Paîs Catalans: scuintri su terorisim e indipendentisim

I atentâts teroristics di Barcelone e di Cambrils a àn atirât su la Catalogne la atenzion dai mieçs di comunicazion di dut il mont. Tancj di lôr, dongje des informazions leadis ai atentâts e ae investigazion che i à vignude daûr, a àn metût in evidence lis capacitâts operativis e il compuartament de polizie (mossos d’esquadra) e des istituzions catalanis che par diviers gjornâi di prin plan – dal nordamerican The Wall Street Journal al todesc Frankfurter Allgemaine Zeitung – a mostrin che il guvier de Catalogne al è za bon di movisi come chel di un stât indipendent. Ancje par chest, varis cuotidians spagnûi e i principâi sindacâts des fuarcis di polizie statâl, a àn inviât une ofensive indreçade a discreditâ in primis propit i mossos. La campagne e à jevât reazions indignadis e no dome in Catalogne. Tra lis reazions si à vude ancje chê de organizazion Òmnium Cultural che e à publicât su lis rêts sociâls un video che – cul non indicatîf di “La vuere sporcje dal stât no si ferme nancje dopo di une tragjedie” – al mostre articui di cronache, editoriâi e vignetis dai media spagnûi che a àn doprât i atentâts par cirî di discreditâ lis istituzions e l’indipendentisim catalan.

Font: VilaWeb, 23-25/08/17

Corsiche: leams plui fuarts cu la Galure

Ai 21 di Avost, Saveriu Luciani, delegât pe lenghe dal esecutîf cors, si à cjatât cui sindics e cui rapresentants dal associazionisim culturâl de Alte Galure cun chê di infuartî i rapuarts jenfri la Corsiche e cheste regjon de Sardegne là che si fevele une varietât linguistiche une vore dongje di chê corse. Si àn cussì metudis jù lis fondis par un acuardi di cooperazion che al puarti ae nassite di un centri culturâl cors – galurês a Tempiu / Tempio Pausania cun chê di promovi la lenghe e la culture comune. La colaborazion si slargjarà ancje sul plan de scuele cu la pussibilitât pai students galurês di frecuentâ i centris di imersion linguistiche in vore in Corsiche e cul svilup di percors formatîfs ancje pal personâl scolastic.

Font: Corse-Matin, 22/08/17

Imazighen: indipendence par indebolî il terorisim islamist

Cuntune declarazion uficiâl Tamazgha, organizazion che e rapresente la part plui militante de diaspore imazighen in Europe, e à pandût la sô solidarietât al popul catalan pai atentâts teroristics di Barcelone e di Cambrils. I imazighen, plui cognossûts come berbers, a son la popolazion native di diviers stâts nordafricans, e al somearès che diviers dai atentadôrs che a àn colpît in Catalogne a vessin propite divignince imazighen. Par Tamazgha cheste situazion e je il risultât di secui di repression e di arabizazion sfuarçade, e che propit i moviments di resistence politiche e culturâl dai imazighen in Maroc, in Alzerie, in Libie e in altris paîs africans a son un mûr cuintri dal radicalisim islamist. Par chest al invide i stâts europeans a cambiâ lis lôr politichis di poie ai regjims repressîfs de Afriche dal Nord par sostignî invezit i moviments democratics come chei dai imazighen. Ta cheste logjiche Tamazgha e poie ancje la indipendence de Catalogne, cu la sigurece di une politiche foreste plui atente a chescj temis di chê mostrade dal stât spagnûl.

Font: Tamazgha, 22/08/17

Paîs Catalans: in calâ l’ûs dal catalan tra i zovins des Baleârs

Daûr dai dâts de ultime inchieste sociolinguistiche publicâts dal guvier des Baleârs, al ven fûr che su lis isulis e cres la cussience de unitât linguistiche cul rest dai Paîs Catalans (81%) e ancje il numar dai gjenitôrs che a fevelin ai fîs par catalan. Magari cussì no, chescj a son tra i pôcs elements positîfs che a vegnin fûr de ricercje. Di fat intes isulis di Eivissa / Ibiza e Formentera, lis plui colpidis dal turisim massîf, a pene il 28% de popolazion si identifiche cul catalan e, plui in gjenerâl, dome il 20,6% dai zovins tra i 15 e i 29 agns al dopre la lenghe proprie in forme prevalente. Si trate di dâts che, pe fondazion Jaume III a mostrin la mancjance di politichis in stât di svicinâ i zovins ae lenghe e di favorî la integrazion linguistiche di cui che al ven di fûr.

Font: Mallorca Diario, 21/08/17; DBalears, 24/08/17

Sud Tirôl: campagne pai toponims storics

I nons di lûc a son un patrimoni culturâl coletîf e stramudâju al vûl dî falsificâ la storie, violâ la dignitât di chel teritori e savoltâ la sô identitât. A partî di chest resonament il partît Süd-Tiroler Freiheit al à inviât une petizion par abolî i decrets fats bogns ai 12 di Març dal 1923 dal grant consei dai fassisim che a scancelavin i nons storics todescs e ladins dal Sud Tirôl par sostituîju cun passe 8 mil toponims talians, pe plui part inventâts dal moment. A passe 90 agns di chê operazion di talianizazion sfuarçade, i decrets fassiscj a restin inmò in vore. La petizion e ponte a scancelâju cuntune leç dal Parlament talian o ben cun altris azions legjislativis. La cuistion no inten però dome i citadins sudtirolês di lenghe todescje e ladine, cussì il moviment politic al à publicât cumò sul so sît internet ancje une version par talian dal opuscul che al spieghe lis resons de sô iniziative.

Font: Süd-Tiroler Freiheit, 21/08/17

Gales: gnovis liniis par infuartî l’ûs dal galês

Un mês dopo vê dade fûr la strategjie par rivâ dentri dal 2050 a di un milion di personis che a fevelin par galês, il guvier dal Gales al à publicât il libri blanc de lenghe galese. Il document al met jù une serie di propuestis tant che meti sù une comission par coordenâ lis azions di promozion de lenghe, sclarî miôr cuâi che a son i servizis disponibii ancje par galês e lavorâ par incressiju, sostignî i sogjets che a vuelin ufrî servizis in lenghe proprie e lavorâ par gjavâ vie lis limitazions che in dì di vuê a lassin fûr cierts sogjets dal oblic di garantî servizis ancje par galês. Ta cheste suaze si ponte a infuartî lis capacitâts di intervent dal comissari pe lenghe galese e a mendâ il sisteme dai standards linguistics minims in maniere di rindilu plui eficient. Il ministri pe lenghe, Alun Jones, al à fat savê che si è za impegnâts a viodi cemût infuartî il sisteme dai standards e par mendâ la leç che ju regole e che, su chest teme, si tignaran fint al mês di Otubar ancje des consultazions publichis. Za dentri de fin dal an, invezit, a varessin di jessi publicâts i regolaments pe metude in vore dai standards linguistics intal setôr sanitari.

Font: wrexham.com, 14/08/17

No passaran

Devant dels atacs criminals a Barcelona i Cambrils no tinc por / no tenim por.

Visca Catalunya lliure e solidaria. #NoPassaran.

Denant dai atacs criminâi a Barcelone e a Cambrils no ai pôre / no vin pôre .

Vive la Catalogne libare e solidarie. No passaran.

Paîs Catalans: prime leç di “separazion” fate buine in Catalogne

Il Parlament catalan al à fate buine une leç che si propon di meti in pîts un sisteme tributari progressîf e redistributîf gjestît de Agjenzie Tributarie de Catalogne cun plene autonomie economiche, finanziarie, patrimoniâl e di personâl. Si trate de prime des trê leçs di “separazion” che a àn di garantî la tignude dal sisteme aministratîf catalan intal câs che tal referendum dal prin di Otubar la maiorance dai citadins e voti a pro de indipendence de Catalogne. Te stesse zornade i deputâts indipendentiscj di Junts pel Sí e CUP a àn firmât la propueste di leç par dâi cuvierzidure legâl al vôt referendari che e varès po di rivâ al esam dal Parlament dopo de polse estive in program dal prin ai 15 di Avost.

Font: Naiz:, 28/07/17

Paîs Catalans: atac dal model a imersion valenzian

Il tribunâl superiôr di justizie de Comunitât Valenziane al à anulât une part dal decret sul plurilinguisim là che si previodevin mancul oris di inglês par cui che al sielzeve il curriculum par spagnûl impen di chel par catalan. Pai magjistrâts, il guvier valenzian al pues intervignî cun azions positivis par favorî il catalan viodude la sô situazion di minorizazion, ma la riduzion des oris di inglês par cui che al sielç il model scolastic par spagnûl no ven viodude come une azion positive, ma tant che une sanzion. Cheste interpretazion no ven però condividude dal esecutîf valenzian che al à za fat savê che al fasarà ricors cuintri de decision dai judiçs. Il decret al varès vût di jentrâ in vore in maniere progressive in Setembar cu la partence dal gnûf an scolastic, a tacâ des primis dôs classis de scuele de infanzie.

Font: VilaWeb, 27-28/07/17; La Gaceta, 27/07/17

Paîs Catalans: a cressin dal 5% lis entitâts pe lenghe

Il regjistri des entitâts pe promozion de lenghe catalane al met adun i sogjets atîfs intai Paîs Catalans che a svilupin ativitâts par promovi compuartaments positîfs inviers de lenghe, par incressi la sô cognossince e il so ûs intai cjamps di lôr competence. Vie pal 2017 lis entitâts cjapadis dentri tal regjistri a son cressudis dal 5% e a son rivadis a 198, di chestis 150 a son associazions e 48 fondazions. 100 a lavorin intal cjamp de culture, 32 ta chel professionâl e imprenditoriâl, 21 te integrazion sociâl, 19 in maniere specifiche te promozion de lenghe, 17 tal setôr zovanîl e 9 tal cjamp des siencis e des tecnologjiis. La grande maiorance, o sei 186, a son logadis in Catalogne, ma a ‘nd è ancje 4 intal Paîs Valenzian, 2 intes isulis Baleârs, intal Aragon e intal stât talian, e une in Andorra e intal stât francês. In dut a metin adun passe 700 mil socis.

Font: Generalitat de Catalunya, 24/07/17

Europe: svilup digjitâl, publicâts i risultâts dal DLDP

A son stâts publicâts i risultâts dal progjet DLDP, o sei il progjet su la diversitât linguistiche tal digjitâl, che al cjapave in esam l’ûs di cuatri lenghis minorizadis – il basc, il breton, il carelian e il sart – intal setôr digjitâl par capî cemût che a vegnin dopradis, ce che al è acessibil o mancul ta chestis lenghis, e la ande dai utents in proposit. Ce che al ven fûr al è, prin di dut, che cui che al fevele chestis lenghis al à gust di doprâlis in ducj i contescj sociolinguistics ufierts dal digjitâl. Di chest pont di viste, lis rêts di comunicazion sociâl a àn un grues potenziâl che però al è disfrutât inmò masse pôc e al covente duncje sburtâ cui che al fevele lenghis minorizadis a doprâlis simpri di plui ancje par creâ contignûts digjitâi. Cun di plui si domande a fuart une incressite dal ûs des lenghis minorizadis intal setôr public e la lôr poie sul plan struturâl (par vie che no si pues e nol è just poiâsi dome sul lavôr volontari dai ativiscj). Su la fonde di cheste ricercje, svilupade dal Istitût di linguistiche computazionâl dal CNR di Pisa, si larà cumò a meti jù des liniis di indreçament par sburtâ la diversitât linguistiche digjitâl. La iniziative e podarès jessi ancje il pont di partence par une ricercje che e cjapi dentri dutis lis lenghis minorizadis de Europe.

Font: ELEN, 24/07/17

Bretagne: azion dimostrative cuintri de segnaletiche par francês

Tal Otubar dal 2015 la Regjon Bretagne e veve sotscrit une convenzion cul Stât centrâl che e previodeve ancje l’ûs di segnaletiche bilengâl dilunc des stradis statâls che a scjavacin il teritori breton. La iniziative e veve chê di «contribuî a ufrî ai citadins un ambient visîf in stât di promovi il breton, di usâju a di un vocabolari di base e di slargjâ la cognossince dal patrimoni toponomastic». Chel istès i à coventât plui di un an e mieç par che lis parts in cause si cjatassin par tacâ a resonâ su cemût procedi sul plan pratic. Intal framieç i intervents fats par rignuvî la segnaletiche stradâl a àn tornât a proponi dome il francês, come che al è sucedût dilunc de statâl 165. Par denunciâ cheste situazion e par dâi une scjassade aes autoritâts competentis, vie pe gnot dai 20 di Lui membris dal coletîf pe lenghe Ai’ta! a àn smontât une cuindisine di cartei dome par francês che a jerin stâts metûts dilunc de statâl 165 e a àn fat savê che a laran indenant cu chestis azions dimostrativis fintremai che no si metaran in vore i contignûts de convenzion.

Font: Seizh Info, 21/07/17

Mari-El: atac di Putin al insegnament des lenghis nativis

Ai 20 di Lui, intant di une visite inte republiche autonome di Mari-El, il president rus Vladimir Putin al à criticât l’insegnament des lenghis nativis inte republichis che a formin la Federazion Russe. Cundut che il mari – lenghe che e parten ae famee finiche – al è lenghe uficiâl de republiche autonome adun cul rus, la sô presince no je paritarie ni tes istituzions e nancje te istruzion. Par chest tai ultins agns si à inviât diviersis iniziativis par incressi la presince dal mari intes scuelis. Cundut de situazion di minorizazion, Putin nol à mancjât di dâ la sô poie plene ae comunitât nazionâl russe di Mari El che, daûr des sôs peraulis, no varès di vê nissun oblic di imparâ une lenghe che no sedi chê russe.

Font: Radio Free Europe, 21/07/17

Scozie: poie parlamentâr al gaelic patrimoni UNESCO

La propueste par che la lenghe gaeliche scozese e vegni ricognossude tant che patrimoni mondiâl de UNESCO si fâs spazi ancje intal Parlament de Scozie. Cun di fat la presidente dal grup parlamentâr pal gaelic, Kate Forbes, e à sigurât che la ipotesi e cjate une poie trasversâl dentri de Assemblee. Il ricognossiment dal status di patrimoni imateriâl de umanitât al judarès a incressi la atenzion par ducj i elements storics e culturâi leâts a cheste lenghe e i darès plui fuarce e plui visibilitât aes azions par difindile e par promovile. In dì di vuê cheste lenghe celtiche e je fevelade in Scozie di sù par jù 60 mil personis.

Font: Press and Journal, 20/07/17

Gales: S4C in cressi su lis rêts sociâls

Tai ultins agns al reste avonde stabil il numar des personis che a cjalin S4C – la television in lenghe galese associade ae BBC – intant che a van dilunc a cressi chei che a àn acès ae sô produzion par mieç des gnovis tecnologjiis. Daûr dal rapuart anuâl su la emitente, vie pal 2016 si àn vûts 18 milions di acès par viodi i siei programs radiotelevisîfs vie Facebook, Twitter o YouTube. Un risultât che al diven ancje de colaborazion metude in cjamp cun produtôrs indipendents. Sul front de programazion, il sucès principâl al è leât aes partidis dal Gales intai campionâts europeans di balon, cul salût finâl par galês de scuadre che su Facebook al è stât viodût di passe 180 mil personis.

Font: Daily Post, 18/07/17

Corsiche: Femu a Corsica, di coalizion a partît

Lis diviersis organizazions politichis che a formin Femu a Corsica, ven a dî Inseme per a Corsica, PNC e A Chjama Naziunale, a àn decidût di trasformâ la lôr coalizion intun partît unitari. Il procès al jere stât anticipât tor de metât di Lui dal president dal esecutîf de Coletivitât Teritoriâl Corse, Gilles Simeoni, e al è daûr a svilupâsi a pas di corse cu la assemblee costitutive za ai 30 di Lui. L’intindiment al è chel di meti sù un partît di guvier che, cence dismenteâ lis sôs fondis nazionalitariis, al sepi tirâ dongje ancje chei che no rivin de militance nazionaliste. Dopo des elezions dal 2015 che a àn puartât lis fuarcis nazionalitariis al guvier de isule e il sucès intes politichis dal mês di Jugn, Femu a Corsica si prepare cussì a frontâ cun plui fuarce lis prossimis sfidis a partî des elezions teritoriâls che si tignaran tal Dicembar di chest an e des tratativis cul stât centrâl par incressi i spazis di autoguvier. Il moviment al à confermât la sô aleance eletorâl cu la coalizion indipendentiste Corsica Libera (formade di Corsica Nazione Indipendente, ANC-PSI e Strada Diritta) che, de bande sô, e cjale cun atenzion il procès di unificazion dai aleâts e si mostre sodisfate che il gnûf partît nol mostri dubis su la conferme de aleance. Critichis a son rivadis invezit di Rinnovu, altri grup di aree nazionaliste, che nol viôt di bon voli la volontât di tirâ dongje chei che al à batiât i “autonomiscj de vincjecincesime ore”.

Font: Alta Frequenza, 17-27/07/17

Corsiche: centris di imersion linguistiche in cressi

Il plan di normalizazion de lenghe corse fat bon tal Avrîl dal 2015 (Pianu Lingua 2020) al fisse une strategjie di svilup dal insegnament dal cors, dal aprendiment continuatîf e dai centris di imersion linguistiche. Tal 2016 la Coletivitât Teritoriâl Corse e il stât francês a àn sotscrit une convenzion anuâl par sigurâ il finanziament ai cuatri centris di studi dulà che lis classis bilengâls des scuelis primariis e secondariis de isule a davuelzin percors di imersion linguistiche. La convenzion e je a pene stade rignuvide par un altri an, ancje cul obietîf di slargjâ la ativitât dai centris ai liceus. L’esecutîf al ponte po a cressi il lôr numar e à cjapâju dentri ancje tai percors di formazion continuative pai adults.

Font: Corse Net Infos, 16/07/17

Sápmi: ancje azions diretis pe autogjestion dal Deatnu

Dopo dal acuardi tra Finlande e Norvegje pal disfrutament de pescje dilunc dal flum Deatnu / Teno / Tana che al scjavace la tiere dai Sami (Sápmi), i rapresentants des comunitâts locâls e i ambientaliscj si son dâts adun par decidi cemût pidimentâ la sô metude in vore. Prin di dut al è stât metût jù un document là che si declare che il flum al parten aes comunitâts sami che a àn il dirit e il dovê di viodi di lui e di gjestîlu in maniere autonome cence dal intervent e dal control dai stâts. Si trate di une declarazion di autodeterminazion des comunitâts che a vivin dilunc dal flum che cumò e sarà fate cognossi ator par cirî la poie di altris comunitâts, realtâts associativis e citadins. I ativiscj a àn decidût di inviâ ancje une azion direte cu la ocupazion de isule di Čearretsuolu tant che base par impedî il disfrutament dal flum.

Font: The Independent Barents Observer, 12/07/17

Gales: plui galês framieç dal dipendents de Assemblee

Il guvier e la Assemblee Nazionâl dal Gales a àn chê di incressi la presince de lenghe galese framieç dai sù par jù 5 mil dipendents che a lavorin pe aministrazion autonome. Pal responsabil de politiche linguistiche de Assemblee, Adam Price, cun chest an che al ven il personâl gnûf al varà di dimostrâ di vê almancul une cognossince di base de lenghe o, tal câs che no le vedi, di impegnâsi a cjapâle sù intant de fase di formazion. L’esecutîf al à però sclarît che la cognossince de lenghe no sarà domandade par dutis lis posizions.

Font: BBC, 14/07/17

Paîs Basc: il pm al vûl 375 agns pai vot di Altsasu

Cuant che ai 15 di Otubar dal 2016 un grup di fantats bascs al jere stât protagonist di une risse cuntun pâr di agjents de Guardia Civil in libare jessude tun locâl di Altsasu, localitât de Navare a maiorance abertzale (nazionalitarie basche), nissun al varès mai crodût che la vicende e sarès stade cjapade in man de Audiencia Nacional, o sei il tribunâl speciâl spagnûl che si ocupe dai câs di terorisim. Cun di fat, une risse di bar e je stade calcolade tant che une azion teroristiche cun motivazions juridichis che il stes inventôr de teorie dal “todo es ETA” (dut al è part di ETA e duncje terorist), il judiç Baltasar Garzón, al stime cence nissune fonde. Lis autoritâts judiziariis di Madrid no àn tignût cont des domandis rivadis de magjistrature e des istituzions politichis de Navare e tant mancul des protestis popolârs che aromai si son slargjadis a dut il Paîs Basc par che il procès si tignìs ta chê comunitât e par che il câs al fos tratât par chel che al è, o sei une semplice risse. A lassâ inmò di plui scaturîts ducj i à po pensât il public ministeri che al à domandât pai vot zovins sot acuse un totâl di 375 agns di preson. Il câs al è cussì fûr dai semenâts che al à jevât l’interès ancje de stampe internazionâl là che la plui part dai comentadôrs e met in evidence il risi che cheste vicende e torni a piâ lis tensions intal Paîs Basc là che, cundut de fin de ativitât armade di ETA, il procès di pâs al è ancjemò debul.

Font: Naiz:, 13-14/07/17; El País, 13-14/07/17; Al Jazeera, 10/07/17