Ocitanie: buine la partecipazion pe XXI Dictada Occitana

A son pôc mancul di cincuante lis localitâts là che ai 26 di Zenâr si son davueltis iniziativis inmaneadis pe vincjeunesime edizion de Dictada Occitana, manifestazion nassude tal 1998 cun chê di promovi la lenghe e la culture ocitane. Dongje dal moment centrâl dedicât ae peraule lete e scrite par ocitan, lis variis iniziativis a àn proponût ancje concierts, spetacui teatrâi, bai e conferencis. Cualchidune des iniziativis si è davuelte ancje fûr de Ocitanie e, plui intal detai, trê tai Paîs Catalans (Barcelone, Valéncia e Albocàsser) e une in France (Parîs).

Font: Jornalet, 24/01/19

Cossovo: scuintri sul progjet di un comun sôl par Mitrovica

Ai 22 di Zenâr, in ocasion dal incuintri cul sindic di Mitrovica Sud Agim Bahtiri, il president dal Cossovo Hashim Thaci al à declarât che il procès di unificazion de citât no si pues fermâ e al à dât la sô poie plene ae propueste di Bahtiri di fusion des dôs parts de citât – chê cossovane-albanese a Sud e chê serbe a Nord – intun comun unic. Il sindic di Mitrovica Sud al à fat indenant cheste propueste sul finî dal mês di Novembar stât e al à presentât ae Assemblee dal Cossovo une petizion, sostignude di 16 mil personis, par lâ ta cheste direzion. La poie di Thaci ae propueste e à jevât lis critichis dal responsabil dal ufici pal Cossovo dal guvier di Belgrât, Marko Djurić, che al à ricuardât che il ricognossiment di Mitrovica Nord tant che comun autonom al è sei tal plan di pâs, sei tai acuardis firmâts l’an passât a Bruxelles dal stes president cossovan. Djurić al à po invidât lis autoritâts di Pristina a meti fin aes menacis cuintri de minorance serbe. Pal sindic dimissionari di Mitrovica Nord, Goran Rakić, la “unificazion” sostignude di Thaci no sarès nuie di plui di un tentatîf di completâ la “netisie etniche” de comunitât serbe ancje de ultime ponte di citât di dulà che no jere stade eliminade tal 1999.

Font: KoSSev, 23/01/19

Irlande: rapuart su lis scuelutis par gaelic fer par 3 agns

Il dipartiment pe educazion de Irlande dal Nord al à dât fûr dome cumò i risultâts di une investigazion su lis scuelis de infanzie in lenghe irlandese puartade insom inmò tal Març dal 2016. Daûr dal rapuart, il setôr des scuelutis gaelichis, cun 43 struturis e 900 fruts, al jere piçul ma in cressite. Il document al proponeve duncje di aumentâ il numar des scuelis de infanzie publichis, di incressi i percors formatîfs pai insegnants e di meti adun materiâi di pueste par judâ i gjenitôrs a compagnâ i fruts cul irlandês ancje fûr des oris di scuele. La publicazion dal rapuart cun trê agns di ritart e à lassât scaturîts diviers di lôr e, tra chescj, ancje la responsabile pe educazion dal partît republican Sinn Féin, Karen Mullan, che e à domandât sclariments al dipartiment. Cundut de oposizion dai partîts unioniscj, lis struturis scolastichis in lenghe irlandese a son daûr a cressi e, in dì di vuê, a contin passe 6 mil students.

Font: BBC, 23/01/19

Alsazie: nazionaliscj francês cuintri de ipotesi di “bilinguisim”

Ancjemò prime di jessi firmât, l’acuardi sotscrit ai 22 di Zenâr a Aquisgran dal president francês Emmanuel Macron e de cancelere todescje Angela Merkel al à jevât atacs e azions di disinformazion de part plui reazionarie e ultranazionaliste de politiche francese (e, ancje se in misure plui limitade, ancje di chê todescje). Un dai ponts plui contestâts dal acuardi al è chel che al fevele di favorî il bilinguisim intes areis di confin. La estreme diestre francese e je saltade sù sparniçant ator la vôs che i alsazians a saressin stâts obleâts a imparâ il todesc. Inte realtât dai fats in nissun pont dal tratât si previôt la couficialitât dal todesc e no si fevele nancje di misuris concretis par valorizâ lis varietâts todescjis feveladis in Alsazie che, al contrari, i guviers francês a àn simpri tibiât. Par Unser Land, moviment autonomist alsazian, la uniche maniere par favorî pardabon la colaborazion transfrontaliere jenfri France e Gjermanie e sarès ricognossi la specificitât de Alsazie cu la concession di un statût di autonomie: une misure che e ve juste te direzion contrarie des politichis di riforme aministrative mostradis fin cumò di Macron.

Font: RPS, 21/01/19; Jornalet, 24/01/19; Corsica Oggi, 24/01/19

Gales: inmò lungje la bataie par servizis bancjaris par galês

Ancjemò l’an passât la comissarie pe lenghe galese, Meri Huws, e veve segnalât il malcontent di cetancj clients pe presince simpri plui limitade dal galês intai servizis bancjaris. Par invertî cheste situazion la organizazion pe lenghe Cymdeithas yr Iaith Gymraeg e à inviât za di cualchi setemane une campagne che e à cjatât la adesion di centenârs di personis che a scrivin ae lôr bancje par domandâi di garantî i servizis online ancje par galês. In dì di vuê nissun dai istitûts bancjaris che a àn filiâls e clients ator pal Gales al ufrìs ancjemò chest servizi. Se cualchi bancje e à rispuindût che e cjaparà in esam la cuistion, di altris a son rivadis rispuestis che no mostrin nissun interès pal teme. A fâ scjas però e je stade massime une rispueste rivade de HSBC là che si domande al client di scrivi par inglês e no tune “lenghe foreste”. L’istitût al à vût po di scusâsi par vê piturât di foreste la lenghe couficiâl dal Gales che, par altri, e je fevelade tes isulis britanichis di prime dal inglês. Chel istès il câs al à palesât benon la ande che cetantis bancjis a àn pai dirits linguistics. Dal moment che ancje i galês a àn paiât par salvâ chescj istitûts il minim che si spietin – e comente la Cymdeithas – al è che ur garantissin servizis inte lôr lenghe.

Font: The Guardian, 20/01/19; Cymdeithas yr Iaith, 21/01/19

Paîs Catalans: tes Baleârs si infuartìs la radiotv par catalan

Il guvier de Comunitât Autonome des Baleârs e metarà 4,2 milions di euros par sprolungjâ la ativitât de radiotelevision publiche des isulis (IB3) e par permeti la ricezion dal segnâl dai canâi catalans TV3CAT, 3/24 e Super 3/Canal 33. Chest ultin servizi al è pensât sei par garantî une pluralitât informative plui grande, sei par incressi la presince e l’ûs sociâl de lenghe catalane.

Font: Nou Diari, 19/01/19

Gales: cul 2022 plui galês intal curriculum linguistic

Il guvier dal Gales al ponte a inviâ un gnûf curriculum linguistic par dutis lis scuelis dal paîs a partî dal 2022. Il plan nol è stât ancjemò definît intai detais ma lis liniis di riferiment a son za stadis imbastidis. Il galês al restarà come insegnament obligatori tra i 3 e i 16 agns, ma al sparìs come “lenghe seconde” tai istitûts cul inglês veicolâr par jentrâ in forme paritarie intune aree educative dedicade a lenghis, leterature e comunicazion che e cjaparà dentri inglês, galês e une lenghe foreste. Cun di fat, ta chescj agns, il model dal insegnament dal galês come lenghe seconde no si à mostrât adat a dâi ancje ai fruts che no fevelin la lenghe a cjase lis competencis par paronâ il galês. O savìn che chescj mudaments a son impegnatîfs – e à dite la responsabile pe educazion, Kirsty Williams – ma si impegnìn a dâi aes scuelis il timp e lis risorsis par puartâju insom.

Font: BBC, 18/01/19

Man: lu dan par muart, ma il manx al è daûr a cressi

Un articul publicât su la stampe inglese sul prin tacâ di Zenâr al à tornât a piâ par un moment la atenzion sul manx, la lenghe celtiche imparintade cul gaelic scozês e cul irlandês fevelade inte isule di Man. L’autôr dal toc al fevelave dal manx tant che di une lenghe muarte e disparide. Inte realtât, cemût che a àn replicât de isule, la lenghe e reste dal sigûr in pericul ma no je par nuie muarte. Zaromai di agns cheste piçule lenghe celtiche e je daûr a vivi une rinassince che le à puartade a risultâts significatîfs. In dì di vuê a son un miâr i fruts che le studiin a scuele e, ancje se la materie no je obligatorie, il numar di chei che le sielzin al va dilunc a cressi an dopo an. Za di cualchi an e je stade metude sù ancje une scuele a imersion par manx. A son po in 2 mil i adults che a frecuentin cors par imparâle o par miorâ la lôr cognossince de lenghe. Il guvier de isule al à ancje metût in vore un ufici di pueste e diviersis misuris pe promozion dal manx. L’articul al è, magari cussì no, un dai tancj che a mostrin la superficialitât e la ignorance che e je ancjemò su lis lenghis minorizadis.

