Paîs Basc: passe 350 i Comuns che a poin Euskaraldia

A son za passe 350 i Comuns e 85 lis realtâts associativis de Comunitât Autonome Basche e de Navare che a àn decidût di aderî al progjet Euskaraldia che si propon di incressi l’ûs sociâl de lenghe basche. Par 11 zornadis, dai 23 di Novembar ai 3 di Dicembar dal 2018, dutis lis aministrazions comunâls e lis organizazions che a aderissin ae campagne si son impegnadis a doprâ la lenghe basche in ogni ocasion pussibile. Intant de iniziative i citadins che a aderissin a varan intor dai distintîfs che a specifichin se a son in stât di fevelâ la lenghe o pûr se a son dome bogns di capîle ma a àn gust che si ur feveli par basc.

Font: El Correo, 30/05/18; EiTB, 31/05/18

Cravuazie: referendum cuintri dai dirits politics des minorancis

Ativiscj catolics e nazionaliscj cravuats a àn inviât la cussì clamade iniziative “La int e decît” che si propon di tirâ sù lis 374 mil firmis che a coventin par inviâ un referendum par scancelâ la ratifiche dal tratât di Istanbul e par riformâ la leç eletorâl in maniere di ridusi i dirits politics ricognossûts de Costituzion aes minorancis nazionâls. In particolâr, la iniziative si propon di sbassâ di 8 a 6 il numar di puescj garantîts in Parlament pai rapresentants des minorancis nazionâls ricognossudis e di dineâur il dirit di vôt par cuistions centrâls tant che la fiducie al guvier o lis leçs di belanç. Ancje in câs che il numar di firmis cjapadis sù al sedi avonde par imbastî un referendum al è cuasi sigûr che la cort costituzionâl lu boçarà par vie che al tocje la ratifiche di un tratât internazionâl. Chel istès la iniziative e mostre il cressi de intolerance in Cravuazie pes minorancis nazionâls e pal slargjament dai dirits sociâi.

Font: Il Piccolo, 29/05/18

Voivodine: si slargjin i spazis di insegnament par cravuat

Il ministeri serp pe educazion al à confermât che cul prossim an scolastic si doplearà il numar des sezions cravuatis intes scuelis secondariis di Subotica, in Voivodine, la regjon de Serbie cul numar plui alt di minorancis. I students a podaran sielzi di frecuentâ lis classis par cravuat ancje tai istitûts tecnics e ta chei specialistics par infermîrs. La ativazion di gnovis sezions e di gnûfs programs disponibii par cravuat e je il risultât dal impegn cjapât chest Fevrâr dal president serp Aleksandar Vučić cui rapresentants de Aleance dai Cravuats de Voivodine. In dì di vuê, inte aree di Subotica, a son passe 400 i students che a frecuentin lis lezions par cravuat.

Font: Total Croatia News, 27/05/18

Bretagne: in 3 mil in place a Rennes pes Diwan

A jerin sù par jù 3 mil lis personis che ai 26 di Mai a àn sfilât pes stradis di Roazhon / Rennes par domandâ justizie pes scuelis Diwan e pe lenghe bretone. Plui in detai si domande di inviâ dai concors gnûfs pai insegnants di e in breton, di cjatâ fûr des soluzions stabilis par paiâ il personâl tecnic e aministratîf des scuelis a imersion e di ricognossi lis classis gnovis che a vegnin viertis. Di passe cuarante agns lis Diwan a ufrissin une educazion in lenghe bretone gratuite, laiche e vierte a ducj, des scuelis de infanzie fintremai lis superiôrs, ma lis istituzions statâls francesis a van dilunc a discognossi il servizi public che a ufrissin aplicantjur un tratament che lis penalize rispiet al rest des istituzions scolastichis francesis.

Font: Agence Bretagne Presse, 26/05/18

Cravuazie: in cressi lis manifestazions di odi cuintri dai serps

Ai 21 di Mai il Consei Nazionâl Serp, che al rapresente la comunitât serbe de Cravuazie, al à dât fûr il so rapuart anuâl su la situazion che si cjate a vivi la minorance. Daûr dai dâts publicâts, vie pal 2017 i câs di incidents leâts ae intolerance etniche, di discors publics violents, di menacis o di agressions cuintri di membris de comunitât serbe a son stâts 393, a front dai 331 segnalâts intal 2016 e dai 189 dal 2015. La realtât però e riscje di jessi ancjemò piês dal moment che plui di cualchidun nol denuncie i abûs patîts par pôre di consecuencis inmò plui penzis. A favorî cheste clime no son dome i ambients politics plui nazionaliscj, ma ancje i mieçs di comunicazion. Il guvier di centri diestre cumò in cjarie (HDZ) nol sburte la intolerance cuintri dai serps ma nol fâs nancje masse par fâi cuintri. Il cuadri al ven confermât ancje dal rapuart dât fûr de comission dal Consei de Europe su razisim e intolerance che al segnale une incressite de agressivitât cuintri de minorance serbe, dai rom e dai omosessuâi.

Font: Balkan Insight, 21/05/18

Grecie: gnove agression leade al odi nazionâl

A van indenant in Grecie lis violencis e i ats di intolerance cuintri dai membris des minorancis nazionâls e di cui che al cîr di promovi ativitâts par valorizâ la diversitât linguistiche, nazionâl e religjose. Un dai ultins episodis di cheste fate al è capitât ai 20 di Mai cuant che un grup di fondamentaliscj religjôs e nazionaliscj grêcs al à agredît il sindic di Tessaloniche, Yiannis Boutaris, membri de comunitât valache (o arumene) e promotôr di politichis di inclusion des minorancis. Boutaris ta chescj agns si veve fat notâ pe sô difese de laicitât des istituzions e pe vierzidure tai confronts des minorancis nazionâls e religjosis presintis in citât.

Font: Aljazeera, 19/05/18

Paîs Catalans: Quim Torra gnûf president de Generalitat

Ai 17 di Mai, Quim Torra al à zurât come centetrenteunesim president de Generalitat cuntune cerimonie une vore sclagne par vie de ecezionalitât de situazion che si cjate a vivi in dì di vuê la Catalogne e cence nissun rapresentant dal guvier spagnûl presint. Torra al jere stât elet ai 14 di Mai cun 66 vôts a pro di Junts per Catalunya e ERC, la astension dai 4 deputâts de CUP, e 65 vôts cuintri di Ciudadanos, PSC, Catalunya en Comú-Podem e PP. Tai siei intervents denant dal Parlament de Catalogne prime dal vôt, Torra al veve confermât il so impegn par lâ indenant cul procès costituent de Republiche catalane. Dut câs, se la indipendence e je la part primarie dal so program di guvier, il gnûf president si veve ancje impegnât pe difese dal sisteme scolastic a imersion linguistiche che za di timp al è atacât des autoritâts spagnolis, par une conferme des politichis di acet dai migrants, par une gnove leç su la sanitât e par une incressite des azions a pro de culture.

Paîs Catalans: cun Jugn si invie la gnove tv publiche valenziane

Cui 10 di Jugn si inviaran in maniere stabile e continuative lis trasmissions di À Punt, la gnove television publiche de Comunitât Autonome Valenziane, che e larà a jemplâ il vueit lassât di Canal Nou, sierât par decision de diestre spagnoliste intant de legjislature stade. Lis primis provis tecnichis di emission si son inviadis ancjemò ai 25 di Avrîl. Par ce che si sa, une volte a regjim, la television e proponarà contignûts di ducj i gjenars e par ducj i publics: dai documentaris aes seriis di finzion, dai programs informatîfs a chei par fruts, e v.i. Il guvier progressist nazionalitari valenzian al à ancje lassât la puarte vierte a di un acuardi cun chel catalan par permeti la vision reciproche des dôs televisions publichis – À Punt e TV3 – in maniere di incressi l’acès a programs televisîfs par catalan intai doi teritoris.

Font: VilaWeb, 17/05/18

Gales: nivei linguistics gnûfs inmò te fumate

Lis politichis linguistichis in Gales si centrin cumò sul svilup dai gnûfs nivei di riferiment pe lenghe galese, ven a dî sui servizis linguistics minims che lis aministrazions locâls, i ents publics e lis societâts che a davuelzin ativitâts di interès public a àn di garantî ai citadins. Il guvier galês si mostre però une vore tirât su lis informazions leadis a chest teme al pont che nissun al sa a ce pont che si è cu la definizion dai nivei. Dopo di passe cuatri mês che la oposizion nazionalitarie (Plaid Cymru) e va dilunc a domandâ sclariments almancul su trops che a son i funzionaris impegnâts su chest lavôr, dome cumò la presidente de Assemblee nazionâl, Julie James, e à riferît che dai cuarante funzionaris dal dipartiment pe lenghe galese a saressin cinc chei impegnâts sui nivei di riferiment e suntune gnove leç linguistiche. Dut câs nancje cheste rispueste e permet di capî trop che al mancje par che a jentrin in vore i gnûfs nivei.

Font: BBC, 16/05/18

Paîs Basc: in cressi la presince dal euskara su Internet

Ai 17 di Mai si à decidût di celebrâ la prime Zornade dedicade ae presince de lenghe basche su Internet. La iniziative e je stade la ocasion par scrutinâ il stât di salût dal euskara su la rêt. Massime in gracie dal domini .eus, inviât cuatri agns indaûr, la lenghe basche e va dilunc a incressi sul web: i sîts nassûts cun chest domini a son plui di 8.400 e pal 90% a proponin contignûts par euskara. Se a chescj si zontin chei cun altris dominis, tant che .com o .org, si stime che i sîts che a doprin la lenghe basche a sedin plui di 26 mil. Vie pal 2017 i sîts Internet cul domini .eus a son cressûts dal 22% a front dal 2% di ducj chei altris inviâts intal Paîs Basc.

Font: EiTB, 16/05/18

Irlande: il Consei de Europe al sburte pe leç sul irlandês

Ai 14 di Mai une delegazion dal Consei de Europe incjariade di viodi dal rispiet de Cjarte des lenghis regjonâls o minoritariis e je stade in visite a Béal Feirste / Belfast là che si à cjatade cun diviers rapresentants dal associazionisim nordirlandês. I membris de delegazion si àn mostrâts avonde preocupâts pe mancjance di une leç organiche pe tutele e pe promozion de lenghe irlandese. La presidente de delegazion, Aleksandra Oszmiańska-Pagett, e à di fat ricuardât cemût che la presince di une normative di pueste no sedi dome un dai oblics previodûts cu la ratifiche de Cjarte ma soredut l’imprest miôr par limitâ i efiets de clime politiche dal moment su la tutele di une lenghe. La aprovazion di une leç sul irlandês, in plui di jessi za stade domandade dai esperts dal Consei de Europe, e jere ancje un dai ponts dai acuardis di pâs su la Irlande dal Nord. Magari cussì no, la cuistion e je propit al centri de crisi politiche e istituzionâl che si à vierzude l’an passât e no si à ancjemò sierade. A patî di cheste situazion, in plui dal gaelic irlandês, e je ancje la varietât di scots fevelade te Irlande dal Nord, ancje chê lassade cence misuris organichis di protezion e di promozion.

Font: BBC, 15/05/18

Macedonie: si infuartìs la presince albanese tal guvier

Il rimpast di guvier decidût dal prin ministri macedon, Zoran Zaev, al puartarà a di une presince plui fuarte de rapresentance albanese. Fin cumò l’esecutîf nassût de aleance tra il Partît Sociâl Democratic e la Union Democratiche pe Integrazion, un dai partîts di riferiment de minorance albanese, al gjoldeve de poie di 61 dai 120 deputâts dal Parlament. Par infuartî cheste maiorance e par dâi uficialitât a di une colaborazion che za e jere in vore, intal guvier a jentraran cumò ancje i rapresentants di altris doi partîts de comunitât albanese, ven a dî une part dal moviment BESA e il Partît Democratic dai Albanês, che a puartaran in dote altris cinc deputâts.

Font: Balkan Insight, 15/05/18

Scozie: scuintri istituzionâl cun Londre su la devoluzion

Il Parlament scozês al à votât a grande maiorance cuintri dal progjet legjislatîf imbastît dal guvier britanic pe jessude dal Ream Unît de Union Europeane. Al centri dal contindi e je la clausule su la riassegnazion des competencis cjapadis dentri tal procès di devoluzion scozês ma controladis de Union Europeane, tant che i jutoris pe agriculture o la gjestion de pescje. Il guvier vuidât di Theresa May al à decidût che, cu la jessude de Union, il podê legjislatîf su chescj setôr nol tornarà aes autoritâts scozesis ma al passarà a chês di Londre. Cun di plui, cu la jessude de suaze normative comunitarie, il guvier britanic al varà la pussibilitât di passâ parsore de volontât dai scozês par mieç di gnûfs acuardis internazionâi ancje tai cjamps aministrâts ad in plen di Edimburc tant che la sanitât. A votâ cuintri di cheste clausule, in plui dal SNP, a son stâts ancje i Laburiscj, i Liberâi Democratics e i Verts scozês, lassant dome i Conservadôrs a difindi il guvier di Londre. Sul plan legâl il vôt scozês nol permet di blocâ lis decisions dal esecutîf britanic ma al vierç un scuintri istituzionâl une vore penç e al ufrìs ae prime ministre scozese Nicola Sturgeon la fonde par domandâ un secont referendum su la indipendence.

Font: The Guardian, 15/05/18

Paîs Basc: prime serie digjitâl 4K par basc

Cuasi dutis lis plui impuartantis plateformis di intrateniment tant che Netflix a pretindin che lis produzions che a mandin in onde a sedin in ultradefinizion, o sei cun tecnologjie 4K. Par jentrâ ta chestis rêts di difusion, duncje, cheste tecnologjie e devente simpri plui sante scugne. Cussì e je pronte par partî la regjistrazion de prime serie digjitâl in lenghe basche in 4K. Si trate di une serie di sîs pontadis di vot minûts ognidune che e à non «Puntu koma» e che e viôt in regjie dôs zovinis ae lôr prime esperience cinematografiche, Maialen Sorzabalbere e Amaia Rojo. Une volte finide, la serie e larà in onde su la television publiche EiTB e su Internet, in plui di partecipâ a diviers festivals a teme.

Font: EiTB, 14/05/18

Irlande: inviât a Belfast il gnûf plan linguistic

Il Consei comunâl di Béal Feirste / Belfast al à inviât in maniere uficiâl il gnûf plan linguistic cuincuenâl de citât che si fonde su cinc cjamps di azion principâi, o sei: lenghe irlandese, scots dal Ulster, lenghe dai segns, lenghis des gnovis comunitâts e sistemis di comunicazion specifics pai disabii. Par svilupâ lis strategjiis previodudis dal plan a saran cjapâts sù a vore doi funzionaris di pueste: un pe promozion, pe tutele e pal svilup dal irlandês; e un par incressi la acessibilitât e la inclusion di chei altris lengaçs.

Font: Belfast Telegraph, 14/05/18

Scozie: manifestazion popolâr a pro de indipendence

Contrari di chel catalan, strissinât dai citadins e des organizazions de societât civîl, fin cumò il procès indipendentist scozês al jere stât vuidât massime dal SNP che za di agns al guvierne la Scozie. Alc però al è daûr a cambiâ e l’esempli catalan al pâr che al sedi di ispirazion ancje di chês bandis. Cussì sabide ai 5 di Mai miârs di personis a àn sfilât pes stradis di Glasgow par domandâ la indipendence di Scozie. Si stime che la partecipazion e sedi stade tra lis 50 e lis 80 mil personis. La manifestazion no je stade inmaneade di nissun partît o rapresentant politic, ma e je nassude dal bas. Cundut dal cidin cuasi totâl de stampe britaniche, si fevele de plui grande manifestazion spontanie pe indipendence viodude in Scozie. Un segnâl duncje che alc al è daûr a cambiâ e che nol va cjapât sot gjambe.

Font: The National, 07/05/18

Paîs Basc: ETA e à comunicât la sô dissoluzion definitive

Ai 3 di Mai, alì de fondazion Henry Durant di Gjinevre, la organizazion armade basche ETA e à fat cognossi la sô ultime declarazion là che e conferme il dismantelament de sô struture e la sô dissoluzion definitive. La declarazion che e met fin ai 60 agns de organizazion e je stade compagnade dal video là che doi dai siei ex militants – Josu Urrutikoetxea e Marisol Iparraguirre – le lein par basc e par castilian. La decision e rive sù par jù a un an di distance de consegne dal so arsenâl e a plui di sîs agns de fin de sô ativitât armade.

Paîs Basc: la declarazion integrâl di ETA su la sô dissoluzion

Propit par vie de sô impuartance storiche, us proponìn achì la declarazion integrâl di ETA ancje par furlan:

«ETA, organizazion socialiste rivoluzionarie basche di liberazion nazionâl, e vûl comunicâ al Popul Basc la fin dal so percors, dopo che i siei militants e lis sôs militantis a àn ratificât la propueste di tignî par finîts il cicli storic e la funzion de Organizazion. Tant che consecuence di cheste decision:

• ETA e à dismantelât dal dut la sô struture.
• ETA e calcole finide dute la sô ativitât politiche e no sarà plui un sogjet che al cjape posizions politichis, che al promôf iniziativis o che si confronte cun altris atôrs.
• I e lis ex militantis di ETA a laran indenant a lotâ par un Paîs Basc unît, indipendent, socialist, di lenghe basche e no patriarcjâl in altris cjamps, ognidun là che al à miôr, cu la responsabilitât e cu la onestât di simpri.

ETA e je nassude cuant che il Paîs Basc al jere in agonie, scjafoiât des sgrifis dal franchisim e assimilât dal stât jacobin, e cumò, 60 agns dopo, al esist un popul vîf che al vûl jessi paron dal so avignî, in gracie dal lavôr fat in setôrs diferents e de lote di diviersis gjenerazions.

ETA e vûl sierâ il cicli dal conflit che al met cuintri il Paîs Basc cui stâts [spagnûl e francês] marcât pal ûs de violence politiche. Cundut achel i stâts a indurin a puartâ indenant chest cicli, cussients de lôr debolece tun confront che al sedi dome politic e preocupâts de situazion che e divignarès de soluzion integrâl dal conflit. Par cuintri ETA no à nissune pôre di chest senari democratic e e à duncje cjapât cheste decision storiche par che il procès a pro de libertât e de pâs al ledi indenant par une altre strade. E je la consecuence logjiche de decision cjapade tal 2011 di bandonâ in maniere definitive la lote armade.

Di cumò indenant l’impegn principâl al sarà di svilupâ come popul un procès che al vedi par fondis la union des fuarcis, l’ativisim popolâr e i acuardis tra sogjets diviers sei par frontâ i efiets dal conflit, sei par frontâ lis sôs lidrîs politichis e storichis. Al sarà decisîf dâi cuarp al dirit di decidi par rivâ al ricognossiment nazionâl. L’indipendentisim di çampe al lavorarà par che dut chest al puarti ae nassite di un Stât Basc.

Cheste ultime decision le cjapìn par sburtâ une fase storiche gnove. ETA e je nassude di chest popul e cumò, dentri di lui, si sfante.

Gora Euskal Herria askatuta! Vive il Paîs Basc libar!»

Font: Naiz:, 03/05/18; EiTB, 03/05/18

Galizie: i media in galego a valin il 4,7% de produzion culturâl

L’Observatorio da Cultura Galega al à elaborât i dâts statistics racuelts di diviersis fonts par fâ il pont su la situazion dai mieçs di comunicazion in lenghe galiziane. I media par galizian a son cressûts in maniere graduâl fintremai il 1999 par po cjatâsi prime denant di un ralentament de incressite e po, tra il 2005 e il 2009, a di une diminuzion. Cul 2010, invezit, si à vude une trasformazion significative che e à puartât dispès a lassâ la cjarte stampade pal digjitâl. I mieçs di comunicazion in lenghe galiziane a interessin massime ae fasse di etât tra i 16 e i 29 agns, fasse di etât che però e je chê che si servìs di plui dai media par castilian: une contradizion che e ven spiegade cul fat che i zovins dispès no cjatin par galizian i contignûts che ur interessin di plui. Sul plan economic, si stime che il setôr dai media par galizian al vedi un valôr che al passe i 100 milions di euros (un valôr che si fonde soredut sul servizi radiotelevisîf public), o sei il 4,7% dal valôr de produzion culturâl de Galizie.

Al merete po segnalât che tal ultin mês si àn inviâts doi gnûfs media digjitâi par galego. Si fevele dal Xornal de Vigo, che si propon di fevelâ de atualitât politiche, economiche, culturâl, sociâl e sportive di chest teritori, e dal sît adiante.gal, une plateforme vierte di informazion e di analisi su la atualitât sociâl e politiche de Galizie.

Font: CulturaGalega, 02-03/05/18

Friûl: doi autonomiscj furlans tal gnûf Consei regjonâl

Lis elezions che si son tignudis ai 29 di Avrîl inte Regjon Autonome Friûl – Vignesie Julie a àn puartât a ribaltâ i ecuilibris politics in vore te legjislature stade cu la coalizion di centri diestre che e à vût la poie de maiorance dai eletôrs e chê di centri çampe – al guvier tai cinc agns precedents – che si ricjate come prime fuarce di oposizion. I citadins a àn assegnât la incarghe di vuidâ il gnûf esecutîf regjonâl a Massimiliano Fedriga, cul so partît – la Lega – che al à vût 17 dai 28 elets otignûts dal centri diestre. La coalizion di centri çampe, dongje de elezion dal so candidât president Sergio Bolzonello, e à cjapât 13 dai puescj disponibii in Consei. Il Movimento 5 Stelle, che al coreve in alternative aes dôs coalizions principâls, al à vût cuatri conseîrs elets, un in mancul de legjislature stade. Par tancj aspiets però, la vere novitât di cheste votazion, e je stade la elezion inte Assemblee regjonâl di doi rapresentants dal Pat pe Autonomie: e je la prime volte di un biel pôcs di agns incà che une fuarce autonomiste furlane e torne a vê une rapresentance in Regjon. Il Pat – che nol à podût presentâsi inte circoscrizion di Triest – al à cjapât il 4,1% des preferencis a nivel regjonâl ma, te circoscrizion di Udin (là che la cussience furlane e je plui alte) al à vût il 7,12% dai vôts. Cheste fuarce politiche, che e à refudât ogni acuardi eletorâl cui partîts talians, e à vût la maiorance assolude intal comun di Tramonç Disot (Friûl ocidentâl), e je lade in dople cifre in diviers comuns e te capitâl furlane, Udin, e à cjapât il 9,94% dai consens. In Consei regjonâl si à vût ancje un elet de Slovenska Skupnost, partît rapresentatîf de minorance slovene, che si presentave però dentri de coalizion di centri çampe.

Font: Regione.fvg.it, 30/05/18