Irlande: gnûf apel par une leç sul gaelic intal Nord

La organizazion pe lenghe irlandese Conradh na Gaeilge e à contatât ducj i partîts politics de Irlande dal Nord e de Republiche di Irlande par domandâ un incuintri urgjent cui lôr dirigjents. Il stes e à fat ancje cu la segretarie di stât pe Irlande dal Nord, cul prin ministri e cul president de Republiche. L’intindiment al è chel di sburtâju a fâ la lôr part par che tal Nord si fasi buine une leç organiche pe lenghe irlandese. La stesse organizazion e à za imbastît une propueste e e à calcolât i coscj de sô metude in vore ma, cundut che e gjolt de poie di 50 dai 90 parlamentârs nordirlandês, la oposizion dai partîts unioniscj e pidimente ogni pas indenant. La leç sul irlandês e je un dai grops che a son daûr de crisi di guvier che si strissine zaromai di un an.

Font: CnaG, 22/01/18

Bretagne: prometûts invistiments sul liceu Diwan

Il liceu Diwan di Karaez / Carhaix al è l’unic istitût superiôr di cheste fate in Bretagne. In dì di vuê al rive a dâi acet a 380 students, ma cul cressi des domandis la situazion e je simpri plui grivie. Ai 19 di Zenâr il president de Regjon, Loïg Chesnais-Girard, al à visitât il liceu e al à sigurât che a son disponibii 3 milions di euros par procedi a slargjâ la struture e che si intint di fâ sù un secont liceu a imersion breton inte citât di Gwened / Vannes, ma nol à dât nissune informazion sui timps che a coventaran par meti in vore i doi progjets.

Font: Le Télégramme, 19/01/18

Asturiis: alerte sui atacs ae uficializazion dal asturian

Il president de Academia de la Llingua, Xosé Antón González Riaño, al à denunciât la campagne di disinformazion metude in at dal PP e di altris grups che a vuelin impedî la uficializazion dal asturian. Par fâur cuintri al à duncje sclarît chei elements leâts al ricognossiment de uficialitât de lenghe proprie des Asturiis che a son stâts strassomeâts par spaurî la opinion publiche. Sul plan dai coscj il PP al à fevelât di 50 milions di euros, par González Riaño invezit no si passaressin i 20 milions di euros par an, o sei a pene il 0,35% dal belanç de Comunitât asturiane; cifre che no va calcolade di spese ma di invistiment viodût che e sviluparès ativitâts economichis e ocupazion. No je vere nancje che i dipendents publics a saressin ducj obleâts a imparâ la lenghe, al à dite il president de Academia de la Llingua, l’asturian al sarès un oblic dome par pocjis posizions che a àn a ce viodi in mût diret cu la lenghe e par ducj chei altris al sarès al plui un element di merit intai concors. Par chel che al rivuarde la scuele, no si ponte a di un model a imersion ma a di une presince curicolâr come che si à za te Comunitât Valenziane o in Galizie. Dal sigûr invezit, cu la uficialitât, la lenghe e varà di vê une presince une vore plui grande tai mieçs di comunicazion.

Font: La Vanguardia, 18/01/18

Macedonie: il president nol firme la leç su lis lenghis

Il president de Macedonie, Gjorge Ivanov, al à decidût di no firmâ la gnove leç su lis lenghis fate buine dal Parlament de Republiche balcaniche ai 11 di Zenâr. Il proviodiment al à chê di incressi il status dal albanês e di slargjâ la sô uficialitât ancje tai comuns là che la comunitât albanese no rive al 20% de popolazion totâl. Ivanov al à motivât la sô decision cul dî che la leç no sarès costituzionâl. Par superâ chest pidiment al covente che il Parlament al torni a votâ la normative. A chel pont par impedî che e vegni metude in vore e coventarès une sentence de cort costituzionâl.

Font: Balkan Insight, 17/01/18

Corsiche: prins cartei par cors a Bastia

Il Comun di Bastia al à tacât a meti fûr i prins 170 cartei stradâi par cors. La iniziative si insuaze tal progjet di politiche linguistiche de Coletivitât Teritoriâl de Corsiche. Si trate de prime segnaletiche stradâl di cheste fate (dâ la precedence; aree 30; atents, scuele) dal moment che fin cumò il bilinguisim al interessave dome la toponomastiche e il non des viis.

Font: Corsica Oggi, 13/01/18

Irlande: gaelic margjinâl tes radios de Republiche

Daûr di un studi che al cjape in esam l’ûs dal gaelic in 59 radios de Republiche di Irlande vie pal 2017 al ven fûr che la presince de lenghe nazionâl e je dal dut margjinâl. La leç su la radiotelevision dal 1988 e oblee dutis lis radios a garantî spazis par irlandês inte lôr programazion. Chel istès, cuatri radios comerciâls e une comunitarie no àn olme di gaelic intai lôr programs, intant che altris cuatri no àn nancje une trasmission inta cheste lenghe ma dome cualchi fruçon cuotidian che nol passe la miezore par setemane. Dispès ancje cuant che i programs a son, a son metûts tes fassis orariis piês. Il gaelic al è scjars fintremai tes radios locâls des conteis là che la lenghe e je plui doprade. In tancj câs la presince dal irlandês e je leade a moments di comicitât o folclorics. Gjavade la emitente di stât RTÉ, no si à nissune stazion che e trasmeti notiziaris informatîfs cuotidians par gaelic.

Font: Irish Examiner, 12/01/18

Paîs Basc: cuasi in cent mil a Bilbao pai presonîrs

Sabide ai 13 di Zenâr miârs di personis a àn rispuindût al apel de rêt citadine Sare e a àn partecipât a Bilbo / Bilbao a di une gnove manifestazion par sburtâ lis autoritâts spagnolis a meti fin aes misuris ecezionâls in vore cuintri dai presonîrs bascs. A sîs agns di distance de fin de lote armade de bande di ETA e cundut dal disarmament totâl de organizazion rivât insom l’an passât, dai pas fats dal Coletîf dai Presonîrs Politics Bascs (EPPK) e des cjoltis di posizions rivadis de maiorance des fuarcis politichis de Comunitât Autonome Basche, de Navare e de Coletivitât dal Paîs Basc francês, lis autoritâts di Madrid a van dilunc a mantignî politichis penitenziariis straordenariis e punitivis cuintri dai presonîrs bascs e a blocâ ogni soluzion politiche dal conflit.

Font: Naiz:, 13-14/01/18; EiTB, 13/01/18

Paîs Catalans: nuie presince in Parlament pai elets in preson

Oriol Junqueras, Joaquim Forn e Jordi Sànchez – i trê rapresentants dal indipendentisim catalan elets intes elezions dai 21 di Dicembar e che a son ancjemò in regjim di preson preventive – no varan la pussibilitât di partecipâ aes riunions dal Parlament de Catalogne. La decision e je stade cjapade dal judiç dal tribunâl suprem spagnûl che al à in man il procediment cuintri dal indipendentisim catalan, Pablo Llarena, che za prime ur veve dineât la pussibilitât di jessi di preson su cauzion. Pal magjistrât i trê a gjoldin di une poie sociâl cussì grande che i lôr trasferiments in ocasion des riunions dal Parlament a saressin a risi di causâ scuintris seris tra lis fuarcis di polizie e i citadins. Dal moment che Junqueras, Forn e Sànchez no àn pierdût il lôr dirit ae rapresentativitât politiche, par Llarena e à di jessi la presidence dal Parlament catalan a decidi la maniere che a puedin delegâ il lôr vôt a altris deputâts. Cun cheste decision il judiç al interven in maniere direte e invasive su lis primis votazions dal Parlament catalan là che si varà di nomenâ propite la presidence de Assemblee e là che duncje il front indipendentist si ricjatarà cun trê vôts in mancul.

Font: Ara: 12/01/18; Naiz:, 12/01/18

Macedonie: fate buine la gnove leç pal albanês

Ai 11 di Zenâr il Parlament de Macedonie, cul vôt a pro di 69 dai 120 deputâts, al à fate buine la gnove leç su lis lenghis previodude tal acuardi di guvier tra i Sociâi Democratics e i partîts de comunitât albanese che ju sostegnin. I albanês a rapresentin un cuart dai passe 2 milions di abitants de Macedonie. Fin cumò la lenghe albanese e jere couficiâl in ducj i comuns là che cheste comunitât e rapresentave almancul il 20% de popolazion. Cu la gnove leç si va a incressi il status de lenghe ancje là che i albanês no rivin a cheste percentuâl e si facilite il so ûs cu lis istituzions.

Font: Balkan Insight, 11/01/18

Paîs Catalans: azions pal ûs de lenghe tal cumierç

Il Consorzi pe normalizazion linguistiche dal guvier catalan al va dilunc a lavorâ par promovi l’ûs de lenghe proprie massime tal cjamp socioeconomic, dal moment che al è un dai setôrs de societât che al svilupe plui relazions comunicativis inte vite di ogni dì. Si à cussì imbastît une sezion specifiche pal cumierç dal Volontariât pe lenghe che vie pal 2017 e à vût la adesion di cuasi 3 mil buteghis là che cui che al vûl perfezionâ il catalan al cjate personâl disponibil a judâlu a miorâ lis sôs capacitâts linguistichis. Ae campagne «I tu, jugues en català», che e sburte l’ûs de lenghe proprie intal cjamp dai zûcs, a àn invezit za aderît disesiet impresis costrutoris e plui di cuatri cent ponts di vendite. Dut chest compagnât di une serie di altris servizis pensâts di pueste par saborâ l’ûs dal catalan intes impresis e tal cumierç.

Font: Generalitat de Catalunya, 09/01/18

Gales: lenghe proprie pôc doprade te Assemblee

Intal ultin an, intant des riunions de Assemblee Nazionâl dal Gales, la lenghe proprie e je stade doprade pal 12% dal timp. A front di cualchi ecezion tant che la deputade dal Plaid Cymru Sian Gwenllian (cun intervents fats pal 99% par galês) o la presidente de Assemblee Elin Jones (84%), la plui part dai elets si mostre une vore clipe tal doprâ la lenghe proprie. A denunciâ cheste situazion e je la organizazion pe lenghe Cymdeithas yr Iaith Gymraeg che i conteste al esecutîf di jessi il prin a dâ il brut esempli. Il prin ministri Carwyn Jones, cundut che al à une otime paronance de lenghe, al à doprât il galês dome tal 10% dai siei discors intant che Dafydd Elis-Thomas cumò che al è ministri al dopre la lenghe proprie une vore di mancul di cuant che al jere deputât. Chescj elements – e dîs la Cymdeithas – a mostrin a clâr che si à un probleme te maniere che al opere il guvier.

Font: BBC, 08/01/18; Cymdeithas, 09/01/18

Corsiche: prin dialic cun Parîs su lis riformis

Dopo de vitorie storiche che i à dât ae aleance nazionalitarie di Pè a Corsica la maiorance assolude te Assemblee de isule, ai 5 di Zenâr la ministre francese pal interni Jacqueline Gourault e je svolade in Corsiche par cjatâsi cui doi rapresentants principâi de coalizion – Gilles Simeoni e Jean-Guy Talamoni – che, ae fin dal incuintri, si son declarâts sodisfats pe volontât di dialic mostrade de delegade dal guvier centrâl. Al è di dî che fin cumò a Parîs si son mostrâts sorts sui ponts principâi dal program di Pè a Corsica, ven a dî la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie. Dopo di chest prin incuintri di cortesie, si varà ocasion di stazâ la disponibilitât vere dal guvier francês ai 22 di Zenâr intant di une riunion tra il prin ministri e la rapresentance de Coletivitât Teritoriâl uniche de Corsiche e in Fevrâr cuant che al è in program un incuintri cul president francês Emmanuel Macron.

Font: Alta Frequenza, 06/01/18; Jornalet, 08/01/18

Paîs Basc: Herri Urrats in program ai 13 di Mai

La edizion di chest an dal Herri Urrats, la fieste des ikastolas dal Paîs Basc setentrionâl sot aministrazion francese, e je in program ai 13 di Mai inte localitât di Senpere / Saint-Pée-sur Nivelle. Lis risorsis racueltis intant de manifestazion a saran impegnadis par judâ lis ativitâts dal istitût superiôr “Manex Erdozaintzi Etxart” frecuentât di students che a rivin des provinciis de Basse Navare e de Zuberoa. Simpri par sostignî lis ikastolas, Seaska – la rêt che e met adun lis scuelis a imersion in lenghe basche – e à inmaneât ai 12 di Zenâr un apontament cui vot finaliscj dal campionât di bertsolaris, il cjant improvisât tipic de tradizion basche.

Font: EiTB, 05/01/18

Irlande: 2018 proclamât an dal gaelic

Intal inovâl dai 125 agns di nassite de Leghe Gaeliche (Conradh na Gaeilge) e dal moviment di rinassince de lenghe irlandese, il 2018 al è stât proclamât «Bliain na Gaeilge», an dal gaelic. Pal prin ministri de Republiche di Irlande, Leo Varadkar, si trate di une ocasion par imparâ miôr e di plui su la lenghe proprie de isule e par stiçâ amîs, vicins e coleghis a doprâle inte vite di ogni dì. La organizazion Conradh na Gaeilge e à invidât ducj a doprâ di plui l’irlandês dilunc vie di chest an, a partecipâ ai apontaments inmaneâts par celebrâ l’aniversari e a meti adun iniziativis par valorizâ la lenghe e par metile al centri de discussion politiche e sociâl de Irlande.

Font: Irish Central, 04/01/18

Aragon: prin curt animât par aragonês

Ai 4 di Zenâr al è stât presentât il prin curtmetraç a disens animâts par aragonês. La iniziative e nas de colaborazion jenfri il guvier de comunitât autonome e l’istitût di art di Zaragoza. La opare e met sul schermi il libri “Lo Gorroroi” (barete rosse) scrit intal 2016 di Saúl Irigaray e ambientât inte localitât di Bielsa intant de vuere civîl spagnole. L’adatament cinematografic al è stât curât di Chusé Raúl Usón e la animazion di Patricia Sánchez.

Font: Aragon Digital, 04/01/18

Gales: gnovis azions pe devoluzion de tv par galês

Cul an gnûf lis mobilitazions inviadis de organizazion pe lenghe Cymdeithas yr Iaith Gymraeg par otignî di Londre la devoluzion al guvier galês des competencis e des risorsis pal setôr radiotelevisîf a àn cjapât ancje une altre forme. Cun di fat, par tignî alte la atenzion su cheste cuistion diviersis personis a àn partecipât a di un dizun di 24 oris che si zonte al siopar dal paiament dal cjanul radiotelevisîf, al coinvolziment di personaçs famôs ae campagne e aes azions di stamp plui politic. Il trasferiment des competencis al ven calcolât tant che l’unic mieç par difindi la television in lenghe galese S4C e par garantî une informazion plui atente al teritori. Il 52% dai galês al è a pro de devoluzion e dome il 27% si mostre contrari.

Font: Cymdeithas, 02/01/18

Federazion Russe: protestis pe lenghe e pal ambient dai Komis

Ancje sul finî dal mês di Dicembar inte Republiche autonome dai Komis a son ladis indenant lis iniziativis di proteste par difindi l’insegnament de lenghe proprie e cuintri dal incuinament ambientâl. Il guvier locâl al à proibît di tignî un referendum che si proponeve di obleâ lis compagniis petrolifaris a sostituî dutis lis tubaduris cun plui di vincj agns che a causin la plui part dal incuinament che al colpìs cheste aree. Associazions ambientalistis e comunitâts locâls a cirin duncje di tignî impiade la atenzion su chest probleme. A cheste reson si à zontade po ancje la difese dal insegnament curicolâr dal komi, lenghe ugrofiniche proprie di cheste Republiche, che diviers rapresentants politics locâi a volaressin mudâ in opzionâl, massime dopo des declarazions fatis in Lui dal president Vladimir Putin su la prioritât dal insegnament dal rus ancje tes Republichis autonomis a dam des lenghis locâls. Cundut dai risis, disinis di personis a àn aderît aes protestis in diviersis localitâts de Republiche ancje cun slogans cuintri dal president rus.

Font: The Independent Barents Observer, 28/12/17

Paîs Catalans: inmò maiorance indipendentiste in Catalogne

Lis elezions pal Parlament catalan clamadis dongje dal guvier di Madrid ai 21 di Dicembar a àn tornât a dâi la maiorance aes fuarcis indipendentistis. Cun di fat, cundut di une campagne eletorâl condizionade de sospension dal autoguvier de comunitât autonome e de presince di diviers candidâts in preson o in esili, i citadins catalans a àn assegnât 70 dai 135 puescj disponibii in Parlament ai partîts sovraniscj e, plui in detai, 34 a son lâts a Junts per Catalunya – liste vuidade di Carles Puigdemont (president deponût cumò in esili a Bruxelles) e che si poie massime sul PDeCAT – 32 a ERC (che il so leader Oriol Junqueras si cjate ancjemò in preson preventive) e 4 ae CUP. Il partît plui votât però al è stât Ciudadanos che al à otignût il vôt di un catalan su cuatri e 37 deputâts in Parlament. Il sucès dal partît vuidât di Inés Arrimadas al è rivât massime su la piel dal PP: il partît tradizionâl de diestre spagnoliste al è di fat colât di 11 parlamentârs a 3. A completâ il front unionist a son po i 17 deputâts dal PSC. Catalunya en Comú-Podem – formazion a pro de autodeterminazion ma contrarie a di un percors unilaterâl di indipendence – e à invezit otignût 8 deputâts. I gnûfs elets a jentraran in cjarie dentri dai 23 di Zenâr e a varan po uns cuindis dîs par inviâ la discussion su la presidence.

Paîs Basc: blocât l’aument dal euskara tes scuelis di Pamplone

Une sentence dal tribunâl superiôr di justizie de Navare e boce il mudament dal model linguistic decidût de aministrazion comunâl di Pamplone in dôs scuelis de infanzie de citât. Dopo agns che si domandave di cressi i puescj disponibii cul model a imersion in lenghe basche, il guvier locâl al veve riformât la ufierte scolastiche citadine puartant i puescj disponibii par euskara di 164 a 408 e sbassant di 255 il numar di chei par castilian o par castilian e inglês. Un intervent che però, pe magjistrature, nol a rispietât il percors previodût de leç.

Font: EiTB, 12/12/17

Montenegro: ricognossiment internazionâl pal montenegrin

Ae fin di un percors durât nûf agns, lis autoritâts dal Montenegro a àn otignût un codiç ISO pal montenegrin (CRN). Chest ricognossiment i da un valôr di uficialitât internazionâl a cheste lenghe che, fin cumò, e vignive calcolade une varietât dal serp. La costituzion di chest paîs balcanic za tal 2007 i assegnave al montenegrin il status di lenghe uficiâl, status che si veve po slargjât intal 2011 a dut il sisteme scolastic public cundut che, propit intal censiment di chel an, il 44% de popolazion al declarave di fevelâ par serp a front di un 36% che al indicave il montenegrin come lenghe proprie. Cun chest gnûf passaç, il montenegrin si infuartìs ancje sul plan internazionâl, intant che i partîts di oposizion e diviersis organizazions a denunciin un aument des discriminazions cuintri di cui che al dopre la lenghe serbe.

Font: Balkan Insight, 12/12/17