Paîs Catalans: promozion linguistiche, 214 i sogjets ricognossûts

Intal 2018 la liste uficiâl des realtâts che a promovin la lenghe catalane si è slungjade di altris 23 sogjets, cuntune incressite dal 8% rispiet al an prime. Si trate di 163 realtâts associativis e 51 fondazions. La plui part – o sei 117 – e lavore tal cjamp de culture, 31 a son chês di nature professionâl o imprenditoriâl, 19 chês impegnadis in maniere specifiche pe lenghe, 19 chês di nature zovanîl o sportive, 18 si ocupin di integrazion sociâl e 10 di siencis e tecnologjie. La liste e cjape dentri i sogjets associatîfs cun sede tai Paîs Catalans che a àn tra lis lôr finalitâts statutariis ancje l’obietîf di incressi la cognossince e l’ûs de lenghe catalane dentri de societât. Il guvier catalan al previôt sconts fiscâi par cui che al fâs donazions a chestis realtâts.

Font: Generalitat de Catalunya, 18/07/18

Gales: al cres il public de tv publiche S4C

A cjaval tra 2017 e 2018 la television publiche in lenghe galese S4C e à cressût i siei spetatôrs dal 5% in Gales e fintremai dal 12% intal rest dal Ream Unît. La emitente e je viodude ogni setemane di 365 mil personis in Gales e di 690 mil intal teritori statâl, intant che su Internet e su iPlayer lis visitis a son sui 8 milions e 200 mil. In dì di vuê, il cost complessîf de television galese al è sui 84 milions di sterlinis: il 90% al rive dal paiament dal cjanul, il 8% al è metût dal guvier britanic e il 2% di ativitâts comerciâls.

Font: BBC, 17/07/18

Paîs Catalans: ritirâts i ordins internazionâi di arest pai esiliâts

Il tribunâl superiôr dal Schleswig-Holstein al à decidût di acetâ la domande di estradizion pal ex president dal guvier catalan Carles Puigdemont dome pe acuse di malversazion e no par chê di ribelion. Pai magjistrâts todescs intal câs catalan a mancjin i elements di violence che a coventin par tignî sù une acuse di ribelion; invezit, dal moment che nol è ancjemò clâr se lis spesis par davuelzi il referendum dal prin di Otubar a sedin stadis sostignudis dutis di privâts, e reste in pîts la acuse mote al esecutîf catalan di vê spindût bêçs publics par une votazion che e jere stade proibide des autoritâts statâls.

Paîs Basc: di 4 a 5 lis secondariis bilengâls in Ipar EH

Des 13 scuelis secondariis che si cjatin in Ipar Euskal Herria, o sei il Paîs Basc setentrionâl sot aministrazion francese, dome cuatri a ufrissin sezions cun insegnament ad in plen bilengâl. Cul prossim an scolastic si ur zontarà ancje l’istitût “Albert Camus” di Baiona / Bayonne là che, cu la zonte dai cors di fisiche e di arts plastichis par basc, la percentuâl di francês e di euskara e devente compagne. Si trate però di une ufierte che e reste ancjemò masse basse a front de domande. Cun di fat, tra il 2004 e il 2016, lis iscrizions intes sezions bilengâls a son passadis dal 9,6% al 18,4%, ma a son tancj i fantats che no àn la pussibilitât di iscrivisi. Un dai problemis principâi al diven de disponibilitât di professôrs in stât di insegnâ la lôr materie par basc. Par reclutâ un insegnant bascofon il percors al è une vore lunc e dispès i dirigjents scolastics no son interessâts a judâ l’insegnament bilengâl. Al pues fintremai sucedi che un professôr bascofon za in servizi al vegni obleât a lassâ l’insegnament tes sezions bilengâls par lâ ta chês in lenghe francese.

Font: 7seizh, 12/07/18

Cornualie: campagne par finanziâ un tv par cornic

La associazion Kowethas an Yeth Kernewek e à inviât une campagne di finanziament popolâr par meti lis fondis di un servizi televisîf su internet par cornic. La television publiche BBC South West e mande in onde cualchi program in lenghe corniche ma si trate di spazis piçui e cence nissune continuitât. Par chest, di un an e mieç incà, si à metût sù un canâl di pueste su internet – Pellwolok an Gernewegva – che in forme volontarie al met a disposizion un program informatîf mensîl, dai dibatiments in studi e une serie di programs itinerants par cornic. La campagne di finanziament, che si sierarà ai 3 di Setembar, si propon di tirâ sù avonde risorsis par imbastî un piçul studi di produzion in stât di clamâ dongje e di formâ plui volontaris.

Font: Eurolang, 10/07/18

Stât spagnûl: cuasi 800 media digjitâi in lenghe minorizade

Daûr di un studi a pene publicât de universitât de Navare al ven fûr che tal stât spagnûl a esistin 3.431 mieç di comunicazion digjitâi, 2.636 che si puedin identificâ sul plan teritoriâl. La plui part si centre te aree di Madrid (574) e in Catalogne (553). Il Paîs Valenzian al è in cuarte posizion (150), la Galizie in cuinte (146), la Comunitât Autonome Basche in seste (134), lis Baleârs in novesime (68) e la Navare in decime seconde (55). Il cuadri al cambie se si cjale il rapuart jenfri media digjitâi e popolazion residente: ta chest câs la situazion miôr si le à te enclave nordafricane di Ceuta; la Navare e je tierce, la Catalogne seste, la Comunitât Autonome Basche otave, lis Baleârs novesimis, la Galizie decime e la Comunitât Valenziane cuasi vincjesime. Lis lenghis des nazionalitâts ricognossudis a son dopradis in forme prioritarie in cuasi 800 mieçs di comunicazion digjitâi. A fâ la part dal leon al è il catalan che, calcolant ancje la varietât valenziane, si lu cjate in 597 media digjitâi (508 in Catalogne, 53 tal Paîs Valenzian, 19 tes Baleârs, 15 tra Castilie e Madrid, un in Aragon e un tal Paîs Basc) e che al è maioritari in Catalogne (508 sîts cuintri dai 133 par castilian) intant che te Comunitât Valenziane e tes Baleârs al è lenghe prioritarie di un sît su cuatri. I media digjitâi in lenghe basche a son 109 (89 te CAB e 20 in Navare), cul euskara che al è maioritari te Comunitât Autonome Basche (89 sîts cuintri dai 75 par castilian) e al rapresente un tierç di chei de Navare. Il galizian al è lenghe di riferiment par 87 mieçs di comunicazion in rêt (85 in Galizie, 2 a Madrid), ma in Galizie al è doprât sù par jù dal 42% dai media digjitâi.

Font: Galicia Confidencial, 10/07/18

Paîs Catalans: statût gnûf pal CNL

Par adatâlu ae gnove normative sui consorzis e par procedi a cjapâ in caric i coscj dal personâl, il guvier catalan (Generalitat de Catalunya) al à fat bon il gnûf statût dal consorzi pe normalizazion linguistiche. L’ent al è stât metût in pîts intal 1989 de Generalitat e di 135 ents locâi cun chê di promovi la cognossince e l’ûs de lenghe catalane in ducj i setôrs de societât. In dì di vuê al à passe 700 dipendents e 146 uficis teritoriâi. Tai sei trente agns di vite al à formât par catalan un milion e 700 mil personis e al à gjestît 125 mil cubiis di volontaris pe lenghe.

Font: Generalitat de Catalunya, 10/07/18

Gales: proteste linguistiche cuintri de cjadene Trago Mills

Militants pe lenghe galese a àn protestât ai 7 di Lui fûr de sede centrâl de cjadene di supermarcjâts Trago Mills a Merthyr Tydfil intant che di plui bandis si à invidât a boicotâ cheste cjadene. Lis iniziativis a son partidis dopo che a son stadis rindudis publichis lis posizions dal president de compagnie, Bruce Robertson, in mert al galês. Intune letare inviade ae comissarie pe lenghe galese, Meri Huws, Robertson no dome al piturave di danôs l’ûs de lenghe proprie te segnaletiche e tai materiâi informatîfs des impresis dal cumierç ma al contestave fintremai l’insegnament dal galês intes scuelis. Pe organizazion pai dirits linguistics Cymdeithas yr Iaith cheste vicende e sclarìs che se si vûl pardabon il bilinguisim ancje tes grandis aziendis no si pues sperâ te buine volontât dai imprenditôrs ma e covente une leç di pueste.

Font: ITV, 07/07/18

Galizie / León: galizian inmò pidimentât intal Bierzo

Il statût de comunitât autonome di Castilie e León al garantìs un ricognossiment juridic al galizian intai teritoris là che al è fevelât e, in particolâr, inte aree aministrade dal consei provinciâl dal Bierzo. Magari cussì no, cheste tutele e reste pe plui part su la cjarte. L’ultin episodi – cemût che al denuncie il coletîf culturâl Fala Ceibe – al tocje propit il sît internet dal ent locâl. Cun di fat, il gnûf portâl dal consei provinciâl a pene presentât al è dut par castilian. Fala Ceibe e invide duncje i citadins a mandâ mails di proteste sei al consei, sei al garant regjonâl pai dirits.

Font: Praza Publica, 05/07/18

Europe: comunitâts minorizadis pidimentadis de leç eletorâl

Il grup parlamentâr de Aleance Libare Europeane (EFA), che al ten adun i partîts rapresentatîfs des nazions cence stât, des minorancis e des comunitâts regjonâls, al manifeste il so discontent pe riforme dal sisteme eletorâl fate buine dal Parlament european. Il pont centrâl dal contindi al è il soiâr tra il 2% e il 5% che si metarà in vore tai stâts che a mandin a Strasburc plui di 35 parlamentârs. Chest al vûl dî che, tai chei stâts là che pes elezions europeanis si àn pocjis grandis circoscrizions o fintremai une sole, si larà a pidimentâ i partîts plui piçui e chei che a son inlidrisâts dome tune part dal teritori statâl, ven a dî chei espression des nazionalitâts minorizadis o di identitâts regjonâls.

Font: EFA, 04/07/18

Paîs Basc: plui atenzion pe lenghe tes assunzions in Navare

In gracie di un acuardi cul stât centrâl, il guvier de Navare al varà la pussibilitât di inviâ un plan di assunzions straordenari che al interesse 996 puescj: 621 inte sanitât, 361 inte aministrazion publiche e 14 tal istitût di salût publiche e lavorative de Navare. Sierade la negoziazion cui sindacâts, il guvier de comunitât forâl al à fat savê che 80 di chescj puescj (sù par jù il 8% dal totâl) a saran risiervâts a personis che a àn une buine cognossince de lenghe basche: plui de metât intai servizis sanitaris e une trentine te aministrazion publiche. Si trate di un pas indenant no di pôc se si calcole che, cui guviers stâts, il criteri linguistic inte selezion dal personâl al jere plui che margjinâl.

Font: Noticias de Navarra, 04/07/18

Irlande: fat bon il gnûf plan cuincuenâl pal irlandês

Il guvier irlandês al à presentât il so gnûf plan cuincuenâl di politiche linguistiche che al cjape dentri la dade 2018-2022 e che si insuaze te Strategjie 2010-2030 pe lenghe irlandese. Il document al à cjatât il bon acet des organizazions pe lenghe sei pes misuris previodudis, sei pal fat di vê metût des scjadincis claris pes azions previodudis in maniere di facilitâ il control su la metude in vore dal plan. A son diviersis lis novitâts ancje par chel che al tocje la scuele, in particolâr un scheme pilote di imersion parziâl in irlandês pai istitûts cul inglês veicolâr e dai programs scolastics estîfs di irlandês par fruts che a rivin di situazions disvantazadis.

Font: CnaG, 03/07/18

Sápmi: moratorie cuintri des minieris tal Násafjäll

Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn proclamât l’autoguvier inte aree dal Násafjäll, a cjaval tra Norvegje e Svezie, e a àn decidût une moratorie par cualsisei ativitât minerarie ta chest teritori. La decision e je stade cjapade dopo che si à savût che lis autoritâts norvegjesis a vevin autorizât la compagnie Elkem AS a espropriâ part de aree par inviâ ativitâts estrativis. Il disfrutament minerari nol va dome a pidimentâ la economie tradizionâl sami e, massime, l’arlevament des renis, ma al puarte ae memorie la ete tragjiche des minieris inviadis tai secui stâts intes tieris dai sami che a vevin puartât fintremai a sclavizâ la popolazion locâl e che si son lassadis daûr inmò in dì di vuê l’incuinament di une part dal teritori. Su la fonde dai dirits ricognossûts ai popui natîfs des leçs internazionâls, i sami dal Násafjäll a àn duncje decidût di no ricognossi il valôr des normativis e dai proviodiments de Norvegje e de Svezie fintremai che i progjets di disfrutament minerari no saran blocâts.

Font: The Barents Observer, 03/07/18

Paîs Catalans: gnovis politichis linguistichis pal ocitan

La direzion gjenerâl di politiche linguistiche dal guvier catalan e à inmaneât un moment di confront par fâ il pont su lis iniziativis pe promozion dal aranês, la varietât ocitane fevelade inte Val di Aran e che e gjolt di un statût di uficialitât in Catalogne. Al apontament a àn partecipât ancje l’Istitût di Studis Aranês e altris realtâts associativis impegnadis pe lenghe ocitane (CAOC, ADÒC, Tirabol e Club Aranès). Tra lis novitâts plui impuartantis o cjatìn la pussibilitât di deduzions fiscâls par cui che al fâs donazions a pro di organisims impegnâts pe lenghe ocitane e la istituzion di une gnove linie finanziarie specifiche par promovi l’ocitan aranês. Sul front universitari, tal 2017 si à metût pe prime volte l’ocitan tra lis prioritâts strategjichis par gjoldi dai finanziaments dal program Interlíngua. Sul finî di chest an invezit a saran disponibii i nivei A1 e A2 pal aranês daûr dal Cuadri european des lenghis.

Font: Generalitat de Catalunya, 27/06/18

Asturiis: acuardi tra universitât e ALLA par promovi l’asturian

La universitât di Uviéu / Oviedo e la Academie de Lenghe Asturiane (ALLA) a àn firmât un pat di cooperazion che si propon di sburtâ l’asturian par mieç di azions coordenadis di promozion e di normalizazion de lenghe proprie. Tra i progjets che si à in ments di svilupâ si à la coedizion di libris e rivistis e la organizazion di events in comun. La Academie e darà une man sul plan linguistic ai programs de universitât par promovi e par slargjâ l’ûs dal asturian e e finanziarà des borsis di studi su la investigazion di aspiets specifics leâts ae lenghe e ae culture des Asturiis.

Font: El Comercio, 27/06/18

Paîs Basc: Wikipedia par euskara cun 70 mil visitis in dì

In gracie dal acuardi sotscrit l’an passât tra il guvier de Comunitât Autonome Basche e la associazion dai utents di lenghe basche di Wikipedia (Euskal Wikilarien Kultura Elkartea) e cul lavôr di passe 800 students universitaris, la version basche di Wikipedia si à insiorade di 317 articui gnûfs, intant che altris 716 a son stâts cressûts o mendâts. Altris 817 articui invezit a son stâts zontâts par mieç di convenzions diferentis. Inte sezion Wikidata, invezit, a son stadis metudis dentri 6.600 descrizions e definizions dal dizionari sientific e tecnologjic in lenghe basche. Cun di plui e je stade inviade ancje Txikipedia, une version de enciclopedie libare in rêt fate su misure pai fruts dai 8 ai 13 agns, che e conte cumò passe un miâr di articui e che de sô partence e à za vût plui di 13 mil visitis. Cun chestis zontis, la Wikipedia par euskara e tocje i 294 mil articui e lis passe 70 mil visitis in dì. Un acuardi sotscrit cul cuotidian in lenghe basche Berria al permetarà invezit di cjariâ su la sezion Wikimedia lis passe 16 mil infografichis publicadis sul gjornâl.

Font: EiTB, 27/06/18

Scozie: tierç plan pal gaelic de universitât des Highlands

Si son inviadis lis consultazions publichis sul gnûf plan linguistic pal gaelic de universitât des Highlands e des Isulis (UHI). I interessâts a podaran intervignî fintremai i 30 di Avost. Il plan, che al è zaromai ae sô tierce edizion, al specifiche lis ativitâts che la universitât scozese e sviluparà di chi al 2022 par promovi e par svilupâ la lenghe gaeliche. Tra i ponts principâi dal document o cjatìn gnovis oportunitâts di formazion pal personâl interni e une incressite dal curriculum di gaelic, des risorsis bilengâls pai students e dal ûs de lenghe tai materiâi informatîfs e promozionâi de universitât.

Font: The National, 27/06/18

Sardegne: fate buine la gnove leç di politiche linguistiche

Ai 27 di Jugn il consei regjonâl de Sardegne al à fat bon – cun 25 vôts a pro e 20 cuintri – il test unificât su la politiche linguistiche regjonâl. Dongje di chês pe lenghe sarde, il test al ricognòs une serie di misuris di tutele e di promozion ancje pal catalan dal Alguer e pes varietâts galuresis, sassaresis e tabarchinis feveladis su la isule. Pes azions previodudis de leç si assegnin mieç milion di euros intal 2018, 3,2 milions intal 2019 e 3,3 milions intal 2020. Sul plan de istruzion il proviodiment al met in pîts la Obreria pro s’imparu de su sardu tant che organisim paritetic cul ufici scolastic regjonâl cun chê di fissâ lis liniis di indreçament pal insegnament dal sart e dal catalan intes scuelis; si met po in vore la cuote regjonâl dai plans di studi par garantî l’insegnament de storie de lenghe sarde. Sul model za in vore in Friûl – Vignesie Julie, si cjapin sù dal stât centrâl lis competencis inte gjestion aministrative dai sportei linguistics. Si previodin contribûts pe editorie, pai mieçs di comunicazion, pai sîts internet e pai imprescj informatics proporzionâts al ûs reâl de lenghe proprie. Cun funzions consultivis su la metude in vore de leç e nas po la Consulta de su sardu, clamade ancje a tornâ a meti man sul standard linguistic: un element – chest ultin – che al va a meti in discussion il procès di standardizazion de lenghe sarde che tal 2006 al veve puartât ae nassite de Limba Sarda Comuna.

Font: RAS, 27/06/18; ANSA, 27/06/18; Unione Sarda, 27/06/18

Bretagne: 28 parlamentârs in difese des Diwan

28 deputâts e senatôrs bretons a àn scrit al president de Republiche francese, Emmanuel Macron, par domandâ che si metin in vore trê misuris prioritariis par permeti la tignude de rêt des scuelis a imersion Diwan. Di passe cuarante agns chestis scuelis a ufrissin une educazion in lenghe bretone gratuite, laiche e vierte a ducj, che e va des scuelis de infanzie fintremai lis superiôrs, ma la lôr situazion e je simpri plui grivie par vie dal cressi dai berdeis burocratics e de criùre di risorsis. Intal document inviât a Macron, i parlamentârs bretons a domandin in particolâr di svilupâ misuris stabilis par paiâ il personâl tecnic e aministratîf des scuelis, di garantî ai istitûts un contribût statâl continuatîf, e di previodi l’inseriment automatic des gnovis scuelis Diwan intal sisteme dai istitûts ricognossûts in maniere di garantîur l’acès ai fonts publics e aes graduatoriis dai insegnants.

Font: Ouest France, 26/06/18

Paîs Catalans: 15 agns di VxL cun passe 125 mil cubiis

Il program di volontariât pe lenghe (VxL) imbastît de direzion gjenerâl di politiche linguistiche de Catalogne e gjestît dal Consorzi pe normalizazion linguistiche al à finît cuindis agns. Si trate di une iniziative pensade par facilitâ la capacitât di fevelâ par catalan e che cubie personis che a àn une cognossince limitade de lenghe e a àn bisugne di fâ pratiche cun volontaris che a àn une buine competence linguistiche e che lis judin a doprâ in maniere corete il catalan. Ta chescj cuindis agns di ativitât il program al à permetût la nassite di passe 125 mil cubiis linguistichis. Ancje tal 2017, pe novesime volte di file, si àn passadis lis 10 mil cubiis ad an. L’an passât si à ancje inviât il servizi in modalitât virtuâl, o sei par mieç di videoconferencis, che tal prin an di ativitât al à permetût la nassite di 224 cubiis e che al à otignût risultâts judicâts une vore positîfs.

Font: Generalitat de Catalunya, 26/06/18