Pontade 04 08 (15/01/08) - 9

Paîs Basc: scjàs politic par altris câs di torture

Ta chestis ultimis zornadis i mieçs di comunicazion dal stât spagnûl, massime chei bascs, a àn fevelât di un gnûf câs di torture cuintri di doi citadins bascs acusâts di jessi membris di ETA. Magari cussì no, l’ûs de violence de bande des fuarcis di polizie spagnolis, no dome come sisteme par interogâ, ma ancje dome par scunî i fermâts, e rimonte inmò ae ete franchiste e no à mai dât segnâi di finî. Cun di fat, lis violencis fatis cuintri dai arestâts, che a jentrin ad in plen inte definizion internazionâl di torture, a son stadis metudis in vore in cetancj câs, massime cuintri dai membris di grups armâts indipendentiscj e di opositôrs politics, in particolâr intal Paîs Basc là che par agns a àn operât ancje scuadrons de muart al servizi des autoritâts spagnolis (come ben dimostrât dal câs dai GAL), ma ancje intai Paîs Catalans. Ta chescj ultins agns a son stâts centenârs i citadins bascs che a àn denunciât torturis de bande des fuarcis di polizie e no si trate dome di etarras (o sei membris di ETA), ma ancje di rapresentants politics e culturâi dal panorame nazionalitari basc. Si trate di une pratiche facilitade dal regjim di incomunicazion che la legjislazion spagnole e permet pai prins cinc dîs daspò dal arest, cuant che il fermât al reste tes mans de polizie par 120 oris di file cence podê viodi nissun, nancje un avocat, e cence nissun control esterni, come che di agns e va dilunc a denunciâ Amnesty International. Cundut achel, la plui part di chescj câs, no ven nancje indagade par vie che lis autoritâts politichis e judiziariis spagnolis a sierin la cuestion cul dî che ducj i etarras arestâts a àn ordin di denunciâ torturis. Dut câs, ogni tant, al salte fûr un câs che pe sô gravitât nol permet di platâ la cuestion. E al è propit ce che al è sucedût ta chestis zornadis daspò dal ricovar di urgjence di Igor Portu arestât cualchi ore prime de Guardia Civil cun Mattin Sarasola intal paîs di Arrasate. Cuant che la polizie lu à menât tal ospedâl di Donostia, Portu al mostrave une cueste rote, un polmon sbusât cun versament di sanc, un voli pestât e pachis su dut il cuarp. Daûr dai sanitaris se a vessin spietât inmò prime di ricoverâlu il zovin al riscjave di murî par vie de feride intal polmon. Daspò che la gnove e je stade comunicade de radio Infozazpi Irratia e po de edizion in rêt dal cuotidian Gara, al è saltât fûr un montafin mediatic, ma soredut politic. La Guardia Civil che tun prin moment, daspò dal arest dai 6 di Zenâr, e veve fevelât di un fer cence nissun probleme, une volte deventadis publichis lis condizions di Portu e à comunicât che la feride tal polmon e jere stade causade di un colp cjapât dal zovin te puartele de machine intant dal arest. Plui tart il ministri spagnûl dal interni, Alfredo Perez Rubalcaba, intune conference stampe, al à dite che daspò vêsi fats identificâ cence problemis, i doi zovins a vevin cirût di scjampâ cuant che la polizie e veve cirût di controlâ i lôr russacs e che lis feridis a jerin stadis causadis de barufe saltade fûr cul tentatîf dai fantats di scjampâ. Cun di fat, tal framieç, a jerin stadis comunicadis ancje lis condizions fisichis di Mattin Sarasola che al presentave segnâi di pachis su dut il cuarp. A jevâ lis reazions duris e la domande di sclariments rivadis massime dai rapresentants politics bascs, ma ancje des associazions pai dirits umans, no jerin duncje dome lis condizions di salût dai doi zovins, ma ancje lis versions contraditoriis des autoritâts spagnolis. Tant plui che, ancje cjapantlis par buinis, no si capive cemût che cuntune feride cussì serie di riscjâ di murî, Igor Portu al fos stât menât in ospedâl passe sedis oris daspò che i fats a saressin capitâts. Tal framieç di Madrid si cirive di sviâ la atenzion dai mieçs di comunicazion, cul dî che i doi arestâts a saressin stâts membris de celule di ETA responsabile dal atentât intal aeropuart di Barajas. Une informazion cheste mai saltade fûr prime, cundut che par solit, al moment dal arest, lis autoritâts spagnolis a dan simpri une grande evidence ai episodis di violence atribuîts ai etarras arestâts. Parcè dâ fûr chestis informazions propit cumò? Intervistade de emitente radiofoniche Infozazpi Irratia, la avocate di Portu, Amaia Izko, e à declarât che “ce che si vûl fâ al è confondi cul butâ fum, cul fâ il rumôr plui grant pussibil par taponâ il scjàs che a son daûr a movi lis notiziis su la situazion di Igor e Mattin. A son daûr a inventâsi lis acusis plui penzis pussibilis. Cussì, no dome si va a violâ la presunzion di inocence, il segret istrutori, l'isolament, ma, cence dubi, si smire a fâ il rumôr plui grant pussibil par taponâ lis provis des torturis”. Dut câs, di là des peraulis de avocate dal zovin basc, a discreditâ lis peraulis des autoritâts spagnolis a son i stes fats. Prin di dut, a smentî la version dal ministri e de polizie, za in contradizion tra di lôr, a jerin stadis lis fameis di Portu e di Sarasola che a vevin dite che i doi zovins, cuant che daspò dal arest a jerin stâts puartâts intes lôr cjasis de polizie pe percuisizion, no mostravin segnâi di pachis come che, invezit, al varès vût di jessi se lis violencis si fossin vudis intant dal arest. Ai 10 di Zenâr e je stade rindude publiche la declarazion di un testemoni che al veve viodût cui siei voi cemût che al moment dal arest i doi fantats bascs no vevin fat resistence e che no si vevin vût episodis di violence. Tes zornadis seguitivis a son stadis rindudis publichis lis declarazions dadis dai doi zovins ai magjistrâts che ju vevin interogâts. Ducj e doi a àn contât la dinamiche dal fer di polizie, che si veve davuelt cence incidents, e po lis violencis patidis tes oris daspò dal arest che a vevin vût il moment plui dûr pôc prime dal ricovar di Portu, cuant che i doi zovins a jerin stâts menâts fûr dal centri di detenzion, tune boschete ad ôr di un riu, là che ur jere stade fate la “bolsa” e altris formis di torture. Al va dite che cuant che i doi fantats a son stâts interogâts a jerin ducj e doi in regjim di incomunicazion, ven a dî che no dome no podevin comunicâ tra di lôr, ma no vevin vût contats cun nissun fûr che cu la polizie e che no savevin nuie di ce che al sucedeve fûr de stanzie là che a jerin sierâts. Il fat che lis lôr declarazions a sedin coerentis tra di lôr, come che al à ricognossût il stes judiç spagnûl che ju à interogâts, coerentis cui risultâts dai esams medics, e coerentis cu lis testemoneancis cjapadis sù ta chestis zornadis tra chei che a vevin podût viodi alc al dimostre a clâr che la torture e je inmò une realtât intal stât spagnûl, massime cuant che si à a ce fâ cun presonîrs bascs.
[Font: Gara, 07-08-09-10-12/01/2008; El Mundo, 08/01/2008; Mon Divers, 09/01/2008; EiTB, 10/01/2008; Infozazpi Irratia, 10/01/2008]

Pontade 04 08 (15/01/08) - 8

Corsiche: manifestazion nazionaliste unitarie cuintri de repression

In Corsiche disevot tra partîts, sindacâts e associazions di aree nazionalitarie a àn clamât adun une manifestazion unitarie par protestâ cuintri de repression che il guvier francês al puarte indenant cuintri dal nazionalisim cors. In particolâr, si domande la liberazion dai presonîrs politics, ma ancje la fin dai atacs cuintri de lenghe corse. A meti adun fuarcis dispès avonde dividudis e je stade massime la condane ae preson a vite dal indipendentist Yvan Colonna, che o vevin za fevelât te pontade stade di Internazionalitari. La iniziative si è davuelte sabide ai 12 di Zenâr a Ajacciu daûr dal sproc “resistenza é liberta” (resistence e libertât). I manifestants a àn ocupât par diviersis oris la sede de Assemblee teritoriâl corse, ma a son stâts butâts fûr de polizie che e à dite di jessi intervignude daspò che un fûc al jere stât piât intal ufici di presidence.
[Font: Mon Divers, 07/01/2007; Libération, 12/01/2008; Le Monde, 13/01/2008; U Ribombu, 13/01/2008]

Pontade 04 08 (15/01/08) - 7

Sardegne: indipendentiscj in lote cuintri des scovacis talianis

La emergjence scovacis che e interesse zaromai di agns la Campanie e à tornât a vê une gnove piche ta chestis ultimis setemanis. La prime soluzion cjatade des autoritâts talianis e je stade chê di smaltî une part dai refudums in altris regjons dal stât talian. La decision dal president de Regjon Sardegne, Renato Soru, di smaltî su la isule une part di chês scovacis e à mot dôs sortis di reazions contraris: chê dai indipendentiscj sarts che le viodin come une gnove dimostrazion de sotanance de isule ai interès talians, e chê dai partîts dal centri diestre (ae oposizion inte Regjon Sardegne) che a àn cjapade la ocasion par fâ sù une bataie politiche su cheste cuestion. A spiegâ in maniere clare cheste diference i àn pensât i stes indipendentiscj, come che si pues lei tun dai manifescj metûts fûr ta chestis zornadis di iRS (indipendèntzia Repùbrica de Sardigna): “il nestri probleme e je inmò une volte la classe dirigjente unioniste e autonomiste che e guvierne cuintri dai sarts e cuintri de Sardegne, cun pocjis diferencis jenfri centri diestre e centri çampe”. Cun di fat, se vuê la aministrazion regjonâl e je di centri çampe, cuant che al guvier al jere il centri diestre la si veve vût une situazion similâr, dome chê in chê volte invezit des scovacis a jerin scoriis nucleârs. La solidarietât che i ven domandade ae Sardegne – a zontin i indipendentiscj – e je simpri a sens unic, parcè che il stât talian al dîs simpri di no cuant che i si domande di tornâ i bêçs che a spietaressin ae Regjon o di vignî incuintri ae Sardegne sul plan des servitûts militârs. Par chest inte zornade di joibe uns dusinte militants indipendentiscj (pe plui part di iRS, ma ancje di Sardigna Natzione e Confederazion Sindacâl Sarde) a àn metût in vore une proteste no violente intal puart di Casteddu / Cagliari par impedî che i refudums rivâts vie mâr a fossin sbarcjâts su la isule. I manifestants a son stâts cjariâts plui voltis des fuarcis di polizie che a ‘nd àn fermâts une cuarantine che a son stâts menâts in cuesture e denunciâts par resistence a public uficiâl cundut che a vessin metût in vore dome formis di resistence no violente. I indipendentiscj sarts a denunciin ancje il tentatîf di cjapâju dentri tai episodis di violence che si àn vûts denant de cjase dal president regjonâl Soru tes zornadis daspò, là che invezit a saressin daûr elements de estreme diestre.
[Font: iRS, 10-11-12/01/2008; stampe taliane, 11-12/01/2008]

Pontade 04 08 (15/01/08) - 6

Paîs Basc: e cres la repression cuintri de çampe abertzale

E somee simpri plui dongje la metude fûr leç de bande des autoritâts politichis e judiziariis spagnolis di chei partîts che a àn cjapât sù la rapresentance politiche de çampe nazionaliste basche, daspò de ilegalizazion di Batasuna e di altris sogjets politics di aree abertzale. Dut câs la strade de metude fûr leç e de criminalizazion no cjape dentri dome i sogjets politics, ma ancje chei impegnâts in ativitâts sociâls e culturâls come che a àn denunciât ta chestis zornadis i avocats difensôrs impegnâts intal procès 18/98 che al à puartât a condanis pesantis par une cincuantine di membris di associazions culturâls, mieçs di comunicazion e altris realtâts dal panorame nazionalitari basc. Lis motivazions de sentence a son stadis rindudis publichis pocjis zornadis indaûr e, a àn dite i avocats de difese, a vierzin la puarte par une gnove butade di criminalizazion daûr de idee che dut ce che si bat pe autodeterminazion basche al è ETA. Intant, sul principi dal an, propit la organizazion armade basche e à dât fûr un gnûf comunicât là che e denuncie la incressite de repression de bande dai stâts spagnûl e francês cuintri de societât basche e e fâs savê che e larà indenant cu lis sôs azions armadis. Sul finî dal 2007, invezit, la çampe indipendentiste basche si è dade adun a Elorrio par sburtâ il progjet di un stât basc indipendent. Chê de costruzion di un stât al è un percors lunc, al è stât dite, ma e reste la uniche strade pussibile par garantî i dirits nazionâi dai bascs. Dut câs, chest procès al podarà deventâ realtât dome se e je la volontât de citadinance basche e daûr di un percors a tapis come chel proponût a Iruñea / Pamplona ai 3 di Març dal 2007.
[Font: Gara, 31/12/2007 e 02-03-10-12/01/2008]

Pontade 04 08 (15/01/08) - 5

Paîs Catalans: si infuartìs il front nazionalist tes Baleârs

Il front de çampe nazionalitarie intes isulis Baleârs si infuartìs in prevision des prossimis elezions statâls. Cun di fat, al è stât sotscrit l’acuardi che al fisse la nasite di une coalizion eletorâl formade dal Partît Socialist di Maiorche (Mallorca), de Unió Mallorquina, di Entesa per Mallorca e di Esquerra Republicana. L’obietîf de coalizion al è chel di otignî un dai vot deputâts elets tes isulis e al è inmò viert a altris fuarcis politichis no statalistis. Chescj partîts a son ancje tra i organizadôrs de manifestazion che ai 30 di Dicembar e a clamât adun a Maiorche miârs di citadins par rivendicâ il dirit ae autodeterminazion.
[Font: Mon Divers, 31/12/2007 e 08/01/2008; VilaWeb, 31/12/2007]

Pontade 04 08 (15/01/08) - 4

Paîs Catalans: gnove boçadure pe politiche dal PP sul valenzian

Simpri par chel che al rivuarde i Paîs Catalans, al è di segnalâ che il Tribunâl superiôr di justizie dal Paîs Valenzian al à dât fûr une sentence che, intai fats, al ricognòs valôr juridic sei al tiermin catalan, sei a chel valenzian par rapresentâ la lenghe proprie di chel teritori. Come a dî che catalan e valenzian a son la stesse robe, contrari di ce che e dîs la diestre spagnoliste al guvier tal Paîs Valenzian che di agns e cîr di creâ une division artificiâl de lenghe cun chê di no jessi calcolâts ancje lôr di catalans. La politiche linguistiche diferenzialiste dal PP, in plui di no vê nissune fonde sientifiche, e ven duncje boçade di cheste sentence che si zonte a chês similârs dal Tribunâl suprem e di chel costituzionâl spagnûl.
[Font: VilaWeb, 07/01/2008]

Pontade 04 08 (15/01/08) - 3

Galizie, Paîs Basc, Paîs Catalans a strenzin i lôr rapuarts ancje tal sport

Ta chescj ultins agns la colaborazion tra lis nazionalitâts minorizadis dal stât spagnûl e je lade dilunc a cressi simpri di plui. Cun di fat, daspò de Declarazion di Compostela fate buine a Sant Jacum di Galizie (Santiago de Compostela) ai 10 di Dicembar tra Comunitât Autonome Basche, Catalogne e Galizie par promovi in maniere unitarie lis produzions culturâls des trê realtâts, ai 29 di Dicembar i rapresentants des trê Comunitâts autonomis a àn sotscrit un altri acuardi. Si trate de “Declarazion di San Mamés”, batiade cussì daûr dal non dal stadi di Bilbo / Bilbao là che pôc plui tart si à davuelte une partide tra lis nazionâls di balon de Catalogne e dal Paîs Basc. Si trate di un pat che al viôt dâsi dongje bascs, catalans e galizians par promovi la colaborazion intal cjamp sportîf cul sburtâ scambis tra atletis, formazions e federazions des trê Comunitâts, ma ancje cul lavorâ adun par promovi la culture sportive e par lotâ cuintri dal doping. Il pont plui impuartant de declarazion, dut câs, al è chel là che si fevele di metisi adun par sburtâ il ricognossiment uficiâl des rapresentativis nazionâls dai trê paîs de bande des federazions sportivis internazionâls, ma ancje par promovi la nassite di campionâts nazionâi pai diviers sports al puest dai atuâi campionâts statâi. Par fâ un esempli, tant par fevelâ di balon, l’Athletic di Bilbao e la Real Sociedad di Donostia a zuiaressin tun campionât basc e no plui ta chel spagnûl e v.i. Se cheste ultime pussibilitât e reste forsit la plui dificile di rivâi, Catalogne, Galizie e Paîs Basc a pontin soredut su la partecipazion des lôr rapresentativis nazionâls intes competizions internazionâls, come che za al sucêt, par esempli, pal Gales e pe Scozie che, pûr cence vê un stât indipendent, a son ricognossûts a nivel internazionâl almancul in cierts sports di scuadre tant che il balon e il rugby. Al è za di agns che lis trê nazions cence stât de penisule iberiche a lavorin par chest risultât, ma cumò a son daûr a incressi i lôr sfuarçs par otignî il ricognossiment. Ta chescj ultins timps, par chel che al rivuarde il balon, a son stadis zuiadis diviersis partidis cu lis nazionâls di altris paîs e ancje cun bogns risultâts: par esempli, i bascs a àn batût Bulgarie, Uruguay e Nigjerie, i catalans il Cile e l’Ecuador, e i galizians a àn batût l’Uruguay e a àn paregjât cun Ecuador e Camerun. A compagnâ la Declarazion di San Mamés e lis rivendicazions des trê nazionalitâts, simpri ai 29 di Dicembar, si è davuelte une grande manifestazion popolâr cun disinis di miârs di personis che a àn cjaminât pes stradis di Bilbao daûr di un strisson cul sproc: “Euskal Herria. Nazio bat, selekzio bat” ven a dî “Paîs Basc: une nazion, une nazionâl”. La colaborazion tra lis trê Comunitâts, dut câs, e cjape fuarce ancje par mieç di altris iniziativis che a cjapin dentri altris sports, Par esempli la Catalogne e parteciparà ai Zûcs Nautics dal Atlantic che chest an si davuelzaran tal Paîs Basc e là che e je dentri ancje la Galizie; e propit chest ultin paîs al è stât invidât de Catalogne inte Rêt dai Paîs Sportîfs là che a partecipin ancje i bascs.
[Font: Galiza Hoxe, 27-29/12/2007 e 07/01/2008; Mon Divers, 29/12/2007; Gara, 30/12/2007]

Pontade 04 08 (15/01/08) - 2

Galizie: preference pal galizian a Coruña

L’ufici pe normalizazion linguistiche dal Comun di Coruña, un dai centris principâi de Galizie, al à metût adun un progjet par fâ dal galizian la lenghe prioritarie inte aministrazion locâl. Chest al vûl dî che ducj i documents a saran prontâts par galizian e che cheste e sarà la prime lenghe doprade dai dipendents comunâi e che, dome a front di une domande esplicite di doprâ il castilian, a passaran ae lenghe statâl.
[Font: Galiza Hoxe, 27/12/2007]

Pontade 04 08 (15/01/08) - 1

Gales: gnûfs prodots informatics par galês

E va indenant la colaborazion tra la Microsoft e l’Ufici pe lenghe galese che e je stade inviade bielzà di cualchi an e che e à dât ai utents galês la pussibilitât di doprâ i prodots informatics de multinazionâl americane inte lôr lenghe. In particolâr, de seconde metât dal mês di Dicembar stât, a son disponibilis lis versions par galês di Vista e Office 2007. Par vêju baste lâ su la sezion di pueste dal sît dal Ufici pe lenghe galese.
[Font: Welsh Language Board, 17/12/2007]

Zonte 03 07 (27/12/07)

Paîs Basc: 47 condanâts tal procès farse 18/98

Ai 19 di Dicembar, pôc prime di misdì, e je stade dade leture de sentence dal cussì clamât “macrosumario 18/98”, ven a dî il procediment judiziari plui grues che al à colpît il Paîs Basc daspò de fin dal franchisim. La sentence e je stade cjapade de Audiencia Nacional, l’orghin judiziari che al à cjapât il puest dal tribunâl pal ordin public franchist, sot de presidence di Ángela Murillo. Il tribunâl speciâl spagnûl al à condanât 47 dai 52 imputâts a di un totâl di 525 agns di preson e a multis di divierse misure. I condanâts a son membris di prin plan de societât civîl basche impegnâts inte difese dai dirits nazionâi di Euskal Herria (il Paîs Basc). Si trate di militants e lavoradôrs des associazions KAS, Ekin, Xaki (associazion nassude cun chê di fâ cognossi a nivel internazionâl la situazion basche e di puartâ solidarietât a chei altris popui tibiâts dal mont), de Fondazion Joxemi Zumalabe (nassude par dâ une man ai moviments sociâi di Euskal Herria), de societât Orain (cjase editore dal cuotidian Egin), e di altris realtâts associativis e economichis baschis. Cuintri di lôr la acuse e je di jessi membris o colaboradôrs de organizazion armade basche ETA. Te sentence si pues lei che “ni KAS, ni Ekin, ni Xaki a son une organizazion armade; no àn armis, parcè che il doprâlis nol è compit lôr ma dal braç armât di ETA, dut câs chestis realtâts a cjapin part ad in plen de unitât organizative e struturâl de organizazion teroriste ETA”. Par ducj i imputâts che a partegnin a chestis organizazions, duncje, a son stadis dadis penis che a van di 11 a 14 agns di preson dure. De Fondazion Zumalabe no si dîs che e je part di ETA, ma che i siei membris “a àn colaborât ae ativitât de organizazion teroriste ETA cun chê di stiçâ la disubidience civîl”. Par lôr lis penis a son ladis di 9 a 10 agns di preson. Pai dipendents de societât Orain e dal gjornâl Egin, si àn vudis situazions diferentis: José Luis Elkoro, par esempli, al è stât considerât membri dal “front negoziadôr” di ETA; di Xabier Salutregi si à dite che al jere deventât diretôr di Egin daspò di une audizion cu la dirigjence di ETA. La Audiencia Nacional e à ancje decidût di scancelâ e licuidâ il patrimoni des societâts Orain, Ardatza, Hernani Imprimategia, Publicidad Lema 2000, Erigane, MC Uralde, Untzorri Bidaiak Ganeko, Grupo Ugao, Gadusmar, e des associazions KAS, Ekin e Xaki. La sentence no si à poiade su provis reâls, come che a àn denunciât diviers osservadôrs internazionâi, si ben su declarazions e deduzions di membris des fuarcis di polizie cence nuie altri a tignîlis sù. No par nuie, par sostignî une afermazion, si fâs ûs dispès de frase “sentido común”, ven a dî “opinion comune”. Une sentence poiade duncje sul pinsîr unic de polizie, cence provis veris e cence tignî in nissune considerazion il lavôr de difese che e à smontât pas a pas lis tesis de acuse. Al moment de leture de sentence i imputâts a àn rispuindût cuntun “Gora Euskal Herria askatuta!” (vive il Paîs Basc libar) e cjantant l'imni “Eusko Gudariak”. La sentence e je stade contestade cun fuarce de plui part de societât basche (partîts politics, sindacâts, mieçs di comunicazion, associazions, citadins) che le judiche dome une sentence politiche cence nissune fonde juridiche. Come che a àn spiegât ben doi esperts che a cognossin une vore in sot la cuestion, Iñaki Egaña e Giovanni Giacopuzzi, cheste teorie puartade indenant cul procès 18/98 che “dut ce che al lavore pe autodeterminazion di Euskal Herria al è ETA” e je fûr de storie, parcè che “e dinee, prin di dut, che e esisti une forme divierse di fâ politiche che e puedi confrontâsi al pâr cun chês che a paronin inte nestre societât.” Propit par chest – a disin – e je stade condanade. Ancje se par fâlu, si è lât fûr e cuintri de leç che in teorie si varès vût di difindi.
[Font: Gara, 19-20-21/12/2007]

Pontade 03 08 (18/12/07) - 9

Galizie, Paîs Basc, Paîs Catalans: front comun pe promozion culturâl

Ai 10 di Dicembar i rapresentants plui alts de politiche culturâl de Galizie, de Comunitât Autonome Basche e de Catalogne a àn sotscrit un pat par promovi in maniere unitarie lis produzions culturâls des trê comunitâts. Il document al è stât batiât la “Declarazion di Compostela”, par vie che e je stade firmade a Sant Jacum di Galizie, o sei Santiago de Compostela. A sotscrivi la declarazion a son stâts i assessôrs pe culture des trê comunitâts, ven a dî Ánxela Bugallo pe Galizie, Miren Azkarate pe Comunitât Autonome Basche e Joan Manuel Tresserras pe Catalogne. La colaborazion e i scambis tal cjamp culturâl tra lis trê comunitâts e jere bielzà in vore di timp, ma cun chest pat si vûl fâ un pas indenant e, in plui di incressi i rapuarts za in at, si metarà adun une programazion unitarie par promovi intune la culture galiziane, chê basche e chê catalane, massime sui marcjâts forescj.
[Font: Galiza Hoze: 10/12/2007]

Pontade 03 08 (18/12/07) - 8

Paîs Basc: la ilegalizazion di Batasuna denant de Cort Europeane pai Dirits Umans

La gnove e zirade bielzà di cualchi zornade, ma ai 13 di Dicembar e je rivade la conferme uficiâl. Cun di fat, ta chê zornade, la Cort Europeane pai Dirits Umans e à informât il Guvier spagnûl di vê fat bon il ricors presentât dal partît de çampe indipendentiste basche, Batasuna, cuintri de sô ilegalizazion. Il moviment nazionalitari basc al veve domandât ae Cort di esprimisi su la violazion dal dirit ae libertât di espression (art. 10), di associazion (art. 11) e di presentâ ricors (art. 13), ricognossûts de Convenzion europeane sui dirits umans. Il tribunâl european al à fat buinis lis primis dôs domandis, ma e à decidût di no esaminâ l’ultin pont, ven a dî chel sul dinei a ricori cuintri de ilegalizazion che al sarès stât metût in at des autoritâts judiziariis spagnolis. Adun cun chel di Batasuna, la Cort Europeane e à fat bogns ancje i ricors di dôs listis e di trê candidâts bascs che ur jere stât impedît di presentâsi intes elezions dal 2003 e dal 2004. Cumò, par che il tribunâl di Strasburc si esprimi, si varà di spietâ cualchi mês. Dut câs, za il fat che a sedin stâts acetâts chescj ricors al met sot acuse lis autoritâts spagnolis par vê metût fûr leç Batasuna e altris sogjets politics bascs. Baste pensâ che la Cort Europeane e acete a pene l’un e mieç par cent des domandis che i vegnin presentadis.
[Font: Galiza Hoxe, 10/12/2007; Gara, 13/12/2007]

Pontade 03 08 (18/12/07) - 7

Paîs Basc: indenant cu la repression e cu la mobilitazion popolâr

Restìn inmò a fevelâ dal Paîs Basc. Un dai procediments judiziaris plui grues e plui innomenâts inviâts cuintri dal panorame nazionalitari basc al è il cussì clamât “macrosumario 18/98” che, tai ultins agns, al à colpît gjornâi, associazions, grups e personis di ogni sorte che a àn come unic element in comun chel di jessi impegnâts inte difese dai dirits nazionâi e linguistics dal popul basc. La acuse e je simpri la stesse, ven a dî che di jessi “organics” a ETA, ancje se no si àn provis reâls di leams tra i imputâts e la organizazion armade basche. Si trate di une vicende che e je deventade aromai la testemoneance plui penze de repression inviade cuintri dal moviment nazionalitari basc e, magari cussì no, e va dilunc a zontâ cjapitui gnûfs. L’ultin, si riferìs a di une gnove operazion di polizie, inviade ai 30 di Novembar, che e à puartât al impresonament di une cincuantine di imputâts de inchieste 18/98. Ancjemò une volte, la operazion e je stade compagnade di iregolaritâts e violazions de procedure judiziarie, baste pensâ, par esempli, che i avocats de difese a àn podût viodi la ordenance di arest dome daspò di trê dîs e mieç che i arescj a jerin scomençâts. Par denunciâ cheste gnove azion repressive, domenie ai 2 di Dicembar, e je stade inmaneade a Bilbo / Bilbao une manifestazion di proteste che e à clamât dongje passe 25 mil personis. Une cifre pardabon grande se si pense che la iniziative e je stade imbastide in mancul di doi dîs e a front di une clime pesante di intimidazion. Simpri par protestâ cuintri dal impresonament massîf leât ae inchieste 18/98, ai 13 di Dicembar si è davuelte une ore di siopar dai lavoradôrs che in diviersis localitâts baschis, tant che Usurbil, Andoain, e Goizueta, a àn puartât a un bloc totâl o cuasi des ativitâts. Intant dal siopar miârs di personis si son dadis dongje tes citâts baschis plui gruessis par manifestâ cuintri dai arescj.
[Font: Gara, 03-04-13/12/2007]

Pontade 03 08 (18/12/07) - 6

Corsiche: il tribunâl speciâl francês al condane Yvan Colonna

Il tribunâl speciâl francês al à condanât ae preson a vite il militant indipendentist cors Yvan Colonna cu la acuse di vê sassinât intal 1998 il prefet de Corsiche, Claude Érignac. Colonna al va dilunc a declarâsi inocent e i siei avocats a àn fat savê che a presentaran domande di apel. Il procès al jere scomençât ai 12 di Novembar, cuatri agns plui tart dal arest di Colonna. La sentence e je stade decidude dai siet judiçs che a formin il tribunâl speciâl, metût sù di pueste par reâts considerâts di stamp terorist e cence jurie popolâr. Il procès e la condane a mostrin diviers ponts scûrs, cun di fat a mancjin provis materiâls cuintri di Colonna, nissun dai testemonis dal sassinament lu al à ricognossût e ancje lis confessions otignudis di altris militants che a varessin partecipât al atac a son stadis ritiradis dai lôr autôrs che a denunciin di jessi stâts sburtâts a acusâ Colonna. Ancje par chestis resons, la vicende e je daûr a fâ di Colonna un simbul pal indipendentisim cors.
[Font: Libération, 13/12/2007; VilaWeb, 14/12/2007]

Pontade 03 08 (18/12/07) - 5

Paîs Catalans: il guvier valenzian al bloche i ripetitôrs de TV3

Vie pe gnot dai 9 di Dicembar il guvier valenzian al à blocât la ativitât dal ripetitôr de Carrasqueta che al trasmet il segnâl de emitente in lenghe catalane TV3 suntune part dal Paîs Valenzian. La organizazion Acció Cultural del País Valencià, che e veve metût sù l’implant, e considere l’at un “atac antidemocratic cuintri de libertât di espression e dal dirit ae pluralitât informative dai valenzians”. Cuintri de sierade dal ripetitôr a àn cjapât posizion ancje il Guvier catalan, e diviers partîts valenzians tant che il Bloc, Esquerra Unida e Esquerra Republicana. I prins doi partîts, dut câs, a àn ancje lamentât il compuartament de Gjeneralitât de Catalogne che e leve dilunc a sigurâ che no jerin problemis intes tratativis cul Guvier valenzian par compensâ la presince de TV3 intal Paîs Valenzian cun chê di Canal 9 in Catalogne. In ogni câs, ducj a àn dite che si trate di une azion pre eletorâl imbastide dal PP che al è cumò al guvier tal Paîs Valenzian. Al è zaromai di agns che il PP valenzian al puarte indenant une politiche anticatalane che si fonde prin di dut suntune azion di separazion des varietâts linguistichis catalanis che si fevelin intal Paîs Valenzian rispiet al catalan. Une azion che e cîr di dineâ la partignince dal so teritori ai Paîs Catalans là che, in plui dal Principât de Catalogne e dal Paîs Valenzian, a son dentri lis Isulis Baleârs, la Franja di Ponent che e je intal Aragon, la Catalogne Nord che e je intal stât francês, e la citât dal Alguer in Sardegne.
[Font: VilaWeb, 10/12/2007; Mon Divers, 11/12/2007]

Pontade 03 08 (18/12/07) - 4

Ladinie: imprescj informatics gnûfs pal ladin

Al è dai agns ’90 che inte Ladinie dolomitane si à tacât a lavorâ sui imprescj linguistics informatics pal ladin, sei intes sôs varietâts locâls, sei inte sô forme standard. Di cheste ativitât, inviade dal Istitut Cutural Ladin, si à svilupât il progjet TALL, o sei “Tratament Automatich del Lengaz Ladin”, che al è stât presentât ai 2 di Dicembar intant de assemblee gjenerâl dal istitût. TALL al met adun une part di corezion ortografiche, une di bancje dâts lessicâl e un motôr di ricercje terminologjic. Dentri o cjatìn duncje COLD, il coretôr ortografic gnûf che, in plui dal ladin standard, al permet di scrivi in maniere corete ancje il fassan, il badiot e il gardenês. Dentri di TALL al è ancje CORPUS LAD, ven a dî une bancje dâts che e ten dentri un grant numar di tescj par standard, fassan, badiot, gardenês, ampeçan e che, vie pal 2008, e cjaparà sù ancje i tescj fodoms. In fin, al è BLAD, un motôr di ricercje terminologjiche che al met adun i dizionaris des diviersis varietâts ladinis des Dolomitis cu lis racueltis lessicografichis metudis adun inte suaze dal progjet SPELL.
[Font: La Usc di Ladins, 01-08/12/2007]

Pontade 03 08 (18/12/07) - 3

Paîs Catalans: centenârs di miârs di citadins in place pal autoguvier

La manifestazion clamade dongje de Plataforma pel Dret de Decidir a Barcelone il prin di Dicembar par domandâ che la Catalogne e puedi decidi par so cont in materie di traspuarts e à vût une partecipazion grandonone. Pai organizadôrs a son stâts plui di 700 mil i citadins che a àn rispuindût al apel, invezit, pes fonts di polizie i manifestants a jerin sui 200 mil. In ogni câs, e je une des manifestazions plui grandis che si à vût a Barcelone di agnorums, cun int che e jere inmò che e spietave di podê partî dôs oris daspò che il cjâf dal corteu si veve mot. Ae iniziative a vevin dât la lôr poie ducj i partîts principâi dal panorame nazionalist e nazionalitari catalan e delegazions a son rivadis ancje dal Paîs Valenzian e des Baleârs. La manifestazion e je deventade une gnove ocasion par domandâ che la Catalogne e puedi decidi in plene libertât cemût organizâsi e guviernâsi. Simpri sul dirit di decidi di bessôi al è stât presentât ancje un manifest sotscrit di une sessantine tra sindics e aministradôrs dai Comuns de Catalogne.
[Font: VilaWeb, 01-03-04/12/2007; Avui, 01/12/2007]

Pontade 03 08 (18/12/07) - 2

Romanie: trê ongjarês elets tal Parlament european

A son trê i membris de minorance ongjarese in Romanie che a son stâts elets intal Parlament european intant des elezions che si son davueltis ai 27 di Novembar. Doi di lôr, Gyorgy Frunda e Csaba Sogor, a partegnin al moviment di riferiment de minorance ongjarese de Transilvanie, ven a dî la Union Democratiche dai Ongjarês de Romanie, che tes elezions e à cjapât il 5,52% des preferencis. Il tierç, invezit, al è il candidât indipendent László Tokés, che al à cjapât il 3,44% dai vôts e al à passât cussì il bloc al 2,83% fissât de leç eletorâl rumene pai candidâts indipendents. La rapresentance ongjarese tal Parlament di Strasburc e reste, duncje, compagne come numars, me e mude come composizion. Cun di fat, prime i trê deputâts a jerin ducj de Union Democratiche dai Ongjarês de Romanie. Il sucès di Tokés e il fat che in diviersis circoscrizions al vedi cjapât plui vôts che no i candidâts de Union, al à dât une scjassade no di pôc dentri dal moviment e al à puartât aes dimissions di plui di un dirigjent dal partît. La elezion di Tokés e je rivade ancje in gracie de poie di ciertis organizazions, tant che il Consei Nazionâl de Contee Szeckler, che no condividin ad in plen lis posizions de Union e che a domandin plui autonomie pes trê conteis che a formin la regjon storiche Szeckler. Si trate di une aree là che i ongjarês a marchin une cierte autonomie storiche e culturâl rispiet a chei altris membris de minorance ongjarese in Transilvanie.
[Font: Mon Divers, 28/11/2007; divers.ro, 03-13/12/2007]

Pontade 03 08 (18/12/07) - 1

Galizie: iniziativis gnovis pe lenghe galiziane

La organizazion galiziane A Mesa pola Normalización Lingüística e à metût sù une linie telefoniche e une direzion di pueste eletroniche di pueste pes denunciis o lis segnalazions leadis ae violazion o ae limitazion dai dirits linguistics intai uficis publics e intes aziendis. A Mesa e cjapade bielzà segnalazions di cheste fate, ma cumò e spere che cun chest servizi di pueste si rivi a vê un cuadri plui precîs de situazion dai dirits linguistics dai galizians.
Intant, la Segretarie gjenerâl de politiche linguistiche de Galizie e à imbastît une gnove iniziative par infuartî il galizian intal setôr imprenditoriâl. In Galizie a son passe 400 lis aziendis che a produsin e a vendin vin. Tal 2003 dome un pâr di lôr a vevin etichetis par galizian, in dì di vuê a ‘nd è 115, ma il Guvier autonomic al vûl incressi inmò di plui cheste cifre. Par chest, sot Nadâl, e sarà inviade une campagne sui mieçs di comunicazion che e varà tant che sproc “Deixa que o viño fale. Escolle un viño etiquetado en galego” (Lasse che il vin al feveli. Vierç un vin etichetât par galizian). Si vûl cussì premiâ chei produtôrs che a àn sielzût di promovi il lôr vin inte lenghe proprie dal paîs. Il progjet, a fasin savê dai uficis dal Guvier galizian, al è chel di slargjâ po chest stamp di intervent ancje in altris cjamps produtîfs.
[Font: Galiza Hoxe: 26/11/2007]

Pontade 02 08 (20/11/07) - 8

Paîs Basc: passe 2 mil jessudis par Enbata

Ta chestis setemanis al è jessût il numar 2000 dal setemanâl basc Enbata. Si trate di un risultât no di pôc par cheste publicazion che, par ducj chescj agns, e je stade un pont di riferiment impuartant par dut il panorame abertzale, o sei patriotic, di Iparralde, ven a dî il Paîs Basc setentrionâl che, dal pont di viste aministratîf, si cjate sot dal stât francês. Il prin numar de riviste al jere jessût vie pal Otubar dal 1960. In chê volte, il gjornâl al jere nassût tant che vôs dal moviment politic basc Enbata, che al rapresentave une vere scjassade intal panorame politic e sociâl di Iparralde, che par agns al jere stât considerât dome la perifarie dal Paîs Basc meridionâl (chel sot de dominazion spagnole): une sorte di fradi piçul che al veve di lâ daûr dal fradi grant che al jere par di là dal confin di stât. Cheste voie di scjassâ la situazion e jere clare bielzà dal non, cun di fat “enbata”, in lenghe basche, al è l’aiar fuart che al anticipe la burascje. Cuant che, ai 30 di Zenâr dal 1974, il moviment politic al ven sierât par ordin dal president francês Pompidou cu la acuse di menaçâ la integritât dal stât, ancje la riviste si ferme. Dut câs, tal zîr di un an, il setemanâl al torne a saltâ fûr, cuntun tai gnûf, no plui leât a di un grup politic specific, ma vôs de pluralitât dal moviment abertzale e osservatôr atent di ce che al sucêt intal Paîs Basc, massime in Iparralde.
(Font: Enbata, 25/10/2007)