14/04/15

Stât francês: elezions dipartimentâls tra lûs e scûr

Ai 22 e ai 29 di Març si son tignûts il prin e il secont turni des elezions dipartimentâls intal stât francês. Intun cuadri gjenerâl là che il sucès de diestre republicane, rapresentade de aleance jenfri UMP e UDI, al à rivât a limitâ la incressite menaçose de estreme diestre xenofobe dal FN, il vôt framieç des nazionalitâts minorizadis al à mostrât cualchi lûs e un biel pôc di scûr.
In Ocitanie, su la cjarte la plui grande tra lis nazions cence stât de Europe, la aree nazionalitarie e jere rapresentade dal cartel eletorâl Bastir! che al veve però un numar limitât di candidaturis, nissune in stât di passâ al secont turni. In Corsiche, là che la nassite in curt di une coletivitât uniche al puest dai doi dipartiments di vuê e à sbassât l’interès pal vôt, cundut di cualchi buine percentuâl otignude dai indipendentiscj di Corsica Libera, dome i nazionaliscj moderâts di Femu a Corsica a àn rivât a vê trê elets. Inte Catalogne dal Nord cualchi risultât positîf al è rivât dai candidâts di Convergència Democràtica de Catalunya e di Unitat Catalana che a corevin in aleance cun UMP e UDI, ma cence nissun elet. In Alsazie i autonomiscj di Unser Land a àn rivât a presentâ candidaturis cuasi pardut e a otignî dispès percentuâls tra il 10 e il 15%. Ancje se no àn rivât a mandâ nissun al secont turni, al è un risultât pardabon impuartant par un partît che nancje un an indaûr al veve a pene un pugn di militants. Cun di plui, in Alsazie, il sucès de UMP al è leât massime ae oposizion al progjet socialist di eliminâ cheste regjon par incuarpâle intune plui grande. In Bretagne il centri diestre al cres, i socialiscj a tegnin avonde, la estreme diestre no cjate masse acet, e si viodin buinis percentuâls di vôt par diviers candidâts de aree nazionalitarie cun cuatri elets a tacâ dal referent di Nous te ferons Bretagne, Christian Troadec. La vere sorprese e rive però dal Paîs Basc setentrionâl là che i nazionalitaris di EH Bai a àn un vût un elet e une medie di consens di passe il 16%, plaçantsi al tierç puest daûr di UMP e socialiscj e denant dal FN. Cheste incressite di consens i veve fintremai permetût di passâ al secont turni in cinc dai dodis distrets che e je dividude la aree basche.
Font: Agence Bretagne Presse, 22-30/03/15; Alta Frequenza, 23-30/03/15; El Punt Avui, 23/03/15; Jornalet, 23-30/03/15; Naiz:, 23-30/03/15; Rue 89 Strasbourg, 23/03/15; Unser Land, 23/03/15; VilaWeb, 22/03/15

Nessun commento: