16/03/17

Irlande: nuie maiorance pai unioniscj te Assemblee dal Nord

Al è un risultât storic chel jessût des elezions anticipadis pe Assemblee nordirlandese che si son tignudis ai 2 di Març. Cun di fat, pe prime volte lis fuarcis unionistis no son plui maiorance. Il Democratic Unionist Party (DUP) al è lât jù al 28,1% des preferencis e al à otignût 28 deputâts, pierdint cussì ancje il podê di veto garantît aes fuarcis che a àn plui di 30 elets e che fin cumò i veve permetût di imponi la sô linie dentri de Assemblee ancje su temis che a gjoldevin di maiorancis alternativis. Il Sinn Féin, che al rapresente l’eletorât nazionalitari irlandês, cuntun salt indenant di cuasi il 4% al rive al 27,9% dai consens e a 27 deputâts.
Cundut di une lizere flession intai vôts, i nazionaliscj moderâts irlandês dal Social Democratic and Labour Party (SDLP) cul 11,9% des preferencis a otegnin 12 deputâts e i passin denant ae seconde fuarce de aree unioniste – l’Ulster Unionist Party (UUP) – che cundut dal 12.9% dai vôts al à di contentâsi di 10 elets. Cul 9,1% dai vôts e 8 deputâts l’Alliance Party si conferme come cuinte fuarce politiche de Assemblee nordirlandese. Cul 2,3% dai vôts i Verts a cjapin invezit doi parlamentârs. A completâ il cuadri o vin un deputât parom pe Traditional Unionist Voice (2,6%) e pal moviment de çampe radicâl irlandese People before Profit Alliance (1,8%), e un elet indipendent. Cun cheste composizion de Assemblee e ven a colâ la preponderance de comunitât unioniste e, par podê meti in pîts cualsisei guvier, si scugnarà passâ pe acetazion di un rapuart di avualiance cu la comunitât nazionaliste che, adun cu lis fuarcis trasversâls ae dôs comunitâts, e jes infuartide di chestis elezions. Al è cumò di capî se il DUP al rivarà a fâ i pas che a coventin par formâ un guvier cul Sinn Féin. Se dentri di trê setemanis dal vôt no si rivarà a di un acuardi si varà di tornâ a votâ o, come ultime alternative, si varà la sospension des istituzions autonomis e si tornarà al guvier diret di Londre.
Font: BBC, 03-06/03/17; Irish Times, 03/03/17; Naiz:, 05/03/17

Nessun commento: