«Volêso
che la Catalogne e sedi un stât indipendent sot forme di
republiche?» E je cheste la domande – scrite par catalan, par
spagnûl e par ocitan aranês – che i citadins catalans a saran
clamâts a dâi rispueste il prin di Otubar. A comunicâ la date e la
domande dal referendum al è stât ai 9 di Jugn il president de
Generalitat,
Carles Puigdemont, compagnât di chei altris membris dal guvier
catalan e dai deputâts des dôs fuarcis – Junts
pel Sí e CUP – che a formin la sô
maiorance. Doi dîs dopo – ai 11 di Jugn – clamadis dongje de
Assemblea Nacional Catalana,
de Associació de Municipis per la
Independència e dal Òmnium
Cultural, almancul 40 mil personis si
son dadis dongje par manifestâ la lôr poie al referendum.
Il salt
indenant intal procès di autodeterminazion al à discjadenât
daurman la rispueste dal guvier spagnûl che al à afermât che il
referendum no si tignarà e che si metaran in cjamp dutis lis azions
che a coventaran par impedîlu. La declarazion di Puigdemont no à
valôr aministratîf e duncje no si à podût impugnâle denant dal
tribunâl costituzionâl, chel istès la procure di stât le à
presentade al tribunâl superiôr de Catalogne par che le dopri
intant dai procediments in at cuintri di membris des istituzions
catalanis come prove che i ats istituzionâi za fats – tant che il
vê comprât urnis e schedis par votâ – a coventin propit par
celebrâ un referendum su la indipendence. De bande sô, il president
de Generalitat
si à declarât disponibil a frontâ il teme denant dal Parlament
spagnûl e al à confermât che, cundut de rie di «no» rivade fin
cumò, si tignarà vierte fin sul ultin la strade par un vôt
concuardât cu lis istituzions spagnolis. La domande di un referendum
concuardât e rive ancje di fuarcis politichis di dimension statâl
tant che Podemos,
là che une des curints internis – Anticapitalistas
– e à decidût za cumò di poiâ la consultazion indipendentiste
ancje se e ves di presentâsi sot forme di at unilaterâl.
Font:
El Punt Avui, 09-16/06/17;
VilaWeb, 09-16/06/17; Naiz:, 09-16/06/17;
El Pais, 09-16/06/17
Nessun commento:
Posta un commento