Font: IOM Today, 16/01/19

Paîs Catalans: il program dai VxL al passe lis 130 mil cubiis

Il program di volontariât pe lenghe (VxL) sburtât de direzion gjenerâl di politiche linguistiche de Catalogne e gjestît dal Consorzi pe normalizazion linguistiche al va dilunc a cressi. Si trate di une iniziative pensade par judâ a fevelâ par catalan là che si cubiin personis che a àn une cognossince limitade de lenghe e a àn bisugne di fâ pratiche cun volontaris che a àn une buine competence linguistiche e che lis judin a doprâ in maniere corete il catalan. Di cuant che il program al è scomençât intal an 2003 lis cubiis linguistichis a àn passât lis 130 mil. Intal 2018 lis cubiis a son stadis 10.600, il numar plui alt tocjât fin cumò. A cressi e je ancje la modalitât virtuâl dal program che si poie su videoconferencis e che al à cjatât il bon acet massime framieç dai zovins tra i 18 e i 29 agns. Il sisteme virtuâl dai VxL, nassût intal 2017, al à puartât fin cumò ae nassite di plui di 300 cubiis cun risultâts une vore positîfs.

Font: Generalitat de Catalunya, 15/01/19

Paîs Basc: disinis di miârs in place pai presonîrs

Tal dopodimisdì dai 12 di Zenâr disinis di miârs di personis a àn partecipât in contemporanie aes manifestazions inmaneadis a Bilbo / Bilbao e Baiona / Bayonne par domandâ la fin dal regjim di ecezionalitât in at cuintri dai presonîrs bascs sei intal stât spagnûl che ta chel francês. Cundut de fin dal procès di disarmament di ETA ai 8 di Avrîl dal 2017 e de dissoluzion de organizazion armade basche ai 4 di Mai dal 2018 e di là dal impegn dal guvier di Parîs intal 2017 e di chel di Madrid l’an passât di procedi almancul a trasferî i presonîrs in struturis carcerariis lis plui dongje ae lôr aree di divignince, cemût che par altri e proviodarès la leç, la situazion e reste ancjemò une vore grivie. Plui in detai, tal stât francês il 40% dai presonîrs si cjate ancjemò in struturis lontanis dal Paîs Basc, tal stât spagnûl chest dât al rive al 90%. A son po 21 i militants bascs cun malatiis seriis che par podê curâsi a varessin di gjoldi di misuris di carcerazion alternative e invezit si cjatin inmò in preson. Cun di plui al 95% dai presonîrs bascs intal stât spagnûl i vegnin dineâts chei permès e chei sconts di pene che a valin invezit par ducj chei altris condanâts. I manifestants a domandin duncje di meti fin a cheste situazion di ecezionalitât e di garantî ai presonîrs bascs il svicinament e chei altris dirits che a son ricognossûts a ducj i presonîrs. Ae iniziative a àn partecipât ancje delegazions rivadis de Catalogne là che, dopo dal prin di Otubar dal 2017, la cuistion dai presonîrs politics e je deventade magari cussì no une vore di atualitât.

Font: Naiz:, 12-13/01/19; EiTB, 12-13/01/19

Macedonie: poie dai partîts albanês al cambi di non

Ai 11 di Zenâr il Parlament macedon al à fats bogns, cu la maiorance di doi tierçs previodude pai mudaments di nature costituzionâl, i proviodiments che a cambiin il non dal stât in Republiche de Macedonie dal Nord. Il non gnûf, contestât cun fuarce de diestre nazionaliste, al varès di permeti di superâ il scuintri istituzionâl in at di agns cu la Grecie che al à impedît fin cumò al paîs balcanic di inviâ il percors pe jentrade te Union Europeane. Par rivâ ae maiorance cualificade che e coventave par aprovâ il cambi di non a son stâts fondamentâi i vôts dai trê partîts che a rapresentin la comunitât albanese, ven a dî la Union Democratiche pe Integrazion, che e fâs part de maiorance, il moviment BESA e la Aleance pai Albanês che a son invezit ae oposizion. Par otignî la poie di chescj ultins doi partîts, il guvier al à prometût che al incressarà i dirits ricognossûts ae comunitât albanese se dal câs ancje cun mendis ae Costituzion.

Font: Balkan Insight, 11/01/19

Stât spagnûl: visite ONU par viodi de situazion des minorancis

Il relatôr speciâl de ONU su lis minorancis, Fernand de Varennes, al sarà in visite tal stât spagnûl tra i 14 e i 25 di Zenâr par racuei informazions su la situazion des minorancis nazionâls, linguistichis e religjosis che a vivin intal ream di Spagne, in particolâr su temis tant che la educazion, la partecipazion politiche e la lote cuintri de intolerance. A son duncje previodûts incuintris cun funzionaris dal guvier centrâl e di chei autonomics, cun rapresentants de societât civîl e cun membris des minorancis. De Varennes in plui che a Madrid, al à in program visitis intai Paîs Catalans, tal Paîs Basc, in Galizie e in Andalusie. Ta cheste ultime comunitât e sarà frontade in particolâr la situazion des comunitâts gjitanis.

Font: VilaWeb, 11/01/19

Paîs Catalans: gnovis azions cuintri de “catalanofobie”

An dopo an l’ûs dal catalan intal cjamp de justizie al va dilunc a calâ. Lis dificoltâts che i citadins e i professioniscj si cjatin denant par impleâ la lenghe proprie tai tribunâi a puartin a pidimentâ la tutele juridiche e fintremai a discriminazions palesis di cui che al fevele par catalan. Par chest la organizazion Plataforma per la Llengua, te suaze de sô campagne “Prou de catalanofòbia” (vonde cu la catalanofobie), e à dât fûr un spot recitât dai atôrs Carme Sansa e Ricard Borràs che, a partî di fats reâi, al denuncie cheste situazion. Il contrast tra la situazion intal stât spagnûl e chê di altris paîs e je saltade tai voi cun clarece propit in ocasion des vicendis judiziariis dai esiliâts catalans in Belgjiche là che i avocats dai acusâts a àn podût sielzi tra un percors judiziari par francês o par flamant. Il dirit al ûs de lenghe catalane ancje te justizie invezit al reste dome su la cjarte dal moment che i judiçs e il personâl che al lavore intai tribunâi dai Paîs Catalans no àn nissun oblic di cognossi la lenghe e par vie che, viodûts i precedents discriminatoris, tancj no riscjin di doprâ il catalan par pôre di jessi penalizâts. Pe Plataforma e covente une gnove leç cuintri des discriminazions linguistichis che e previodi ancje sanzions dal moment che, se la pedagogjie e reste la strade principâl, cuant che no son alternativis al covente punî. Par lâ ta cheste direzion e à ancje inviât une racuelte di firmis in rêt là che tai prins dîs si son notâts za uns 15 mil citadins (www.proudecatalanofobia.cat).

Font: Plataforma per la Llengua, 11/01/19

Ocitanie: gnove campagne pe uficialitât dal ocitan

Il moviment de çampe radicâl ocitane Libertat al à fat savê che sul finî di Fevrâr al lançarà une campagne pe uficialitât dal ocitan e par chest al invide ducj i coletîfs che a condividin cheste bataie a mobilitâsi, a puartâ il lôr contribût e a metisi in rêt. Cun di fat, a disin, nissun moviment, par trop grant che al sedi, al pues rivâ di bessôl a chest obietîf. Par Libertat la lenghe e je la fonde de identitât e cence di jê nol è pussibil nissun avignî pe Ocitanie. Cu la uficialitât, la lenghe proprie e à duncje di cjatâ il so puest inte educazion, inte formazion, inte aministrazion e tai servizis publics, intai mieçs di comunicazion e in dute la societât ocitane.

Font: Jornalet, 11/01/19

Paîs Catalans: la Viquipèdia e rive a 600 mil articui

La Viquipèdia, la version catalane de enciclopedie libare in rêt, e je rivade a 600 mil articui. La cifre e je stade tocjade ai 10 di Zenâr cuntun toc dedicât ae biografie de ativiste Pura Velarde. Des 303 versions regjistradis di cheste enciclopedie ator pal mont, chê in lenghe catalane e je la vincjesime par numar di contignûts, inant che sul plan de cualitât dai siei articui si cjate tra lis primis trê. Nassude tal 2001, si à svilupade in gracie dal contribût di 300 mil personis che a àn scrit, editât o comedât i articui che le componin. Vie pal 2018 la version catalane de enciclopedie libare e à vût passe 196 milions di consultazions.

Font: Generalitat de Catalunya, 10/01/19

Paîs Basc: presentade la edizion 21 de Korrika

Ai 9 di Zenâr la organizazion AEK (Coordenament pe alfabetizazion e pe baschizazion) e à presentât la vincjeunesime edizion de Korrika, la corse inmaneade ogni doi agns par cjapâ sù fonts pe promozion e pal insegnament de lenghe basche e par slargjâ il so ûs inte societât. La manifestazion si davuelzarà dai 4 ai 14 di Avrîl. Si partìs de localitât di Gares / Puente la Reina, in Navare, e dopo di vê scjavaçât dutis lis regjons storichis dal Paîs Basc si rivarà a Gasteiz. La corse e tocjarà ancje dutis lis citâts principâls e, plui in detai, Iruñea / Pamplona ai 6 di Avrîl, Baiona / Bayonne ai 7, Bilbo / Bilbao ai 11 e Donostia ai 12.

Font: MediaBask, 09/01/19; EiTB, 09/01/19

Asturiis: asturian simpri plui margjinalizât su la RTPA

La Xunta pola Defensa de la Llingua Asturiana e a screât il 2019 cuntun comunicât là che e denuncie la incressite de margjinalizazion de lenghe proprie inte RTPA, la Radiotelevision dal Principât des Asturiis. La organizazion e segnale cemût che la emitente publiche e va cuintri dal Statût di autonomie, de leç sui ûs linguistics e fintremai de stesse normative che le regole, che e previôt che la RTPA e sedi un imprest par promovi l’asturian. Vie pal 2018 la situazion e je lade fintremai in piês cu la scancelazion de direte mensîl par asturian di une partide e cence che si dopleàs in lenghe proprie nancje une trasmission. I programs lâts in onde par asturian a son stâts une vore pôcs e ancje chei programâts intai oraris piês. Par chel che al rivuarde la radio publiche, in plui de lenghe, si à penalizât fintremai la musiche asturiane che no à rivât a passâ nancje la ore di presince par setemane.

Font: InfoAsturies, 05/01/19

Paîs Catalans: tes Baleârs si invie Cinemacat

La organizazion Obra Cultural Balear, in gracie de colaborazion cun CineCiutat e cu la direzion gjenerâl pe politiche linguistiche, e inviarà ca di pôc il progjet Cinemacat par promovi il cine par catalan ancje su la isule di Mallorca. Par intant si proponarà ogni joibe un film in version origjinâl o sottitulât par catalan ma l’intindiment al è di rivâ a di une programazion stabile dal cine par catalan prime a Palma e po ancje in altris localitâts de isule.

Font: La Vanguardia, 04/01/19

Aragon: pas indenant pal insegnament di catalan e aragonês

Daûr dai dâts dal dipartiment pe educazion, intal Aragon a son cuasi cent i istitûts scolastics là che si insegne il catalan o l’aragonês. Ca di cualchi setemane e varès di jessi fate buine une gnove ordenance par regolâ l’insegnament e l’ûs di chestis lenghis intai istitûts autorizâts. Lis novitâts a varessin di previodi la pussibilitât di insegnâ par catalan o par aragonês tra lis cuatri e lis sîs voltis par setemane tes scuelis de infanzie e di doprâ in maniere veicolâr la lenghe proprie par insegnâ une materie tes primariis e tes secondariis.

Font: Hoy Aragon, 03/01/19

Irlande: in cressi il gaelic tes scuelis dal Gaeltacht

Il ministri pe educazion de Republiche de Irlande, Joe McHugh, al à comentât cun sodisfazion i risultâts dal prin rapuart su la metude in vore dal program di valorizazion des scuelis dal Gaeltacht, o sei lis areis là che l’irlandês al è ancjemò fevelât in maniere significative. Il program, che al interesse 105 scuelis primariis e 28 secondariis, al è stât inviât intal 2017 cun chê di slargjâ e di incressi la cualitât dal insegnament in lenghe gaeliche. Il rapuart al diven des ispezions davueltis intes scuelis tra il mês di Setembar e chel di Dicembar. Il program al à za permetût di slargjâ l’ûs de imersion linguistiche tai prins agns di scuele e al à cjatât une grande adesion de bande dai insegnants e des fameis. Tra i problemis segnalâts si à invezit la dificoltât a fâ doprâ l’irlandês ai students des superiôrs fûr dal orari di lezion. Dut câs lis primis misuris imbastidis par fâi cuintri a cheste problematiche a àn za tacât a dâ risultâts positîfs. McHugh al à fat savê che vie pal 2019 lis risorsis pe educazion intal Gaeltacht a saran cressudis a 5 milions di euros, cuasi il dopli di chês dal an passât.

Font: Galway Daily, 29/12/18