Paîs Basc: il PNV si conferme come prime fuarce de CAB

Tes elezions che si son tignudis ai 25 di Setembar inte Comunitât Autonome Basche, il Partît Nazionalist Basc (PNV) si conferme la fuarce plui votade cun passe il 37% des preferencis e 29 elets, 2 in plui di chei otignûts intal 2012. EH Bildu, espression de çampe indipendentiste basche, al manten il secont puest cul 21,1% dai vôts e 17 parlamentârs. Rispiet aes elezions stadis, la coalizion indipendentiste e à pierdût sei vôts che elets, ma e à rivât a restâ denant di Elkarrekin-Podemos che, a cjalâ diviers sondaçs, e riscjave di deventâ la seconde fuarce politiche de Comunitât. Chel istès, cul 14,74% e 11 elets, Elkarrekin-Podemos e je la novitât plui significative dal gnûf Parlament basc. Al è di notâ che dutis e trê chestis fuarcis a son a pro dal “dirit di decidi”, come a dî che plui dal 70% dai citadins bascs al à votât par moviments politics che a sostegnin il dirit ae autodeterminazion. I socialiscj (PSE-PSOE) invezit a van dilunc a pierdi teren: no rivin nancje al 12% des preferencis e a cjapin a pene 9 deputâts, 7 in mancul de volte stade. 9 deputâts ancje pal PP (un in mancul dal 2012) che al cjape il 10,1% dai vôts. Iñigo Urkullu, candidât president pal PNV, al vuidarà duncje par une altre legjislature la Comunitât Autonome Basche, al reste dome di capî se cuntun guvier di minorance o cuntune aleance di program cun cualchi altre fuarce.

Font: Naiz:, 25-26/09/16; El Pais, 25-26/09/16

Galizie: PP pe tierce volte di file al guvier de Comunitât

In Galizie, invezit, lis elezions dai 25 di Setembar a àn assegnât al PP il 47,6% dai vôts e 41 dai 75 deputâts elets. Alberto Núñez Feijóo si ricjate cussì a vuidâ pe tierce volte di file il guvier di cheste comunitât autonome. La diestre spagnoliste e cres la percentuâl dai vôts cjapâts, ma e manten il stes numar di elets che e veve otignût intal 2012. Daûr dal PP si placin En Marea, la coalizion che e met adun fuarcis nazionalitariis e de çampe radicâl (Podemos, Anova, Esquerda Unida), cun pôc mancul dal 20% des preferencis e 14 deputâts, e i socialiscj cul 17,88% dai vôts e 14 elets, 4 in mancul des elezions stadis. A sierâ il cuadri al è il partît di riferiment dal nazionalisim galizian, ven a dî il Bloque Nacionalista Galego (BNG), cul 8,36% dai vôts e 6 parlamentârs, un in mancul de ultime volte.

Font: Naiz:, 25-26/09/16; El Pais, 25-26/09/16

Montenegro: aleance eletorâl pai partîts de minorance albanese

Pe prime volte i trê partîts principâi de minorance albanese dal Montenegro a coraran adun intes elezions politichis cun chê di incressi la lôr presince tal Parlament e di vê plui fuarce te bataie par difindi i dirits nazionâi de lôr comunitât. Forca, Union dai Albanês e il Partît de Alternative Albanese a àn sotscrit une aleance che si propon di difindi e di promovi la lenghe e i simbui identitaris de lôr comunitât, di incressi la presince dal albanês intes scuelis e di favorî il decentrament e il svilup socioeconomic de minorance. Daûr dal censiment dal 2011, in Montenegro a vivin passe 30 mil albanês, pôc mancul dal 5% de popolazion totâl. Tes ultimis elezions i partîts di riferiment de minorance a vevin cjapât uns 12.500 vôts e elet doi deputâts. Cun cheste aleance a pontin duncje a otignî almancul trê parlamentârs e a pesâ di plui tai ecuilibris politics statâi. La coalizion eletorâl montenegrine e ven cumò proponude di esempli ancje par altris realtâts là che la rapresentance politiche albanese e je dividude tant che la Macedonie e la Serbie.

Font: Balkan Insight, 20/09/16

Paîs Catalans: tes Baleârs a tornin i fonts pe stampe par catalan

Il guvier des isulis Baleârs al à dât fûr un bant che al ponte a infuartî i spazis comunicatîfs par catalan. Cun cheste iniziative si metin a disposizion 175 mil euros pes ativitâts in lenghe catalane dentri de stampe locâl e di chê specializade. L’intindiment nol è dome chel di judâ chei gjornâi che a son lâts indenant a doprâ il catalan ancje dopo dal 2010, cuant che il guvier precedent al veve taiât i fonts pal ûs de lenghe catalane inte stampe, ma ancje di favorî gnûfs progjets di comunicazion par catalan.

Font: dBalears, 20/09/16

Paîs Basc: in Navare si sburte i adults a imparâ l’euskara

Cui 19 di Setembar il guvier de Navare al à inviât une campagne comunicative par sburtâ a imparâ la lenghe basche ancje cui che al à za completât il so percors scolastic. A cjaval tra il finâl di Setembar e il principi di Otubar, di fat, a son viertis lis iscrizions pai centris publics e privâts che a ufrissin cors di euskara par adults. La campagne, finanziade cun 50 mil euros, e cjape dentri cuotidians e periodics locâi, gjornâi digjitâi, messaçs radiofonics e spazis publicitaris sui traspuarts publics de Navare. Cheste iniziative si insuaze tal progjet plui grant dal guvier navarês di promovi la cognossince e l’ûs de lenghe proprie di cheste comunitât. Par sostignî invezit lis ativitâts diretis dai istitûts che a ufrissin cors di lenghe basche pai adults a son stâts za assegnâts 297 mil euros in Jugn e altris 100 mil a rivaran in Otubar.

Font: Tele Cinco, 19/09/16

Friûl: al torne Suns Europe, fûr il bant

Ancje chest an al torne Suns Europe, il festival des arts performativis in lenghe minoritarie, in program dai 29 di Novembar ai 3 di Dicembar in Friûl. La iniziative, che e ponte a stiçâ e a mostrâ la creativitât intes lenghis minorizadis de Europe, e cjape dentri leterature, cine ma soredut musiche. Propit par chel che si riferìs ae sezion musicâl, dongje de finâl che si tignarà a Udin ai 3 di Dicembar, e je in program ancje une semifinâl pe regjon alpine mediteranie centrâl de Europe che si davuelzarà ai 19 di Novembar in Ladinie (a Moena). Cui che al vûl partecipâ al cjate il bant e i modui par aderî sul sît internet www.sunseurope.com . La manifestazion, coordenade de cooperative Informazione Friulana – Radio Onde Furlane e sostignude de Agjenzie Regjonâl pe Lenghe Furlane, e gjolt dal patrocini dal Consei de Europe e de Rêt pe promozion de diversitât linguistiche (NPLD).

Font: Suns Europe, 14/09/16

Aragon: acuardi cu la Catalogne par promovi il catalan

Il guvier dal Aragon e chel de Catalogne a àn rignuvît e infuartît l’acuardi tra lis dôs comunitâts par promovi in maniere unitarie la lenghe catalane, massime te educazion. Te strisse orientâl dal Aragon, la cussì clamade Franja, si stime che a sedin almancul 40 mil personis che a àn il catalan come prime lenghe. Tra lis azions previodudis dal acuardi o cjatìn la formazion dai professôrs, la parificazion dai titui, il svilup di materiâi didatics e scambis linguistics.

Font: La Vanguardia, 13/09/16

Cornualie: circoscrizion eletorâl cul Devon, al cres il no

Inte suaze de riforme eletorâl che e je daûr a jessi svilupade intal Ream Unît a son in program ancje dai mudaments significatîfs intai confins des circoscrizions. La comission che e à la incarghe di definî la gnove gjeografie eletorâl e à cussì decidût di creâ une gnove circoscrizion miste tra Devon e Cornualie che no ten cont dai confins storics, culturâi e aministratîfs tra la contee inglese e la plui piçule tra lis nazions celtichis dal Ream Unît. Pe comission e je dome une cuistion di numars: nol è pussibil fâ stâ dentri dai confins de Cornualie cinc circoscrizions eletorâls de stesse dimension di chês programadis e duncje la cuinte si le fasarà cul meti dentri la part nordorientâl de Cornualie (cu lis citadinis di Lannstefan / Launceston e Bud / Bude) e chê nordocidentâl dal Devon (cul puart di Bideford), là che però i cornics a saran in minorance. Il Consei de Cornualie al à za manifestât la sô oposizion e si è fat indenant par coordenâ lis azions par fâi cuintri al progjet. Di là des resons culturâls, gjeografichis e politichis – al à dite il president dal Consei, John Pollard – al è un contrast evident ancje sul plan legâl tra il mudament des circoscrizions e il ricognossiment de Cornualie tant che minorance nazionâl. Dick Cole, segretari dal partît nazionalitari Mebyon Kernow, al à dite che la creazion di une circoscrizion miste e sarès un colp cence precedents ae integritât teritoriâl de nazion corniche e al à invidât a imbastî une campagne popolâr par impedî chest mudament. Intant diviersis realtâts associativis e citadins cornics, massime te aree interessade de gnove circoscrizion, a àn za anticipât la intenzion di meti in at azions diretis, tant che il bloc des stradis che a scjavacin il flum Tamar, confin storic jenfri Cornualie e Ingletiere.

Font: The Guardian, 13/09/16

Cravuazie: tes politichis 11 elets par minorancis e autonomiscj

Intes elezions politichis che si son tignudis ai 11 di Setembar in Cravuazie, la Union Democratiche Cravuate (HDZ) e je stade la fuarce politiche plui votade e la sô coalizion e à otignût plui dal 36% des preferencis e 61 elets. Cun dute probabilitât duncje al sarà il so president, Andrej Plenković, a cjapâ in man la incarghe di prin ministri.

Paîs Catalans: presentât il plan par svilupâ il catalan tal forest

Inte suaze de riunion anuâl dal Consei des comunitâts catalanis intal forest, la direzion pe politiche linguistiche dal guvier de Catalogne e à presentât un plan par judâ cui che al vûl imparâ il catalan ator pal mont. La iniziative no cjape dentri i cors universitaris che a son za al centri di une altre misure di intervent. Tra lis azions previodudis dal plan o cjatìn: la formazion continuade dai professôrs di catalan intal forest ancje cu la creazion di spazis dulà condividi e scambiâsi ideis, cognossincis, esperiencis e materiâi; svilupâ gnûfs cors di catalan in linie e miorâ la acessibilitât di chei za in vore; incressi la partecipazion dai catalans che a son a stâ tal forest intal volontariât pe lenghe.

Font: Generalitat de Catalunya, 12/09/16

Paîs Catalans: in 800 mil in place pe Diada

Si stime in 800 mil personis la partecipazion aes mobilitazions inmaneadis de Assemblea Nacional Catalana e dal Òmnium Cultural pai 11 di Setembar, in ocasion de fieste nazionâl catalane. Chest an la iniziative si è davuelte in cinc lûcs diviers, ognidun cuntun riferiment ai elements che a compagnin il procès indipendentist: a Barcelone daûr de peraule di ordin “libertât”, a Lleida pal “ecuilibri teritoriâl”, a Tarragona par “rêt infrastruturâl e progrès”, a Berga pe “culture” e a Salt par “solidarietât e diversitât”. Lis fonts di polizie a fevelin di uns 540 mil personis a Barcelone, intant che altris 260 mil personis a àn partecipât ae Diada ta chês altris cuatri localitâts. Cundut di numars che a restin une vore alts e che a palesin la voie di indipendence dai catalans, chest an la partecipazion e je stade plui basse rispiet ai trê agns stâts cuant che a lâ in place al jere stât plui di un milion di personis.

Font: VilaWeb, 11/09/16

Irlande: a coventin tutelis pe lenghe ancje sul puest di vore

La organizazion pe lenghe irlandese Conradh na Gaeilge e à domandât aes autoritâts statâls di mendâ la normative sul lavôr in maniere di garantî i dirits linguistics ancje sul puest di vore. A stiçâ cheste domande e je stade la vicende di Cormac Ó Bruic che si è licenziât dopo che i jere stât improibît di fevelâ par gaelic intal locâl là che al lavorave. Al è di no crodi – a disin i dirigjents de organizazion – che si improibissi a di un lavoradôr di fevelâ cui clients che a vuelin fâlu intune des lenghis uficiâls dal stât: no dome si va a violâ i dirits linguistics, ma si va fintremai a fâi un dam ae ativitât aziendâl. Par evitâ altris câs dal gjenar, Conradh na Gaeilge e invide duncje a meti in leç une garanzie esplicite pai dirits linguistics dai lavoradôrs.

Font: CnaG, 09/09/16

Paîs Basc: impedide la candidature a president di Otegi

La coalizion sovraniste basche EH Bildu e veve nomenât Arnaldo Otegi tant che candidât president (lehendakari) de Comunitât Autonome Basche pes elezions in program ai 25 di Setembar. Otegi al è jessût di preson intal Març di chest an dopo di vê scontade une sentence a sîs agns e mieç di presonie pe sô funzion di vuide intal procès di pâs unilaterâl inviât intal Paîs Basc: une sentence di stamp politic che e veve jevât no pôcs dubis te stesse cort costituzionâl spagnole e che e je ancjemò al esam de cort europeane pai dirits umans. Chel istès, la avocature gjenerâl dal stât e à domandât ae zonte eletorâl de Gipuzkoa, competente pal câs, di impedî la sô candidature. L’organisim di control lu à declarât “inelegjibil”: une decision che EH Bildu e à decidût di impugnâ. La coalizion sovraniste e à ancje fat savê che no proponarà un candidât president alternatîf rispiet a Otegi.

Font: Naiz:, 24/08/16; EFA, 25/08/16

Bosgne: supervisôrs internazionâi dividûts sul referendum serp

Il referendum che lis autoritâts de Republika Srpska, o sei la entitât aministrative de Bosgne a maiorance serbe, a vuelin tignî ai 25 di Setembar al divît ancje i stâts membris dal comitât internazionâl che al controle il rispiet dai acuardis di pâs. Cundut dai riclams dal guvier federâl e de plui part dai supervisôrs internazionâi, l’esecutîf de entitât serbe al vûl che i citadins di cheste part de Bosgne a disin la lôr su la decision di celebrâ tant che fieste nazionâi i 9 di Zenâr, o sei la date che tal 1992 e jere stade proclamade la Republika Srpska. La leç che e fissave cheste date e je stade però boçade de cort costituzionâl tant che discriminatorie e lis autoritâts federâls de Bosgne a calcolin duncje ancje il referendum un at fûr de leç. Il comitât internazionâl sui acuardis di pâs al varès vût di intervignî, ma si cjate dividût sul ce fâ cu la Federazion Russe che e poie i serps e diviers stâts ocidentâi che no vuelin il referendum. Altris invezit a varessin miôr lassâ fûr il comitât de cuistion dal moment che nol à il podê di fâ rispietâ lis sôs decisions: e je duncje la pôre che, che si disi di sì o di no, si larà a pierdi di credibilitât e a incressi di plui lis tensions dentri de federazion bosgnache.

Font: Balkan Insight, 23/08/16

Gales: cualchi vierzidure dal guvier su lis scuelis di paîs

Une vierzidure sul avignî des scuelis di paîs galesis, che a àn un pês impuartant tant che presidi de lenghe proprie e de identitât locâl, e je rivade de gnove segretarie pe educazion dal guvier galês, Kirsty Williams. Intant di un incuintri cui rapresentants de organizazion pe lenghe Cymdeithas yr Iaith Gymraeg, la Williams e à mostrât di volê imbastî une politiche gnove par chescj istitûts. Ancje se al è impussibil rivâ a evitâ dutis lis sieradis – e à dite – si vûl passâ di une logjiche là che la prioritât e jere taiâ i coscj cul sierâ lis scuelis a di une là che l’obietîf al è invezit chel di no sierâlis, magari viodint di sparagnâ par mieç di un sisteme di istitûts confederâts. Propuestis a rivin ancje dal teritori, cuntun progjet pilote che al ponte suntune gjestion a miezis tra aministrazion publiche e comunitât locâl par mieç di fondazions comunitariis che a deventin proprietariis dai edificis e a fitin po i spazis al ent public.

Font: Cymdeithas yr Iaith Gymraeg, 22/08/16

France: ricors alsazians e catalans sui nons des gnovis regjons

Lis propuestis dai nons pes gnovis regjons jessudis de riforme teritoriâl dal stât francês a jevin inmò protestis. I plui contestâts a son “Grand-Est” pe gnove entitât che e cjape dentri Alsazie, Lorene, Champagne e Ardenis, e “Ocitanie pirenaiche mediteranie” pe union jenfri Lenghedoc – Roussillon e Misdì – Pireneus. Al Consei di Stât, che dentri dal prin di Otubar al à di cjapâ la decision finâl, a son cussì rivâts i ricors fats indenant dal moviment Alsaciens Réunis che nol intint di rinunciâ al non e ai simbui storics de Alsazie e di un coletîf de Catalogne Nord che al vûl che il non de regjon al tegni cont des dôs identitâts che a formin chest teritori, chê ocitane ma ancje chê catalane. I prins a fondin il lôr ricors su la mancjade consultazion dai conseis dipartimentâi previodude de leç e su la violazion de Cjarte europeane des autonomiis locâls. Resons di procedure, in plui di chês storichis e culturâls, a son ancje daûr dal ricors dal coletîf de Catalogne Nord che al à ancje invidât i citadins a sostignî il non “Ocitanie – Paîs Catalan” cuntune manifestazion in program a Perpignan ai 10 di Setembar. Al è di dî che ancje une part dal moviment ocitan al è malcontent, par vie che si dopre il non di dute la nazion par clamâ dome une part dal so teritori.

Font: Agence Bretagne Presse, 21/08/16; Jornalet, 24/08/16

Aragon: cun Setembar aragonês e catalan tes primariis

In Setembar, cu la partence dal an scolastic 2016 – 2017, al jentrarà in vore intal Aragon il gnûf curriculum che al previôt la pussibilitât di doprâ l’aragonês e il catalan tant che lenghis veicolârs intes areis là che a son feveladis. La misure e interesse par cumò dome lis scuelis primariis. Otignût il vie libare dal servizi provinciâl pe educazion, i insegnants a podaran duncje doprâ chestis lenghis par insegnâ cualsisei materie. Ta cheste maniere dopo agns di presince dome intai spazis extracuricolârs, lis dôs lenghis propriis dal Aragon si svicinin al status che a àn inglês o francês intai centris scolastics bilengâi.

Font: Publico.es, 20/08/16

Paîs Catalans: passe un milion par insegnâ il catalan tal mont

Par mantignî lis catedris di catalan intes universitâts logadis fûr de aree linguistiche catalane vie pal an academic 2016-2017, la Generalitat (il guvier catalan) e à impegnât un milion e 31 mil euros. I fonts, gjestîts dal istitût Ramon Llull, a laran a 64 centris universitaris ator pal mont là che si insegne lenghe e leterature catalane. Tra di lôr o cjatìn lis universitâts di Harvard e Columbia tai Stâts Unîts, Oxford e Birmingham intal Ream Unît, Lipsie in Gjermanie e Vignesie in Italie. I contribûts a interessin però ancje centris universitaris in Argjentine, in Canadà, in France, in Irlande, te Republiche Ceche e intal stes stât spagnûl.

Font: La Vanguardia, 19/08/16

Paîs Catalans: indipendence utile pe lenghe ancje tal Nord

Une inchieste davuelte intal dipartiment francês dai Pireneus Orientâi e mostre che il catalan al va dilunc a pierdi teren. In dîs agns chei che lu capissin a son passâts dal 65% al 61% e chei che a son in stât di fevelâlu almancul un pôc a son lâts dal 37,1% al 35%. In dì di vuê dome un 1,3% al fevele la lenghe simpri e un 5,7% le dopre in maniere cuotidiane. Dentri des fameis il catalan al è doprât intal 12% dai câs par fevelâ cui nonos, intal 6% dai câs cui gjenitôrs e nancje tal 0,1% cui fîs. A front di chescj dâts negatîfs, dut câs al ven fûr ancje che l’80% dai abitants dal dipartiment al è a pro dal insegnament dal catalan a scuele e il 76% al è dacuardi cul bilinguisim. Cheste poie popolâr si scuintre però cuntun implant normatîf che nol previôt la pussibilitât dal bilinguisim e cuntun sisteme scolastic là che dome il 7,5% dai students al studie par catalan in maniere imersive o parziâl. I responsabii de inchieste a spieghin chescj dâts cu la percezion de bande de int che la lenghe catalane e vedi mancul lustri e utilitât rispiet al francês. Une situazion che però e podarès cambiâ, al à spiegât Alà Baylac-Ferrer de universitât di Perpignan, cu la nassite di une republiche catalane indipendente.

Font: La Vanguardia, 18/08/16

Corsiche: in place ai 24 di Setembar pai presonîrs politics

La organizazion Associu Sulidarità e à decidût di inmaneâ une gnove manifestazion par domandâ la amnistie par ducj i presonîrs politics cors e la fin des ricercjis dai militants che si cjatin in clandestinitât. L’apontament al è stât fissât pal prin dopodimisdì di sabide ai 24 di Setembar a Ajacciu. La decision e je leade di une bande ae fin de lote armade che e par agns e à interessât la isule e di chê altre ae mancjance di volontât, confermade ancje di resint dal prin ministri francês Manuel Valls, di frontâ la cuistion dai presonîrs. A butâ benzine sul fûc i à po pensât ancje la decision de procure de republiche di tornâ a arestâ o mantignî in preson trê militants cors che i judiçs a vevin decidût di liberâ.

Font: Alta Frequenza, 17/08/16