Paîs Catalans: si vote pe indipendence il prin di Otubar

«Volêso che la Catalogne e sedi un stât indipendent sot forme di republiche?» E je cheste la domande – scrite par catalan, par spagnûl e par ocitan aranês – che i citadins catalans a saran clamâts a dâi rispueste il prin di Otubar. A comunicâ la date e la domande dal referendum al è stât ai 9 di Jugn il president de Generalitat, Carles Puigdemont, compagnât di chei altris membris dal guvier catalan e dai deputâts des dôs fuarcis – Junts pel Sí e CUP – che a formin la sô maiorance. Doi dîs dopo – ai 11 di Jugn – clamadis dongje de Assemblea Nacional Catalana, de Associació de Municipis per la Independència e dal Òmnium Cultural, almancul 40 mil personis si son dadis dongje par manifestâ la lôr poie al referendum.

Paîs Basc: Spagne condanade pal câs Atutxa, Knörr e Bilbao

Ai 13 di Jugn il tribunâl european dai dirits umans al à condanât lis istituzions spagnolis par no vê garantît un procès just e imparziâl al ex president dal Parlament de Comunitât Autonome Basche, Juan María Atutxa (PNV), e ai ex membris dal ufici di presidence, Gorka Knörr (EA) e Kontxi Bilbao (EB-IU). La vicende e rimonte ancjemò al 2003 cuant che, te suaze de ilegalizazion e de persecuzion judiziarie de çampe indipendentiste basche (Batasuna), i trê si vevin refudâts di meti in at l’ordin dal tribunâl suprem spagnûl pe dissoluzion dal grup parlamentâr Sozialista Abertzaleak che al tignive dentri i indipendentiscj bascs. Cinc agns plui tart il stes tribunâl ju veve condanâts ae inabilitazion di incarghis publichis e a miârs di euros di multe. Finît il percors judiziari spagnûl, i trê politics bascs a vevin podût presentâ la lôr cause denant dal tribunâl di Strasburc che cumò i à dât reson ricognossint che in Spagne no ur è stât garantît un procès just. Il stât spagnûl al varà di paiâur un euro parom, o sei la cifre simboliche che i trê a vevin domandât tant che risarciment morâl pe lôr condane.

Font: Naiz:, 13/06/17

Europe: resistence linguistiche tal Parlament european

In ocasion dai 25 agns de Cjarte europeane des lenghis regjonâls o minoritariis, l’intergrup des minorancis dal Parlament european al veve domandât che si permetès di doprâ par une volte ancje lis lenghis no uficiâls intant de riunion de Assemblee dai 12 di Jugn e che, in vie ecezionâl, si ur garantìs il servizi di traduzion in vore te aule. Dopo di une prime disponibilitât mostrade dal president Antonio Tajani, lis pressions rivadis dai rapresentants di diviers stâts – Spagne in primis – a vevin puartât a di un dinei totâl de domande. Un tant nol à però fermât un grup di europarlamentârs dal meti in at une azion di resistence linguistiche. Ta cheste maniere cuatri deputâts catalans – Josep-Maria Terricabras (ERC), Francesc Gambús (UDC), Marina Albiol (EUPV) e Ramon Tremosa (PDECat) – un basc – Josu Juaristi (EH Bildu) – e une galiziane – Lidia Senra (Alternativa Galega) – a àn fevelât tes lôr lenghis propriis. Cundut di diviersis interuzions e de mancjance di traduzion, chestis lenghis a son stadis dopradis pe prime volte intune session plenarie dal Parlament european par dimostrâ che la Europe no si ferme ae sume dai siei stâts e des lôr lenghis uficiâls.

Font: VilaWeb, 13/06/17

Cossovo: lis elezions a incressin il cuadri di instabilitât

Lis elezions dai 11 di Jugn in Cossovo a àn lassât il paîs intune situazion di instabilitât. La coalizion formade dal Partît Democratic dal Cossovo (PDK), de Aleance pal Avignî dal Cossovo (AAK) e dal moviment NISMA e je stade la plui votade cun pôc mancul dal 34% des preferencis, ma si ricjate cence une maiorance suficiente par guviernâ. I scuintris politics dai ultins mês no le judaran dal sigûr a cjatâ un acuardi cun chê altre aleance eletorâl formade de Leghe Democratiche dal Cossovo (LDK), de Aleance pal Cossovo Gnûf (AKR) e de liste Alternativa che si à fermade al 25,79% dai vôts. Inmò plui dificile la aleance cul moviment radicâl di oposizion Vetëvendosje che cul 27,16% dai consens al à cuasi dopleât lis preferencis intal zîr di nancje trê agns. In plui dai problemis intal formâ une aleance di guvier, la coalizion vuidade dal Partît Democratic dal Cossovo e varà di frontâ une situazion grivie sul plan internazionâl. Cun di fat, il leader de coalizion – Ramush Haradinaj – al è un dai ex comandants dal UÇK, il moviment armât cossovan, e al è acusât de Serbie di crimins di vuere: al è duncje dificil di pensâ che il guvier di Belgrât al sedi disponibil a fevelâ di cualsisei robe cuntun esecutîf vuidât di un om che al calcole un criminâl. Par chel che al rivuarde lis minorancis, che a àn vincj puescj garantîts intal Parlament cossovan, ancjemò une volte il risultât plui significatîf al è chel de Srpska Lista, il partît di racuelte dai serps, che al à sfiliât il 6% dai vôts e al varès di otignî tra i 9 e i 10 deputâts. I ven daûr il Partît Democratic Turc dal Cossovo cul 1,09% dai consens, intant che chês altris listis a son restadis sot dal 1% dai vôts.

Font: Balkan Insight, 12/06/17; DW, 13/06/17

Ream Unît: tes politichis a cressin SF e PC, al cale il SNP

Cu lis elezions anticipadis clamadis dongje ai 8 di Jugn, la prime ministre britaniche Theresa May e veve chê di infuartî la sô posizion cuntune maiorance ancjemò plui largje tal Parlament di Westminster. La sô prevision si à però mostrade dal dut falade, dal moment che i citadins dal Ream Unît i àn assegnât une maiorance di 318 deputâts, 13 in mancul di chei che e veve e 8 in mancul di chei che a coventin pe maiorance assolude in Parlament. I Conservadôrs, cul 42,4% dai consens, a restin duncje il prin partît dal Ream Unît, ma a sintin sul cuel il flât dai Laburiscj che, cul 40% dai vôts e 262 parlamentârs (30 in plui di chei che a vevin), a àn vût un recupar di là des previsions. Tra i partîts a dimension statâl i unics altris rapresentâts inte Assemblee a son i Liberâi Democratics cun 12 deputâts e i Verts cuntun sôl rapresentant.

Europe: nomenade la gnove direzion de NPLD

Inte suaze de assemblee plenarie de Rêt europeane pe Promozion de Diversitât Linguistiche (NPLD) che si à tignude inte Ladinie dolomitane e je stade sielzude la gnove direzion de organizazion che e unìs guviers locâi e organisims publics che a rapresentin e che a promovin lis comunitâts minorizadis de Europe. Ae presidence de Rêt e je stade elete la assessore pe culture e pe politiche linguistiche dal guvier frison, Sietske Poepejes, intant che come president vicjari al è stât sielzût l’assessôr di riferiment de segretarie gjenerâl pe politiche linguistiche de Galizie, Gregorio Ferreiro Fente.

Font: Lingua.gal, 11/06/17

Paîs Catalans: leç su lis lenghis te aministrazion impugnade

Il tribunâl superiôr di justizie dal Paîs Valenzian al à acetât il ricors presentât cuintri dal gnûf decret che al regole i ûs istituzionâi e aministratîfs des lenghis uficiâls dentri de aministrazion publiche valenziane. A fâlu indenant e je stade la Central Sindical Independent i de Funcionaris (CSIF) che e à ancje domandât che il proviodiment al vegni suspindût fintremai che no rivarà la sentence. Il sindacât al stime che il decret al meti il catalan suntun plan prioritari rispiet al spagnûl, cundut che lis dôs lenghis a varessin di jessi sul stes nivel. Inte realtât, in dì di vuê, la avualiance formâl tra lis dôs lenghis uficiâls e ven superade tai fats di un ûs maioritari dal spagnûl de bande dai funzionaris di là de lenghe doprade dai citadins che si ur indrecin.

Font: VilaWeb, 08/06/17

Macedonie: albanês 8 dai 17 ministris dal gnûf guvier

Dopo mês di crisi istituzionâl, ai 31 di Mai il Parlament de Macedonie al à votât la fiducie al gnûf esecutîf vuidât dal leader dal Partît Sociâl Democratic (SDSM), Zoran Zaev. Il guvier al gjolt de poie di 62 dai 120 parlamentârs, o sei i 49 dal Partît Sociâl Democratic, i 10 de Union Democratiche pe Integrazion e i 3 de Aleance pai Albanês. Cun di fat, dai trê partîts che a rapresentin la comunitât albanese in Parlament, dome chescj doi a àn aderît ae aleance di guvier, intant che il tierç – Besa – al à fat savê che al garantirà la sô poie dome su proviodiments specifics. Dai 17 ministris che a formin l’esecutîf, 8 a son espression dai doi partîts albanês de coalizion di guvier. Inte storie de Macedonie, la comunitât albanese, che e forme un cuart de popolazion totâl dal stât, no à mai vût cussì tancj rapresentants intal esecutîf.

Font: Balkan Insight, 31/05/17

Paîs Catalans: e cres la tension sul vôt pe indipendence

E va dilunc a cressi la tension sul referendum su la indipendence che il guvier de Catalogne al vûl inmaneâ dentri de fin dal an. Ai 30 di Mai i rapresentants di ducj i partîts a pro dal referendum (Junts pel Sí, ERC, CUP, PDeCAT, MES, Demòcrates, Podem) si son cjatâts cul esecutîf par fâ il pont su la situazion dopo dai gnûfs «no» rivâts dal guvier spagnûl a cualsisei ipotesi di acuardi su la consultazion. Pal moment no si à decidût ancjemò nissune date pal vôt ma, a àn fat savê, e je aromai cuistion di setemanis se no di dîs. A Madrid però no si limitin a cjalâ e, in plui des azions repressivis za metudis in at sul plan judiziari, a cressin simpri di plui i atacs di rapresentants dal guvier o des fuarcis che lu sostegnin cuintri de CUP, la ale libertarie e plui dure dal indipendentisim catalan. I siei membris a son dal continui insultâts, discualificâts e acusâts di saborâ la violence, cuntun mecanisim za metût in at agns indaûr cuintri di Batasuna e che al veve anticipât la metude fûr leç dai indipendentiscj bascs. Une situazion che e alarme cetancj catalans (e no dome) preocupâts pe linie simpri plui autoritarie e agressive mostrade des istituzions statâls spagnolis.

Font: Naiz:, 30/05/17; La Vanguardia, 01/06/17

Irlande: prin pas pe riforme de leç su lis lenghis

Ai 30 di Mai, intant di un incuintri di guvier, il ministri Seán Kyne al à anticipât un pôcs dai contignûts de propueste par riformâ la leç su lis lenghis uficiâls de Republiche di Irlande. Des sôs declarazions al somee che diviers dai emendaments previodûts a vegnin incuintri aes domandis fatis indenant dal comissari pe lenghe irlandese, Rónán Ó Domhnaill, e de organizazion pai dirits linguistics Conradh na Gaeilge. Par esempli si varès di sostituî il sisteme dai plans linguistics pal gaelic cun nivei di tutele standard in vore in ducj i ents publics e di proviodi che almancul il 20% dai dipendents publics che si cjaparà sù a vore di cumò indenant al vedi une buine paronance dal irlandês fevelât e scrit.

Font: CnaG, 30/05/17

Scozie: gnove propueste pal vôt su la indipendence

Chê de prime ministre scozese Nicola Sturgeon su la date pal davuelziment di un secont referendum su la indipendence e je une posizion clopadice. Dopo vê cambiât posizion plui di une volte, sul prin tacâ dal an, e veve proponût di tornâ a votâ tra l’Autun dal 2018 e la Vierte dal 2019. Une posizion che e veve cjatât la poie dal Parlament scozês che, ai 28 di Març, al veve fate buine une mozion là che al domandave al Parlament britanic di meti in vore la cussì clamade “sezion 30”, o sei il percors che al permet ae Assemblee scozese di votâ su materiis risiervadis a Westminster tant che, a pont, il referendum su la indipendence. Cumò però, intant de campagne eletorâl pal Parlament britanic, Nicola Sturgeon e à dite che il referendum al varès di davuelzisi dopo che a saran fissâts i detais de jessude dal Ream Unît de Union Europeane, ma prime che l’acuardi di separazion al vegni firmât. Une date che, viodûts i timps stimâts dal guvier di Londre, e riscje di lâ plui innà dal 2019.

Font: The Guardian, 30/05/17

Paîs Catalans: progjet par rignuvî l’insegnament pai adults

La direzion gjenerâl pe politiche linguistiche dal guvier catalan e à inviât il progjet ÈLIA che si propon di rignuvî la ufierte formative di catalan pai adults. In dì di vuê in Catalogne si stime che a sedin doi milions e mieç di personis che a volaressin miorâ la lôr cognossince dal catalan. Il progjet al ponte duncje a rispuindi a cheste domande. ÈLIA si divît in dôs fasis. Te prime, in program chest an, si larà a scrutinâ il rapuart dai adults cul insegnament de lenghe e la lôr cognossince dai percors e dai imprescj za disponibii par chest fin. Intant de seconde fase, che si davuelzarà vie pal 2018, su la fonde des informazions rigjavadis intant de prime, si sviluparà un plan di inovazion de ufierte formative atuâl sul plan pedagogjic, metodologjic, strumentâl e promozionâl.

Font: Generalitat de Catalunya, 29/05/17

Paîs Catalans: aleance televisive intercatalane

Dal acuardi tra lis televisions publichis de Catalogne e des Baleârs – TV3 e IB3 – al è daûr a nassi un spazi comun par catalan batiât Bon Dia Televisió che al sarà trasmetût vie internet. L’intindiment al è chel di rivâ a chel 60% de popolazion che al consume contignûts audiovisîfs par mieç de rêt. Pal moment i materiâi trasmetûts a rivaran dai archivis des dôs televisions, cu la prospetive di zontâ ancje i programs di Canal 9, la television publiche par catalan sierade sot dal penultin guvier de Comunitât Autonome Valenziane. Ta cheste maniere si varessin materiâi in stât di cuvierzi la plui part des tieris di lenghe catalane.

Font: Mallorca Diario, 26/05/17

Ucraine: gnovis cuotis linguistichis pes televisions

Il Parlament de Ucraine al fate buine une leç par regolâ la presince des lenghis intes stazions televisivis dal paîs. Il test al previôt che ducj i canâi che a àn une difusion di nivel statâl a vedin almancul i trê cuarts des lôr emissions par ucrain. Pes televisions di dimension locâl si domande invezit un minim dal 60% dai spazis inte lenghe di stât che a deventin il 75% tal câs dai telegjornâi. Chestis cuotis no varessin di rapresentâ un pidiment pe plui part des lenghis minorizadis feveladis in Ucraine, fale che pal rus che, in plui di jessi maioritari in diviersis regjons, al è une lenghe une vore doprade ancje intal setôr radiotelevisîf.

Font: Broad Band TV News, 25/05/17

Paîs Basc: riforme de politiche linguistiche in Navare

E ve indenant a pas di corse la riforme de politiche linguistiche in Navare. Il guvier de Comunitât al à fat bon il progjet di riforme de leç che e regole l’ûs de lenghe basche intes aministrazions, intes agjenziis e intai ents publics. La gnove leç e elimine l’implant limitatîf di chê prime, par garantî a un numar simpri plui grant di citadins di acedi ai servizis publics ancje par euskara. In Navare, di fat, lis personis che a fevelin par basc a son cressudis a 80 mil. Un aument che al tocje massime i zovins sot dai 24 agns che, tal 25% dai câs, a àn une buine paronance de lenghe. Di cheste incressite al nas ancje il vie libare dal Parlament de Navare al slargjament di 54 a 98 comuns de aree linguistiche miste, o sei chê là che l’euskara al gjolt di une cierte tutele.

Font: EiTB, 24 e 31/05/17

Paîs Catalans: plan linguistic pal personâl dal guvier valenzian

Il guvier valenzian al à presentât il plan di compagnament linguistic pai dipendents de Comunitât autonome in maniere che a vedin lis competencis suficientis par rapuartâsi cui citadins intes dôs lenghis uficiâls, ven a dî il catalan – te sô varietât valenziane – e il castilian. Vuê come vuê, di fat, cundut che il 57,3% dal personâl al declare di jessi in stât di doprâ il catalan, dome il 12,3% des comunicazions cul public a son ta cheste lenghe. Il plan si poie su cinc intervents di fonde. Il prin al metarà a disposizion dai funzionaris modei di documents, dizionaris tematics e publicazions che ur permetin di meti adun lis pratichis par catalan. Il secont al previôt cors sul lengaç aministratîf, juridic e sanitari. Il tierç al ufrìs consulencis linguistichis vie telefon o chat. Il cuart intervent al met adun tutorâts, jutoris personalizâts e volontariât linguistic. L’ultin al ponte a svilupâ une rêt interne programade ancje par catalan.

Font: 20 minutos, 23/05/17

Irlande: il comun di Belfast si vierç aes lenghis

Cui 23 di Mai la aministrazion comunâl di Béal Feirste / Belfast e à inviât une consultazion publiche par sintî la opinion dai citadins su lis politichis linguistichis che e pense di meti in vore. L’esecutîf citadin si propon in particolâr di inviâ un ufici di pueste pe lenghe irlandese e di svilupâ politichis par promovi la varietât di scots che si fevele in Irlande dal Nord. La consultazion e larà indenant par vot setemanis a dilunc.

Font: BBC, 23/05/17

Gales: maiorance a pro de devoluzion de radiotelevision

La maiorance de popolazion galese e vûl che lis competencis su la gjestion dal sisteme radiotelevisîf locâl a vegnin trasferidis dal Parlament di Londre ae Assemblee Nazionâl dal Gales. Daûr di un sondaç dal centri di statistichis YouGov, il 52% dai galês al domande la devoluzion dai podês ta cheste materie, intant che a jessi contrari al è a pene il 27% de popolazion. Se si gjave duncje chei che no àn cjapât posizion, la percentuâl e devente di 65% a pro e 35% cuintri. La organizazion Cymdeithas yr Iaith Gymraeg e à lançât za di cualchi mês une campagne pe devoluzion dai podês che cumò e conte ancje su la poie di disinis di citadins che si refudin di paiâ lis tassis su la television se la competence no sarà trasferide aes Assemblee Nazionâl dal Gales. La iniziative – a àn spiegât – no cjale dome ai beneficis che la devoluzion e puartarès ae presince de lenghe galese dentri dal sisteme radiotelevisîf, ma ancje a favorî la incressite de atenzion par ce che al sucêt in Gales.

Font: Cymdeithas, 22/05/17

Irlande: in miârs in place a Belfast pai dirits linguistics

Sabide ai 20 di Mai miârs di citadins a àn rispuindût al apel de organizazion pai dirits linguistics An Dream Dearg e a àn sfilât pes stradis di Béal Feirste / Belfast, dal cuartîr nazionalist di Falls fintremai il palaç dal comun, intal centri de citât. La iniziative e veve chê di mostrâ inmò une volte la poie par une leç organiche sul irlandês in stât di garantî ad in plen i dirits linguistics de comunitât di lenghe gaeliche de Irlande dal Nord. La rivendicazion e je stade al centri, massime tai ultins mês, di diviersis manifestazions sei te capitâl nordirlandese, sei tes citâts di Doire / Derry e di Iúr Cinn Tráchta / Newry e, dopo des ultimis elezions, e cjate la poie di 50 dai 90 deputâts de Assemblee de Irlande dal Nord.

Font: BBC, 20/05/17

Galizie: in place pal dirit di vivi par galizian cence limitazions

Ai 17 di Mai, in ocasion de Zornade dedicade ae leterature galiziane, miârs di personis a àn sfilât pes stradis di Sant Jacum di Galizie (Santiago de Compostela) par domandâ aes autoritâts di svilupâ politichis in stât di podê doprâ la lenghe proprie cence limitazions in ducj i cjamps de vite. La manifestazion e je stade inmaneade de plateforme pai dirits linguistics Queremos Galego e, in plui di cetancj citadins, e à viodût la partecipazion di rapresentants dai principâi partîts di oposizion (BNG, En Marea, PSdeG, Esquerda Unida), di sindacâts e di associazions pe lenghe. La iniziative e à dât flât ae proteste cuintri des politichis metudis in at dal guvier galizian intai ultins agns. In plui di limitâ la presince de lenghe proprie te scuele, il guvier dal PP al ven acusât di pidimentâ l’ûs dal galizian in cetancj setôrs (economie, justizie, salût e v.i.) cu la sô mancjance di politichis ativis.

Font: Galicia Confidencial, 17/05/17