Crimee: cidinade la radiotelevision tatare indipendente

Cul prin di Avrîl il canâl informatîf indipendent ATR, l’unic in Crimee a trasmeti ancje par tatar, al à vût di blocâ lis sôs emissions. Dopo de anession de Crimee ae Federazion russe, ducj i mieçs di comunicazion locâi a vevin di regjistrâsi alì des gnovis autoritâts dentri dal prin di Avrîl. La direzion de ATR e à presentât par trê voltis i documents che a coventavin par regjistrâsi, ma ogni volte lis autoritâts russis a àn cjatavin alc che nol leve e à boçavin la domande. Il cuart tentatîf nol à nancje vût rispueste e si è rivâts cussì ae scjadince fissade par regjistrâsi.

Paîs Basc: in vore par un protocol pe avualiance linguistiche

Kontseilua, il consei dai organisims sociâi pe lenghe basche, al à presentât la assemblee europeane de diversitât linguistiche che si davuelzarà intal Dicembar dal 2016 a Donostia, inte suaze des iniziativis leadis al ricognossiment de citât basche tant che capitâl europeane de culture. Ta chê suaze si presentarà un protocol su la avualiance linguistiche che al sarà svilupât de organizazion basche adun cul Pen International, cu la Organizazion des nazions e dai popui no rapresentâts, cun Linguapax, cu la Rêt europeane pe avualiance linguistiche (ELEN), cul Ciemen e cul Centri european pes cuistions des minorancis. Il pont di partence par chest document al sarà la declarazion universâl dai dirits linguistics che e jere stade fate buine a Barcelone intal 1996.

Font: Deia, 01/04/15

Bretagne: al cres l’insegnament bilengâl

L’ûs veicolâr de lenghe bretone tes scuelis al va dilunc a cressi. Cun di fat, i istitûts bilengâi dal setôr public (Div-Yezh) a contin cumò 6.887 students, cuntun aument dal 3,4% rispiet al an prime. Si à po di zontâur i 5.099 iscrits aes scuelis catolichis Dihun e i 3.854 students des scuelis a imersion Diwan, ancje chei in aument rispiet al an passât. Ce che invezit al jeve preocupazion e al pidimente la incressite e je la mancjance di insegnants specializâts, risultât dal disinterès des istituzions francesis pe formazion par breton.

Font: Le Telegramme, 31/03/15

Paîs Basc: de CAB 400 mil euros pal euskara in Iparralde

Il guvier de Comunitât Autonome Basche al va indenant a judâ lis realtâts associativis impegnadis intal promovi l’euskara in Ipar Euskal Herria, la part dal Paîs Basc che si cjate intal stât francês. Ai 31 di Març, il delegât de CAB pe politiche linguistiche, Patxi Baztarrika, e il president dal organisim public de lenghe basche, François Maitia, a àn sotscrit l’impegn finanziari pal 2015 che si insuaze intal acuardi plurienâl 2011 – 2016. Si fevele di un font pe promozion de lenghe basche cuntune dotazion totâl di 1,6 milions di euros là che 400 mil euros a rivin drets de Comunitât Autonome Basche. Cuasi un milion e 300 mil euros a saran dâts, par mieç di convenzions di pueste, ai sogjets principâi impegnâts intal promovi l’euskara, il rest invezit al permetarà di finanziâ progjets a pro de lenghe fats indenant di altris sogjets privâts.

Font: Diario Vasco, 31/03/15

Stât spagnûl: il 13% de editorie e je par catalan, basc e galizian

Daûr dal rapuart su la produzion editoriâl intal stât spagnûl, dilunc vie dal 2014, il 77,7% dai titui publicâts a jerin par spagnûl, il 10,6% par catalan (te cifre al è dentri ancje l’1,3% calcolât tant che valenzian), l’1,5% par galizian e l’1,4% par basc. Se si cjale, invezit, ai dâts che a rivin des diviersis comunitâts autonomis, la proporzion di publicazions in lenghe proprie plui alte e je chê des isulis Baleârs cul 48,5% di titui par catalan (a front di un 36,7% par spagnûl), i vegnin daûr la Galizie, cul 33% di titui par galizian, la Comunitât Autonome Basche, cul 32,6% di publicazions par euskara, la Catalogne cul 27,9% par catalan, il Paîs Valenzian cul 17,1% dai titui par catalan, e la Navare cul 5,6% dai libris publicâts par basc. Se si cjale però ai numars complessîfs l’85,8% dai titui par catalan si lu à editât in Catalogne (il 5,6% tes Baleârs e il 5,1% a Madrid, ma chestis cifris no tegnin cont dal valenzian) e il 79,1% di chei par euskara inte Comunitât Autonome Basche (cun Madrid che cul so 10,3% e fâs miôr de Navare, ferme al 5,9%). Se si cjale aes publicazions par fruts, che tal 2014 a son stadis il 8,1% dal totâl, si viôt la impuartance centrâl che chest setôr al à inte produzion basche, là che a rapresentin plui dal 30% dal totâl. La atenzion pai fruts e je plui alte de medie statâl ancje inte editorie par catalan, cun cuasi il 20% dal totâl, e ta chê par galizian, là che e passe il 12%.

Font: Europa Press, 29/03/15

Romanie: pal guvier voie di autonomie e razisim a son chel stes

Al pareve che cu la elezion di un membri de minorance todescje tant che president de Republiche, la Romanie e tacàs a fâ dai pas indenant sul plan dal ricognossiment de sô pluralitât linguistiche e nazionâl, invezit intes ultimis setemanis si viodin azions che a van juste de bande contrarie. In Març si veve proibît la celebrazion de Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. Po si à vût l’arest dal sindic di Gyergyószentmiklós / Gheorgheni par vê metût fûr la bandiere szekely suntun edifici public. Cumò si è rivâts al pont che intal stampon des strategjiis pe sigurece 2015 – 2020 che il guvier rumen al à imbastît si à metût lis rivendicazions di autonomie des comunitâts minorizadis sul stes plan dal razisim e de xenofobie, cun dut ce che chest al compuarte sul plan juridic e repressîf. Fin cumò però, a nivel comunitari però, cheste menace simpri plui penze cuintri des minorancis no à cjatât censuris, fale par un intervent dûr di condane de Aleance Libare Europeane (EFA).

Font: EFA, 27/03/15

Asturiis: i sindacâts de scuele a domandin l’asturian uficiâl

A contestâ lis politichis imbastidis dal esecutîf asturian sul front dal insegnament de lenghe proprie no son dome lis organizazions impegnadis inte promozion dal asturian, ma ancje i sindacâts de scuele. Intun comunicât unitari, di fat, lis organizazions sindacâls plui impuartantis – SUATEA, Fete-UGT, CCOO Enseñanza Asturias e Corriente Sindical d’Izquierda – a acusin il guvier asturian di condanâ cu lis sôs sieltis l’avignî dal asturian. Sot atac la mancjance di azions par inserî l’insegnament de lenghe proprie sul stes plan di chês altris materiis e la propueste di curicul che e previôt fintremai il tai di trê cuarts des oris setemanâls par asturian intes scuelis superiôrs de comunitât. Par invertî cheste ande e dâi fuarce al asturian, a zontin i sindacâts, la soluzion miôr al è che di declarâlu lenghe couficiâl intes Asturiis.

Font: InfoAsturies, 27/03/15

Paîs Catalans: leç anticatalane fate buine dal PP valenzian

Il Parlament valenzian, cul vôt a pro dome dal PP, al à fate buine une leç sul ricognossiment, la protezion e la promozion dai elements identitaris dai valenzians. Il proviodiment al previôt che si meti sù un osservatori che al controli che i finanziaments publics no ledin a associazions o a ents che lis lôr azions a son judicadis cuintri dai principis di cheste leç. Cun di plui al ricognòs i titui di cognossince dal valenzian assegnâts di entitâts che a doprin une grafie divierse di chê uficiâl. La logjiche di cheste normative e je chê di alimentâ in maniere artificiose la diference tra valenzian e catalan, cence fondis sul plan sientific e za condanade sul plan juridic, par fâi cuintri a ducj chei che si impegnin par promovi la lenghe e la identitât dai Paîs Catalans. Par cheste reson, nissune fuarce politiche fûr de diestre spagnoliste, e à poiât la leç.

Font: Ara, 25/03/15

Stât francês: elezions dipartimentâls tra lûs e scûr

Ai 22 e ai 29 di Març si son tignûts il prin e il secont turni des elezions dipartimentâls intal stât francês. Intun cuadri gjenerâl là che il sucès de diestre republicane, rapresentade de aleance jenfri UMP e UDI, al à rivât a limitâ la incressite menaçose de estreme diestre xenofobe dal FN, il vôt framieç des nazionalitâts minorizadis al à mostrât cualchi lûs e un biel pôc di scûr.

Paîs Basc: si à sierade a Bilbao la XIX edizion de Korrika

Domenie ai 29 di Març si à sierade a Bilbo / Bilbao la edizion diesime novesime de Korrika, la corse inmaneade ogni doi agns de AEK (coordenament pe alfabetizazion e pe baschizazion) cun chê di cjapâ sù fonts pe promozion e pal insegnament dal basc e par slargjâ te societât l’ûs di cheste lenghe. La corse, partide de localitât di Urepele / Urepel inte Basse Navare, e je lade indenant cence polsis par undis zornadis e par 2.161 chilometris scjavaçant dutis lis provinciis baschis. [Di segnalâ che tra lis lenghis dopradis sul sît uficiâl par presentâ la manifestazion, chest an si à vût ancje il furlan.]

Font: Naiz:, 29/03/15

Ocitanie: inviade la devoluzion dai podês inte Val di Aran

Il guvier catalan al à fats bogns i prins decrets pe devoluzion des competencis e dai servizis al Consei gjenerâl de Val di Aran su la fonde de gnove leç che e ricognòs a chest teritori un regjim di autonomie speciâl dentri de Catalogne. I prins trasferiments a integnin protezion civîl, cumierç, artesanât, archivis e festivitâts. La leç di autonomie, fate buine dal Parlament catalan ai 21 di Zenâr di chest an, e ricognòs la identitât nazionâl ocitane di cheste valade pirenaiche, i siei dirits storics e la sô specificitât garantide di un statût speciâl che cui prins trasferiments al tache a cjapâ sostance.

Font: Jornalet, 26/03/15

Macedonie: scuintri te maiorance tra macedons e albanês

Al è scuintri viert in Macedonie tra i doi partîts che a formin la maiorance di guvier, o sei il Partît Democratic pe Unitât Nazionâl Macedone (VMRO DPMNE), che al è il plui votât framieç de comunitât macedone, e la Union Democratiche pe Integrazion (DUI), espression de minorance albanese. Al centri dal contindi a son une propueste di leç che e previôt une prove scrite de residence intal stât par podê rinovâ la cjarte di identitât e une altre che e puarte ae pierdite dai dirits leâts ae residence intal câs che si sedi a stâ intal forest par plui di trê mês di file. I doi proviodiments a laressin a colpî massime la comunitât albanese, che in dì di vuê e rapresente un cuart de popolazion totâl dal paîs. Cun chest sisteme si vûl ridusi in maniere artificiose il numar dai albanês de Macedonie, e dîs la Union Democratiche pe Integrazion, che e à duncje fat savê che e doprarà ducj i mieçs a sô disposizion par impedî che i doi tescj a deventin leç. Intal câs de prime propueste, là che in Parlament e covente la dople maiorance, i baste votâ cuintri, tal secont câs invezit e menace di blocâ i lavôrs de aule cun centenârs di emendaments.

Font: Balkan Insight, 25/03/15

Scozie: decidude la gnove strategjie dal Bòrd na Gàidhlig

Il diretîf dal Bòrd na Gàidhlig al à fatis buinis lis gnovis liniis di azion strategjiche presentadis dal aministradôr delegât, Iain Campbell, che di pôc al à cjapât il puest di John Angus MacKay ae vuide de agjenzie pe lenghe gaeliche scozese. A son cuatri lis prioritâts che a son stadis fissadis, a partî di un inzornament dal Plan nazionâl di politiche linguistiche pal gaelic in vore, adun cu la preparazion dal stampon pal Plan 2017-2022. Sul front dal insegnament si larà a implementâ lis strategjiis pe prime infanzie, pes scuelis secondariis e pe educazion dai adults, e si metarà jù il stampon pes diretivis pal insegnament dal gaelic che a varan po di jessi fatis buinis dal guvier scozês. Par chel che al rivuarde lis politichis pes comunitâts locâls, lis azions a saran centradis su la fasse di etât sot dai trente agns, su lis fameis cun fruts piçui e su lis comunitâts là che il gaelic al è fevelât di almancul il 20% de popolazion. Par finî si larà a infuartî la colaborazion cun chei altris sogjets publics e privâts impegnâts pe lenghe.

Font: Bòrd na Gàidhlig, 24/03/15

Gales: fats bogns i standards linguistics gnûfs pai ents publics

La Assemblee Nazionâl dal Gales e à fats bogns i gnûfs standards linguistics che il guvier galês, i conseis locâi e lis autoritâts dai parcs nazionâi a varan di rispietâ. I nivei a van a cjapâ il puest dai plans di politiche linguistiche fats bogns dai singui ents e al sarà il comissari pe lenghe galese a decidi, câs par câs a seconde des ativitâts davueltis, i standards di meti in vore. Tra lis novitâts previodudis si à ancje la pussibilitât pal comissari di multâ cui che nol rispiete i nivei previodûts. Tal Autun di chest an a varessin di jessi fats bogns i standards par struturis sanitariis, universitâts e altris sogjets publics. Une tierce butade e cjaparà dentri ancje sogjets privâts che a davuelzin un servizi public, tant che lis compagniis de aghe.

Font: Wales on line, 24/03/15

Finlande: mobilitazion sami cuintri di gnovis minieris

La decision de Agjenzie finlandese pe chimiche e pe sigurece (Tukes) di assegnâ une licence pe esplorazion minerarie inte aree di Ohcejohka / Utsjoki, Geavvu / Kevo e Deatnu / Teno ae compagnie KDR e à fat saltâ sù lis comunitâts sami che a vivin di simpri ta chê regjon. Un rapresentant politic de comunitât al è svolât a Dublin, là che e je la sede de compagnie, par consegnâ une difide a sgjavâ inte regjon. La difide, poiade de Coalizion antiminerarie de valade di Deatnu, e ricuarde che la licence assegnade de Tukes e je ilegâl par vie che i mancje il consens preventîf e informât des comunitâts sami che a son lis popolazions indigjenis di chês tieris e a ‘ndi àn il plen gjoldiment. Inte letare consegnade ae KDR si informe ancje che se la compagnie no si ritirarà, si procedarà a fâi cuintri cun ogni forme di lote, de mobilitazion sociâl aes campagnis di sensibilizazion, dai procediments legâi su nivel statâl fintremai ae segnalazion de violazion dai dirits des popolazions nativis denant de ONU.

Font: Finugor, 23/03/15

Cossovo: rivendicazions unitariis dai aministradôrs serps

Ai 18 di Març i aministradôrs locâi dai comuns a maiorance serbe dal Cossovo setentrionâl si son dâts adun par cirî di coordenâ i prossims pas di fâ. Ae fin de riunion si à metût jù un document unitari cun dîs obietîfs che si ponte a otignî. Par esempli si domande di inviâ cence altris ritarts la associazion dai comuns serps dal Cossovo e che la comunitât serbe e vedi une rapresentance tes aministrazions locâls, ancje cuant che no je maiorance. Si ponte po ancje a di une autonomie finanziarie dai comuns serps e al dirit di veto dai elets serps in Parlament su lis leçs che a àn un efiet diret su la lôr comunitât. Altris domandis a integnin la liberazion dai presonîrs politics serps, la tutele des proprietâts de glesie ortodosse e ancje il bloc des privatizazions.

Font: Balkan Insight, 18/03/15

Asturiis: tes superiôrs a risi il 75% des oris pal asturian

La organizazion Iniciativa pol Asturianu e à fat savê che i plans imbastîts dal assessorât pe educazion dal guvier asturian a previodin il tai di trê des cuatri oris setemanâls previodudis pal insegnament de lenghe proprie intes scuelis superiôrs de comunitât. Za la situazion e je grivie dal moment che l’asturian al è dome materie opzionâl, cun cheste iniziative si riscje duncje di meti fin ae presince de lenghe intes superiôrs. Adun cu la denuncie dal fat, Iniciativa pol Asturianu e domande al esecutîf locâl di tornâ su la sô decision e di mantignî la situazion dal insegnament almancul sui nivei dal dì di vuê.

Font: Iniciativa pol Asturianu, 17/03/15

Asturiis: manifest trasversâl pe couficialitât dal asturian

Plui di un centenâr di personalitâts, di mistîrs i plui diviers e di orientament politic trasversâl (dal PP a IU, di Podemos al PSOE), a àn firmât un apel par che l’asturian al vegni ricognossût de comunitât regjonâl tant che lenghe couficiâl. L’intindiment al è chel di profitâ dal svicinâsi de scjadince eletorâl par obleâ i partîts a cjapâ un impegn o almancul une posizion clare sul teme dal ricognossiment. Pai organizadôrs la iniziative za cumò e je un sucès par vie che e mostre che la difese dal asturian no je une cuistion ideologjiche o di partît, ma e parten a ducj in maniere trasversâl.

Font: El Comercio, 16/03/15

Finlande: rimandât il vôt pe convenzion sui popui natîfs

Ai 14 di Març il Parlament finlandês al à tignût la sô ultime riunion di lavôr prime de dade di inativitât che e anticipe lis elezions pe gnove assemblee. Al ordin dal dì e jere ancje la ratifiche de convenzion 169 de International Labour Organisation, la agjenzie de ONU dedicade ae tutele dai lavoradôrs e ae protezion sociâl. Si trate di une diretive vincolante che e garantìs dute une schirie di dirits aes comunitâts nativis e che e je za in vore in vincjedoi stâts ator pal mont. Il Parlament finlandês al à però decidût di no metile in votazion e duncje la sô ratifiche e je rimandade ae prossime legjislature. La ministre pe justizie Anna-Maija Henriksson e à declarât il so marum par cheste decision, ma e à ancje ricognossût che un vôt fat di presse al varès riscjât di pidimentâ in maniere definitive la ratifiche. Intant dai lavôrs de aule, denant dal Parlament, si è tignude une manifestazion inmaneade de organizazion de zoventût sami che e domandave la ratifiche de convenzion. La metude in vore de diretive e larès di fat a zovâ in primis propit aes comunitâts sami che a vivin tes regjons plui a Nord de Finlande, in plui che in Norvegje, in Svezie e intun toc de Federazion Russe.

Font: YLE, 14/03/15

Finlande: lis gnovis de radio publiche ancje par carelian

La radiotelevision publiche finlandese YLE e à inviât un gnûf program informatîf par carelian. Si trate di une trasmission radiofoniche setemanâl di gnovis metude adun cul jutori de Societât pe Lenghe Careliane. Daûr dai dâts dal ultin censiment, in Finlande a vivin plui o mancul 350 mil carelians, 30 mil di lôr a son ancjemò in stât di fevelâ la lôr lenghe proprie e 5 mil le doprin ogni dì. I prins dâts di scolte a mostrin che il program al è scoltât ancje di un pôcs di finlandês: un tant al è pussibil par vie che il carelian al è il lengaç plui dongje dal finlandês. Dongje dal finlandês (ancje te version semplificade e in forme di segns) e dal carelian, la radiotelevision publiche de Finlande e ufrìs programs ancje par svedês, sami, rus e inglês.

Font: Finugor, 04/03/15