Paîs Catalans: un sburt aes multinazionâls pal ûs dal catalan

La fondazion Vincle e la Plateforme pe lenghe a àn metût fûr la version par inglês e adatade al public internazionâl dal portâl Empresa en catala. Chest gnûf imprest, nassût dal sburt dal sisteme imprenditoriâl catalan, al à chê di meti a disposizion ancje des multinazionâls che a àn sedis o filiâls intai paîs di lenghe catalane un spazi informatîf che al permet di cognossi la dimension dal marcjât linguistic catalan, lis leçs su la lenghe e esemplis di buinis pratichis sul plan linguistic di podê meti in vore.

Font: Generalitat de Catalunya, 06/02/15

Norvegje: popui natîfs di Barents a congrès

Si è tignût a Tromsø, in Norvegje, il tierç congrès dai popui natîfs de regjon di Barents là che a jerin rapresentâts sei i cuatri stâts che si dividin cheste aree de Europe setentrionâl, ven a dî Norvegje, Svezie, Finlande e Federazion Russe, sei i trê popui natîfs che a vivin alì, o sei sami, veps e nenets. Tra i risultâts dal congrès si à l’acuardi tra i cuatri stâts par finanziâ in maniere continuative e avuâl il grup di lavôr internazionâl dai popui natîfs. Intant de riunion però no son mancjadis lis critichis pai pidiments che lis autoritâts russis a vevin metût ai delegâts des comunitâts indigjenis che intal Setembar stât a vevin di lâ a New York pe conference mondiâl dai popui natîfs. Une vicende che, a àn rispuindût i rapresentants rus, e je za al centri di une investigazion che i siei risultâts a saran comunicâts al Consei pai dirits umans de ONU.

Font: Barents Observer, 05/02/15

UE: iniziative de NPLD pes lenghis minorizadis

Ai 5 di Fevrâr une delegazion de NPLD (Rêt pe promozion de diversitât linguistiche) e à presentât alì dal Parlament european un plan di azions che di chi al 2020 a varessin di judâ a promovi dentri de Union Europeane la diversitât linguistiche. Il document si svilupe dilunc di cuatri liniis di azion prioritariis e al vûl dâi sostance ai principis di tutele e di promozion des lenghis minorizadis che intal Setembar dal 2013 a jerin stâts riclamâts di une risoluzion dal Parlament european. La presentazion a Bruxelles e vûl jessi il prin pas par une dade di consultazions che e varès di davuelzisi intai prossims mês. Tra lis propuestis dal plan si à il ricognossiment tant che lenghis uficiâls dentri des istituzions europeanis di chês lenghis minorizadis tant che basc, catalan e galês che za a gjoldin di un nivel di couficialitât intes regjons là che a son feveladis, ma ancje che a sedin cjapadis dentri di programs tant che il curriculum vitae eletronic Europass o l’Ersmus+.

Font: El Pais, 05/02/15; Diario de Navarra, 05/02/15; NPLD, 02/02/15

Scozie: lenghe e culture gaeliche simpri plui di atrat

In Scozie l’interès pe lenghe e pe culture gaeliche al va dilunc a cressi. A dimostrâlu a son ancje dôs gnovis jessudis sul prin tacâ di Fevrâr. La prime si riferìs a sîs istitûts scolastics primaris logâts intes isulis ocidentâls de Scozie che a àn otignût il ricognossiment di scuelis gaelichis. Il guvier scozês al à concedût chest status dopo de decision dai istitûts di passâ dal inglês al gaelic tant che prime lenghe di insegnament. La seconde gnove si riferìs ae publicazion di un studi sui risultâts de edizion 2014 dal Royal National Mod, o sei l’apontament che ogni an al celebre la lenghe e la culture gaeliche. Daûr de ricercje la edizion stade dal event, che si è tignude a Inbhir Nis / Inverness, e à svilupât un zîr economic di trê milions e mieç di sterlinis, cuasi un milion di plui di ce che si spietavisi.

