Macedonie: pressions sul guvier pe leç sul albanês

Tal câs che il gnûf esecutîf de Macedonie – formât dal Partît Sociâl Democratic, de Union Democratiche pe Integrazion e de Aleance pai Albanês – nol fasi buine une leç che e slargje l’ûs uficiâl de lenghe albanese dentri di Setembar, il Moviment pes Riformis (DPA), un dai components de Aleance pai Albanês, al è pront a gjavâsi de coalizion di guvier. La manovre e met a risi la tignude dal esecutîf dal moment che cun doi deputâts in mancul al pierdarès la maiorance che cumò al à intal Parlament. Il prin ministri vicjari, Bujar Osmani al à rispuindût che dutis lis fuarcis che a formin la scuadre di guvier a son daûr a lavorâ su la leç e che si stime che in trê mês e podarà jessi fate buine. La normative cumò in vore e previôt pal albanês il status di lenghe couficiâl in ducj i comuns là che i albanês a rapresentin almancul il 20% de popolazion. La gnove leç e varès di slargjâ lis misuris di tutele ancje là che la presince de minorance e je plui basse.

Font: Balkan Insight, 13/07/17

Aragon: il guvier al sburte l’aragonês tra i funzionaris

Il guvier dal Aragon (formât di PSOE e Chunta) al è daûr a puartâ indenant un plan di formazion linguistiche par slargjâ la cognossince dal aragonês tra i funzionaris publics de comunitât autonome. Jenfri Mai e Jugn al è za stât svilupât un cors dedicât ae introduzion de lenghe e al so ûs inte aministrazion publiche. Cumò invezit i funzionaris a àn la pussibilitât di iscrivisi a di un cors sui elements storics, leteraris e culturâi leâts al aragonês. La iniziative e je in program tra i 4 di Setembar e i 2 di Otubar. Chestis ativitâts a àn chê di preparâ la struture publiche ae gnove leç su lis lenghis che l’esecutîf al è impegnât a preparâ par infuartî la tutele dal aragonês e dal catalan.

Font: ABC Aragón, 11/07/17

Stât talian: sburt de ELEN pe ratifiche de Cjarte des lenghis

La organizazion ELEN – Rêt Europeane pe Avualiance des Lenghis – e à scrit al president dal consei dai ministris talian, Paolo Gentiloni, ai membris che a formin l’esecutîf e ai senatôrs par che si procedi cu la ratifiche de Cjarte europeane des lenghis regjonâls o minoritariis. Il stât talian al à firmât la Cjarte intal 2000, ma ducj i tentatîfs legjislatîfs par ratificâle a son lâts sù pai stecs. L’ultin test di ratifiche – che al viôt tant che prin firmatari il parlamentâr Francesco Palermo – si cjate cumò pantanât in Senât. La iniziative de ELEN si propon duncje di dâi un sburt par che al puedi jessi fat bon prime de fin de legjislature. In plui de azion direte, la Rêt Europeane e à ancje invidât lis realtâts di riferiment des comunitâts minorizadis che a vivin intal stât talian a fâ pressions par chel il test al ledi indenant.

Font: ELEN, 11/07/17

Paîs Catalans: sì de magjistrature ae prioritât dal valenzian

Il tribunâl superiôr di justizie dal Paîs Valenzian al à refudât la domande fate indenant de Central Sindical Independent i de Funcionaris (CSIF) par che al suspindi la metude in vore dal gnûf decret che al regole i ûs istituzionâi e aministratîfs des lenghis uficiâls dentri de aministrazion publiche valenziane. Il sindacât al stime che il decret al meti il catalan suntun plan prioritari rispiet al spagnûl e, intal so ricors, al domandave di suspindilu par vie che al varès puartât un prejudizi seri cuintri dai siei iscrits e dai dipendents che no fevelin par catalan: une valutazion che il tribunâl al à mostrât di no condividi par nuie.

Font: Valencia Plaza, 08/07/17

Cravuazie: minorance serbe ostracizade dai media

Il Consei Nazionâl Serp, organisim di riferiment de comunitât serbe de Cravuazie, al à presentât a Zagabrie une ricercje su la maniere che i cinc cuotidians cravuats plui impuartants a frontin i temis e lis gnovis che a àn a ce viodi cun cheste e cun altris minorancis che a vivin dentri dai confins di stât. Su la fonde de analisi di 1.500 articui, il dât principâl al è che si tint a fevelâ pôc des minorancis e, cuant che si lu fâs, intes gnovis sui serps a fevelâ no son mai i membris di cheste comunitât, ma dome i cravuats. Cun di plui, la presince de minorance e ven presentade dispès come une menace permanente cuintri de Cravuazie. In diviers articui si dopre un lengaç violent cuintri dai serps, e ancje cuant che no si lu fâs in maniere direte si palese une atmosfere che e stice la asse cuintri di cheste comunitât. Intal 1991, prime de vuere, la comunitât serbe de Cravuazie e jere formade di 581 mil personis, in dì di vuê dome di 186 mil.

Font: Balkan Insight, 07/07/17

Paîs Catalans: intervents gnûfs pro e cuintri dal referendum

Cul svicinâsi de date dal referendum su la indipendence, fissade pal prin di Otubar, e cul cressi des pressions par blocâ la iniziative, il guvier catalan al à decidût di sostituî i siei membris che si vevin mostrâts plui in dificoltât su chest front. Cussì la puartevôs dal esecutîf Neus Munté e à lassât il puest a Jordi Turull (Junts pel Sí), la responsabile pe educazion Meritxell Ruiz a Clara Ponsatí (indipendente), e il conseîr pal interni – che al controle ancje la polizie autonomiche (Mossos d’Esquadra) – Jordi Jané a Joaquim Forn (PDECat). La deleghe pai procès eletorâi e je stade invezit trasferide ae vicepresidence dal guvier, in maniere che il responsabil de logjistiche pal referendum di cumò indenant al sarà Oriol Junqueras (ERC).
Cun chê di pidimentâ la organizazion dal vôt, il tribunâl costituzionâl spagnûl al à decidût di declarâ incostituzionâls dutis lis vôs di belanç de Catalogne dedicadis a cuvierzi lis spesis par elezions o consultazions popolârs, par un totâl di passe 6 milions di euros. Il stes orghin judiziari al à però vût di condizionâ il bloc dai bêçs ae verifiche dal lôr ûs reâl in maniere che si ledi a colpî dome lis risorsis che si doprarà pal referendum su la indipendence.

Font: Naiz:, 05-14/07/17

Paîs Catalans: costituzionâls lis leçs di politiche linguistiche

Tra il 2006 e il 2010 i guviers spagnûi in cjarie a vevin impugnât par incostituzionalitât cuatri leçs linguistichis fatis buinis dal Parlament catalan. Dome cumò però il tribunâl costituzionâl di Madrid al à fat cognossi la sô decision in mert che, in buine sostance, i da reson aes istituzions catalanis. Par chel che al rivuarde la leç sul audiovisîf, la sentence e acete che la lenghe doprade par solit e sedi chê catalane, pûr che chest nol puarti ae esclusion dal castilian. Par chel che si riferìs ae leç sul acet, vie libare ae cognossince primarie di un nivel di catalan prime di passâ ae formazion par castilian. In mert al codiç sui acuiscj che al garantìs il dirit dai citadins a che si ur rispuindi te lenghe che a àn miôr, la sentence e declare che, cundut che no si pues previodi sanzions, al è di vignî incuintri ae domande dai consumadôrs. Su la leç dal cine, si manten une cuote minime di catalan che e ven però sbassade dal 50 al 25%. Pes autoritâts catalanis, lis decisions dal tribunâl a mostrin a clâr la volontât dai guviers spagnûi e massime dal PP di meti sot atac la normalizazion linguistiche dal catalan. Sul plan des normis a pro des lenghis propriis, il tribunâl costituzionâl no si à ancjemò pronunciât su la leç di educazion de Catalogne e su chê pal ocitan aranês.

Font: Generalitat de Catalunya, 05/07/17

Paîs Basc: l’euskara al va dilunc a cressi

Ai 5 di Mai i guviers de Comunitât Autonome Basche e de Navare, intune cul Ufici public pe lenghe basche (Euskararen Erakunde Publikoa), a àn presentât i ultins dâts de seste inchieste sociolinguistiche sul stât de lenghe basche, ven a dî chei dedicâts a Ipar Euskal Herria, o sei la part dal Paîs Basc sot aministrazion francese, e chei complessîfs par dute la aree basche. Par chel che al inten il Paîs Basc francês, tra il 1991 e il 2016 il numar dai euskalduns, o sei di chei che a fevelin par basc, al è cressût di un miâr di personis ancje se, cul aument gjenerâl de popolazion, la percentuâl si à sbassade. Il dât miôr però al è chel riferît ai fantats jenfri i 16 e i 24 agns, là che i euskalduns a son cressûts dal 1%, a dimostrazion di une inversion di tindince tra lis gjenerazions plui zovinis ancje in Ipar Euskal Herria. Se si cjalin invezit i dâts gjenerâi dal Paîs Basc, intai ultins vincjecinc agns lis personis in stât di fevelâ par euskara a son passadis dal 22,3% al 28,4%. Chei che lu doprin par solit a son però il 25,7%: tal 10,3% dai câs plui dispès che no la lenghe dal stât, tal 6,2% in proporzion similâr e tal 9,2% cun mancul frecuence che no spagnûl o francês. Sul front dal rapuart cul euskara, lis personis che a vuelin che la lenghe e sedi promovude a son il 55,8% (rispiet al 47,5% dal 1991) e i contraris a son lâts jù al 16%.

Font: EiTB, 05/07/17

Serbie: lis iniziativis dai bosgnacs a preocupin il guvier

Il Consei Nazionâl Bosgnac, organisim di rapresentance de minorance bosgnache in Serbie, al à comunicât la intenzion di celebrâ in grant i cent agns de declarazion di Sjenica. Il document, sotscrit intal Avost dal 1917, al domandave che il Sanzac, regjon a maiorance musulmane a cjaval tra Serbie e Montenegro, al fos anetût ae Bosgne. La gnove e je stade comentade in maniere negative di diviers rapresentants dal guvier di Belgrât preocupâts par vie che a viodin la iniziative tant che un tentatîf di saborâ la separazion di cheste regjon de Serbie. Il suspiet al nas ancje dal fat che, cuasi tal stes moment, membris de minorance bosgnache a àn inviât une petizion par che il Sanzac al deventi une regjon transfrontaliere, sul model des euroregjons in vore te Union Europeane.

Font: Balkan Insight, 04/07/17

Asturiis: passe il 90% al vûl l’asturian a scuele

Ai 28 di Jugn, alì de sede de Academie de Lenghe Asturiane, a son stâts presentâts i risultâts de tierce inchieste sociolinguistiche des Asturiis che e indagave su politichis linguistichis, cognossince e ûs de lenghe. Sul front dai nivei di cognossince de lenghe, la inchieste e mostre che il 90% de popolazion al è in stât di capî l’asturian, intant che il 62% al è bon di fevelâlu, il 38% di leilu e il 25% di scrivilu. Altris dâts impuartants a son po la disparizion cuasi totâl dal stigme linguistic che par agns al à fat vergognâ i asturians di doprâ la lôr lenghe proprie, e une riprese de trasmission intergjenerazionâl dal asturian. Par chel che al rivuarde invezit lis politichis linguistichis, il 64% de popolazion al stime che lis istituzions a fasin pôc o nuie pe lenghe, il 53% al è dacuardi che l’asturian al sedi ricognossût come lenghe couficiâl des Asturiis, e il 51% al volarès che i siei fîs a studiassin l’asturian a scuele. Propite in teme di istruzion, 9 asturians su 10 a domandin che l’asturian al jentri ad in plen intai programs scolastics.

Font: La Nueva España, 29/06/17

Irlande: presentât il rapuart anuâl dal comissari pe lenghe

Ai 27 di Jugn al è stât publicât il rapuart anuâl dal comissari pe lenghe irlandese. Il document si fonde massime su lis segnalazions di violazion dai dirits linguistics fatis indenant dai citadins. Lis segnalazions rivadis vie pal 2016 a son stadis 768, il numar plui alt dal 2004 incà, o sei di cuant che e je stade metude sù la figure dal comissari pe lenghe. Une dimostrazion dai problemis grues che ancjemò a son intal meti in vore la normative di tutele – al à comentât il comissari Rónán Ó Domhnaill – ma ancje de incressite de cussience dai dirits linguistics de bande dai citadins. Un tierç des segnalazions si riferissin ae mancjance di plans linguistics o al lôr rispiet de bande di ents o aministrazions publichis. Il 27,6% des denunciis al diven de mancjance dal irlandês inte tabelonistiche dai edificis istituzionâi e l’11,2% de mancjance te segnaletiche stradâl. Un 8,2% des lamentancis al è riferît a problemis intal ûs de version irlandese dal non o de direzion di cjase. Tal 7,6% dai câs si fevele invezit di rispuestis istituzionâls dadis par inglês a front di domandis fatis par irlandês. Chel altri 5% di segnalazions al è leât al status de lenghe, a publicazions uficiâls o a toponomastiche dome par inglês. Su la fonde di cheste situazion, Ó Domhnaill al à za domandât aes autoritâts irlandesis di sostituî il sisteme dai plans linguistics cun nivei di tutele standard in vore in ducj i ents publics e di cressi il numar di dipendents in stât di paronâ l’irlandês. Domandis che cumò al pâr che a vedin cjatât acet inte propueste di leç par mendâ la normative su lis lenghis uficiâls de Republiche di Irlande.

Font: Irish Times, 27/06/17

Paîs Catalans: azion par rivendicâ il dirit ae indipendence

La dì di S. Zuan, calcolade une sorte di fieste nazionâl ator par ducj i Paîs Catalans, un grup di ativiscj dal moviment zovanîl Arran al à metût in at une azion simboliche par rivendicâ il dirit ae indipendence di dutis lis tieris catalanis. I militants indipendentiscj a àn taiadis vie lis tabelis di confin logadis su la frontiere che e divît la Catalogne tra trê stâts diferents, ven a dî Spagne, France e Andorra. I tocs des tabelis cui nons dai trê stâts a son stâts metûts da pît de cussì clamade “Puarte dai Paîs Catalans”, monument logât a Salsas, dongje di dulà che al cor il confin storic e linguistic tra Ocitanie e Catalogne, dôs des plui grandis nazions cence stât de Europe. Il video de azion al è stât po inviât a diviers mieçs di comunicazion di chestis dôs comunitâts.

Font: Jornalet, 27/06/17

Aragon: a cressin lis risorsis par promovi lis lenghis te scuele

Il guvier dal Aragon al à decidût di incressi lis risorsis e lis strategjiis par promovi lis lenghis propriis intal sisteme scolastic de comunitât. I programs “Luzía Dueso” e “Jesús Moncada” che a permetin aes scuelis che indi fasin domande di ufrî ai lôr students ativitâts curicolârs di animazion par aragonês e par catalan a varan a disposizion intal prossim an scolastic 10 mil euros parom. Si fevele dal 44% di fonts in plui dal an passât, cuant che i doi programs a vevin finanziât cuasi une novantine di ativitâts in passe 60 centris scolastics. Cun di plui, vie pal an 2017-2018, si zontarà ancje il program “El aragonés en el aula” che si propon di incressi la cognossince dal aragonês e di sostignî i professôrs che davuelzin ativitâts scolastichis ta cheste lenghe.

Font: El Diario, 26/06/17

Sanzac: progjet par imbastî une euroregjon

A son plui di 4 mil lis personis che a àn sotscrit une petizion che e sarà inviade ai guviers de Serbie e dal Montenegro cun chê di meti sù intal Sanzac une regjon transfrontaliere, sul model des euroregjons in vore te Union Europeane. L’intindiment principâl, a disin i promotôrs, al è chel di promovi il svilup economic dal teritori par mieç dai finanziaments previodûts par chest gjenar di istituzions. Il Sanzac al è une regjon storiche abitade in maiorance di bosgnacs musulmans e che cumò si cjate dividude jenfri Serbie e Montenegro. La propueste di une euroregjon e cjate però avonde fredis lis comunitâts serbis, montenegrinis e rom che a vivin alì e e lasse avonde malcuiets i guviers dai doi stâts dal moment che la iniziative e gjolt de poie de Turchie, interessade a incressi la sô influence su la regjon cul sostignî lis comunitâts musulmanis che a vivin alì.

Font: Balkan Insight, 26/06/17

Paîs Basc: anulât part dal plan pal euskara de Gipuzkoa

La Provincie de Gipuzkoa e fasarà ricors cuintri de sentence dal tribunâl superiôr di justizie dal Paîs Basc che e anule cinc articui dal so plan di normalizazion dal ûs dal euskara te dade 2013-2017. Pal tribunâl i articui anulâts a metin a risi l’acès ai servizis dai citadins che no fevelin par basc, ma pe Provincie si trate di une leture restritive de normative e di fat, di cuant che il plan al è in vore, nissun citadin si à mai lamentât par cheste reson. In ogni câs, e zonte la aministrazion provinciâl, la sentence e varà un efiet limitât dal moment che aromai a mancjin sì e no sîs mês ae fin di chest plan e tal prossim si dopraran formis che a varessin di evitâ leturis limitativis come chês de magjistrature.

Font: EiTB, 23/06/17

Paîs Basc: soluzion juste pai presonîrs, pal FSP al è il moment

Ai 22 di Jugn i rapresentants dal Forum Sociâl Permanent a àn ricevût lis passe 80 mil firmis cjapadis sù framieç dai lavoradôrs dal Paîs Basc par che si cjati une soluzion juste pai presonîrs, i depuartâts e i dispatriâts causâts dal conflit che par agns al à segnât cheste part de Europe. Lis firmis a saran presentadis ai presidents dai Parlaments de Comunitât Autonome Basche e de Navare intune cu lis conclusions de cuarte assemblee dal Forum che si à tignude a Iruñea / Pamplona vie pal mês di Mai. Dopo di incuintris cu lis fuarcis politichis e sociâls baschis, il Forum al stime che aromai a sedin lis cundizions par che la maiorance dai partîts (PNV, EH Bildu, Podemos, PSE) e dai sindacâts a inviin un dialic inclusîf e trasversâl par cjatâ fûr un percors pe soluzion definitive dal conflit basc e par imbastî une convivence fondade sul rispiet des vitimis di dutis lis espressions de violence che a àn segnât il Paîs Basc tai ultins cincuante agns. Cun di plui, al zonte il Forum, la plui part dai rapresentants politics e sociâi e concuarde sul fat che chest procès al è facilitât dal disarmament metût in at di ETA e che la politiche penitenziarie e à di jessi mudade par adatâsi ae situazion atuâl.

Font: Naiz:, 22/06/17

Norvegje: comission pe veretât e pe riconciliazion cui Sami

Il Parlament norvegjês al à fate buine une leç che e invie il percors par meti sù une comission pe veretât e pe riconciliazion cun chê di fâ cognossi lis violencis, i abûs e lis discriminazions metudis in at cuintri des comunitâts sami e dai cussì clamâts Kvens, o sei i dissendents dai finlandês imigrâts intal secul XIX. Se il teme al è stât al centri di diviersis ricercjis storichis, lis istituzions norvegjesis a àn fat pôc o nuie fin cumò par riparâ ai efiets di chestis politichis repressivis che, massime tra i sami, a àn lassât daûr une ereditât di vergogne, di dinei de proprie lenghe e identitât, e di tabûs. La decision dal Parlament norvegjês e rive juste pocjis setemanis dopo che la stesse strade e jere stade cjapade des autoritâts finlandesis. La leç e je stade poiade di dutis lis fuarcis politichis fale chês de diestre nazionaliste, o sei il Partît dal Progrès (Fremskrittspartiet) e chel Conservadôr (Høyre).

Font: The Barents Observer, 22/06/17

Ream Unît: Sky al ricognòs la nazionalitât dai siei coridôrs

Ai 22 di Jugn il grup britanic Sky al à presentât la scuadre che e partecipe cui siei colôrs al Tour de France e che e à tant che cjapitani Chris Froome. Intal video uficiâl di presentazion i nûf membris de scuadre a vegnin compagnâts dai lôr dâts principâi di identificazion. Par chel che al rivuarde la lôr divignince, il grup Sky al à decidût di no segnalâ la citadinance, ma la nazionalitât par mieç de bandiere de lôr comunitât nazionâl. Cussì i coridôrs galês Luke Rowe e Geraint Thomas a son stâts identificâts cul dragon ros de bandiere dal Gales e no cul Union Jack britanic, intant che Mikel Landa e Mikel Nieve a son compagnâts de Ikurriña basche e no de bandiere spagnole. Cuntune sielte braurose e fûr dal comun, il grup britanic al à cussì decidût di rispietâ la identitât vere dai siei coridôrs e no la lôr partignince statâl cemût che a fasin par solit lis societâts sportivis plui innomenadis.

Font: Naiz:, 22/06/17

Paîs Basc: prin acuardi nazionâl sul euskara

I guviers de Comunitât Autonome Basche e de Navare adun cul organisim public pal euskara dal Paîs Basc sot aministrazion francese a àn metût jù un acuardi su la promozion de lenghe basche che al sarà sotscrit in curt dai rapresentants des trê istituzions. La colaborazion tra chestis entitâts no je gnove, ma e je la prime volte che si rive a di un acuardi che al cjapi dentri dut intun lis trê parts che al è dividût il teritori nazionâl basc, o sei lis dôs comunitâts autonomis che si cjatin intal stât spagnûl (Hego Euskal Herria) e la aree basche che si cjate ta chel francês (Ipar Euskal Herria). Il test al previôt diviers setôrs di intervent che a van de educazion ae analisi sociolinguistiche, des politichis linguistichis sul plan european al ûs sociâl de lenghe. I detais dal acuardi a saran però comunicâts dome dopo che il document al sarà firmât.

Font: EiTB, 20/06/17

Finlande: la ferovie dal Nord une menace pai Sami

I partîts e i industriâi de Finlande a cjalin cuntune vore di interès al progjet di une gnove ferovie di 500 chilometris che e scjavaci lis regjons plui setentrionâls dal stât par peâ il rest de rêt feroviarie cu la cueste norvegjese dal Mâr di Barents. La linie e ven viodude tant che part fondamentâl di une gnove vie comerciâl jenfri Asie e Europe, e in particolâr tra i percors marins simpri plui batûts dal Nord artic e chei continentâi. Il progjet al jeve cetantis preocupazions framieç des comunitâts sami dal moment che la linie gnove e passarès in buine part propit su lis lôr tieris. Il percors al taiarès in doi lis areis tradizionâls dulà che a passonin lis renis, limitant i spostaments e i pascs disponibii pal arlevament e causant la muart di centenârs di animâi. Par Tiina Sanila-Aikio, presidente dal Parlament sami de Finlande, se chest progjet al ves di deventâ realtât, al podarès dâ un colp mortâl ae culture e ae economie tradizionâl dai Sami.

Font: The Barents Observer, 19/06/17