29/05/18

Paîs Catalans: Quim Torra gnûf president de Generalitat

Ai 17 di Mai, Quim Torra al à zurât come centetrenteunesim president de Generalitat cuntune cerimonie une vore sclagne par vie de ecezionalitât de situazion che si cjate a vivi in dì di vuê la Catalogne e cence nissun rapresentant dal guvier spagnûl presint. Torra al jere stât elet ai 14 di Mai cun 66 vôts a pro di Junts per Catalunya e ERC, la astension dai 4 deputâts de CUP, e 65 vôts cuintri di Ciudadanos, PSC, Catalunya en Comú-Podem e PP. Tai siei intervents denant dal Parlament de Catalogne prime dal vôt, Torra al veve confermât il so impegn par lâ indenant cul procès costituent de Republiche catalane. Dut câs, se la indipendence e je la part primarie dal so program di guvier, il gnûf president si veve ancje impegnât pe difese dal sisteme scolastic a imersion linguistiche che za di timp al è atacât des autoritâts spagnolis, par une conferme des politichis di acet dai migrants, par une gnove leç su la sanitât e par une incressite des azions a pro de culture.
Cu la partence dal gnûf guvier catalan e varès di rivâ insom la gjestion direte esercitade tai ultins sîs mês di Madrid par mieç dal articul 155 de Costituzion spagnole. Chel istès i dirigjents dai partîts spagnoliscj si preparin za a tornâ a meti in vore la sospension de autonomie catalane, cul PSOE che si è dât dongje a PP e Ciudadanos inte intenzion di cjapâ in man ancje il control di TV3, la television autonome catalane. Par chel che al rivuarde invezit i Mossos d’Esquadra – la polizie catalane – ancje cu la fin de metude in vore dal articul 155, il comant al restarà in cjâf al guvier di Madrid in gracie de leç su la sigurece statâl.
Intant che in Catalogne la repression judiziarie e va indenant cul arest di altris membris dai Comitâts di Difese de Republiche (Comitès de Defensa de la República), o sei i grups metûts in pîts par sostignî il procès di autodeterminazion e par svilupâ azions solidariis cui presonîrs politics, sul plan internazionâl la azion spagnole e va dilunc a pierdi di credibilitât. Lis autoritâts judiziariis de Belgjiche, di fat, a àn refudât di meti in at i ordins di cature cuintri dai ex membris dal guvier catalan Meritxell Serret, Lluís Puig e Toni Comín. A son coladis duncje lis misuris cautelârs che ur jerin stadis imponudis. Cheste decision e podarès vê efiets ancje su lis domandis di estradizion al esam in Scozie pe ex conseire pe educazion Clara Ponsatí e in Gjermanie par Carles Puigdemont, il president dal guvier catalan destituît l’an passât des autoritâts spagnolis.
Font: VilaWeb, 17/05/18; Ara, 14-17/05/18; Naiz:, 14-16/05/18

Nessun commento: