Paîs Catalans: rinviade la elezion dal president de Generalitat

Il president dal Parlament catalan, Roger Torrent, al à decidût di rinviâ la convocazion de assemblee in program lunis ai 12 di Març che e varès vût di puartâ ae elezion dal gnûf president de Generalitat. Un tant in spiete che il tribunâl suprem si esprimi sul ricors cuintri de decision dal judiç Pablo Llarena, che al à in man la inchieste sul indipendentisim catalan, di dineâ a Jordi Sànchez il permès par partecipâ ae riunion dal Parlament (un secont ricors al è pront invezit pal tribunâl european dai dirits umans di Strasburc). Sànchez, za president de ANC e cumò deputât di JxCat, si cjate di plui cuatri mês in preson preventive par vie dal so rûl intal procès di autodeterminazion de Catalogne. Su la elezion di Sànchez a gnûf president dal guvier catalan si vevin cjatâts dacuardi i doi partîts principâi dal front indipendentist – JxCat e ERC – dopo che il tribunâl costituzionâl spagnûl al veve declarât impussibile la elezion di Carles Puigdemont, cumò in esili in Belgjiche, almancul che nol tornàs in Catalogne e che – viodût il mandât di arest che al à sul cjâf – no i fos dât un permès judiziari par partecipâ.

Font: Ara, 09/03/18; Naiz:, 09/03/18

Letonie: pas indenant de leç cuintri des scuelis russis

Ai 8 di Març il Parlament de Letonie al à fate buine in seconde leture la propueste di leç che e met il leton tant che lenghe obligatorie in dutis lis scuelis dal paîs, ancje chês des minorancis (par solit privadis). La riforme si propon di meti il leton come lenghe veicolâr in dutis lis materiis principâls insegnadis intes scuelis bilengâls o a imersion dentri dal 2020. La misure e colpìs massime la comunitât di lenghe russe che e rapresente cuasi un cuart de popolazion. Daûr de propueste di leç, intes scuelis de minorance il rus al restarès come lenghe di insegnament pes oris di lenghe e leterature russe e pes materiis di aree storiche – umanistiche. Prime che la propueste e deventi leç e covente ancjemò une leture in Parlament e la firme dal president de Republiche, ma la iniziative e à za jevât la mobilitazion de comunitât russofone che e à imbastît protestis e mobilitazions di place.

Font: TASS, 09/03/18

Gales: politichis pe lenghe, scuintri su lis consultazions

Il guvier galês al à davuelt une consultazion publiche sul so progjet di riforme de legjislazion linguistiche. Lis rispuestis cjapadis sù a son stadis 504 che i si zontin altris 278 tiradis dongje cun trê campagnis diferentis de organizazion Cymdeithas yr Iaith che però i funzionaris dal guvier no àn calcolât te lôr totalitât ma dome come trê contribûts singui. Ta cheste maniere, e à protestât la organizazion pe lenghe, i risultâts de consultazion a son stâts strassomeâts a fuart. Daûr dai calcui dai funzionaris dal guvier, juste par fâ un esempli, une des propuestis di riforme plui impuartantis dal esecutîf galês – o sei di sostituî l’ufici dal comissari pe lenghe cuntun altri organisim – e cjatarès contraris o in dubi il 56% dai partecipants ae consultazion; invezit, se si tignìs cont di dutis lis rispuestis singulis, i contraris o in dubi a saressin plui dal 70% dal totâl. Rapresentants dal esecutîf a àn ametût che la proteste e à mani e che a tignaran cont dai indreçaments che a rivin des campagnis de Cymdeithas.

Font: BBC, 07/03/18

Irlande: Raidió Rí-Rá ancje in FM ma dome par dîs dîs

Par celebrâ i siei dîs agns di vite Raidió Rí-Rá, la emitente musicâl indreçade ai zovins che e dopre il gaelic irlandês in ducj i siei spazis fevelâts, si podarà scoltâle par dîs zornadis ancje in modulazion di frecuence tes areis di Baile Átha Cliath / Dublin, Corcaigh / Cork, Gaillimh / Galway e Luimneach / Limerick. Pe ocasion la programazion e sarà plene di musiche dal vîf e di ospits che si proponaran come condutôrs di ecezion. Par solit la maiorance dai presentadôrs de emitente e je formade di students che a rivin di diviersis scuelis de isule. Vie pal an Raidió Rí-Rá e inmanee ancje iniziativis cui students des primariis e des secondariis par fâur provâ in prime persone ce che al vûl dî fâ radio. Par cumò la emitente si pues scoltâle dome su Internet (www.rrr.ie) e cuntune app: cun cheste sperimentazion in modulazion di frecuence si permetarà duncje di dâ une cerce de radio a di un public plui larc.

Font: CnaG, 07/03/18

Irlande: il consei di Belfast al poie la leç pal gaelic

Il consei comunâl di Béal Feirste / Belfast al à fate buine une mozion presentade dal partît People Before Profit là che si domande al Parlament nordirlandês une leç organiche pe tutele e pe promozion de lenghe gaeliche irlandese. Dopo di une jentrade tignude di un rapresentant de organizazion pe lenghe Conradh na Gaeilge, si à inviade une discussion là che i conseîrs si son confrontâts a muse dure. I rapresentants dai partîts unioniscj a àn votât cuintri dal document ancje se cun motivazions diviersis, di cui che al à fevelât di meti i bêçs su cuistions judicadis plui impuartantis a cui che al acusave i aversaris di doprâ l’irlandês come une arme politiche par colpî la comunitât unioniste comprendûts chei tra di lôr che la lenghe le fevelin. Ae fin, dut câs, la mozion e je passade cun 34 vôts a pro e 22 contraris.

Font: Belfast Telegraph, 06/03/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Galizie / León: nuie fonts ai ents locâi dal Bierzo pal galizian

La Xunta, ven a dî il guvier de Galizie, e à dite di no al apel dal coletîf Fala Ceibe par incressi lis risorsis aministrativis, economichis e umanis dai ents locâi dal Bierzo in maniere di infuartî l’ûs de lenghe proprie ta chest teritori di lenghe galiziane cjapât dentri te comunitât di Castilie e León. Il teme al jere stât puartât ae atenzion dal Parlament dai rapresentants dal Partît Socialist (PSOE) e dal BNG, ma il Partît Popolâr (PP) che al à la maiorance te Assemblee galiziane al à boçât la iniziative limitantsi a confermâ lis misuris di jutori in vore in dì di vuê che si centrin sul insegnament intes scuelis.

Font: Diario de León, 04/03/18

Ocitanie: Consei Gjenerâl di Aran adun pal aranês

Ai 28 di Fevrâr il Consei Gjenerâl di Aran al à fate buine ae unanimitât une mozion a pro de promozion e de tutele dal aranês come lenghe proprie de Val di Aran, valade pirenaiche dal principât di Catalogne là che si fevele une varietât linguistiche ocitane. La iniziative e nas tant che proteste pe sentence dal tribunâl costituzionâl spagnûl che e scancele i articui de leç sul ocitan – fate buine dal Parlament catalan intal 2010 – che a calcolin l’aranês come lenghe di ûs preferenziâl des aministrazions locâls de Val di Aran. La decision dal tribunâl, che e rive a sîs agns de impugnazion de leç, si compagne a diviers atacs cuintri dal aranês rivâts dal guvier spagnûl e in particolâr dal ministri pe istruzion e pe culture, Íñigo Méndez de Vigo. Inte mozion si domande ancje al guvier catalan di sostignî gnovis misuris in stât di incressi l’ûs sociâl dal ocitan e si propon di meti in pîts une comission pal aranês. Par rispuindi ai atacs cuintri de lenghe proprie lis associazions de valade impegnadis pe lenghe a àn clamât dongje une manifestazion che si tignarà ai 24 di Març.

Font: Jornalet, 02/03/18

Corsiche: confront su autonomie e riforme de Costituzion

La delegade pai afârs cors dal guvier francês, Jaqueline Gourault, ai 27 di Fevrâr si à tornade a cjatâ cui rapresentants de Comunitât Teritoriâl de Corsiche e ur à confermât che la isule e sarà cjapade dentri te propueste di revision de Costituzion republicane che il president francês Emmanuel Macron al è daûr a imbastî. La ministre e à fat savê che la isule e jentrarà tal articul 72 che al fronte il dirit ae “diferenziazion”, ma che si varà ancje un articul di pueste che al varès di ricognossi ae Corsiche dai podês specifics, di definî po cuntune leç ordenarie. Chestis mendis ae Costituzion a laressin duncje a infuartî la autonomie de isule, ancje se par cognossi cualchi detai in plui in proposit si varà di spietâ la prossime taule di confront che e varès di davuelzisi te prime metât dal mês di Març. Si trate dut câs di une strade di rive sù dal moment che, se ancje Macron al rispietarà lis sôs promessis, par che la riforme de Costituzion e passi a coventin i vôts a pro di almancul trê cuints dai parlamentârs francês.

Chel istès, ai 8 di Març, par marcâ cun inmò plui fuarce la posizion des istituzions de isule, la Assemblee de Corsiche e à votât une propueste di articul di meti te Costituzion francese là che si esplicite la autonomie de isule e la devoluzion di diviersis competencis. Il test al è passât cun 48 vôts a pro su 63. A votâ cuintri dome lis diestris statalistis.

Font: Alta Frequenza, 28/02/18 e 09/03/18; Corsica Oggi, 28/02/18

Paîs Basc: prin pas pe gnove leç sul euskara de Navare

La presidence dal Parlament de Navare e i presidents dai grups parlamentârs a àn fatis buinis a maiorance lis normis istitutivis de comission speciâl che e à la incarghe di meti jù une gnove leç sul euskara in stât di superâ la division in trê areis linguistichis in vore fin cumò e di ricognossi il basc come lenghe uficiâl in dute la Navare. Il document al è stât fat bon dai rapresentants de maiorance nazionalitarie e progressiste (Geroa Bai, EH Bildu, Elkarrekin Podemos e Izquierda Ezkerra), intant che i àn votât cuintri i popolârs (PP), i socialiscj (PSN) e la diestre regjonaliste (UPN).

Font: Noticias de Navarra, 27/02/18

Paîs Basc: simpri plui euskara tal sport

In cressi la presince de lenghe basche ancje tal sport. Dôs lis gnovis rivadis sul finî di Fevrâr che a van ta cheste direzion. La prime e je la conferme, rivade dal diretôr gjenerâl dal Tour de France Christian Prudhomme, che l’euskara al sarà lenghe couficiâl dal zîr inte tape dai 28 di Lui che si davuelzarà tra lis localitâts di Senpere e Ezpeleta, intal Paîs Basc francês. Dilunc dai 31 chilometris di cheste tape dutis lis comunicazions e ducj i segnâi uficiâi dal Tour a saran ancje in lenghe basche. La seconde gnove e rive dal Osasuna – scuadre di Pamplone che e zuie tal massim campionât di balon dal stât spagnûl – là che la dirigjence de societât e à fat savê di vê lançât un gnûf canâl Twitter e une gnove pagjine Facebook di plante fûr par euskara. La lenghe basche e sarà po integrade in maniere progressive ancje tal sît uficiâl de scuadre e te comunicazion cui abonâts dal Osasuna.

Font: EiTB, 21 e 26/02/18

Scozie: plui risorsis pal insegnament plurilengâl

Il guvier scozês, par bocje dal ministri Jamie Hepburn, al à fat savê che al zontarà altris trê milions di sterlinis intal belanç des scuelis pal an 2018-2019 par infuartî l’insegnament plurilengâl che, dal 2013 incà, al à viodût invistiments par passe 27 milions. La Scozie e à di fat inviât il model linguistic 1+2 che al previôt che, za cul prin an di scuele, i fruts a tachin a studiâ une lenghe foreste intant che une seconde e je zontade tal cuint an des primariis. Chestis lenghis a àn di jessi studiadis almancul fintremai il tierç an des secondariis. Tra lis lenghis disponibilis, dongje di variis lenghis europeanis e dal cinês mandarin, si à ancje il gaelic scozês che, ta cheste maniere, al pues jessi studiât ancje fûr de aree tradizionâl là che al è fevelât.

Font: Sunday Post, 20/02/18

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.

Europe: fate buine une mozion pai dirits des minorancis

Il Parlament european al à fate buine la mozion par une risoluzion su la protezion e la no discriminazion des minorancis intai stâts membris de Union Europeane. Il document al marche cemût che fin cumò lis istituzions comunitariis a àn fat masse pôc su chest front e al riclame duncje la Union aes sôs responsabilitâts intal difindi e intal promovi i dirits des comunitâts minorizadis che a vivin dentri dai siei confins. La mozion e invide a disvilupâ politichis che a previodin la partecipazion di chestis comunitâts, a imbastî imprescj che a permetin di controlâ pardabon il rispiet dai dirits des minorancis e a esplicitâ la protezion e la no discriminazion des comunitâts minorizadis intai tratâts europeans. Intal document si ricuarde po la impuartance di chestis comunitâts pe coesion sociâl e si invide ducj i stâts membris a promovi la diversitât linguistiche e a garantî i dirits des minorancis ancje cu la ratifiche dai imprescj za in vore tant che la Cjarte europeane des lenghis regjonâls o minoritariis, la Convenzion cuadri pe protezion des minorancis nazionâls e il Protocol pe protezion dai dirits umans e des libertâts di fonde. Cun di plui, si domande ae Comission europeane di infuartî la promozion dal ûs e dal insegnament des lenghis minorizadis.

Font: EFA / European Parliament, 09/02/18

Corsiche: rie di ‘no’ di Macron aes domandis dai cors

Inte suaze de sô visite in Corsiche, il president francês Emmanuel Macron al à rispuindût cuntune rie di ‘no’ aes rivendicazions puartadis indenant de maiorance nazionalitarie che e je al guvier de Coletivitât Teritoriâl uniche de isule.

Paîs Catalans: AI e domande la liberazion dai presonîrs politics

La organizazion Amnesty International, par bocje de sô diretore europeane Gauri van Gulik, e à domandât che i dirigjents indipendentiscj catalans che si cjatin ancjemò impresonâts a sedin liberâts daurman. Il riferiment al è ai presidents des dôs organizazions in prime linie intal procès di autodeterminazion, Jordi Sànchez e Jordi Cuixart, che si cjatin aromai di cuatri mês in preson preventive in spiete dal procès. Par Amnesty International, ancje se lis protestis popolârs vuidadis dai doi Jordis a fossin di tignî di turbative dal ordin public, in ogni câs no si pues calcolâlis di sedizion o riviel. Tignîju in preson preventive duncje nol è dome disproporzionât, ma ancje une violazion de libertât di espression e dal dirit di dâsi adun. La organizazion pai dirits umans si mostre preocupade ancje pes decisions dal judiç dal tribunâl suprem, Pablo Llarena, di tignî in preson il vicepresident dal guvier catalan, Oriol Junqueras, e il conseîr dal interni catalan, Joaquim Forn, cun chest ultin che si à fintremai dimetût di deputât par evitâ che si lu acusi di podê meti in vore azions politichis a pro de indipendence.

Font: The Guardian, 07/02/18

Ream Unît: prin dibatit parlamentâr par galês

Ai 7 di Fevrâr, pe prime volte, diviers parlamentârs a àn vût la pussibilitât di fevelâ par galês intant di un dibatit parlamentâr a Westminster. La ocasion si à presentade cu la riunion dal grant comitât galês, un organisim dal Parlament britanic formât dai cuarante deputâts elets in Gales e di parlamentârs di altris circoscrizions, che si à dât adun par scrutinâ un pocjis des misuris economichis fatis indenant inte suaze de ultime manovre finanziarie. Dome l’an passât il guvier di Londre al à autorizât l’ûs de lenghe galese intant dai lavôrs di chest organisim parlamentâr.

Font: BBC, 07/02/18

Paîs Basc: ancje il Biarritz Olympique pal euskara

Ai 6 di Fevrâr la societât di rugby Biarritz Olympique e la aministrazion de citât basche a àn sotscrit une convenzion pal ûs dal euskara. La firme e varès cumò di puartâ ae presince de lenghe basche te comunicazion uficiâl de societât sportive e al so ûs intant des ativitâts di animazion fatis dilunc vie des partidis zuiadis in cjase. Un grup di lavôr formât dai rapresentants de societât e dal comun al viodarà cumò di meti a pont i detais di chestis e di altris misuris prime che si invii la prossime stagjon.

Font: Seizh.info, 07/02/18

Irlande: in piês l’insegnament dal gaelic tes primariis

Daûr dai 5.500 controi davuelts dai ispetôrs dal ministeri pe educazion irlandês intes scuelis de Republiche tai ultins cuatri agns al ven fûr un lâ in piês dai nivei cualitatîfs dal insegnament de lenghe gaeliche, massime tes primariis. Il 28% des lezions di irlandês a son stadis valutadis sot de suficience, a front di un 7% di chês par inglês e di a pene un 4% di chês di matematiche. Di nivel une vore bon a saressin invezit juste il 12% des lezions di irlandês, cuintri dal 27% di inglês e dal 33% di matematiche. Intes secondariis la situazion e je un tic miôr rispiet ai risultâts de ispezion dal 2013 ma, chel istès, no je cui sa ce buine. Un tant al è leât ancje ae incressite dal numar dai iscrits e ae diminuzion de spese par student che, dal 2010 incà, si à sbassade dal 15%. I ispetôrs a domandin duncje di inviâ gnovis misuris par incressi i nivei di insegnament dal irlandês, a partî di mudaments intal curriculum e te formazion dai professôrs.

Font: RTÉ, 05/02/18

Bretagne: azion dimostrative di Ai’ta! a pro dal breton

A pene il 3% dai students a puedin studiâ par breton intai istitûts bilengâi parificâts e tes scuelis a imersion Diwan, su la television publiche la lenghe bretone e je presinte dome une ore e mieze par setemane, inte plui part dai servizis publics l’ûs de lenghe proprie nol è permetût, i nons storics bretons a vegnin impedîts dai uficis anagrafics e, cundut dai acuardis sotscrits inmò tal 2015, la segnaletiche stradâl dilunc des stradis statâls de Bretagne e continue a jessi dome par francês. In rispueste a cheste situazion il coletîf Ai’ta! al à rivendicât une gnove azion simboliche metude in at sul prin tacâ di Fevrâr cuant che, vie pe stesse gnot, i siei militants a àn dismontât i panei segnaletics dome par francês logâts dilunc di dîs tratis des autostradis che a scjavacin la Bretagne. Tal comunicât stampe di rivendicazion a àn ancje fat savê che lis menacis che i rivin des prefeturis no fermaran lis lôr ativitâts dimostrativis.

Font: ABP, 03/02/18