Font: BBC, 03 e 06/02/15

Asturiis: ricognossiment dal consei scolastic statâl pe lenghe

Il Consei scolastic dal stât spagnûl al à fate buine la propueste che e previôt la pussibilitât di vê une classe di insegnament specifiche ancje pai professôrs di asturian. Cun di fat, a maiorance, si à aprovât un document che al previôt che ta chês comunitâts autonomis là che si fevelin lenghis ricognossudis e che a son za insegnadis intes scuelis, ancje se no gjoldin di un status di couficialitât, i professôrs che a insegnin cheste lenghe intai istitûts secondariis a àn dirit a di un ricognossiment compagn di chel dai insegnants di chês altris materiis. Un proviodiment duncje che al somee fat su misure pe situazion de lenghe asturiane. Il ricognossiment però nol rivarà in automatic, ma al à di jessi domandât de comunitât autonome interessade.

Font: Asturias 24, 03/02/15

Paîs Catalans: la universitât valenziane in cjamp pe lenghe

La universitât di València e à inviât une campagne pe normalizazion linguistiche che, cundut che si indrece prin di dut ae comunitât universitarie, e à chê di rivâ ancje al rest de societât. La iniziative e met al centri la avualiance linguistiche e e ricuarde che ducj a àn di vê i stes dirits e i stes dovês, di là de lenghe che si fevele. La campagne si svilupe su dîs messaçs leâts a diviersis situazions cuotidianis là che si sburte par che il catalan, e la sô varietât valenziane, a vedin chês stessis oportunitâts di jessi dopradis dal spagnûl.

Font: Generalitat de Catalunya, 03/02/15

Paîs Basc: l’euskara al cres in Navare

Ai 3 di Fevrâr il guvier de Navare al à presentât la ultime mape linguistiche de Comunitât di dulà che al ven fûr che, intai ultins vincj agns, al è cressût il numar des personis che a cognossin la lenghe basche, ancje se il dât al cambie daûr de zone. In medie, il 25% de popolazion al capìs l’euskara e al è in stât di fevelâlu almancul a di un nivel elementâr. Inte cussì clamade aree bascofone, il 60% de int al è bon di fevelâ par euskara: si trate di un dât plui bas di chel di dîs agns indaûr compagnât ancje di une diminuzion marcade di chei che lu doprin in maniere normâl in cjase. Inte aree miste il 12% de popolazion al sa l’euskara, ven a dî il dopli di vincj agns indaûr. La cognossince de lenghe e cres ancje te aree che la leç e calcole di no bascofone, là che il 4% de int al sa fevelâ par euskara; une percentuâl che però e salte sù al 12% se si calcolin dome i minôrs di 14 agns.

Font: EiTB, 03/02/15

Lusazie: iniziativis e problemis sot de lint de EFA

La Lusazie e je une regjon storiche logade a cjaval tra i lands de Sassonie e dal Brandeburc là che e vivin i serbians (o sorabis), ven a dî la uniche minorance slave autoctone dentri dal stât todesc. Sul prin tacâ di Fevrâr la Aleance Libare Europeane (EFA) e à tignût a Njebjelcicy / Nebelschuetz une conference par frontâ i temis dal autoguvier, de promozion linguistiche e culturâl, e de sostenibilitât ambientâl di cheste comunitât. Intant dal apontament, là che in plui dai rapresentants des organizazions serbianis a jerin ancje i delegâts dai partîts autonomiscj di Slesie, Moravie e Sud Tirôl, si à ancje presentât il progjet par meti sù un Parlament regjonâl serbian (Sejmik). La Lusazie però e sarà al centri ancje di altris iniziativis de EFA: sul finî di Fevrâr si varan doi apontaments intal Parlament european là che si fevelarà dal program di scuele serbiane a imersion (progjet Witaj) e dal impat dramatic des minieris di cjarbon a cîl viert pal ambient e pe int de Lusazie. In Avrîl, invezit, la citât serbiane di Budysin / Bautzen i darà acet ae assemblee gjenerâl de Aleance Libare Europeane.

Font: EFA, 03/02/15

Gales: galês doprât pôc intes rêts sociâls

Daûr di une ricercje curade dal guvier galês e dal comissariât pe lenghe galese al ven fûr che il numar des personis in stât di fevelâ cun plene paronance il galês al è dal 11%, cuant che dîs agns indaûr al jere dal 12%. Al cres invezit il numar di cui che al à une cierte cognossince de lenghe, massime tra i fruts e i zovins. Tra chei che a fevelin par galês, la metât e à ocasion di doprâlu ogni dì, dome un su cinc lu fevele simpri in cjase, ma al cres il numar di chei che lu doprin sul puest di vore. Al è un cuadri cun alts e bas chel che al jes di cheste ricercje, là che la situazion piês si le viôt intes rêts sociâls dulà che ancje cui che al cognòs il galês al tint a doprâ cuasi simpri l’inglês. Cussì, dome un su vot al scrîf sms par galês e un su dîs al mande emails ta cheste lenghe, su Facebook il galês al ven doprât cuasi simpri dome dal 9% di chei che a cognossin la lenghe e su Twitter sì e no dal 6%.

Font: BBC, 29/01/15

Scozie: disponibil il coretôr ortografic pal gaelic

Ai 28 di Zenâr al è stât presentât in maniere uficiâl intal Parlament scozês un coretôr ortografic gaelic par Microsoft Office. Il program, che si poie suntune base di dâts di 547 mil formis, al è stât svilupât de agjenzie Bòrd na Gàidhlig. Si trate di un imprest pensât par judâ a doprâ la lenghe in maniere plui sigure a scuele, intai rapuarts di vore e ta chei informâi, ma ancje par semplificâ il rapuart tra il standard scrit e lis diviersis varietâts de lenghe gaeliche feveladis ator pe Scozie.

Font: Bòrd na Gàidhlig, 28/01/15

Paîs Basc: no judiziari al euskara uficiâl a Ustaritz

Il tribunâl aministratîf di Pau al à anulât la delibare che e uficialize la lenghe basche intal comun di Uztaritze / Ustaritz, intal Paîs Basc sot aministrazion francese. Il proviodiment al jere stât fat bon dal consei comunâl a grande maiorance, ma il prefet dal dipartiment dai Pireneus Atlantics lu à impugnât. La aministrazion comunâl, vuidade de çampe patriotiche basche, e je cumò in spiete di podê lei lis motivazions de sentence par decidi ce fâ, ma intal framieç e à fat savê che e larà indenant cul lavôr di normalizazion za inviât che al previôt la traduzion par euskara di ducj i documents uficiâi e la formazion linguistiche dai dipendents publics.

Font: Naiz:, 27/01/15; Le Figaro, 27/01/15

Spagne: violazion dai dirits linguistics al esam de ONU

Ai 21 di Zenâr la Rêt Europeane pe Avualiance Linguistiche (ELEN) e à presentât intant de audizion sul rispiet dai dirits umans in Spagne tignude de ONU a Gjinevre un rapuart che al met adun lis violazions dai dirits linguistics segnaladis intal stât spagnûl tra il 2007 e il 2013. Plui che une liste sterpe des normativis violadis, il document al centre la sô atenzion su câs specifics là che lis vitimis di chestis violazions a contin ce che ur à sucedût. Indi ven fûr un cuadri di discriminazion sistematiche e istituzionalizade des lenghis altris dal stât spagnûl tant che catalan, basc e galizian, ma ancje asturian e aragonês. Il document al sarà presentât in Jugn intant di une session plenarie de ONU, ma in gracie de mediazion dai europarlamentârs bascs e je za stade fate cognossi ancje ae Comission europeane. Cun di plui e podarès jessi la fonde par puartâ il teme denant de Cort europeane pai dirits umans.

Font: El Punt Avui, 27/01/15; Europa Press, 28/01/15; El Pais, 21/01/15

Man: une app par cognossi la storie de isule

Intai ultins agns la isule di Man e je al centri di une rinassince nazionâl che e à puartât a di un sflorî di ativitâts par tornâ a scuvierzi la culture e la identitât origjinâl di cheste dipendence de corone britaniche logade juste intal mieç dal Mâr de Irlande. Ta cheste suaze si son svilupâts percors educatîfs, dentri e fûr des scuelis, par studiâ la lenghe proprie di cheste comunitât, une lenghe celtiche imparintade cul irlandês e cul gaelic scozês che e jere aromai sul pont di disparî. Cumò però si vûl dâi un sburt ancje ae cognossince de storie di Man e par chest si à a pene lançât une aplicazion pensade massime pai students des scuelis secondariis, ma che e pues tornâ buine par ducj, là che si fâs cognossi la storie de isule ancje cul jutori di videos e di induvinins. La app, svilupade dal Comitât pe radiodifusion gaeliche e di une fondazion privade, e je gratuite e si pues doprâle sei su computer che sui dispositîfs informatics mobii.

Font: BBC, 26/01/15

Paîs Basc: la Gipuzkoa e vûl plui euskara tai comuns

Inte suaze des audizions inte comission istituzionâl dal Parlament de Comunitât Autonome Basche sul progjet di leç di riforme des aministrazions comunâls, il delegât pal euskara de provincie de Gipuzkoa al à proponût che la gnove leç e garantissi la competence linguistiche di ducj i elets cul previodi che par candidâsi si vedi di vê une cognossince suficiente de lenghe basche. Il rapresentant de Gipuzkoa al à ancje domandât des mendis al test par che si dedi prioritât al euskara intal paisaç linguistic e inte comunicazion istituzionâl dal moment che par rivâ a di une bilinguisim vêr si à di dâi plui fuarce ae lenghe che cumò e je plui pidimentade intal so ûs sociâl.

Font: Diario Vasco, 26/01/15

Galizie: ai 8 di Fevrâr gnove manifestazion pe lenghe

Il coordenament Queremos Galego, che al met adun passe sîscent realtâts associativis, al à proclamât pai 8 di Fevrâr une zornade di mobilitazion a pro dal galizian che e varà il so moment centrâl inte manifestazion in program a S. Jacum di Galizie (Santiago de Compostela). A stiçâ cheste gnove mobilitazion a son i ultins dâts publicâts dal Istitût galizian di statistiche (IGE) che a mostrin cemût che, pe prime volte, l’ûs de lenghe proprie framieç de popolazion al sedi lât sot dal 50%. Par Queremos Galego si trate dal risultât di almancul trente agns di inazion dal guvier locâl che al sosten une politiche di uficialitât formâl, ma no reâl de lenghe galiziane.

Font: Galicia Hoxe, 26/01/15

Paîs Basc: Bildu al propon la vie basche pe indipendence

Ai 24 di Zenâr EH Bildu e EH Bai a àn presentât la lôr propueste par une vie basche pe indipendence. Si trate di un progjet viert che intai prossims mês al sarà fat cognossi ai citadins, aes realtâts sociâls e economichis baschis par che lu discutin e par che a dedin il lôr contribût par svilupâlu. La idee e je chê di un procès cun velocitâts diferentis a seconde dal nivel di cussience des diviersis provinciis che a formin il Paîs Basc e che al partissi des istituzions che za a esistin par trasformâlis di struments di subordenazion a struments di indipendence. Un percors progressîf, duncje, là che però la fonde metude e je za fuarte se si pense che EH Bildu e controle za un centenâr di comuns bascs e ancje la provincie di Gipuzkoa. La strade basche pe indipendence però no si limite dome ai dirits politics, ma e previôt un gnûf pat cui citadins che al cjapi dentri ancje i dirits sociâi.

Font: Naiz:, 24-27/01/15

Paîs Catalans: tes Baleârs si propon un gnûf pat pe educazion

Dopo di diviers mês di lavôr, i sogjets associatîfs che si son dâts adun intal coordenament Illes per un Pacte a àn presentât al public il stampon di un pat pe educazion che al sedi la fonde par une gnove leç su la educazion des Baleârs. Tal zîr di un mês il document al sarà presentât e discutût cui sindacâts de scuele e cui partîts politics. La propueste e met al centri dal insegnament la lenghe catalane che, tant che lenghe proprie des isulis, e à di jessi prioritarie e maioritarie, contrari di ce che al è sucedût cu la riforme de scuele inviade intai ultins agns dal esecutîf di diestre che al guvierne lis Baleârs. I progjets educatîfs a varan di jessi svilupâts dai istitûts daûr di diviersis variabilis, ma simpri cul obietîf che ae fin dal percors scolastic obligatori i students a vedin competencis linguistichis dal stes nivel par catalan e par spagnûl, plui la cognossince di une lenghe foreste. Par garantî che i insegnants a vedin la paronance plene de lenghe che a doprin par insegnâ si varà une revision dai titui, des certificazions linguistichis e de formazion.

Font: El Mundo, 23/01/15

Corsiche: par Femu a Corsica rot il dialic cul stât

Intai ultins agns Femu a Corsica e à puartât il so contribût atîf par rivâ a di une condivision slargjade dentri de Assemblee corse su propuestis tant che la creazion di une coletivitât teritoriâl uniche par dute la isule, l’inseriment dal status de Corsiche dentri de costituzion francese, la couficialitât pe lenghe corse, un statût dai residents e une riforme fiscâl. Dopo di vê jevât problemis di compatibilitât costituzionâl, cumò – si lei intun comunicât dai nazionaliscj moderâts cors – il guvier francês al à fat colâ la mascare e al à mostrât che il no che al rive di Parîs su chestis propuestis al diven dome di sieltis politichis. Par Femu a Corsica no son justificazion pussibilis par une posizion di cheste fate che e va duncje calcolade tant che la roture dal dialic jenfri il stât francês e la Corsiche. Il partît nazionalist al vise duncje che tes prossimis setemanis si confrontarà cui siei militants, cul rest dal moviment nazionâl cors e cun chei altris partîts de isule par decidi ce strade cjapâ dopo di cheste roture. Tra lis ipotesis su la taule ancje chê di inviâ un percors di autodeterminazion come chel za imbastît in altris nazions cence stât de Europe.

Font: Corse Matin, 23/01/15

Ocitanie: sì de Catalogne ae autodeterminazion aranese

Ai 21 di Zenâr il Parlament catalan al à fate buine la leç sul statût speciâl de Val di Aran che e ricognòs la identitât nazionâl ocitane di cheste valade pirenaiche, i siei dirits storics e ancje chel di decidi in plene libertât dal so avignî. Cun di plui si previôt ancje une riforme dal sisteme di finanziament di concuardâ dentri di trê agns. La leç e ricognòs la varietât ocitane aranese tant che prime lenghe de valade, ma ancje ducj i simbui de sô identitât specifiche. Il test al è stât votât di ducj i partîts fûr che dai Ciutadans e, par cualchi articul, dal PP. Il vôt contrari dai doi partîts de diestre spagnoliste al diven dal ricognossiment dal dirit ae autodeterminazion dai aranês. Une vore diferente la reazion des autoritâts aranesis che a àn laudât i partîts catalans pari vê fat lôr ad in plen il dirit ae autodeterminazion cul ricognossilu cui fats e no dome cu lis peraulis ancje a chei altris. Ca di sîs mês a saran i aranês a decidi se a vuelin che la leç e jentri in vore, pûr che intal framieç il tribunâl costituzionâl spagnûl al decidi se le leç catalane su lis consultazions e je valide o pûr no.

Font: VilaWeb, 22/01/15

Sardegne: propueste par sburtâ l’insegnament dal sart

Une propueste di leç sul insegnament de lenghe sarde intes scuelis sotscrite dai presidents dai grups consiliârs di maiorance e di oposizion e je stade presentade intal Consei regjonâl de Sardegne e e varès di jessi fate buine za tai prins mês dal 2015. Daûr di ce che e previôt la leç statâl 482/99 la adesion al insegnament dal sart e sarà volontarie, ma rispiet a ce che e previodeve la leç regjonâl sul sart dal 1997 la propueste e ponte a garantî continuitât didatiche e uniformitât intal insegnament de lenghe sarde. Cun di fat, ogni an si previodin almancul 120 oris dedicadis ae lenghe proprie de isule intes scuelis de infanzie e 80 oris tes primariis. Il test al previôt un regjistri regjonâl dai insegnants di sart cu la certificazion des lôr competencis linguistichis e didatichis, e une comission cun funzions di coordenament e di vuide de ativitât des istituzions scolastichis. Par inviâ cheste riforme si previôt une dotazion finanziarie di trê milions di euros ad an pai prossims trê agns.

Font: Castedduonline, 16/01/15; La Nuova Sardegna, 17/01/15