de organizazion Conradh na Gaeilge cuintri dal esecutîf de Irlande dal Nord par vie che nol veve fate buine la Strategjie pe lenghe irlandese 2015 – 2035 che e varès vût di regolâ lis misuris a pro dal gaelic. La cause si poiave sul fat che, cul boçâ chel proviodiment, l’esecutîf nordirlandês nol veve rispietât i impegns che si veve cjapât cui acuardis leâts al procès di pâs e al so program di guvier. Cheste sentence, al à declarât il segretari gjenerâl di Conradh na Gaeilge Julian de Spáinn, e sclarìs une volte par dutis che al è un dovê dal esecutîf svilupâ une strategjie pal svilup de lenghe e che al à di fâlu daurman cence altris ritarts.

Font: Conradh na Gaeilge, 03/03/17

Sardegne: e torne in Rai la programazion par sart

Di lunis ai 6 di Març su la radiotelevision publiche a son tornâts a tacâ i programs in lenghe sarde. Un tant al è stât pussibil in gracie dal acuardi anuâl tra la aministrazion regjonâl sarde e la sede locâl de Rai che al previôt 144 oris di programazion radiofoniche in limba su lis 344 totâls garantidis de radiotelevision publiche ae Sardegne. La assessore regjonâl pe culture, Claudia Firino, e spieghe però che si trate dome di un pont di partence dal moment che l’esecutîf nol è par nuie content di cemût che la lenghe sarde e ven tratade a nivel statâl, là che no je stade nancje calcolade intal moment che si à metude jù la leç di riforme de Rai.

Font: IteNovas, 02/03/17

Paîs Catalans: cubiis linguistichis ancje tes Corts valenzianis

Deputâts di ducj i grups politics e dipendents dal Parlament dal Paîs Valenzian (Corts) a àn aderît al program di volontariât linguistic coordenât de organizazion Escola Valenciana che al met dongje une persone che za e parone la lenghe catalane (te sô varietât valenziane) e une che e à gust di imparâle par judâle par mieç di conversazions di une ore la setemane par almancul dîs setemanis. La iniziative, che l’an passât e veve cjapât dentri dome i parlamentârs, chest an si à slargjade pe prime volte ancje al personâl des Corts là che si àn formadis bielzà vincjecinc cubiis. Dopo agns là che lis istituzions politichis valenzianis a vevin pidimentât la promozion de lenghe, cumò cheste iniziative e vûl dâ il bon esempli ai citadins par che “si gjavin la pôre di fevelâ par catalan”. Pal president di Escola Valenciana, Vicent Moreno, cheste rispueste positive che e rive dal Parlament e contribuìs ae difusion, ae coesion sociâl e ae normalitât de lenghe.

Font: 20 minutos, 01/03/17