Pontade 22 08 (28/10/08) - 5

Grecie: arescj e violencis tun paîs macedon pes esercitazions

La tension jenfri Grecie e Macedonie e je cressude inmò di plui tor de metât dal mês di Otubar cuant che reparts dal esercit grêc a àn cirût di traviersâ cui cjars armâts il paîs di Zabrdeny / Lofi che si cjate intune des areis là che e vîf la minorance macedone. I abitants de vile, intune cun chei dai paîs dulintor a vevin blocât lis colonis militârs domandant che il lôr teritori nol fos doprât pes esercitazions de artiliarie. Cun di fat, za in altris ocasions il paîs al jere stât centrât des bombis e la int dal puest par zornadis interiis no veve podût lavorâ tes sôs proprietâts agriculis dulintor de vile. Dut câs, lis autoritâts greghis a vevin rispuindût cul atac di reparts speciâi di polizie e cul arest di diviersis personis, tra di lôr ancje il president dal Consei comunâl di Lofi. A cheste azion di fuarce, la int de zone e veve rispuindût cuntune mobilitazion inmò plui grande che e à puartât ae liberazion dai arestâts e ae promesse che no si varessin vudis esercitazions di artiliarie pesante. Cuatri gjornaliscj rivâts de Republiche di Macedonie par documentâ i fats a son stâts arestâts e po, daspò des protestis internazionâls, compagnâts ae frontiere e espuls. Ducj chescj fats a àn jevât gnovis protestis de bande dal guvier macedon.
Font: Eurolang, 18 e 14/10/08

Pontade 22 08 (28/10/08) - 4

Corsiche: Jacques Culioli vincidôr al Liet Lavlut

Al è stât il cjantat cors Jacques Culioli a vinci la edizion 2008 dal Liet Lavlut, il festival european des cjançons in lenghe minoritarie che si è davuelt ai 18 di Otubar a Lulea, inte Laponie svedese. Al cjantant cors a son lâts sei il premi de jurie, sei chel dal public. Daûr di lui si son plaçâts i asturians Dixebra e la sami Elin Kåven. Paritât ancje pe cuarte posizion jenfri i furlans Carnicats e i morvins Mordens. Chei altris musiciscj che a àn partecipât ae fase finâl dal concors a rivavin des comunitâts bretone, frisone, galese, galiziane, finlandese de Svezie e albanese de Italie.
Font: Liet Lavlut, 18/10/08; Galiza Hoxe, 18/10/08; Eurolang, 21/10/08; Nationalia, 23/10/08

Pontade 22 08 (28/10/08) - 3

Gales: il Plaid Cymru al incrès la sô poie

Ai 17 di Otubar a son stâts comunicâts i i risultâts dal prin sondaç su lis intenzions di vôt a nivel galês daspò des elezions pe Assemblee Nazionâl dal 2007. Il scandai al mostre che a nivel galês a vegnin premiâts i doi partîts che cumò a son al guvier in Gales, ven a dî i nazionalitaris dal Plaid Cymru (25,7%) e i Laburiscj (35%), che a mostrin un aument dai consens tor dal 3% rispiet aes ultimis elezions pe Assemblee Nazionâl Galese. Il sondaç, dut câs, al domandave ancje lis intenzions di vôt dai galês par chel che si riferìs al Parlament britanic. Ta chest câs si viôt, invezit, cemût che i Laburiscj a pain lis sieltis politichis de aministrazion Brown (38,7% cuintri dal 42,7% des elezions politichis dal 2005). Pai Liberâi Democratics la situazion e je fintremai piês (13,3% cuintri dal 18,4%). A vuadagnâ, in chest moment, a saressin duncje i Conservadôrs (23,9% cuintri dal 21,4%), ma soredut il Plaid Cymru (18,3% cuintri dal 12,6%). La poie dal Plaid Cymru e je fuarte e e va dilunc a cressi – al à comentât il parlamentâr galês Adam Price – e chest al è dal sigûr il risultât de fiducie che la int e à pal nestri partît daspò dal nestri ingrès tal guvier galês e dal lavôr che o vin fat par une gnove politiche pal Gales.
Font: Plaid Cymru, 17/10/08

Pontade 22 08 (28/10/08) - 2

Bretagne: radiogjornâl regjonâl par breton

Al è stât presentât al public il progjet par un radiogjornâl regjonâl par breton metût adun di Brudañ ha Skignañ, une associazion di servizi e di coordenament par cuatri emitentis radiofonichis de Bretagne: Radio Kreiz Breizh, Radio Bro Gwened, Radio Kerne e Avorig FM. In dì di vuê lis cuatri radios a cuvierzin dome la informazion dai teritoris là che al rive il lôr segnâl, cumò invezit a metaran in rêt lis informazions locâls cu la zonte di chês di nivel regjonâl. Il risultât al è un radiogjornâl cuotidian di 10 minûts par breton di nivel regjonâl. Il progjet al è finanziât de Regjon e dai dipartiments bretons che, in dut, a àn metût a disposizion 130 mil euros. Brudañ ha Skignañ e à po in progjet un program di aprofondiment setemanâl e des trasmissions specifichis pai zovins.
Font: ABP, 15/10/08

Pontade 22 08 (28/10/08) - 1

Vojvodine: fat bon de assemblee locâl il gnûf statût

La Assemblee de Vojvodine e à fat bon il gnûf statût de regjon là che, cundut che si à une maiorance serbe, si cjatin diviersis comunitâts minoritariis, a tacâ di chê ongjarese. Il test al à vût il vôt a pro di 89 dai 120 deputâts dal Parlament locâl. Cuintri dal statût gnûf a àn votât dome i membris dai partîts nazionaliscj serps che lu acusin di là plui innà di ce che e permet la Costituzion. Il test cumò al à di frontâ l’esam dal Parlament serp, ma si calcole che al varès di jessi fat bon dentri de fin dal an. Tra lis novitâts dal statût si cjate la trasformazion in guvier dal atuâl consei esecutîf de regjon e la pussibilitât di vierzi un ufici di rapresentance a Bruxelles.
Font: B92, 15/10/08; Món Divers, 16/10/08

Pontade 21 08 (14/10/08) - 12

Paîs Basc: EA e tache la racuelte di firmis a pro de consultazion

Ai 12 di Otubar Eusko Alkartasuna e à tacât a Bilbo / Bilbao la racuelte di firmis a pro de consultazion popolâr su la normalizazion politiche che il guvier de Comunitât Autonome Basche al veve voie di davuelzi, ma che e je stade proibide dal Tribunâl Costituzionâl spagnûl. L’obietîf al è chel di cjapâ sù uns 50 mil firmis par denunciâ denant dal Tribunâl european pai dirits umans la “incapacitât democratiche dal stât spagnûl”.
Font: Gara, 13/10/08; Món Divers, 13/10/08

Pontade 21 08 (14/10/08) - 11

Irlande: mobilitazion pal gaelic intal Nord

Diviers centenârs di personis si son dadis dongje ai 11 di Otubar intal centri di Béal Feirste / Belfast par une gnove manifestazion pai dirits linguistics. La iniziative, inmaneade de organizazion Pobal (che e ten adun diviersis realtâts associativis impegnadis pal svilup de lenghe gaeliche), e veve chê di domandâ une leç pal irlandês, daûr di ce che a previodin i acuardis di Saint Andrews. Pai organizadôrs de proteste al covente un intervent legjislatîf che al garantissi la presince dal gaelic intai servizis publics, inte educazion, inte justizie e intai mieçs di comunicazion, compagn di ce che za si à in altris comunitâts dal Ream Unît tant che il Gales e la Scozie. A blocâ la aprovazion di une leç pal gaelic a son massime i partîts de aree unioniste.
Font: Món Divers, 13/10/08; BBC, 11/10/08

Pontade 21 08 (14/10/08) - 10

Corsiche: il FLNC al cjape posizion cuintri dal PADDUC

Ai 11 di Otubar, il FLNC (Front di Liberazion Nazionâl Cors), al à dât fûr intant di une tape dal Zîr de Corsiche un messaç che al denuncie la politiche coloniâl francese su la isule e il sisteme clientelâr che le poie. A jessi contestât al è in particolâr il PADDUC, ven a dî il Plan plurienâl di svilup de Corsiche, che al varès di fissâ lis liniis di svilup de isule pai prossims cincuante agns. Pal moviment armât cors, il Plan al varà tant che risultât principâl chel di disprivâ la popolazion corse de sô tiere a dut vantaç di speculatôrs che a moltiplicaran lis vilis pai milionaris e lis secondis cjasis pai vacancîrs e pai pensionâts che a rivin massime dal Nord Europe. Il FLNC, tal so document, al invide la stampe locâl e internazionâl a fâ cognossi lis pratichis politichis che a fasin de Corsiche une “republiche des bananis” al servizi dai interès francês e dal clientelisim di cualchi sorestant cors.
Font: Radio Alta Frequenza, 11/10/08

Pontade 21 08 (14/10/08) - 9

Paîs Basc: screât canâl televisîf gnûf par basc

Ai 10 di Otubar a son scomençadis lis emissions dal tierç canâl de rêt televisive publiche basche. ETB-3 al è dut in lenghe basche e al è indreçât massime ai fruts e ai zovins, ma si varan ancje spazis culturâi e pe informazion. Il gnûf canâl si zontarà, intal digjitâl, a ETB-1 par basc, a ETB-2 par spagnûl, e a ETB-Sat che al cuvierç la Europe, ma no Canal Vasco che al trasmet vie satelit pal public american. Inte stesse zornade, che e cole intal inovâl pai 25 agns di Radio Euskadi, al è stât screât ancje il gnûf portâl internet de radiotelevision publiche basche (www.eitb.com) che al incrès il materiâl multimediâl e la pussibilitât dal public di interazî.
In curt al varès di partî ancje il secont canâl de television publiche galiziane, ancje chel indreçât a di un public zovin. Cun di fat, la sô partence e jere stade anticipade par Otubar, ancje se e mancje ancjemò la conferme uficiâl. Ta chestis zornadis, invezit, si à inviât il procès di digjitalizazion de rêt televisive galiziane.
Font: EiTB, 10/10/08; Galiza Hoxe, 11/10/08

Pontade 21 08 (14/10/08) - 8

UE: apel ai stâts che no àn ratificât la Convenzion cuadri pes minorancis

Un grup di 84 organizazions no governativis che si son dadis dongje al Grup internazionâl pai dirits des minorancis a àn indreçât un apel par ratificâ la Convenzion cuadri pe protezion des minorancis nazionâls ai vot stâts dal Consei de Europe che ancjemò no lu àn fat. Il document al sburte i stâts a garantî i dirits linguistics des comunitâts nazionâls minorizadis che a vivin tal lôr teritori, ma par jentrâ in vore al covente che i guviers di chescj stâts lu firmin e po lu ratifichin. Dai 47 stâts dal Consei de Europe a son 4 chei che a àn dome firmât la Convenzion, ven a dî Belgjiche, Grecie, Islande e Lussemburc, e 4 chei che no le àn ni firmade, ni ratificade, o sei Andorra, France, Monaco e Turchie. E je une situazion che e preocupe no pôc – a scrivin tal lôr apel chestis organizazions – par vie che diviersis comunitâts minoritariis impuartantis che a vivin ta chescj paîs a son lassadis fûr dai mecanisims di protezion previodûts de Convenzion. La situazion piês si le cjate intal stât francês, ta chel grêc e tal chel turc.
Font: L’Express, 10/10/08

Pontade 21 08 (14/10/08) - 7

Irlande: gnûfs plans locâi di politiche linguistiche

Intant che il ministri irlandês pes areis a maiorance gaeliche al fâs savê che i gnûfs regolaments de leç su lis lenghis uficiâls a jentraran in vore intal Març dal 2009, diviersis autoritâts locâls a àn za anticipât lis lôr gnovis liniis di politiche linguistiche pal gaelic. I regolaments ministeriâi a interessaran, in particolâr, l’ûs dal irlandês e dal inglês intai avîs, inte segnaletiche e intes tabelis dai uficis publics e des aministrazions locâls. Diviersis aministrazions, dut câs, si son za motis par incressi l’ûs dal gaelic intes lôr ativitâts. Par esempli, in Setembar la contee di Cill Dara / Kildare e à inviât un servizi di comunicazion cul public specific par irlandês e e je daûr a lavorâ par rindi dal dut bilengâl il so sît internet e par garantî la presince dal gaelic intai siei comunicâts. Cui prins di Otubar, invezit, si à tacât il procès par aumentâ la presince de lenghe irlandese inte documentazion uficiâl, intal sît internet e inte segnaletiche de contee di Ceatharlach / Carlow. La contee di Loch Garman / Wexford e je, invezit, in vore propit cumò a tirâ sù i conseis de int pal gnûf plan locâl di politiche linguistiche pal gaelic.
Font: Gaelport, 02 e 09/10/08

Pontade 21 08 (14/10/08) - 6

Bretagne: vie il breton di TV Breizh

TV Breizh, filiâl bretone dal canâl televisîf francês TF1, e à decidût di blocâ il servizi di dopleadure par breton che al jere in vore par diviers films e telefims trasmetûts de rêt televisive. La decision e je stade cjapade daspò che si veve za proviodût a eliminâ il program di aprofondiment setemanâl in lenghe bretone. Cun di plui, cul prin di Zenâr dal 2009 al sierarà ancje il telegjornâl regjonâl cuotidian par francês. Ta cheste maniere, TV Breizh e larà a pierdi ducj i elements linguistics e informatîfs che le lein ae realtât locâl, par deventâ une semplice sucursâl locâl de television gjeneraliste francese.
Font: Le Monde, 08/10/08

Pontade 21 08 (14/10/08) - 5

Paîs Catalans: manifestazion pe uficialitât dal catalan inte Catalogne Nord

Diviersis realtâts associativis de Catalogne Nord, tant che la Federazion pe difese de lenghe e de culture catalane, il Coordenament des associazions pe lenghe e il Casal Jaume I, a àn decidût di clamâ adun une manifestazion par rivendicâ la uficialitât dal catalan ancje ta chest toc di tiere catalane che si cjate sot de aministrazion statâl francese. La iniziative si davuelzarà ai 8 di Novembar, cuant che e je in program la tape finâl de Correllengua. Contrari di ce che al sucêt intal rest dai Paîs Catalans, a disin i organizadôrs de iniziative, inte Catalogne dal Nord la lenghe proprie dal paîs no je uficiâl. Cumò che lis lenghis regjonâls a àn cjatât spazi inte Costituzion francese, a spieghin lis associazions che a poin la manifestazion, e je rivade la ore di ricognossi la uficialitât dal catalan ancje tal Rosselló / Roussillon.
Font: Món Divers, 07/10/08; Eurominority, 08/10/08

Pontade 21 08 (14/10/08) - 4

Frisie: unitât politiche pal ricognossiment costituzionâl dal frison

Il ministri dal interni dai Paîs Bas al à fat savê che al studiarà la pussibilitât di meti dentri inte Costituzion la lenghe frisone. Al è il prin risultât di une campagne imbastide dai partîts de Frisie daspò che il stes ministri al veve presentât une propueste di modifiche costituzionâl là che si fevelave dome dal olandês. In dì di vuê, almancul intai fats, dongje de uficialitât dal olandês, si à une sorte di couficialitât dal frison inte provincie de Frisie, ma nissune des dôs lenghis e ven citade de Costituzion. Ducj i partîts frisons si son duncje mobilitâts par fâ in maniere che il frison nol resti fûr de Cjarte di fonde dal stât e a àn inmaneât ancje une manifestazion inte capitâl neerlandese. La mobilitazion e à cjatât la poie ancje dai partîts olandês di oposizion, ta cheste maniere e vignarès a mancjâ la maiorance di doi tierçs dal Parlament che e covente par fâ buine la riforme de Costituzion.
Font: Nationalia, 03/10/08; Eurolang, 03/10/08; Dutch News, 02/10/08; EFA, 30/09/08

Pontade 21 08 (14/10/08) - 3

Serbie: apel dal Consei de Europe pe tutele des minorancis

Intune risoluzion fate buine dal Consei de Europe si domande ae Serbie di fâ di plui par combati la discriminazion cuintri dai rom, dai rumens e dai arumens che a vivin intal so teritori. Intal document si domande in particolâr di fâ buine une leç cuintri de discriminazion e di garantî a chestis comunitâts minoritariis dai organisims rapresentatîfs istituzionâi. E ven, invezit, judicade avonde buine la situazion inte Vojvodine, regjon plurinazionâl dal stât serp là che e vîf ancje une gruesse comunitât ongjarese.
Font: Divers.ro, 02/10/08

Pontade 21 08 (14/10/08) - 2

Ingussezie: e cres la violence intal paîs

E va dilunc a cressi simpri di plui la tension inte republiche russe de Ingussezie. Cun di fat, daspò dal sassinament dal gjornalist Magomed Yevloyev par man des fuarcis di polizie al servizi dal guvier filorùs, ai 30 di Setembar il ministri dal interni ingùs Musa Medov al è scjampât par un pêl a di un atentât cuintri di lui. Lis autoritâts russis a son cumò daûr a investigâ par capî cui che al sedi daûr di cheste azion, ma lis primis ipotesis a fevelin di un svindic pe muart di Yevloyev o di un atac de vuerilie ingusse. Dome intal mês di Avost a son cuasi un centenâr i muarts intai scuintris jenfri militârs rus e grups armâts ingùs: une cifre che e je in cressi rispiet ai mês prime. Intant diviersis organizazions pai dirits umans a van dilunc a denunciâ lis disparizions e lis torturis metudis in vore des fuarcis di polizie o dal esercit rus cuintri de popolazion ingusse. Il stes ex president ingùs, Ruslan Àuixev, al dîs che aromai si cjatisi denant di une vuere civîl, ancje se inmò di basse intensitât.
Font: Nationalia, 01/10/08; Món Divers, 01/10/08

Pontade 21 08 (14/10/08) - 1

Corsiche: tal 2009 e nassarà “Corsica Libera”

I partîts indipendentiscj cors si daran dongje tune gnove formazion politiche che e varà non Corsica Libera. La gnove realtât politiche e varès di nassi intal Zenâr dal 2009 de union di Corsica Nazione Indipendente, Rinnovu, Fronte Populare, Consulta Naziunalista e Strada Dritti. Si trate di un passaç impuartant intal tentatîf di superâ lis divisions storichis de aree indipendentiste corse. La idee di fonde e je chê di rivâ a di une Republiche corse indipendente, ma par rivâi si previodin dute une schirie di passaçs graduâi. Tra i prins pas, duncje, si domande il ricognossiment di une citadinance teritoriâl sul model de Gnove Caledonie, la uficialitât de lenghe corse e la liberazion dai presonîrs politics.
Font: Món Divers, 01/10/08

Pontade 20 08 (30/09/08) - 9

Paîs Basc: metûts fûr leç ancje EAE-ANV e EHAK-PCTV

La sentence

Al è rivât in buine sostance insom, intal stât spagnûl, il procès par meti fûr leç lis associazions e i partîts de çampe indipendentiste basche. Cun di fat, il Tribunâl Suprem spagnûl, che al à cjapât sù la ereditât dai tribunâi speciâi di ete franchiste, al à metût fûr leç ai 16 di Setembar EAE-ANV (Azion Nazionaliste Basche) e, doi dîs dopo, EHAK-PCTV (Partît Comunist des Tieris Baschis). In ducj e doi i câs, i magjistrâts a àn fat bon il teoreme judiziari imbastît dal guvier spagnûl e de publiche acuse che al lee lis dôs formazions politichis ae za ilegalizade Batasuna e lis calcole di struments politics che a operin daûr des indicazions de organizazion armade ETA.

Lis reazions

La decision e à cjatât il bon acet dal PSOE, cumò al guvier intal stât spagnûl, dal PP e des lôr sezions inte CAB e in Navare. Pal guvier de CAB, invezit, cheste sentence e palese l’ûs par fins eletorâi di une leç (la “Ley de Partidos”) che e slontane la fin de violence e di ogni soluzion politiche pal avignî dal Paîs Basc. Il PNV al à fevelât di decision une vore grivie e cence precedents a nivel european. La decision e à cjatât la condane ancje di Eusko Alkartasuna che e à po acusât il guvier di Zapatero (PSOE) di no jessi bon di puartâ indenant une politiche alternative a chê di Aznar (PP). Par Nafarroa Bai si trate di “une gnove negative pe democrazie e pe societât basche”. La contrarietât totâl par une sentence che “e met fûr leç lis ideis e e impedìs che une part de societât basche e puedi jessi rapresentade” e je rivade di Ezker Batua (EB-IU). Par Aralar la decision dal Tribunâl Suprem e je “un atac ae democrazie” e “une aberazion politiche e juridiche che no cjate pareli inte Europe di vuê”. Manifestazions di solidarietât pai doi partîts metûts fûr leç a son rivadis, in plui che dal Paîs Basc, de Galizie, dai Paîs Catalans e di diviers paîs de Europe.

Lis consecuencis

EHAK-PCTV al veve otignût 9 deputâts intes elezions dai 17 di Avrîl dal 2005 pal Parlament de Comunitât Autonome Basche. EAE-ANV, cundut che in diviers lûcs si veve cjatade cun diviersis listis anuladis, e veve otignût vie pes elezions aministrativis dal 2007 e dal 2008 uns 180 mil vôts, 430 conseîrs e la aministrazion di une cuarantine di Comuns bascs. Metûts fûr leç chescj doi partîts, duncje, si lasse cence rapresentance politiche la çampe indipendentiste basche (ezkerra abertzale) e une fete significative di eletorât. Prime di chestis dôs formazions politichis, di fat, a jerin za stadis metudis fûr leç Batasuna (intune cun Herri Batasuna e Euskal Herritarrok), AuB (Autodeterminaziorako Bilguneak), Herritarren Zerrenda, Aukera Guztiak, Abertzale Sozialistak, e cetantis organizazions ancje di stamp zovanîl, culturâl e pai dirits umans.

Cualchi note storiche

A lassâ scaturîts e je massime la decision cjapade cuintri di Azion Nazionaliste Basche, la prime formazion politiche de ezkerra abertzale, fondade intal 1930 e, cundut che e a son logadis inte stesse aree politiche, cuntune storie indipendente di chê di Batasuna. Baste pensâ che EAE-ANV inte lote pe difese de Republiche spagnole, intai agns de clandestinitât e de resistence al franchisim e jere stade flanc a flanc cun chei stes socialiscj che vuê a àn decidût di metile fûr leç. Par difindi il guvier basc e la Republiche spagnole, il partît al veve lassât sul cjamp centenârs di siei militants incuadrâts in trê batalions (Olabarri, Eusko Indarra e ANV3) e in altris reparts (repart pionîrs Askatasuna e batalion Gordexola) cuntun nivel di pierditis tra lis plui altis de vuere. Azion Nazionaliste Basche e veve partecipât cui siei rapresentants al guvier republican vuidât dal socialist Juan Negrín, e ai guviers bascs in patrie e in esili. Chê che fintremai i siei aversaris politics a àn presentât tant che “une sigle storiche plene di dignitât e di eroisim” e je stade, duncje, metude fûr leç pe seconde volte: la prime volte lu veve fat Franco intal 1939, vuê lu fasin i socialiscj (che tal 1939 a jerin ancje lôr te liste dai partîts fûr leç). Cun EAE-ANV fûr leç, al partît i vegnin dineâts ancje i risarciments previodûts pai bens (stimâts in 700 mil euros) e pai locâi (un centenâr) che i jerin stâts confiscâts sot dal franchisim. Ancje i archivis storics dal partît, tornâts a meti adun cun tante fature, a son stâts secuestrâts di gnûf de polizie spagnole.

Intal stât francês

Se chest al è il cuadri intal Paîs Basc meridionâl, chel sot aministrazion spagnole, la situazion e riscje di lâ in piês ancje par di là dal confin cul stât francês, intal Paîs Basc setentrionâl. Cun di fat, dilunc vie de setemane stade la polizie francese e à arestât 14 membris di Batasuna – che in France e je ancjemò une formazion politiche legâl – e percuisît par trê dîs la sede dal partît a Baiona / Bayonne. Ducj i arestâts a son stâts liberâts daspò di cualchi zornade cence nissune acuse e ai 27 di Setembar i membris dal partît a son tornâts a jentrâ te lôr sede compagnâts di une manifestazion là che a àn partecipât almancul 2 mil personis, cundut dai blocs de polizie che a àn impedît a cetancj di lôr di partecipâ ae iniziative. E je stade la plui gruesse manifestazion che si à vude a Baiona intai ultins agns. Cheste operazion poliziâl – a àn dite i rapresentants di Batasuna – e mostre che ancje in France si è daûr a cjapâ la strade de ilegalizazion de çampe indipendentiste basche.
Font: Gara, 28-18/09/08; Món Divers, 24 e 18/09/08; Galiza Hoxe, 27 e 18/09/08; Nationalia, 16/09/08

Pontade 20 08 (30/09/08) - 8

Gales: pressions su Brown par incressi l’autoguvier

Il Plaid Cymru, partît nazionalitari che al guvierne il Gales in coalizion cui Laburiscj, al sburte sul prin ministri britanic Gordon Brown par che al dedi la sô poie a di une incressite dal autoguvier galês. Tra lis condizions pe aleance di guvier tra Laburiscj e Plaid Cymru e je ancje chê di davuelzi, dentri de fin de legjislature, un referendum par slargjâ l’autoguvier dal Gales. Brown al è stât une vore clâr tal poiâ la devoluzion plene des competencis ae Assemblee de Irlande dal Nord, ma cumò – a disin i rapresentants dal Plaid Cymru – ancje i galês a domandin un Parlament vêr che al puedi decidi pe lôr nazion e, duncje, il prin ministri britanic al à di decidi se dâ ai galês lis competencis che a domandin o lâ daûr des pressions dai rapresentants plui reazionaris dal so partît. Daûr di une ricercje fate che al è pôc de Universitât di Aberystwyth al ven fûr che il 10% dai galês al domande la indipendence de lôr nazion, il 39% al vûl che il Gales al vedi un Parlament cun capacitât legjislative e fiscâl plene, e il 31% al è content dal nivel di autoguvier cumò in vore. Duncje, gjavât un 5% di personis che no àn rispuindût, dome al 15% dai intervistâts no i poche il procès di devoluzion inviât in Gales.
Font: Plaid Cymru, 23/09/08; News Wales, 22/09/08; Món Divers, 24/09/08

Pontade 20 08 (30/09/08) - 7

Paîs Basc: la rispueste dal guvier de CAB ae consultazion proibide

Daspò dal no dal Tribunâl Costituzionâl spagnûl ae consultazion popolâr che il guvier de Comunitât Autonome Basche al voleve davuelzi par sapontâ un procès di autodecision sul avignî dal popul basc, l’esecutîf de CAB al à lassât in man ai partîts che lu poin la rispueste di dâ a cheste proibizion. Plui che une denuncie denant dal Tribunâl european dai dirits umans, la strade proponude dal PNV – la fuarce principâl de coalizion di guvier – e je chê di internazionalizâ la cuestion lavorant a nivel di Consei de Europe e di chei altris organisims comunitaris. Par dâi plui fuarce a chestis iniziativis si à inviât ancje une racuelte di firmis che si pues cjatâle su sît www.kontsulta.eu . Dut câs, la propueste, al ribàs rispiet ae denuncie denant dal Tribunâl european dai dirits umans anticipade dal stes president de CAB Juan José Ibarretxe, no i à plasude masse ai aleâts di guvier dal PNV, massime a Eusko Alkartasuna e a Aralar. I doi partîts, di fat, a àn fat savê che no intindin rinunciâ al ricors denant dal Tribunâl european.
Font: Gara, 20/09/08