Pontade 11 08 (06/05/08) - 13

Paîs Basc: e cres inmò la repression cuintri de çampe indipendentiste

Su ordin dal judiç de “Audiencia Nacional”, Baltasar Garzón, e je stade arestade la sindiche di Arrasate, Ino Galparsoro. La decision e je stade cjapade nancje une setemane daspò che la mozion cuintri di jê sostignude dai partîts spagnoliscj e dal PNV e jere stade boçade de maiorance dai conseîrs dal Comun basc. La candidature de Galparsoro e jere une di chês che, tes aministrativis dal 2007, no jere stade improibide des autoritâts spagnolis che a vevin impedît a cetantis listis leadis ae çampe indipendentiste basche di presentâsi aes elezions. Cuant che, ai 8 di Fevrâr di chest an, il stes Garzón al veve decidût di suspindi lis ativitâts di ANV (Azion Nazionaliste Basche) al veve ancje sclarît che lis ativitâts davueltis dai elets di chel partît inte suaze des lôr incarghis istituzionâls no vevin di jessi calcoladis tra chês impedidis ai membris di ANV. Cun di fat, in câs contrari, si varès blocade la ativitât istituzionâl des aministrazions là che i citadins a vevin elet conseîrs dal partît nazionalitari basc. Cul arest de sindiche di Arrasate, Garzón al mostre di vê cambiât idee dal moment che la acuse di “colaborazion cun organizazion teroriste” e di “violazion de sospension des ativitâts di ANV” si poie dome su la ativitât davuelte de Galparsoro tant che prime citadine dal so Comun. Cun di plui, cun cheste decision si vierç la strade pal arest di altris 432 conseîrs elets tal 2007 tes filis di ANV e pal bloc des ativitâts aministrativis tai Comuns là che i rapresentants nazionalitaris a son al guvier. Denant di cheste decision si son tignudis diviersis manifestazion di solidarietât cu la sindiche arestade sei in Arrasate che in altris localitâts baschis. “Cemût si puedial clamâ democrazie un sisteme là che si impresone un sindic parcè che al fâs il lavôr che i eletôrs lu àn votât par che al fasi?” a àn declarât i rapresentants de çampe indipendentiste basche, che a àn dite che par cjatâ alc dal gjenar si à di tornâ al ’36 cuant che i franchiscj a impresonavin e a fusilavin i sindics.

Lis ultimis setemanis, intal Paîs Basc, a son stadis segnadis de violence: di une bande cui atentâts (cence muarts) che la organizazion armade basche ETA e à fat il prin di Mai cuintri des sedis di partîts e sindacâts spagnoliscj, e di chê altre cui atacs de polizie autonomiche cuintri de manifestazion che si è davuelte ai 26 di Avrîl a Durango par celebrâ i 30 agns de nassite di Herri Batasuna (moviment di riferiment de çampe indipendentiste basche vuê metût fûr leç des autoritâts spagnolis) e che a àn puartât al arest e al feriment di diviers dai partecipants.

Font: Gara, 01-04/05/08 e 27/04/08

Pontade 11 08 (06/05/08) - 12

Gales: tes aministrativis i nazionaliscj a cressin, ma a pierdin il Gwynedd

Lis elezions aministrativis che si son davueltis in Gales a àn dât un risultât une vore negatîf pal Partît Laburist che al à vût in dut 344 conseîrs locâi, ven a dî 122 in mancul de legjislature stade. Cun di plui, i Laburiscj a àn pierdût la maiorance assolude in sîs Conseis provinciâi (Merthyr Tydfil, Blaenau Gwent, Torfaen, Caerphilly, Flintshire e Newport), conservantle dome in doi di chei che za a vevin (Neath Port Talbot e Rhondda Cynon Taff). I Conservadôrs, invezit, a àn concuistât 62 conseîrs in plui de volte stade e cumò a ‘nd àn in dut 173 e a àn zontât une Provincie a chê che za a controlavin (Monmouthshire e Glamorgan). I Liberâi Democratics a son cressûts di 21 conseîrs e cumò a ‘nd àn in dut 162. Il Plaid Cymru al à concuistât 33 conseîrs in plui de volte stade e si conferme seconde fuarce intal Gales cui siei 207 elets totâi. Dut câs, i nazionaliscj galês a pierdin la maiorance assolude te uniche Provincie che a controlavin, o sei il Gwynedd. Ta cheste aree il Plaid Cymru al à paiât a fuart la sô politiche di riorganizazion scolastiche, cun di fat il gnûf moviment Llais Gwynedd (la vôs dal Gwynedd) nassût propit par fâi cuintri a chestis misuris al à otignût plui di une disine di elets che a puedin jessi decisîfs par aministrâ la Provincie.
Font: BBC, 02-03/05/08; Agence Bretagne Presse, 02/05/08

Pontade 11 08 (06/05/08) - 11

Corsiche: iniziativis a pro dal ricognossiment uficiâl dal cors

In spiete dal dibatiment sul ricognossiment des lenghis regjonâls in program ai 7 di Mai intal Parlament francês, une schirie di associazions nazionalistis corsis a àn clamât dongje ai 3 di Mai dai presidis simbolics intes citâts principâls de isule. La iniziative, che e je stade inmaneade dal Associu di i Parenti Corsi, de Cunsulta di i Studenti Corsi, de Ghjuventù Indipendentista e de Ghjuventù Paolina, e veve chê di sburtâ la modifiche dal secont articul de Costituzion francese che e previôt il francês tant che uniche lenghe de Republiche. Ta chescj agns lis bataiis a pro dal cors a àn puartât bogns risultâts, massime te scuele, ma la strade di fâ e je inmò tante, a spieghin i grups nazionaliscj. In dì di vuê, in Corsiche a esistin 46 scuelis primariis bilengâls che a cuvierzin il 13% dai arlêfs. Dut câs, si calcole che il 92% dai fruts al studiedi il cors, di chescj il 27% par almancul trê oris la setemane. Lis cifris a son une vore plui bassis, invezit, tes scuelis secondariis.

Font: AFP, 03/05/08; Ouiaubreton, 04/05/08

Pontade 11 08 (06/05/08) - 10

Bretagne: une corse pe lenghe e pai 30 agns des Diwan

Dai 30 di Avrîl ai 3 di Mai si è davuelte in Bretagne la prime edizion di Ar Redadeg, une corse pe lenghe imbastide sul stamp de Korrika basche e de Correllengua catalane. I partecipants a àn corût dilunc di une percors di 600 chilometris di Naoned / Nantes a Karaez / Carhaix. Par partecipâ i coridôrs a vevin di paiâ une iscrizion di 100 euros par chilometri: i bêçs cjapâts sù ta cheste maniere, chei metûts di ents o impresis che a poiavin la iniziative e chei tirâts sù cu la vendite di materiâl memoreatîf a laran par finanziâ lis scuelis bretonis a imersion Diwan, che propit ta chescj dîs a fasin fieste pai lôr 30 agns di esistence. Cheste rêt scolastiche privade e à permetût di scolarizâ miârs di fruts bretons te lôr lenghe. Il tentatîf di finanziâlis ancje cun fonts publics, inviât tal 2000, al è ancjemò blocât par vie dai ricors imbastîts di doi sindacâts di insegnants francês che a gjoldin ancje di fuartis poiis politichis.

Font: Agence Bretagne Presse, 01-03/05/08; Eurolang, 01/05/08; Mon Divers, 29/04/08

Pontade 11 08 (06/05/08) - 9

Irlande: si discutin sul teritori lis strategjiis pal gaelic

A son daûr a davuelzisi intes citâts principâls de Irlande i incuintris publics par discuti su la Strategjie pe Lenghe Irlandese, un plan previodût de leç pal gaelic dal 2006, che al à chê di fissâ i obietîfs che si intint di rivâi dentri dai prossims vincj agns. Tra i ponts che il plan al intint di puartâ indenant si à: il svilup di un sisteme scolastic dut par irlandês in plui dal insegnament obligatori de lenghe in dutis lis scuelis de Republiche; meti in vore ad in plen la legjislazion sul ûs dal gaelic tant che lenghe uficiâl tes aministrazions publichis; une poie plui fuarte pes comunitâts là che l’irlandês al è inmò lenghe di ûs normâl; miorâ i servizis radiotelevisîfs par gaelic. I incuintris publics si davuelzin a Cork, Limerick, Dublin, Galway, e Sligo, ma cui che nol rive a partecipâ di persone al pues inviâ il so contribût al sît internet metût sù di pueste.

Font: Pobail, 29/04/08

Pontade 11 08 (06/05/08) - 8

Galizie: il galizian si cjate tal moment piês de sô storie

La organizazion galiziane “A Mesa pola Normalización Lingüística” e à presentât il manifest de campagne “Pal dirit a vivi par galizian” (polo dereito a vivirmos en galego) che e varà tant che moment principâl la manifestazion nazionâl pe lenghe che si davuelzarà domenie ai 18 di Mai a Sant Jacum di Galizie (Santiago de Compostela). Intant de presentazion dal document, il president di A Mesa, Carlos Callón, al à dite che il galizian si cjate cumò tal moment piês de sô storie. Cheste situazion – al à zontât – e je fie de politiche cuintri de lenghe puartade indenant dal 1990 al 2005 dai guviers dal PP vuidâts di Manuel Fraga. Inmò in dì di vuê a van dilunc pressions une vore fuartis par che la lenghe proprie de Galizie e disparissi – al à dite simpri Callón – ma, cundut achel, si à di jessi otimiscj parcè che la societât galiziane e à cumò i imprescj par recuperâ la sô lenghe.

Font: Mon Divers, 29/04/08

Pontade 11 08 (06/05/08) - 7

Man: bandieris e lenghis de Interceltiche sui boi

La isule di Man e je une des nazions cence stât de Europe che e stampe dai boi par so cont (adun cul lis isulis Fær Øer e Åland). Chest an la aministrazion postâl de isule e à decidût di dedicâ une serie di boi aes nazions che a partecipin al Festival Interceltic di An Oriant / Lorient, ven a dî Asturiis, Bretagne, Cornualie, Gales, Galizie, Irlande, Scozie, e la stesse Man. I vot boi a mostrin ognidun la bandiere di une di chestis nazions cence stât e une frase te lenghe proprie dal paîs che si riferìs ae impuartance di mantignî vive la lenghe native. Par esempli, sul bol che al rapresente Man, si pues lei “Gyn chengey, gyn cheer”, ven a dî “cence lenghe, nol è paîs”.

Font: Mon Divers, 28/04/08

Pontade 11 08 (06/05/08) - 6

Armenie: l’Alt Karabakh al è za indipendent, il ricognossiment al rivarà

Il Parlament de Republiche armene al à boçât une propueste di leç par ricognossi la indipendence dal Alt Karabakh, regjon a maiorance armene che e fâs part dal Azerbaizan. Cuintri dal proviodiment a àn votât 64 deputâts, a pro dome 15. Pai parlamentârs che a àn boçât la propueste i spiete al president de Republiche decidi la politiche foreste dal stât. In mert il president armen, Serge Sarkisian, al à declarât che la indipendence de regjon e je bielzà un fat e che il so ricognossiment de bande de comunitât internazionâl e je dome une cuestion di timp.

Font: Mon Divers, 28/04/08

Pontade 11 08 (06/05/08) - 5

Paîs Catalans: in miârs a Alacant pe libertât di espression

Si calcole che a fossin passe vincj mil i manifestants che a àn sfilât pes stradis di Alacant / Alicante, par domandâ la libertât di espression menaçade dal bloc de emitente catalane TV3 e par memoreâ la ocupazion borboniche dal Paîs Valenzian dai 25 di Avrîl dal 1707. Intant de manifestazion si à ricuardât ancje altris doi episodis storics, ven a dî il bombardament franchist de citât tal 1938 che al veve causât plui di tresinte muarts e il sassinament di un zovin militant catalanist tal 1977. Ae iniziative a àn aderît diviersis associazions culturâls, organizazions sindacâls e sociâls, e i partîts catalaniscj e di çampe.

Font: Vilaweb, 27/04/08

Pontade 11 08 (06/05/08) - 4

Irlande: gnovis risorsis linguistichis in rêt

Al è stât il ministri irlandês pai afârs comunitaris, rurâi e dal Gaeltacht, Éamon Ó Cuív a lançâ i gnûfs servizis pe lenghe irlandese de societât Gaelchultúr. Si trate di un cors e di altris materiâi linguistics in rêt che si zontin ai cors pal personâl des aministrazions e dai ents publics che Gaelchultúr e davuelç za di cuatri agns sul teritori. Il cors, che al è il prin in rêt par gaelic irlandês, al varès di jessi metût a disposizion in curt, si pense za tor Jugn, ancje des impresis privadis e dal rest dal public. Tal zîr di trê agns il cors al sarà svilupât su sîs nivei di competence e si metarà a disposizion un cors di base par imparâ l’irlandês par ducj chei che, ator pal mont, a son interessâts ae lenghe proprie de Irlande.

Font: Gaelport, 27/04/08

Pontade 11 08 (06/05/08) - 3

Ocitanie: il volontariât linguistic al rive in Val d’Aran

Il Consei gjenerâl de Val d’Aran al à presentât il program dal volontariât pal aranês, la varietât ocitane che si fevele ta cheste valade pirenaiche dal Principât di Catalogne. La iniziative e ricjape propit il model dai volontaris catalans che ta chescj agns al à puartât a risultâts avonde bogns. I volontaris a dan la lôr disponibilitât a dedicâ almancul une ore par setemane par fevelâ l’aranês cuntune persone che e je daûr a imparâ la lenghe. Si formin cussì des cubiis che, cun conversazions su argoments di interès comun, a permetin di svilupâ lis abilitâts linguistichis di cui che al vûl imparâ l’aranês. Il sindic de comunitât, Francés Boya, al à ancje dite che si è daûr a lavorâ par meti sù une Academie de Lenghe Ocitane che e cjapi dentri l’Istitût di Studis Ocitans, e lis aministrazions e lis universitâts di dute la aree ocitane.

Font: Mon Divers, 25/04/08

Pontade 11 08 (06/05/08) - 2

Paîs Catalans: no si pues impedî di doprâ il catalan in tribunâl

Intal stât spagnûl i acusâts a àn dirit a esprimisi in cualsisei lenghe ricognossude tant che proprie des diviersis comunitâts autonomis che lu componin. A confermâlu e je la “Audiencia Nacional” spagnole che e jere stade clamade a intervignî sul davuelziment dal procès cuintri di doi zovins catalans acusâts di vê brusât des fotos dal re di Spagne inte suaze di une campagne antimonarchiche. I doi a vevin domandât di doprâ par catalan, ma il judiç ur veve dineât la pussibilitât di vê un tradutôr catalan – castilian. Il Tribunâl superiôr spagnûl al à condanât il compuartament dal judiç e al à marcât il dirit di doprâ denant dal judiç il catalan, il basc, il galizian e l’ocitan, o sei lis lenghis ricognossudis come propriis dai diviers Statûts di autonomie.
Font: Mon Divers, 25/04/08; Vilaweb, 25/04/08

Pontade 11 08 (06/05/08) - 1

Paîs Catalans: pas indenant pal ricognossiment des selezions nazionâls

Il Tribunâl di Arbitraç Sportîf al à decidût che se la federazion internazionâl di une cierte dissipline sportive e permet a plui di une scuadre dal stes stât di partecipâ aes competizions internazionâls, la legjislazion statâl no pues impedîlu. La sentence dal Tribunâl e je la rispueste al ricors fat indenant des autoritâts sportivis spagnolis par impedî che la rapresentative catalane di bowling e cjapi part aes garis internazionâls. Si trate di un precedent impuartant che, in plui dal bowling, al varès di permeti aes selezions catalanis e di altris nazions cence stât di partecipâ aes competizions internazionâls in almancul 47 sports diferents, tra chescj ancje il basket e la atletiche. Dut câs, al è probabil che, cundut de sentence, la strade no sarà di rive jù par vie des pressions di cetantis federazions sportivis statâls che no vuelin rinunciâ a atletis impuartants. Par chel che al rivuarde il balon, la situazion e je inmò plui grivie par vie che la FIFA e proibìs in maniere esplicite la partecipazion di plui di une scuadre par stât, fûr che tal câs dal Ream Unît. La presince di cuatri rapresentativis diviersis par Ingletiere, Scozie, Gales e Irlande dal Nord e je stade considerade une sorte di ricognossiment pal paîs tignût par patrie dal balon. Dut câs si trate di une teorie clopadice dal moment che aes manifestazions internazionâls a partecipin ancje altris rapresentativis di nazions no indipendentis tant che lis Fær Øer e la Palestine.

Font: Nationalia, 25/04/08

Pontade 10 08 (22/04/08) - 8

Ocitanie: campagne pe lenghe ocitane patrimoni de umanitât

E va indenant la campagne inmaneade de Chambra d’Òc par rivâ al ricognossiment de lenghe ocitane tant che patrimoni mondiâl de umanitât. L’apel, indreçât ae UNESCO, al ven compagnât di un altri progjet che al à non “L’Occitània a pè”, ven a dî la Ocitanie a pît. Par sburtâ l’apel, di fat, al è stât pensât di scjavaçâ a pît une buine fete de Ocitanie: une cjaminade internazionâl che e tacarà ai 30 di Avost di Vinai (Vinaio), intes valadis ocitanis dal Piemont, par rivâ ai 7 di Novembar a Vielha in Val d’Aran. Cun di fat, il spazi linguistic ocitan al cjape dentri trê stâts diviers, ven a stâi chel talian, chel francês e chel spagnûl. Tal prin, la lenghe d’òc e je fevelade in dodis valadis alpinis dal Piemont, tun blec de Ligurie e tal comun di La Gàrdia (Guardia Piemontese) in Calabrie. Intal stât francês, la aree ocitane e cjape dentri trenteun dipartiments, o sei cuasi dute la part meridionâl dal stât. L’ocitan al è po fevelât ancje te Val d’Aran, intal Principât di Catalogne. Par vê plui informazions su la iniziative o par aderî si pues là achì.
Font: Chambra d’Òc

Pontade 10 08 (22/04/08) - 7

Sardegne: la Regjon e ponte su la lenghe sarde

Dentri de fin de legjislature la Sardegne e varà une gnove leç di politiche linguistiche. A dîlu al è stât il president de Regjon, Renato Soru, ai 18 di Avrîl intant de riunion dai sportei linguistics sarts, che inte isule a son za 198. Par Soru, la Regjon e à di cjapâ di esempli la leç regjonâl su la lenghe furlane fate buine l’an passât dal Consei regjonâl dal Friûl – Vignesie Julie. Cun di plui, al à dite il president de Sardegne, il câs furlan al è stât di esempli ancje par chel che al rivuarde la convenzion sotscrite ai 11 di Avrîl tra Ministeri talian pes comunicazions, Regjon e RAI. Chest acuardi al previôt che cun Mai a partissin su la RAI regjonâl trasmissions radiofonichis cuotidianis di miezore su la atualitât, la culture e la storie de Sardegne. Chestis trasmissions a saran par sart dal lunis al miercus e de joibe ae domenie par talian. Soru al à po proponût ai uficis linguisticis di colaborâ cu la Regjon par meti in pîts une web tv dute di plante fûr in lenghe sarde. Ancje il discors dal president de Regjon al è stât fat par sart parcè che – al à dite Soru – la lenghe si le difint in primis cul fevelâle pardut.
Font: Regione Sardegna, 11-18/04/08

Pontade 10 08 (22/04/08) - 6

Italie: sudtirolês, valdostans e slovens in Parlament

Lis elezions politichis dai 13 e dai 14 di Avrîl a àn confermât la presince di rapresentants sudtirolês, valdostans e slovens intal Parlament talian. In Senât a son stâts elets trê senatôrs de Südtiroler VolksPartei (SVP), un valdostan sot dal cartel “Autonomie, Liberté, Democratie” che al met adun partîts autonomiscj e dal centri çampe, e une slovene tes filis dal PD. Inte Cjamare dai deputâts, invezit, a son stâts elets doi rapresentants de SVP (ma te legjislature stade a ‘nd jere di plui) e un de liste “Vallée d’Aoste” che e meteve adun la Union Valdôtaine e altris doi moviments autonomiscj valdostans. Intes elezions politichis talianis, tra i partîts espression di comunitâts minorizadis, a jerin ancje i sudtirolês “Die Freiheitlichen” e “Union für Südtirol”, e i sarts “Sardigna Natzione” e “Partito Sardo d’Azione” che no àn vût nissun rapresentant elet. Di parlamentârs sarts e furlans a ‘nd è stâts elets in Parlament, ma dome framieç dai partîts di implant talian.
Font: Ministero dell’Interno (I), 15-16/04/08

Pontade 10 08 (22/04/08) - 5

France: dibatiment su lis lenghis minorizadis te “Assemblee Nazionâl”

Ai 7 di Mai la “Assemblee Nazionâl” francese e frontarà tun dibatiment la situazion des lenghis minorizadis feveladis intal stât. E je la prime volte che la Cjamare dai deputâts e fronte in maniere direte cheste tematiche, al à spiegât il deputât breton Marc Le Fur, che al è ancje vicepresident de Assemblee. Propit in graciis di cheste incarghe, Le Fur al à rivât a otignî dal prin ministri François Fillon di frontâ chest argoment che te politiche francese al è dispès considerât un tabù. Le Fur al à ancje za provât trê voltis a puartâ denant de Assemblee une propueste di modifiche de Costituzion par gjavâ vie l’articul che al ten il francês di uniche lenghe uficiâl dal stât. Propit chest articul al è stât doprât ta chescj agns par impedî che la France e ratifichi la Cjarte europeane des lenghis regjonâls o minoritariis che e oblearès il stât a meti in vore misuris di tutele ative par lenghis tant che l’ocitan, il breton, il basc e il cors.
Font: Cabinet de Marc Le Fur, 16/04/08; Mon Divers, 17/04/08

Pontade 10 08 (22/04/08) - 4

Scozie: e cres la voie di referendum pe autodeterminazion

Dilunc vie de campagne eletorâl pes elezions che a àn dât al SNP la maiorance relative in Scozie, un dai cjavai di bataie dal Partît Nazionalist Scozês al jere stât chel dal referendum pe indipendence. A cuasi un an des elezions, il progjet referendari – che al viôt cuintri Laburiscj, Liberâi Democratics e Conservadôrs – al reste un dai obietîfs che il SNP si propon di rivâi dentri de fin de legjislature e la plui part dai citadins scozês e somee in cunvigne cun chest progjet. Cun di fat, un scandai jessût che al è pôc al mostre che il 65% dai scozês al vûl che il referendum si davuelzi. Cundut achel, se si votàs vuê, la opzion indipendentiste no varès la maiorance. Daûr dal ultin sondaç, di fat, il 41% dai scozês al sarès a pro de indipendence, il 40% al sarès cuintri e il 19% nol sa ancjemò ce che al sielzarès di fâ. La inchieste, fate de societât TNS System Three, e mostre risultâts avonde dongje di chê fate par cont dal Daily Mail che e da il 41% dai scozês favorevui ae indipendence, il 43% contraris e il 16% malsigûrs su la sielte di fâ. Cun di plui, ducj e doi i sondaçs a mostrin che la opzion indipendentiste e je daûr a vuadagnâ teren: dal Avost dal an passât a vuê, di fat, la poie ae idee di une Scozie indipendente e je cressude jenfri il 6 e il 10%. Pai dirigjents dal SNP chescj risultâts a son ancje la testemoneance dal bon guvier metût in at dal Partît Nazionalist Scozês e dal fastidi dai citadins pai atacs che a rivin dal guvier di Londre.
Font: SNP, 13/04/08; Scotland Today, 05/04/08; Mon Divers, 06/04/08

Pontade 10 08 (22/04/08) - 3

Rom: intervent de OSCE cuintri de discriminazion

Ai 8 di Avrîl e cole la Zornade internazionâl dal popul rom. Cualchi zornade indaûr, propit inte suaze di chest inovâl, il diretôr dal Ufici pes istituzions democratichis e pai dirits umans de OSCE, Christian Strohal, al è intervignût par riclamâ i guviers dai stâts membris a incressi i sfuarçs par dislidrisâ la discriminazion cuintri des popolazions rom e sigurâ la lôr partecipazion plene ae societât. Cun di fat, in dì di vuê, te plui part dai paîs, i membris des comunitâts rom si cjatin a jessi discriminâts tal cjamp de educazion, de cjase, dal lavôr e de sanitât. Tal 2003 la Organizazion pe Sigurece e la Cooperazion in Europe e veve metût jù un Plan di azion che al impegnave i siei membris a lotâ cuintri de discriminazion e dal razisim che i rom si cjatin a patî. Magari cussì no – al à dite Strohal – daspò cinc agns la situazion no je mudade cui sa trop e chestis comunitâts si cjatin a frontâ pidiments di ogni sorte cuant che a cirin di otignî chei dirits che i spietin a ducj i citadins. A front di cheste situazion, in Lui i rapresentants dai stâts membris de OSCE a varessin di tornâ a dâsi dongje par cirî di inzornâ e comedâ il Plan di azion. Intant, ai 6 di Avrîl, si è presentade a Bruxelles la Coalizion par une Politiche pai Rom Europeans che e à chê di sburtâ su lis istituzions comunitariis par che a cressin i sfuarçs cuintri de discriminazion. La CPRE e je formade di vot organizazions impegnadis te difese dai dirits umans, tant che Amnesty International e Minority Rights Group, o che a son espression de comunitât rom.
Font: Nationalia, 07/04/08

Pontade 10 08 (22/04/08) - 2

Paîs Basc: delegazion di Iparralde ae ONU

Dai 21 di Avrîl ai 2 di Mai, a New York, si davuelzà une schirie di audizions denant dal Forum permanent su lis cuestions autoctonis de ONU e, pe prime volte, e sarà sintude ancje une delegazion basche che e rive di Iparralde, ven a dî dal Paîs Basc setentrionâl che al è cjapât dentri tal stât francês. La iniziative, inmaneade dal grup “Autonomia Eraiki”, e à chê di denunciâ a nivel internazionâl la situazion che si cjatin a vivi i bascs, massime sot dal stât francês. Cun di fat, lis istituzions statâls francesis a àn sotscrit l’an passât la Declarazion ONU sui dirits dai popui natîfs, che e cjape dentri ancje i bascs, ma chel istès a van dilunc a dineâur i lôr dirits linguistics e nazionâi, a tacâ di chel di vê une realtât aministrative basche.
Font: Gara, 05/04/08; Mon Divers, 06/04/08