Paîs Catalans: azions pal ûs de lenghe tal cumierç

Il Consorzi pe normalizazion linguistiche dal guvier catalan al va dilunc a lavorâ par promovi l’ûs de lenghe proprie massime tal cjamp socioeconomic, dal moment che al è un dai setôrs de societât che al svilupe plui relazions comunicativis inte vite di ogni dì. Si à cussì imbastît une sezion specifiche pal cumierç dal Volontariât pe lenghe che vie pal 2017 e à vût la adesion di cuasi 3 mil buteghis là che cui che al vûl perfezionâ il catalan al cjate personâl disponibil a judâlu a miorâ lis sôs capacitâts linguistichis. Ae campagne «I tu, jugues en català», che e sburte l’ûs de lenghe proprie intal cjamp dai zûcs, a àn invezit za aderît disesiet impresis costrutoris e plui di cuatri cent ponts di vendite. Dut chest compagnât di une serie di altris servizis pensâts di pueste par saborâ l’ûs dal catalan intes impresis e tal cumierç.

Font: Generalitat de Catalunya, 09/01/18

Gales: lenghe proprie pôc doprade te Assemblee

Intal ultin an, intant des riunions de Assemblee Nazionâl dal Gales, la lenghe proprie e je stade doprade pal 12% dal timp. A front di cualchi ecezion tant che la deputade dal Plaid Cymru Sian Gwenllian (cun intervents fats pal 99% par galês) o la presidente de Assemblee Elin Jones (84%), la plui part dai elets si mostre une vore clipe tal doprâ la lenghe proprie. A denunciâ cheste situazion e je la organizazion pe lenghe Cymdeithas yr Iaith Gymraeg che i conteste al esecutîf di jessi il prin a dâ il brut esempli. Il prin ministri Carwyn Jones, cundut che al à une otime paronance de lenghe, al à doprât il galês dome tal 10% dai siei discors intant che Dafydd Elis-Thomas cumò che al è ministri al dopre la lenghe proprie une vore di mancul di cuant che al jere deputât. Chescj elements – e dîs la Cymdeithas – a mostrin a clâr che si à un probleme te maniere che al opere il guvier.

Font: BBC, 08/01/18; Cymdeithas, 09/01/18

Corsiche: prin dialic cun Parîs su lis riformis

Dopo de vitorie storiche che i à dât ae aleance nazionalitarie di Pè a Corsica la maiorance assolude te Assemblee de isule, ai 5 di Zenâr la ministre francese pal interni Jacqueline Gourault e je svolade in Corsiche par cjatâsi cui doi rapresentants principâi de coalizion – Gilles Simeoni e Jean-Guy Talamoni – che, ae fin dal incuintri, si son declarâts sodisfats pe volontât di dialic mostrade de delegade dal guvier centrâl. Al è di dî che fin cumò a Parîs si son mostrâts sorts sui ponts principâi dal program di Pè a Corsica, ven a dî la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie. Dopo di chest prin incuintri di cortesie, si varà ocasion di stazâ la disponibilitât vere dal guvier francês ai 22 di Zenâr intant di une riunion tra il prin ministri e la rapresentance de Coletivitât Teritoriâl uniche de Corsiche e in Fevrâr cuant che al è in program un incuintri cul president francês Emmanuel Macron.

Font: Alta Frequenza, 06/01/18; Jornalet, 08/01/18

Paîs Basc: Herri Urrats in program ai 13 di Mai

La edizion di chest an dal Herri Urrats, la fieste des ikastolas dal Paîs Basc setentrionâl sot aministrazion francese, e je in program ai 13 di Mai inte localitât di Senpere / Saint-Pée-sur Nivelle. Lis risorsis racueltis intant de manifestazion a saran impegnadis par judâ lis ativitâts dal istitût superiôr “Manex Erdozaintzi Etxart” frecuentât di students che a rivin des provinciis de Basse Navare e de Zuberoa. Simpri par sostignî lis ikastolas, Seaska – la rêt che e met adun lis scuelis a imersion in lenghe basche – e à inmaneât ai 12 di Zenâr un apontament cui vot finaliscj dal campionât di bertsolaris, il cjant improvisât tipic de tradizion basche.

Font: EiTB, 05/01/18

Irlande: 2018 proclamât an dal gaelic

Intal inovâl dai 125 agns di nassite de Leghe Gaeliche (Conradh na Gaeilge) e dal moviment di rinassince de lenghe irlandese, il 2018 al è stât proclamât «Bliain na Gaeilge», an dal gaelic. Pal prin ministri de Republiche di Irlande, Leo Varadkar, si trate di une ocasion par imparâ miôr e di plui su la lenghe proprie de isule e par stiçâ amîs, vicins e coleghis a doprâle inte vite di ogni dì. La organizazion Conradh na Gaeilge e à invidât ducj a doprâ di plui l’irlandês dilunc vie di chest an, a partecipâ ai apontaments inmaneâts par celebrâ l’aniversari e a meti adun iniziativis par valorizâ la lenghe e par metile al centri de discussion politiche e sociâl de Irlande.

Font: Irish Central, 04/01/18

Aragon: prin curt animât par aragonês

Ai 4 di Zenâr al è stât presentât il prin curtmetraç a disens animâts par aragonês. La iniziative e nas de colaborazion jenfri il guvier de comunitât autonome e l’istitût di art di Zaragoza. La opare e met sul schermi il libri “Lo Gorroroi” (barete rosse) scrit intal 2016 di Saúl Irigaray e ambientât inte localitât di Bielsa intant de vuere civîl spagnole. L’adatament cinematografic al è stât curât di Chusé Raúl Usón e la animazion di Patricia Sánchez.

Font: Aragon Digital, 04/01/18

Gales: gnovis azions pe devoluzion de tv par galês

Cul an gnûf lis mobilitazions inviadis de organizazion pe lenghe Cymdeithas yr Iaith Gymraeg par otignî di Londre la devoluzion al guvier galês des competencis e des risorsis pal setôr radiotelevisîf a àn cjapât ancje une altre forme. Cun di fat, par tignî alte la atenzion su cheste cuistion diviersis personis a àn partecipât a di un dizun di 24 oris che si zonte al siopar dal paiament dal cjanul radiotelevisîf, al coinvolziment di personaçs famôs ae campagne e aes azions di stamp plui politic. Il trasferiment des competencis al ven calcolât tant che l’unic mieç par difindi la television in lenghe galese S4C e par garantî une informazion plui atente al teritori. Il 52% dai galês al è a pro de devoluzion e dome il 27% si mostre contrari.

Font: Cymdeithas, 02/01/18

Federazion Russe: protestis pe lenghe e pal ambient dai Komis

Ancje sul finî dal mês di Dicembar inte Republiche autonome dai Komis a son ladis indenant lis iniziativis di proteste par difindi l’insegnament de lenghe proprie e cuintri dal incuinament ambientâl. Il guvier locâl al à proibît di tignî un referendum che si proponeve di obleâ lis compagniis petrolifaris a sostituî dutis lis tubaduris cun plui di vincj agns che a causin la plui part dal incuinament che al colpìs cheste aree. Associazions ambientalistis e comunitâts locâls a cirin duncje di tignî impiade la atenzion su chest probleme. A cheste reson si à zontade po ancje la difese dal insegnament curicolâr dal komi, lenghe ugrofiniche proprie di cheste Republiche, che diviers rapresentants politics locâi a volaressin mudâ in opzionâl, massime dopo des declarazions fatis in Lui dal president Vladimir Putin su la prioritât dal insegnament dal rus ancje tes Republichis autonomis a dam des lenghis locâls. Cundut dai risis, disinis di personis a àn aderît aes protestis in diviersis localitâts de Republiche ancje cun slogans cuintri dal president rus.

Font: The Independent Barents Observer, 28/12/17

Paîs Catalans: inmò maiorance indipendentiste in Catalogne

Lis elezions pal Parlament catalan clamadis dongje dal guvier di Madrid ai 21 di Dicembar a àn tornât a dâi la maiorance aes fuarcis indipendentistis. Cun di fat, cundut di une campagne eletorâl condizionade de sospension dal autoguvier de comunitât autonome e de presince di diviers candidâts in preson o in esili, i citadins catalans a àn assegnât 70 dai 135 puescj disponibii in Parlament ai partîts sovraniscj e, plui in detai, 34 a son lâts a Junts per Catalunya – liste vuidade di Carles Puigdemont (president deponût cumò in esili a Bruxelles) e che si poie massime sul PDeCAT – 32 a ERC (che il so leader Oriol Junqueras si cjate ancjemò in preson preventive) e 4 ae CUP. Il partît plui votât però al è stât Ciudadanos che al à otignût il vôt di un catalan su cuatri e 37 deputâts in Parlament. Il sucès dal partît vuidât di Inés Arrimadas al è rivât massime su la piel dal PP: il partît tradizionâl de diestre spagnoliste al è di fat colât di 11 parlamentârs a 3. A completâ il front unionist a son po i 17 deputâts dal PSC. Catalunya en Comú-Podem – formazion a pro de autodeterminazion ma contrarie a di un percors unilaterâl di indipendence – e à invezit otignût 8 deputâts. I gnûfs elets a jentraran in cjarie dentri dai 23 di Zenâr e a varan po uns cuindis dîs par inviâ la discussion su la presidence.

Paîs Basc: blocât l’aument dal euskara tes scuelis di Pamplone

Une sentence dal tribunâl superiôr di justizie de Navare e boce il mudament dal model linguistic decidût de aministrazion comunâl di Pamplone in dôs scuelis de infanzie de citât. Dopo agns che si domandave di cressi i puescj disponibii cul model a imersion in lenghe basche, il guvier locâl al veve riformât la ufierte scolastiche citadine puartant i puescj disponibii par euskara di 164 a 408 e sbassant di 255 il numar di chei par castilian o par castilian e inglês. Un intervent che però, pe magjistrature, nol a rispietât il percors previodût de leç.

Font: EiTB, 12/12/17

Montenegro: ricognossiment internazionâl pal montenegrin

Ae fin di un percors durât nûf agns, lis autoritâts dal Montenegro a àn otignût un codiç ISO pal montenegrin (CRN). Chest ricognossiment i da un valôr di uficialitât internazionâl a cheste lenghe che, fin cumò, e vignive calcolade une varietât dal serp. La costituzion di chest paîs balcanic za tal 2007 i assegnave al montenegrin il status di lenghe uficiâl, status che si veve po slargjât intal 2011 a dut il sisteme scolastic public cundut che, propit intal censiment di chel an, il 44% de popolazion al declarave di fevelâ par serp a front di un 36% che al indicave il montenegrin come lenghe proprie. Cun chest gnûf passaç, il montenegrin si infuartìs ancje sul plan internazionâl, intant che i partîts di oposizion e diviersis organizazions a denunciin un aument des discriminazions cuintri di cui che al dopre la lenghe serbe.

Font: Balkan Insight, 12/12/17

Irlande: apel pe difese dai dirits dai irlandês dal Nord

Passe dusinte tra personalitâts dal mont academic, dal sport e de culture nordirlandesis a àn sotscrit un apel al prin ministri de Republiche di Irlande, Leo Varadkar, par che al intervegni par tutelâ i dirits de comunitât nazionaliste e republicane dal Nord a front dal faliment dai tentatîfs par meti in vore ad in plen i contignûts dal acuardi di pâs dal Vinars Sant e di chel seguitîf di S. Andree. In dì di vuê – a denunciin i firmataris – la comunitât nazionaliste nordirlandese no gjolt ancjemò dai stes dirits di chê unioniste. Dopo des elezions di Març, i partîts di riferiment des dôs comunitâts – Sinn Féin e DUP – no àn ancjemò rivât a cjatâ un acuardi di guvier. Tra i ponts di scuintri plui dûrs si à, par esempli, la aprovazion di un leç di tutele e di promozion pe lenghe irlandese.

Font: BBC, 11/12/17

Corsiche: maiorance nazionalitarie cence pareli te Assemblee

Tal secont turni des elezions pe gnove Coletivitât Teritoriâl uniche de Corsiche che si son tignudis ai 10 di Dicembar la coalizion nazionalitarie Pè a Corsica e à otignût un risultât cence precedents. Cun di fat, cul 56,5% dai vôts e à otignût 41 dai 63 puescj disponibii inte Assemblee de isule, a front dai 10 elets de diestre regjonaliste, dai 6 de diestre stataliste (Les Républicains) e dai 6 dal partît dal president francês Emmanuel Macron (La République en marche). I cors a àn duncje premiât in maniere clare la azion dal guvier vuidât di Gilles Simeoni che al met adun i nazionaliscj moderâts di Femu a Corsica e i indipendentiscj di Corsica Libera e che, tra i ponts di fonde dal so program, al previôt la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie. A front de conferme massive par cheste maiorance l’esecutîf di Parîs nol pues lâ indenant a dineâ lis nestris rivendicazions – al à comentât il president de Assemblee stade, Jean-Guy Talamoni – in câs contrari o varìn di passâ aes mobilitazions popolârs e di denunciâ il compuartament de France ator pes capitâls europeanis. Par intant, un prin impegn pal esecutîf cors al sarà chel di gjestî la metude in vore de Coletivitât Teritoriâl uniche che si inviarà il prin di Zenâr dal 2018 de fusion tra la Coletivitât precedente e i dipartiments de Alte e de Basse Corsiche e che e rapresente un sogjet dal dut gnûf inte architeture istituzionâl francese.

Font: Le Monde, 11/12/17

Ocitanie: diplome universitari ocitan a Bordeaux

La universitât Bordeaux Montaigne (Bordèu Montanha) e à ativât un diplome universitari ocitan specializât in culture, patrimoni artistic e spetacul. I cors a son in program tra il Març e il Lui dal 2018 ancje cu la pussibilitât de frecuence a distance. La iniziative e nas de colaborazion jenfri la universitât e l’ufici public pe lenghe ocitane (ÒPLO).

Font: Jornalet, 10/12/17

Paîs Basc: in 11 mil a Parîs pai dirits dai presonîrs bascs

A jerin almancul 11 mil lis personis che ai 9 di Dicembar a àn sfilât pes stradis di Parîs daûr dal strisson cu la scrite “Bakea Euskal Herrian: orain presoak” (Pâs intal Paîs Basc, cumò i presonîrs). La iniziative e je stade inmaneade dai cussì clamâts “Artesans de pâs” che te Vierte di chest an a vevin facilitât la consegne dal arsenâl di ETA aes autoritâts francesis. L’obietîf de manifestazion al jere chel di sburtâ il guvier di Parîs a meti fin aes misuris ecezionâls in vore cuintri dai presonîrs bascs e, plui in particolâr, di domandâ il trasferiment dai presonîrs intes struturis carcerariis plui dongje dal Paîs Basc, la liberazion di chei che a patissin di malatiis seriis, la concession de libertât condizionâl cui stes criteris in vore pai criminâi comuns e la eliminazion dal status di DPS che al incrès lis misuris punitivis. La manifestazion e gjoldeve de poie di passe un miâr di conseîrs e rapresentants politics elets intal Paîs Basc sot aministrazion francese e a sfilâ in prime linie a Parîs a jerin rapresentants di ducj i partîts politics, gjavât il Front National. Un esempli di condivision e di trasversalitât che i organizadôrs a sperin che si puedi espuartâ ancje te part dal Paîs Basc cjapade dentri intal stât spagnûl.

Font: Naiz:, 09/12/17; EiTB, 09/12/17

Moldova: scuintri sui programs radiotelevisîfs rus

Ai 7 di Dicembar il Parlament moldâf al à fat bon un codiç su lis emissions radiotelevisivis che al previôt che no si puedin mandâ in onde contignûts che a rivin di stâts che no àn ratificât la convenzion europeane su la television transfrontaliere. In buine sostance la norme si propon di eliminâ chê che il Partît Liberâl Democratic, cumò al guvier, al definìs “propagande russe”. In plui di minorancis significativis che a àn il rus come prime lenghe, la plui part de popolazion de Moldova e cognòs ancje il rus e duncje dutis lis emitentis principâls a trasmetin cetancj programs ta cheste lenghe, programs che pe plui part a rivin de Federazion Russe o che si poin su materiâi e fonts di chel paîs. Diviers organisims di control a segnalin cemût che cheste situazion e fasi passâ cence mediazion la linie dal Cremlin su cetancj temis sensibii. Il president de Moldova, il filorus Igor Dodon, al à fat savê daurman che nol firmarà la leç. No sarès però la prime volte che il so “no” al ven superât di un intervent de cort costituzionâl che lu suspint dal mandât il timp che al covente par ratificâ il proviodiment. Di là dai siei contignûts politics, la gnove leç e va però ancje a limitâ l’acès de popolazion di lenghe russe a programs radiotelevisîfs te lôr lenghe. Ancje par chest, il guvier de regjon autonome de Gagauzie al à dite che nol metarà in vore la gnove norme e nol imponarà nissune limitazion ae programazion par rus.

Font: Balkan Insight, 08/12/17

Finlande: comitât pe riforme de legjislazion sui Sami

Il ministeri finlandês pe justizie al à metût sù il comitât che al à di riformâ la leç istitutive dal Parlament sami. Il test de gnove propueste di leç al varà di jessi metût jù dentri dal Avrîl dal 2018 e al varà di tignî cont sei dai oblics costituzionâi e di chei internazionâi in materie di dirits umans, sei de declarazion de ONU sui dirits dai popui natîfs. La iniziative e jere domandade di timp des comunitâts sami che a sperin che cheste riforme ur dedi plui fuarce, massime par chel che al rivuarde l’autoguvier e la pussibilitât di contribuî in maniere determinante intes decisions che a rivuardin i Sami, a partî di chês su la gjestion des tieris e des aghis dulà che a vivin.

