Bretagne: gnove manifestazion pe riunificazion in Setembar

La riforme dal sisteme des autonomiis intal stât francês e à sbassât il numar des regjons par vie de fusion tra diviersis di lôr. Un destin che, in gracie di une fuarte mobilitazion popolâr, la Bretagne e à evitât. Se il procès si è sierât cence la pierdite de autonomie, no si à invezit rivât a profitâ de ocasion par tornâ a dâ dongje il dipartiment de Loire Atlantiche che al fâs part de Bretagne storiche ma che di agns si cjate sot di une altre aministrazion regjonâl. Par tignî batût sul teme, la organizazion Bretagne Réunie e à decidût di clamâ dongje une gnove manifestazion popolâr pe riunificazion. L’apontament si davuelzarà a Naoned / Nantes sabide ai 24 di Setembar.

Font: Agence Bretagne Presse, 22/07/16

Galizie: jutoris statâi dineâts par vê doprât il galizian

La organizazion galiziane Mesa pola Normalización Lingüística e à comunicât che e denunciarà denant dal Consei de Europe il ministeri spagnûl pe industrie, pe energjie e pal turisim par vê violât la Cjarte europeane des lenghis regjonâls o minoritariis. La decision e je stade cjapade dopo che l’Istitût pe diversificazion e pal sparagn de energjie, organisim che al dipent dal ministeri, al à dineât jutoris economics impuartants ai comuns di S. Jacum di Galizie (Santiago de Compostela), Teo e Santa Comba par vie che tra i documents che a vevin presentât par otignî i fonts a ‘nd jere ancje cualchidun scrit par galizian. La decision di dineâ i jutoris no ten cont dal fat che chê galiziane e je lenghe uficiâl intune part dal stât e che il so ûs al ven tutelât de Cjarte europeane ancje in situazions come chestis.

Font: Sermos Galiza, 21/07/16

Paîs Catalans: catalan lenghe uficiâl dai Zûcs dal Mediterani

Dai 30 di Jugn ai 9 di Lui di chest an che al ven, la citât di Tarragona i darà acet ai Zûcs dal Mediterani là che passe 4 mil atletis di 26 stâts diferents si sfidaran in 33 dissiplinis sportivis. La organizazion, afidade ae fondazion Tarragona 2017, in acuardi cul guvier catalan e à decidût che tra lis lenghis uficiâls de manifestazion, dongje di inglês, francês e spagnûl, si varà ancje il catalan. Par rivâ a di un tant a son in program dai percors di formazion specifics pai passe 3 mil volontaris che a saran impegnâts pai Zûcs. A contribuî sul plan de formazion e su chel dai materiâi linguistics pe manifestazion a saran la Direzion gjenerâl di politiche linguistiche de Catalogne, il Consorzi pe normalizazion linguistiche e il Termcat.

Font: El Mundo, 20/07/16

Irlande: pussibiliscj tal Sud sul referendum pe riunificazion

Intant de sô prime visite uficiâl intes sîs conteis, il gnûf segretari di stât pe Irlande dal Nord, James Brokenshire, al à declarât che no son lis cundizions par meti in vore l’articul dai acuardis di pâs dal Vinars Sant che al previôt la pussibilitât di un referendum pe riunificazion de isule. La ipotesi e jere saltade fûr intal doman dal referendum su la jessude dal Ream Unît de Union Europeane dal moment che i citadins de Irlande dal Nord si vevin declarâts in maiorance cuintri de jessude. Dopo di un prin moment di cidin, lis autoritâts de Republiche de Irlande a àn invezit mostrât di no scartâ cheste pussibilitât. Il prin ministri Enda Kenny al à dite che propit il procès di jessude dal Ream Unît de Union Europeane al podarès creâ lis cundizions par clamâ dongje il referendum e che intes tratativis che si inviaran tra lis parts si varà di tignî cont ancje di cheste opzion. In Europe si à ancje za vût un precedent di podê imitâ – al à zontât Kenny – ven a dî la riunificazion jenfri la Gjermanie dal Ovest e chê dal Est. Ancje pal Fianna Fáil, il principâl partît di oposizion de Republiche, chê dal referendum e je une strade che e reste vierte.

Font: BBC, 18/07/16

Gales: bancjis e ûs de lenghe, alc si môf

Juste un an indaûr la comissarie pe lenghe galese, Meri Huws, e veve dât fûr un rapuart sui servizis linguistics ufierts des bancjis ativis in Gales e la fotografie che a ‘ndi vignive fûr e jere cetant negative. Tra i prins efiets dal rapuart si veve vût la nassite di une taule di confront cui operadôrs dal setôr che, dopo des primis riunions, e à rivât a dismovi alc. Par chel che al rivuarde lis aplicazions che a permetin l’acès ai servizis bancjaris, dentri de fin dal an e rivarà la version par galês de Barclays intant che chê de NatWest Cymru e je daûr a jessi imbastide. I doi istitûts a àn ancje tacât a ufrî rispuestis par galês sui lôr spazis Twitter. Par chel che al inten invezit i servizis intes filiâls dai istitûts, Barclays e à introdusût dai avîs audio bilengâi, NatWest e à inviât percors di formazion linguistiche pal so personâl e Santander e à fat savê che la cognossince dal galês e je un dai elements sensibii pes sôs assunzions in Gales.

Font: Wales On Line, 17/07/16

Paîs Basc: acuardi pe difusion di EiTB in Navare

Ai 15 di Lui lis assessoris Ana Ollo e Cristina Uriarte, in rapresentance dai guviers de Navare e de Comunitât Autonome Basche, a àn sotscrit un acuardi di colaborazion par slargjâ i servizis di EiTB, la radiotelevision publiche de CAB, a dute la Navare. In spiete che il guvier spagnûl al autorizi pe difusion dal segnâl l’ûs dai spazis a disposizion de Comunitât Forâl de Navare, EiTB e podarà doprâ lis plateformis di difusion dai canâi locâi. La operazion no varà coscj in plui pal guvier de Navare e e permetarà a ducj i citadins di chest teritori di vê acès plen ai diviers canâi sei par basc che par spagnûl che a formin la ufierte di EiTB. Il gnûf servizi al varès di tacâ cul mês di Setembar.

Font: Naiz:, 15/07/16

Crimee: scuintri tra Russie e Ucraine sui dirits dai tatars

Il ministri ucrain pe justizie, Pavlo Petrenko, al à anticipât la intenzion di presentâ une denuncie cuintri de Russie denant dal Tribunâl european pai dirits umans pe metude al bant de organizazion Mejlis, che e rapresente la comunitât tatare de Crimee. Ta cheste penisule, che tal 2014 e je stade anetude de Federazion Russe, a vivin sù par jù 260 mil tatars, o sei il 13% de popolazion totâl. Sul finî dal mês di Avrîl la Cort supreme de Crimee e à decidût di meti fûr leç Mejlis par vie che le calcole une organizazion estremiste. Diviers dai dirigjents di cheste organizazion a jerin scjampâts in Ucraine dopo de anession de Crimee e a van dilunc a acusâ lis autoritâts russis di violâ i dirits de comunitât tatare.

Font: Sputnik International, 15/07/16

Paîs Catalans: leç par une gnove tv publiche valenziane

Ai 14 di Lui il Parlament valenzian al à fate buine la propueste di leç sul servizi public di radiodifusion e television de comunitât autonome che e permet di tornâ a inviâ il servizi taiât intal 2013 de diestre spagnoliste in chê volte al guvier. Il test al è stât votât di dutis lis fuarcis politichis, fale il PP che si è astignût. I citadins de Comunitât Valenziane a varan cussì la pussibilitât di gjoldi di un servizi radiotelevisîf public inte lôr lenghe proprie. La leç e previôt dai mecanisims di control par evitâ che la radiotelevision valenziane e torni a jessi un dipuesit pai amîs dal guvier in cjarie. Par cumò no si sa ancjemò cuant che il servizi al tornarà operatîf e cun trops dipendents.

Font: VilaWeb, 14/07/16

Ocitanie: gnove Calandreta a Sant Guironç

I istitûts Calandreta, sparniçâts par dute la Ocitanie, a son scuelis laichis che a operin in convenzion cul stât francês e a doprin l’ocitan tant che lenghe veicolâr. Cun chest Autun il lôr numar al cressarà in gracie dal gnûf istitût che al è stât autorizât intal comun di Sant Guironç / Saint-Girons, inte aree pirenaiche, là che e je za in vore une scuele bilengâl. Cuntune campagne di autofinanziament che e je stade inviade ta chescj dîs si larà cumò a garantî ancje lis risorsis che a coventin pai mobii e pal materiâl didatic di doprâ te scuele.

Font: Jornalet, 14/07/16

Gales: petizion cuintri dai tais ai progjets pai fruts

La organizazion Cymdeithas yr Iaith Gymraeg (Societât pe Lenghe Galese) e à presentât ai rapresentants dal guvier galês une petizion sotscrite di centenârs di citadins par che a gjavin i tais ai progjets di promozion dal ûs de lenghe galese tra gjenitôrs e frutins. Cul mês di Avrîl, di fat, al è stât sierât il progjet Twf e al so puest si ‘ndi à inviât un altri che però al à a disposizion 200 mil sterlinis in mancul e al lasse cussì cence servizi diviersis provinciis dal Gales. Pe Cymdeithas saborâ l’ûs dal galês in famee tai prins agns di vite dai fruts al è fondamentâl pal svilup de lenghe proprie.

Font: Cymdeithas yr Iaith Gymraeg, 13/07/16

Bretagne: prins pas par une manifestazion unitarie bretone

Une gnove organizazion si è dade dongje in Bretagne cun chê di imbastî un progjet in stât di tirâ dongje lis diviersis realtâts impegnadis sul teritori e di svilupâ cun lôr un percors unitari par disegnâ l’avignî de Bretagne. Il progjet, batiât Bretagne en marche, al previôt di scjavaçâ dute la Bretagne storiche, di Brest a Naoned / Nantes, cuntun percors dividût in sedis tratis là che a ogni toc di marcje si compagni un apontament di confront tra lis diviersis realtâts sociâls. Chescj incuintris a coventaran par tirâ dongje ideis e propuestis e par meti adun un program che al vuidi l’avignî de Bretagne tant che sogjet specific e unitari.

Font: Agence Bretagne Presse, 11/07/16

Paîs Catalans: e cres la ufierte di cines e seriis par catalan

L’assessorât pe culture dal guvier catalan al à sprolungjât l’acuardi inviât intal 2014 cu la plateforme di television a paiament spagnole Movistar+ par incressi la sô ufierte di cines e telefilms sottitulâts par catalan. Si passe cussì des 17 seriis televisivis e dai 148 films sottitulâts dal 2014 a 230 cines sottitulâts, 20 telefilms e 40 titui dopleâts. La emitente, di proprietât de societât Telefónica, e trasmet vie cabli e di satelit par cuasi 4 milions di abonâts. Tratativis a son po in vore par incressi i titui dopleâts o sottitulâts par catalan ancje cu lis plateformis in linie Netflix e Filmin. Sul principi dal mês di Lui il guvier catalan al à ancje publicât une gnove base di dâts in linie par fâ cognossi dutis lis produzions cinematografichis e lis seriis televisivis disponibilis in lenghe catalane.

Font: Europa Press, 11/07/16

Paîs Catalans: gnovis iniziativis pe “Ocitanie - Paîs Catalan”

A di une part dai citadins de Catalogne Nord, o sei chê cjapade dentri intal stât francês, propit no i poche la decision dal Consei regjonâl di proponi “Ocitanie pirenaiche mediteranie” tant che non pe gnove regjon nassude de union jenfri Lenghedoc – Roussillon e Misdì – Pireneus. Il non di “Ocitanie” al è chel plui votât dai citadins de gnove regjon, intant che la adietivazion “pirenaiche mediteranie” e je stade zontade in Consei regjonâl. La ultime peraule dut câs i spiete al Consei di Stât che dentri dal prin di Otubar al à di decidi se fâ bogns o no i nons sielzûts a nivel locâl. Inte Catalogne Nord però miârs di citadins a àn sotscrit un apel par che il non definitîf al vegni cambiât in Ocitanie – Paîs Catalan. Une propueste che e ven cjapade sù ancje di diviers aministradôrs locâi, a tacâ dal sindic di Soler e senatôr republican François Calvet, che al à fat zontâ sui cartei cul non dal comun la definizion di “Paîs Catalan”. Un at rivendicatîf che al vûl sburtâ il Consei di Stât a tignî cont inte sô decision ancje di cheste componente teritoriâl.

Font: VilaWeb, 11/07/16

Ream Unît: propueste par une riforme “federâl” dal stât

Par tancj di lôr aromai, dentri e fûr dal Ream Unît, al è clâr che il risultât dal referendum dai 23 di Jugn che al à metût lis fondis pe jessude de Union Europeane al varà efiets ancje su la architeture interne dal stât. Cun di fat, il vôt al à tornât a infuartî la voie di indipendence in Scozie, al à alçade la tension in Irlande dal Nord là che une part de popolazion e volarès dâsi dongje cul rest de isule e al à puartât une part dai galês a proponi, se no la indipendence, almancul une forme une vore fuarte di federalisim. Cumò ancje dal cûr de Ingletiere e rive une propueste di riforme costituzionâl che e meti man in maniere radicâl al implant statâl. E je chê dal cussì clamât Grup pe Riforme de Costituzion vuidât di lord Salisbury e formât di membris di prin plan dal panorame politic britanic.

Paîs Catalans: implants “statâi” catalans boçâts de Consulte

Il tribunâl costituzionâl spagnûl al à decidût in mert al ricors fat indenant dal guvier di Madrid cuintri des misuris fiscâls e finanziariis fatis buinis vie pal 2015 dal Parlament catalan e al à declarade no costituzionâl la plui part dai articui che, in buine sostance, a metevin lis fondis par creâ struturis tributariis, energjetichis e infrastruturâls in stât di movisi par lôr cont intal câs di indipendence de Catalogne. L’obietîf de sentence al è duncje chel di impedî che tal moment che lis istituzions catalanis a vessin di declarâ la indipendence a puedin poiâsi su struturis aministrativis in stât di garantî sul plan logjistic e operatîf il percors indipendentist.

Font: VilaWeb, 07/07/16

Corsiche: gnûf no di Valls aes rivendicazions de isule

Ai 4 di Lui, intant de visite dal prin ministri francês Manuel Valls in Corsiche, i presidents dal esecutîf e de Assemblee corse, Gilles Simeoni e Jean-Guy Talamoni, no àn platât lis critichis al guvier di Parîs pal so dinei a fâ buinis lis propuestis che a rivin de isule e che ta chescj agns a àn cjatât la poie de maiorance dai citadins e dai elets de Corsiche. Su la taule si àn la couficialitât de lenghe corse, il cussì clamât “statût di resident” (che par evitâ speculazions ediliziis al previôt almancul cinc agns di residence prime di podê comprâ imobii), lis competencis fiscâls, il plan di svilup teritoriâl e la amnistie pai presonîrs politics. Ducj temis che a àn cjatât maiorancis trasversâls inte Assemblee de Corsiche, ma che ancje cheste volte si son cjatâts denant dal “no” dai rapresentants dal guvier di Parîs. Simeoni e Talamoni a àn declarât la disponibilitât a continuâ par cumò a colaborâ cu lis istituzions francesis, ma che a podaressin cambiâ strade se si larà dilunc a no fâ buinis lis propuestis che a rivin de isule.

Font: Liberation, 04/07/16; Corse Net Infos, 04/07/16

ONU: France riclamade sui dirits des comunitâts minorizadis

I delegâts de Rêt Europeane pe Avualiance des Lenghis (ELEN) a son stâts scoltâts in audizion a Gjinevre su la situazion des lenghis minorizadis intal stât francês denant dal Comitât pai dirits economics, sociâi e culturâi de ONU che, ai 27 di Jugn, al à dât fûr il rapuart cu lis sôs conclusions. Il Comitât al ricuarde che il principi di avualiance dai citadins denant de leç e la condane des discriminazions no son avonde par sigurâ l’esercizi dai dirits economics, sociâi e culturâi dai membris des comunitâts minorizadis e al racomande duncje aes istituzions francesis un ricognossiment uficiâl dai dirits des minorancis. Un principi atîf, duncje, che al ricognossi e al promovi i dirits di cui che al fevele intune lenghe minoritarie tes istituzions, te scuele, tai mieçs di comunicazion e te vite sociâl.

Font: ELEN, 01/07/16

Stât spagnûl: a cressin i libris par basc e par catalan

Daûr dai dâts comunicâts dal ministeri spagnûl pe educazion, pe culture e pal sport, vie pal 2015 lis publicazions di libris par basc e par catalan a son cressudis intant che chês par galizian si son sbassadis. A nivel gjenerâl, dentri dal stât spagnûl pôc mancul dal 85% dai libris publicâts a jerin par castilian, cuasi il 12% par catalan (là che al è dentri ancje un 1,7% inte varietât valenziane dal catalan), l’1,9% par galizian, l’1,7% par basc e il rest in lenghis forestis. Tra lis publicazions intune lenghe minorizade la incressite principâl e rive dai Paîs Catalans là che si va dal + 22,2% dal valenzian al + 13,3% dal catalan “standard”, intant che i libris par basc a son cressûts dal 8,5%. In cuintritindince dome il galizian cuntune diminuzion des publicazions dal 3,1%.

Font: 20 minutos, 29/06/16

Bretagne: Diwan, plui students ma a mancjin insegnants

Cul cuadri definitîf des iscrizions pal prossim an scolastic, al ven fûr che lis scuelis bretonis a imersion Diwan a varan ancje vie pal an 2016-2017 un aument dal 6% dai students, compagn di ce che a vevin za vût intal an scolastic che si è a pene sierât. Plui in detai, intes primariis si varan 3.016 fruts (+5,86%) e tes secondariis 1.326 students (+6,25%), dividûts in 151 classis e cun 160 insegnants e 19 suplents. La incressite dai students però e met ancjemò plui sot pression un organic za tirât. Cun di fat, dongje di vê numars no masse alts, chel des Diwan al è un cuarp insegnant in medie avonde zovin e che duncje al dopre plui dispès formis di lavôr a timp parziâl o periodis di permès par maternitât e paternitât. Cun chê di superâ cheste situazion si cirarà duncje di infuartî il personâl, massime cu la zonte di timps parziâi e di suplencis.

Font: Le Telegramme, 28/06/16

Irlande: rapuarts negatîfs sul stât dal gaelic tal Nord

Ai 27 di Jugn al è stât publicât il sest rapuart su la metude in vore intal Ream Unît dal acuardi internazionâl sui dirits economics, sociâi e culturâi. Tal document si marche cun preocupazion la mancjance di misuris concretis de bande des autoritâts britanichis par garantî e par promovi l’ûs dal gaelic irlandês inte Irlande dal Nord. Il Comitât autôr dal rapuart al racomande duncje la metude in vore di une leç specifiche par garantî chescj dirits, su la fonde di ce che a previodin ancje i acuardis di pâs dal Vinars Sant. Te stesse zornade al è jessût ancje il rapuart anuâl dal comissari pe lenghe gaeliche che al riferìs dutis lis mancjancis intal rispiet dai dirits linguistics che si àn intes sîs conteis dal Nord. I doi documents a àn puartât la organizazion pe lenghe Conradh na Gaeilge a invidâ lis autoritâts locâls e chês britanichis a intervignî cuntune legjislazion complete pe tutele e pe promozion dal irlandês.

Font: CnG, 28/06/16