Bretagne: par Ai’ta! la Regjon e à di fâ la politiche linguistiche

Al è aromai plui che clâr che lis istituzions statâls no àn nissune intenzion di impegnâsi par garantî i dirits linguistics des comunitâts minorizadis, par chest e à di jessi la aministrazion regjonâl a deventâ protagoniste ta chest cjamp. Di chest resonament e partìs la iniziative indreçade ae presidence de Regjon Bretagne dal coletîf pai dirits linguistics Ai’ta! cun chê di sburtâ il guvier regjonâl a impegnâsi pe lenghe proprie. In plui di cressi i invistiments pe politiche linguistiche, Ai’ta! i domande ae Regjon di tornâ a viodi lis convenzions cul stât centrâl o cun altris sogjets publics in maniere di aumentâ la presince de lenghe bretone intal sisteme scolastic e te radiotelevision publiche, e di otignî la presince di segnaletiche bilengâl su la viabilitât principâl, tes stazions feroviariis, tes puestis e tai museus. A son po azions che la aministrazion regjonâl e pues inviâ daurman tant che une presince paritarie dal breton in Consei e tai uficis regjonâi, e une campagne par sensibilizâ i fruts sui temis de lenghe e de culture de Bretagne.

Font: Agence Bretagne Presse, 01/05/16

Irlande: elezions tal Nord, 4 partîts e 70 candidâts pal gaelic

La organizazion pe lenghe Conradh na Gaeilge e à puartât indenant une campagne a pro dal gaelic (#GaelVóta) indreçade ai partîts e ai candidâts in corse tes elezions dai 5 di Mai in Irlande dal Nord. Trê i impegns principâi che si domandave aes fuarcis politichis di cjapâ sù, ven a dî: un invistiment di 2,6 milions di sterlinis in plui par svilupâ un plan strategjic par incressi l’ûs de lenghe irlandese e infuartî i puescj di vore ta chest setôr; la promozion dal gaelic inte vite sociâl de bande dal ministeri nordirlandês pes comunitâts; il svilup di un sisteme scolastic che al garantissi l’insegnament dal irlandês e che al incressi la presince des scuelis a imersion. L’impegn a sostignî chestis politichis al è rivât di cuatri partîts te lôr totalitât – Sinn Féin, SDLP, People before Profit Alliance, Cross-Community Labour Alternative – e di passe 70 candidâts a titul personâl.

Font: CnaG, 29/04/16

Paîs Catalans: autodeterminazion, sì al referendum tal Nord

Il tribunâl di Perpinyà / Perpignan al à declarât che un referendum su la autodeterminazion al fâs part de libertât di espression e che duncje cui che si propon di imbastîlu nol davuelç une ativitât ilegâl. Cun cheste motivazion la magjistrature e à refudât la domande di dissoluzion fate indenant de prefeture dal dipartiment dai Pireneus orientâi cuintri dal Comitât pe autodeterminazion de Catalogne Nord, o sei la regjon catalane sot aministrazion francese. La prefeture, che e je stade condanade a paiâ lis spesis legâls, e veve presentât denuncie intal 2014 cuant che il comitât al voleve inmaneâ une consultazion popolâr come chês inviadis intal principât di Catalogne. Dopo de sentence il Comitât al à fat savê che al è pront a lâ indenant cul progjet di referendum e che intal framieç al à racuelt avonde donazions par organizâ lis operazions di vôt. Par cumò no si à savût nuie su la date che però e varès di jessi vie pal 2017.

Font: VilaWeb, 29/04/16; Jornalet, 29/04/16

Paîs Catalans: STEI al vûl plui azions pal catalan tes Baleârs

Il sindacât dai insegnants STEI al à domandât al guvier des Baleârs misuris concretis di discriminazion positive par incressi la presince e l’ûs de lenghe catalane tai istitûts scolastics, tes aministrazions publichis, tai mieçs di comunicazion e te societât. Tant che esemplis concrets di azions di podê meti in vore, il sindacât al propon une gnove normative par garantî l’insegnament al cent par cent par catalan, ma ancje cors di formazion in servizi pai professôrs, materiâi didatics adats a dutis lis tapis educativis e scambis scolastics cun chês altris comunitâts di lenghe catalane.

Font: Periódico de Ibiza y Formentera, 29/04/16

Europe: bandieris proibidis al Eurovision, bascs come i teroriscj

Il festival european de cjançon Eurovision si conferme simpri di plui une manifestazion indreçade a esaltâ une vision dal continent centrade sui stâts e sul monolinguisim inglês a dam de pluralitât e de diversitât des comunitâts nazionâls e des lenghis che lu componin. L’inglês di fat al devente simpri di plui la uniche lenghe de manifestazion, tes cjançons, te presentazion e fintremai tes scritis ametudis su lis bandieris dal public che al partecipe ae finâl. E propit la diretive interne su lis bandieris ametudis in sale dade fûr chest an de organizazion e à jevât scjas. Te liste des bandieris che il public nol pues puartâ, in plui di chês cun publicitâts, cun simbui o scritis che a puedin risultâ ofensivis, a son elencadis ancje chês che a àn scritis che no sedin par inglês o che a rapresentin comunitâts locâls, autonomis o regjonâls. Come a dî: nuie stât, nuie bandiere. Proibizion però ancje par chês realtâts aministrativis che la lôr statualitât no je ricognossude di ducj tant che Cossovo, Transnistrie o Palestine. Il piês però si lu à tocjât là che, te liste des bandieris metudis come esempli di proibî, si à metût dongje chê basche (ikurriña) cun chê dal stât islamic. Lis reazions duris rivadis dal Paîs Basc, ma ancje de Catalogne, de Corsiche e di altris nazions cence stât a àn puartât i organizadôrs a scusâsi. Pecjât che, ancje se la imagjin de bandiere basche cumò e je stade gjavade de liste dai esemplis, la proibizion di metile fûr intant de manifestazion e reste.

Font: Naiz:, 28 e 29/04/16; VilaWeb, 29/04/16

Lussemburc: lussemburghês prime lenghe a cjase e a scuele

Su la fonde dai ultins dâts comunicâts dal istitût statâl di statistiche Statec, intai lûcs di lavôr dal Lussemburc la lenghe plui fevelade e je il francês. Cun di fat, a doprâlu sul puest di vore al è il 68% des personis. I vegnin daûr il lussemburghês (60%) e il todesc (34%). Tes scuelis invezit e je la lenghe proprie dal granducât a jessi la plui doprade. Il lussemburghês al è il plui fevelât ancje par chel che al rivuarde il rest de vite cuotidiane (cjase e timp libar). La seconde lenghe plui fevelade fûr dal lavôr e de scuele e je il portughês – o sei chê de comunitât imigrade plui numerose – intant che il francês si ricjate al tierç puest.

Font: Luxemburger Wort, 27/04/16

Polonie: prin incuintri dal president Duda cu lis minorancis

Ai 26 di Avrîl il president polac Andrzej Duda si è cjatât pe prime volte cui rapresentants des diviersis comunitâts di minorance ricognossudis a nivel statâl. La plui part des minorancis ricognossudis in Polonie e je rapresentade di popolazions che a son maiorance tai stâts dongje tant che lituans, cecs, slovacs, rus, ucrains, bielorùs e todescs, ma ancje di comunitâts nativis o che a àn un leam storic cun cheste tiere tant che karaims, lemko, rom, ebreus, armens e tatars. Il president nol à fat riferiment ae situazion penze che si cjatin a patî diviers ativiscj e rapresentants di grups minoritaris par vie di un nazionalisim polac simpri plui agressîf, ma al contrari al à piturât une Polonie là che no si àn conflits leâts ae partignince etniche – nazionâl. Intal so intervent Duda nol à fevelât di azions di tutele pes minorancis, ma dome de dibisugne di infuartî in ducj i citadins il sens di partignince ae Polonie.

Font: Polskie Radio dla Zagranicy, 26/04/16

Paîs Basc: ai 4 di Jugn mobilitazion pal euskara in Navare

La organizazion Kontseilua e à clamât dongje une manifestazion pai prossims 4 di Jugn a Iruñea / Pamplona cun chê di rivendicâ une politiche linguistiche plui eficace pe lenghe basche. L’invît al partecipâ al è in primis a ducj chei che a son impegnâts intal moviment sociâl a pro dal euskara, ma ancje a ducj chei che a vuelin la pussibilitât di podê doprâ in dutis lis ocasions cheste lenghe. Dal sigûr la situazion e je miorade dopo che il guvier de Navare al è passât de diestre regjonaliste e spagnoliste a di une aleance progressiste – nazionalitarie, ma si spietavisi alc di plui. Di chi la decision di dâsi adun in place par mostrâ la volontât de int di vê politichis linguistichis plui fuartis pal basc.

Font: Naiz:, 25/04/16

Ream Unît: protestis cuintri dal tai dai fonts statâi pal cornic

Dal 2003 indenant, o sei di cuant che i jere stât ricognossût il status di lenghe minoritarie, il guvier britanic al veve assegnât al Consei de Cornualie un contribût anuâl di 150 mil sterlinis par judâ la presince dal cornic intes istituzions, te educazion, te societât e te economie. Cun chest an però l’esecutîf di Londre al à scancelât i contribûts. Denant des protestis dal Consei de Cornualie, il guvier britanic al à rispuindût che l’acuardi su la devoluzion fat bon l’an passât al è compagnât di un finanziament complessîf di un miliart e 700 milions di sterlinis pai prossims cuatri agns e che se lis istituzions de Cornualie a vuelin invistî su la lenghe a puedin tirâ fûr i bêçs di li. La spiegazion no à però convint ni lis autoritâts locâls e nancje un trop di 18 parlamentârs che a àn presentât une mozion par che il guvier al riviodi la sô posizion. La iniziative e je stade poiade di 16 deputâts scozês dal SNP, di un galês dal Plaid Cymru e di un laburist.

Font: BBC, 21/04/16; Parliament UK, 27/04/16; Mebyon Kernow, 28/04/16

Ocitanie: procès di rifondazion pal moviment Libertat!

Nassût intal 2009 de union tra diviers grups de çampe rivoluzionarie ocitane, il moviment Libertat! al è daûr a inviâ un procès di rifondazion. Il prin pas al è in program il prin di Mai intun cjamp politic che si davuelzarà a Pau. La decision e diven de dibisugne di analizâ i mudaments che si àn vûts ta chescj agns dentri dal stât francês a partî de capacitât di atrat de diestre ultranazionaliste ancje intai confronts des classis popolârs. A front di tancj temis di frontâ a son dai elements di fonde che a restaran di riferiment, a partî de capacitât di meti dongje la lote pe autodeterminazion de Ocitanie cu la difese dai siei dirits sociâi, linguistics e nazionâi, e dai leams cu lis lotis di liberazion di chei altris popui.

Font: Jornalet, 19/04/16

Galizie: cine “minoritari” pe mancjance di poie istituzionâl

Il cine intes lenghis minorizadis nol à tant un probleme di produzion, ma di invisibilitât che al diven de mancjance di atenzion de bande des istituzions e dal sisteme di distribuzion cumò in vore. E je la conclusion di un studi svilupât di ricercjadôrs de universitât di Sant Jacum di Galizie (Santiago de Compostela) che al cjape in esam e al confronte in particolâr la situazion de cinematografie in Galizie, Gales e Finlande. Si trate di trê realtâts avonde diviersis sul plan dai nivei di autoguvier e di status de lenghe proprie, ma propit il lôr confront al permet di sclarî cemût che une cinematografie che no dopre une lenghe di comunicazion internazionâl si cjate pidimentade o fintremai condanade ae invisibilitât se no je poiade des istituzions cun politichis di pueste che, dongje di invistiments specifics, a àn di cjapâ dentri ancje percors e imprescj che a permetin a chestis produzions di jessi viodudis intai media – a partî des televisions publichis locâls – e di vê acès ae grande distribuzion.

Font: Galicia Confidencial, 18/04/16

Paîs Basc: miârs in place a Bilbao pai presonîrs

Passe 19 mil personis a àn manifestât ai 17 di Avrîl pes stradis di Bilbo / Bilbao par domandâ il rispiet dai dirits dai presonîrs bascs. La mobilitazion e je stade inmaneade e sostignude di passe un miâr di ex presonîrs e dispatriâts impegnâts cumò par cjatâ fûr une soluzion par centenârs di bascs che si cjatin ancjemò in preson o esiliâts par vie de lôr partecipazion ae lote pe indipendence dal Paîs Basc. Se l’obietîf finâl al è chel di une amnistie che, intune suaze di soluzion politiche dal conflit, e permeti a ducj di tornâ a cjase, lis rivendicazions primariis a son chês de fin de dispersion dai militants intes presons plui lontanis dal Paîs Basc e dal rispiet ancje pai bascs di chei dirits che a vegnin ricognossûts a ducj chei altris presonîrs.

Font: Naiz:, 17/04/16

Paîs Catalans: la ANC e programe cinc mobilitazions pe Diada

Inte assemblee gjenerâl dai 17 di Avrîl la Assemblea Nacional Catalana (ANC) e à decidût che a saran cinc lis mobilitazions che si davuelzaran pai 11 di Setembar di chest an, in ocasion de fieste nazionâl de Catalogne (Diada). Cun di fat, se vie pai ultins agns, si veve decidût di centrâ lis fuarcis suntune uniche grande manifestazion, chest an si fasarà un at unic ma svilupât in cinc localitâts diviersis cun chê di rapresentâ un paîs “unît, viert e solidari”. Sul prin tacâ dal Astât invezit si davuelzarà une mobilitazion par poiâ i aministradôrs locâi investigâts de magjistrature spagnole pal lôr impegn a pro de indipendence. La ANC e à ancje decidût che, intal câs simpri plui probabil di elezions anticipadis a nivel statâl, si lavorarà par sburtâ la unitât des fuarcis politichis catalanis, ancje se no cuntune uniche liste indipendentiste.

Font: VilaWeb, 17/04/16

Paîs Catalans: IB3 si torne a viodi ancje in Catalogne

I citadins dal principât di Catalogne a àn di gnûf la pussibilitât di viodi IB3, la television publiche par catalan des Baleârs. Ancjemò intal 2009 il guvier de Catalogne e chel des isulis a vevin sotscrit un acuardi di reciprocitât des emissions televisivis publichis cun chê di creâ un spazi comun televisîf par catalan, ma il mudament des tecnologjiis di difusion dal segnâl e dai ecuilibris politics a vevin puartât a fermâ la condivision des emissions intal Novembar dal 2012 in Catalogne e intal Març dal 2015 intes Baleârs. La situazion e je però tornade a cambiâ e, dopo che intal Dicembar stât la television publiche catalane (TV3.cat, 3/24 e Super 3/33) e je tornade disponibile pai citadins des isulis, cumò a son tornadis ancje pai catalans lis emissions di IB3.

Font: Vila Web, 15/04/16

Paîs Basc: passe 600 libris par euskara ancje pai vuarps

I fonts bibliografics de ONCE (la organizazion statâl pe assistence des personis vuarbis) de Comunitât Autonome Basche in dì di vuê a àn a disposizion passe 600 titui par euskara adatâts pes personis cun disabilitâts visivis. Si trate di libris adatâts dal personâl de ONCE sei in formât braille che sonôr (sisteme Daisy). Un tant al è stât pussibil in gracie dal acuardi tra il guvier de Comunitât Autonome e la sezion basche de ONCE in vore dal 2006 e confermât ancje par chest an. Vie pal 2016 il program al previôt l’adatament di altris 55 libris garantît di un invistiment complessîf di 44 mil euros.

Font: Euskadi.eus, 14/04/16

Galizie: pas indaûr de magjistrature sui dirits linguistics

Ai 14 di Avrîl la plateforme pai dirits linguistics Queremos Galego e à inmaneât une iniziative di proteste denant dal tribunâl superiôr di justizie de Galizie a Coruña cuintri de sentence che e à boçât une buine part de ordenance dal Comun di Lugo sul ûs istituzionâl de lenghe galiziane. Il tribunâl al à contestât ducj i passaçs dal test là che no si faseve riferiment al castilian (spagnûl) par vie che cualchidun al varès podût calcolâju come un ricognossiment de sole uficialitât dal galizian, e fintremai il passaç là che si definìs il galizian tant che lenghe proprie de Galizie. Un decision che par Queremos Galego e je fondade su prejudizis linguistics che a vuelin mantignî il galizian intune cundizion di inferioritât rispiet al castilian. Intun document inviât ai dirigjents dai orghins judiziaris, la organizazion e critiche la sentence par vie che in plui di jessi contrarie ae volontât de maiorance de comunitât galiziane e va cuintri ancje de normative locâl, statâl e comunitarie sui dirits linguistics.

Font: Sermos Galiza, 14/04/16

Cossovo: acuardi tra sindics albanês e serps de aree di Pristina

Ancje in gracie de mediazion de mission OCSE in Cossovo, sîs comuns de aree di Pristina – sei a maiorance albanese che serbe – a àn sotscrit un acuardi di colaborazion cun chê di incressi il dialic tra lis diviersis comunitâts e di fâi cuintri a ogni forme di discriminazion. Chê di Pristina e je une aree là che par fortune no si àn vûts masse scuintris jenfri albanês e serps, ma lis relazions tra lis dôs comunitâts a restin avonde tiradis. Chest acuardi al ponte duncje a superâ chestis tensions e al è positîf che tra i sindics che a àn sotscrit l’acuardi a sedin rapresentants sei di Vetevendosje, moviment de aree cossovane plui nazionaliste, sei de Lista Srpska, leade ad in dopli cul guvier di Belgrât.

Font: Balkan Insight, 14/04/16

Europe: no dal Parlament ai tescj Erasmus par basc e catalan

Ai 12 di Avrîl il Parlament european al à boçât cun 515 vôts cuintri, 183 a pro e 5 astignûts un emendament che al impegnave la Comission Europeane e i stâts membris de Union a voltâ i documents dal program Erasmus ancje intes lenghis scolastichis veicolârs tant che il catalan e il basc. Il no al è rivât de grande maiorance dai membris dai Popolârs europeans, dai Liberâi, dai Conservadôrs e Riformiscj, e dai Eurosetics; plui dividût invezit il vôt framieç dal grup socialist; a sostignî in bloc l’emendament a son stâts invezit i grups de Çampe Unitarie Europeane e dai Verts. Framieç dai eurodeputâts elets intal stât spagnûl, a votâ cuintri a son stâts i rapresentants de diestre spagnoliste (PP e Ciudadanos) e a pro ducj chei altris (PSOE, Podemos, IU e rapresentants des nazionalitâts minorizadis).

Font: El País, 12/04/16

Gales: campagne par invertî i tais sui progjets pai fruts

La organizazion Cymdeithas yr Iaith Gymraeg (Societât pe Lenghe Galese) e à lançât une campagne par sburtâ il guvier che al jessarà des prossimis elezions galesis a invertî i tais decidûts dal esecutîf in cjarie pal progjet di promozion dal ûs de lenghe proprie tra gjenitôrs e frutins. Cul mês di Avrîl, di fat, al è stât sierât il progjet Twf e al so puest si à inviade la iniziative Cymraeg i Blant (Galês pai frutins) che e à però une disponibilitât di 200 mil euros in mancul dal progjet precedent e che e lasse cence servizi diviersis provinciis dal Gales. La poie al ûs de lenghe proprie in famee tai prins agns di vite dai fruts al deve un grues contribût ae cressite dal galês, e spieghe la Cymdeithas, e duncje no si pues no cjalâ cun preocupazion la disparizion di chest servizi in diviersis areis dal paîs.

Font: Cymdeithas yr Iaith Gymraeg, 11/04/16

Ongjarie: fonts par facilitâ la cognossince de culture rom

Il guvier ongjarês al à publicât un bant par finanziâ une serie di progjets su la culture rom che a àn une disponibilitât di 160 mil euros. L’intindiment al è chel di slargjâ framieç dai citadins une cognossince dai elements culturâi de plui impuartante minorance etnolinguistiche de Ongjarie. Par fâlu si ponte massime su dôs liniis di azions, ven a dî poiâ manifestazions specifichis dedicadis ae culture rom e sburtâ la presince di iniziativis dedicadis a cheste culture dentri di altris events.

Font: Politics.hu, 08/04/16