Font: The Independent Barents Observer, 05/12/17

Paîs Catalans: Spagne batude sul front judiziari a Bruxelles

Intant che si svicine la date des elezions pal Parlament catalan e che la campagne eletorâl e je condizionade a fuart des misuris repressivis metudis in at dal guvier di Madrid cuintri des istituzions autonomis, la atenzion e reste pontade sui aspiets judiziaris de vicende. Dopo vê confermade la preson preventive cence cauzion par doi dai membris dal guvier catalan – Oriol Junqueras e Joaquim Forn – e pai presidents de ANC, Jordi Sànchez, e dal Òmnium Cultural, Jordi Cuixart, il judiç dal tribunâl suprem spagnûl che al à in man il procediment cuintri dal indipendentisim catalan, Pablo Llarena, al à decidût di ritirâ i ordins europeans di arest e di consegne cuintri dal president catalan Carles Puigdemont e di cuatri membris dal so esecutîf (Antoni Comin, Meritxell Serret, Lluís Puig e Clara Ponsatí) cumò in esili a Bruxelles. La decision e je stade cjapade par pôre che la magjistrature belgjiche, tal câs che e acetàs la estradizion, e limitàs i reâts che i cinc a podevin jessi clamâts a rispuindi. A Bruxelles duncje il câs al è za stât archiviât e lis misuris cautelârs cuintri dai cinc rapresentants catalans a son stadis ritiradis. Intant, par tignî impiade la atenzion de Europe su la Catalogne, ai 7 di Dicembar il distret european de capitâl de Belgjiche al à viodût a sfilâ pes sôs stradis disinis di miârs di catalans – 45 mil daûr des fonts di polizie – che a àn domandât ae Europe di dâsi une sveade e a àn stiçât lis istituzions comunitariis a no voltâsi di chê altre bande. Al è di dî che lis manifestazions no mancjin a Bruxelles, ma al è râr di viodint di cussì partecipadis, massime se si pense di dulà che a rivavin i partecipants.

Font: Naiz:, 04-14/12/17; VilaWeb, 07/12/17

Asturiis: ents locâi a pro de uficialitât dal asturian

In dì di vuê i conseis locâi che a àn cjapât une posizion uficiâl a pro de uficialitât dal asturian a son vot – Avilés, Bimenes, Castrillón, Llena, Mieres, Noreña, Uviéu e Xixón – e a rapresentin passe 650 mil personis, o sei il 62,79% de popolazion des Asturiis. Al è zaromai di agns che si domande une riforme dal statût di autonomie par che al asturian e al galizian fevelât te part plui ocidentâl di cheste comunitât ur vegni ricognossût un status di plene uficialitât dongje dal castilian, ma nissun dai guviers in cjarie fin cumò al à inviât chest procès. Par solit il dinei al jere motivât cu la mancjance di une domande sociâl suficiente. Cumò però, a disin lis organizazions impegnadis pe uficialitât dal asturian, cheste scuse no à plui mani. Cun di fat, dongje dai ents locâi che a rapresentin cuasi doi tierçs de popolazion, a declarâsi a pro de uficialitât a son 31 dai 45 deputâts che a formin il Parlament asturian (socialiscj, Podemos, Izquierda Xunida, Foro). A chest pont, duncje, i tocje al esecutîf decidi se lâ dilunc a blocâ la riforme o fâ sô une rivendicazion che e gjolt de poie de maiorance dai elets.

Font: Asturies.com, 04/12/17

Paîs Basc: lenghe de sanitât, in 188 mil a àn miôr l’euskara

Sul imprin dal 2017 il guvier de Comunitât Autonome Basche al veve inviât une campagne par invidâ i citadins a indicâ cuale lenghe che a vevin miôr di fevelâ cui miedis e cui operadôrs dal servizi sanitari (Osakidetza). L’intindiment al jere chel di garantî il plui pussibil i dirits linguistics ancje te sanitât publiche là che, intai ultins dîs agns, i dipendents cuntune competence suficiente par doprâ l’euskara a son cressûts e a rapresentin sù par jù un tierç dal totâl. In dì di vuê a son 188 mil i citadins che a àn za dât la lôr preference al ûs de lenghe basche. A chest pont, il guvier de CAB al varà di cirî di adatâ il sisteme sanitari in maniere di relazionâ il plui pussibil i citadins che a àn sielzût l’euskara come prime lenghe cui operadôrs sanitaris che a àn il profîl linguistic just.

Font: La Vanguardia, 02/12/17