Sardegne: la Regjon e ponte su la lenghe sarde
Dentri de fin de legjislature la Sardegne e varà une gnove leç di politiche linguistiche. A dîlu al è stât il president de Regjon, Renato Soru, ai 18 di Avrîl intant de riunion dai sportei linguistics sarts, che inte isule a son za 198. Par Soru, la Regjon e à di cjapâ di esempli la leç regjonâl su la lenghe furlane fate buine l’an passât dal Consei regjonâl dal Friûl – Vignesie Julie. Cun di plui, al à dite il president de Sardegne, il câs furlan al è stât di esempli ancje par chel che al rivuarde la convenzion sotscrite ai 11 di Avrîl tra Ministeri talian pes comunicazions, Regjon e RAI. Chest acuardi al previôt che cun Mai a partissin su la RAI regjonâl trasmissions radiofonichis cuotidianis di miezore su la atualitât, la culture e la storie de Sardegne. Chestis trasmissions a saran par sart dal lunis al miercus e de joibe ae domenie par talian. Soru al à po proponût ai uficis linguisticis di colaborâ cu la Regjon par meti in pîts une web tv dute di plante fûr in lenghe sarde. Ancje il discors dal president de Regjon al è stât fat par sart parcè che – al à dite Soru – la lenghe si le difint in primis cul fevelâle pardut.
Font: Regione Sardegna, 11-18/04/08
1 commento:
intant che cualchidun al va indenant (Sardegne), cualchidun altri al menace di torna indaur.
Ma i furlans no mi par che a mertin chest.
Almancul la plui part di chei che o cognòs jo.
Posta un commento