22/07/16

Ream Unît: propueste par une riforme “federâl” dal stât

Par tancj di lôr aromai, dentri e fûr dal Ream Unît, al è clâr che il risultât dal referendum dai 23 di Jugn che al à metût lis fondis pe jessude de Union Europeane al varà efiets ancje su la architeture interne dal stât. Cun di fat, il vôt al à tornât a infuartî la voie di indipendence in Scozie, al à alçade la tension in Irlande dal Nord là che une part de popolazion e volarès dâsi dongje cul rest de isule e al à puartât une part dai galês a proponi, se no la indipendence, almancul une forme une vore fuarte di federalisim. Cumò ancje dal cûr de Ingletiere e rive une propueste di riforme costituzionâl che e meti man in maniere radicâl al implant statâl. E je chê dal cussì clamât Grup pe Riforme de Costituzion vuidât di lord Salisbury e formât di membris di prin plan dal panorame politic britanic.
Il grup al à metût jù il stampon di une gnove leç di union (Act of Union) là che si propon di assegnâ aes nazions e aes regjons che a formin il Ream Unît dutis lis competencis fale che politiche foreste e tratâts internazionâi, difese e sigurece statâl, imigrazion e dirits umans, monede e bancje centrâl, servizis finanziaris e gjestion gjenerâl de fiscalitât, aministrazion publiche e cort supreme di justizie. Cheste devoluzion fuarte di podês e sarès compagnade di une revision parlamentâr, cu la abolizion de Cjamare dai Lords o la sô sostituzion cuntune Cjamare des nazions e des regjons e une Cjamare dai deputâts plui sclagne. Si trate cumò di capî ce acet che cheste propueste e varà de bande dal gnûf guvier britanic vuidât di Theresa May. Su la taule a restin però cuistions no di pôc. Par esempli, la propueste no somee cussì atrative pe Scozie là che l’indipendentisim al è simpri plui fuart, no ufrìs soluzions pe gnove politiche confinarie tra Nord e Sud de Irlande dopo de jessude de UE, no ricognòs in nissune maniere la identitât separade de Cornualie e no propon cemût guviernâ la Ingletiere, se cu la creazion di un Parlament specific o cu la devoluzion dai podês a gnovis regjons autonomis.
Font: The Guardian, 10/07/16

Nessun commento: