Aragon: prin intervent uficiâl par aragonês a Huesca

La lenghe aragonese e je stade doprade pe prime volte intal consei comunâl di Uesca / Huesca, la seconde citât dal Aragon. A fâlu a son stâts i doi conseîrs dal partît nazionalitari Chunta Aragonesista intant dal lôr discors di insediament. La gnove e à cjapât di sorprese chei altris conseîrs, là che la reazion plui critiche e je rivade dai rapresentants Partido Aragonés, formazion regjonaliste di diestre, intant che la sindiche, espression dal PP, e à domandât ai doi conseîrs di ufrî ancje la traduzion par spagnûl dal lôr intervent par che e sedi metude a verbâl. Dal moment che fin cumò nissun al jere mai intervignût par aragonês, intal consei comunâl de capitâl dal Alt Aragon al mancje un regolament sul ûs di plui lenghis intant dai lavôrs dal consei. La cuistion è varà duncje di jessi frontade intes prossimis riunions de assemblee comunâl.

Font: Jornalet, 8/05/14

Cossovo: nuie acuardi su esercit e minorancis, si torne a votâ

In Cossovo si tignaran ai 8 di Jugn lis elezions politichis anticipadis, sì e no un mês dopo de decision di meti fin ae ativitât legjislative par vie de incapacitât di riformâ il sisteme de rapresentance des minorancis intal Parlament. In dì di vuê a son vincj i puescj garantîts pes minorancis ricognossudis: dîs pai serps e dîs di dividisi tra rom, turcs, goranis, bosgnacs, egjizians e ashkalis. Daûr dal plan proponût dal inviât ONU pal Cossovo cheste situazion e varès vût di cambiâ cu la prossime legjislature, ma lis fuarcis parlamentârs no àn rivât a cjatâ un acuardi in proposit. Il plan al previodeve che la minorance serbe e fos rapresentade di ducj i deputâts che e rivave a elei, ma simpri cuntun minim di dîs puescj garantîts. La maiorance cumò al guvier, invezit, e voleve sprolungjâ il sisteme in vore cumò, ma cuntune rapresentance plui fruçonade par vie dal ricognossiment tant che minorancis ancje di cravuats e montenegrins. Denant di cheste posizion i deputâts serps si son refudâts di poiâ la trasformazion des fuarcis di sigurece cossovanis in esercit dal Cossovo. La mancjance di acuardi su chescj doi temis e à duncje puartât ae dissoluzion anticipade dal Parlament e ae convocazion di gnovis elezions.

Font: Balkan Insight, 7-8/05/14

Macedonie: oposizion e albanês critics, legjislature za in crisi

E tache pardabon mâl la gnove legjislature in Macedonie là che, dopo des elezions politichis e presidenziâls di Avrîl, la plui part dai elets de oposizion no si son presentâts pal increditament tant che parlamentârs. Al apontament in comission eletorâl a son rivâts i 80 deputâts dai doi partîts che a formin la coalizion di guvier, ven a stâi i 61 dal VMRO DPMNE e i 19 dal moviment plui votât de minorance albanese o sei Union Democratiche pe Integrazion, ma dome 8 dai elets tra i partîts di oposizion, o sei i 7 de seconde formazion politiche albanese – il Partît Democratic dai Albanês – e l’unic deputât dal moviment GROM. No si son presentâts chei altris 35 parlamentârs di oposizion elets dal Partît Sociâl Democratic, dai Gnûfs Socialdemocratics, dai Liberâi Democratics e dal plui piçul tra i partîts rapresentatîfs de comunitât albanese, ven a dî la Rinassite Nazionâl Democratiche. Chescj partîts a denunciin brois eletorâi e a domandin un guvier di transizion che al permeti di creâ chês cundizions di paritât che a coventin par gnovis elezions regolârs.

Bretagne: la UDB e fâs fieste pai siei 50 agns

Intal mieç de campagne eletorâl pes elezions europeanis la Union Démocratique Bretonne / Unvaniezh Demokratel Breizh e à celebrât i siei cincuante agns di ativitât cuntune manifestazion a An Oriant / Lorient là che, in plui di dirigjents e militants, a àn partecipât ancje personaçs che, si ben su altris posizions, a àn judicât impuartant il lavôr fat di chest partît autonomist e progressist breton. Cun di fat, tra lis sôs bataiis storichis o cjatìn temis che cumò a son patrimoni ancje di altris sogjets politics tant che la riunificazion aministrative de Bretagne, la incressite dai nivei di autoguvier, la valorizazion e la promozion de lenghe bretone, l’impegn par une Europe federâl e solidarie. In dì di vuê, la UDB e je rapresentade intes istituzions di un centenâr di conseîrs comunâi, cuatri conseîrs regjonâi e un deputât intal Parlament francês.

Font: EFA, 6/05/14

Galizie: in vore la edizion 2014 di Correlingua

Si siere ai 16 di Mai, dopo jessi partide ai 5 dal mês, la edizion 2014 di Correlingua, la manifestazion che, intune prospetive ludiche e rivendicative, e permet ai students di rifleti su la situazion de lôr lenghe proprie e di domandâ il dirit di vivi ad in plen par galizian. La corse pe lenghe e je rivade ae sô edizion numar 14 e e je inmaneade de organizazion Mesa pola Normalización Lingüística, de associazion sociopedagogjiche galiziane (AS-PG) e de confederazion dai insegnants galizians (CIG-Ensino), adun cui comuns di Pontevedra, Lugo, Vigo e Ourense e cu la provincie di Lugo. La edizion 2014 e je dedicade al scritôr Xosé María Díaz Castro che propit chest an a colin i cent agns de sô nassite.

Font: Correlingua, 3/05/14

Bretagne: falsificazions sul presidi UNESCO de Val de Loire

La organizazion Bretagne Réunie e l’Institut Culturel de Bretagne a àn scrit ae Unesco par denunciâ lis manipolazions e lis falsificazions storichis e culturâls puartadis indenant des regjons aministrativis dal Paîs de Loire e dal Centri, intune cu la sezion UNESCO de Val de Loire. La valade de Loire cui siei cjistiei e il so patrimoni storic e culturâl e je ricognossude tant che patrimoni de umanitât, ma no je la prime volte che cui che al varès di gjestî chest sît a ‘nt slargje i confins par cjapâ dentri lûcs tant che Naoned / Nantes che no dome a son fûr de aree ricognossude, ma dal pont di viste storic, linguistic e culturâl a fasin part de Bretagne. Di chi la domande ae dirigjence de UNESCO di meti man ae cuistion, no dome par vie de scoretece di chestis azions, ma ancje parcè che lis stessis a van a incressi lis politichis di snazionalizazion in at cuintri de Bretagne.

Font: Bretagne Réunie, 30/04/14

Ladinie: si è tignude la seste edizion de “Aisciuda Ladina”

Dai 5 ai 11 di Mai si è tignude la seste edizion de “Aisciuda Ladina” (Vierte Ladine), une iniziative che e à chê di promovi e di fâ rifleti su la lenghe e su la identitât ladine de Val di Fasse. A inmaneâle a son stâts il Comun General de Fascia, la Union di Ladins de Fascia, la Scuele ladine fassane e l’Istitût Culturâl Ladin. Il teme centrâl che al è stât svilupât chest an al è chel dai risis de visibilitât dal ladin cu la dibisugne, di une bande, di mostrâ la proprie identitât in maniere cussiente e, di chê altre bande, cul risi che cheste dibisugne e vegni viodude tant che une mostre sfaçade di diversitât. Intant de iniziative si à cirût di cjapâ dentri dute la comunitât locâl, cuntune atenzion particolâr par ciertis categoriis tant che fruts des scuelis e comerciants. La fieste, nassude intal 2009, e cole tor dai 5 di Mai par ricuardâ la nassite de bandiere ladine che e ven fate rimontâ propite a chê zornade dal 1920.Font: Provincie di Trent, 30/04/14

Paîs Basc: cors di euskara sore nuie pai disocupâts

Intun moment di crisi economiche e ocupazionâl come chel che si è daûr a vivi, a son tantis lis aministrazions locâls che a proponin sore nuie pai disocupâts dai cors di formazion. Al è ce che al fâs ancje il comun basc di Irun là che si à decidût di ufrî ai disocupâts dai cors intensîfs di euskara sore nuie. Si trate di cors trimestrâi di vincj oris par setemane che a pontin a fâ imparâ o a miorâ il nivel di cognossince de lenghe basche. No si trate dome di incressi la cognossince dal euskara framieç dai adults, ma di ufrî a cui che al è cence lavôr – a Irun cuasi une persone ogni cinc – une cjarte in plui di zuiâsi intal mont dal lavôr, là che fevelâ par basc al è un element che al pues fâ la diference.

Font: Deia, 29/04/14

Paîs Catalans: tv par catalan, Comunitât Valenziane sot acuse

La organizazion Plataforma per la Llengua, intal su ultin rapuart sul stât de lenghe catalane, e à acusât il guvier de Comunitât Autonome Valenziane di lâ cuintri dai impegns cjapâts des istituzions spagnolis pe metude in vore de Cjarte europeane des lenghis regjonâls o minoritariis. In dì di vuê, di fat, i abitants dal Paîs Valenzian a àn acès a 36 canâi televisîfs di nivel locâl o statâl, ma nancje un inte lenghe proprie de comunitât ven a stâi il catalan. Un tant par vie che l’esecutîf valenzian, vuidât de diestre spagnoliste, al à decidût di sierâ la radiotelevision publiche e, in particolâr, la television par catalan Canal 9. La sierade de tv publiche par catalan si zonte ae fin des emissions di TV3 che a vignivin trasmetudis intal Paîs Valenzian in gracie dai ripetitôrs di proprietât de Acció Cultural del País Valencià. Intal 2011 la organizazion e jere stade obleade a sierâ chê esperience che e durave di 25 agns dopo de decision dal esecutîf valenzian di dâi une multe di 600 mil euros.

Font: Dialogo Libre, 26/04/14

Paîs Basc: selezion dai prins utents pal domini .eus

Al è timp fin ai 30 di Mai par domandâ di jentrâ intal grup dai prins novante utents che a podaran zovâsi di un sît internet cun domini .eus, nassût par dâi un riferiment di pueste par cui che al dopre l’euskara o si identifiche cu la lenghe basche. Il non dai sogjets selezionâts si lu cognossarà po a partî dal mês di Jugn. Une volte partîts i prins pionîrs, si vierzarà une seconde fase par lançâ il domini .eus che e sarà risiervade a istituzions, associazions e impresis leadis in maniere direte cu la lenghe basche. Rivâts insom chescj doi passaçs si inviarà la tierce e ultime fase, che e previôt di meti il domini a disposizion di ducj. Si calcole che, a chel pont, comprà un domini .eus al costarà sù par jù uns 50 euros.

Font: Efe Futuro, 26/04/14

Paîs Catalans: intes IPM si fevele soredut par catalan

Plui dal 70% des impresis piçulis e mezanis (IPM) de Catalogne al dopre intes sôs ativitâts di ogni dì la lenghe catalane. Une percentuâl che e reste maioritarie, ma si sbasse al 57%, ancje cuant che si trate di rapuarts cun sogjets che a son fûr de imprese, ven a dî istituzions, furnidôrs, clients e v.i. A son i doi dâts principâi di un scandai fat su cinccent impresis de Direzion gjenerâl pe politiche linguistiche dal guvier catalan e de PIMEC, o sei la associazion di categorie des aziendis piçulis e mezanis. Suntun plan teritoriâl, la provincie catalane là che la lenghe proprie e je doprade di plui e je chê di Girona, chê là che si le dopre di mancul e je chê di Barcelone. Suntun plan dimensionâl, invezit, lis impresis là che la lenghe e je plui fuarte a son chês individuâls.

Font: NPLD, 25/04/14

UE: l’Intergrup pes lenghis al lance il Manifest di Strasburc

Inte sô ultime riunion prime de sierade de legjislature, l’Intergrup pes lenghis, pes comunitâts nazionâls e pes minorancis tradizionâls dal Parlament european al à presentât il Manifest di Strasburc: un document che al propon lis liniis di fonde par difindi i dirits e favorî il svilup des minorancis linguistichis e nazionâls de Europe. Il test, metût jù e sotscrit dai trente membris dal Intergrup, al segnale i problemis principâi che a pidimentin il svilup di chestis comunitâts e al propon une schirie di mudaments di nature legjislative e culturâl par superâju. Tra lis propuestis indreçadis aes istituzions de UE o cjatìn ancje chê di meti adun un plan strategjic di azions a pro des comunitâts minorizadis come chel che si à za metût in vore in maniere specifiche pai rom.

Font: EFA, 23/04/14

Ucraine: tensions e violencis tra filorus e governatîfs

Lis tratativis di Gjinevre tra Ucraine, Russie, UE e USA – che a previodevin di meti fin aes violencis e aes provocazions, di disarmâ lis miliziis e di inviâ un dialic par une riforme costituzionâl – no àn vût grancj risultâts sul teren, se e je vere che fintremai la tregue proclamade par Pasche no à rivât a tignî bot fint insom. I incidents e lis provocazions a son lâts indenant e une gnove ofensive dai reparts speciâi dal guvier di Kiev e di milizians de estreme diestre ucraine che e à causât diviers muarts e ferît e je stade fermade dome dopo de menace russe di un intervent come chel viodût cualchi an indaûr in Gjeorgjie. Il president e il prin ministri ad interim, Oleksandr Turčinov e Arseny Yatseniuk, a àn prometût che a poiaran une modifiche costituzionâi par dâi plui competencis ai conseis locâi e par infuartî i dirits linguistics des comunitâts russofonis. Il Partît des Regjons, che al poiave il guvier di prime e che al à la sô scune massime intes regjons dal Est, al stime chestis propuestis masse flapis e al domande une riforme costituzionâl che e siguri un decentrament fuart dai podês aes regjons e un status di couficialitât pe lenghe russe. A restin però realtâts come chês di Kharkiv, Donetsk, Gorlovka, Kramatorsk e Slaviansk là che a son lis miliziis folorussis a controlâ il teren e a rivendicâ consultazions come chês che a àn puartât la Crimee a jessi anetude de Federazion Russe.

Font: Ria Novosti, 24/04/14; Reuters, 18/04/14

Paîs Catalans: inviade une gnove tv par catalan

Ai 23 di Avrîl e à tacât la sô programazion regolâr une gnove television par catalan. La trasmission di scree de gnove emitente si le à vude però za la sere prime cuntune interviste al president de Generalitat, Artur Mas, seguide di un dibatiment cun diviersis personalitâts catalanis e de presentazion dal palinsest. Si trate di El Punt Avui TV, metude in pîts dal omonim grup editoriâl dopo vê cjolt la licence di emission di Canal Català. La television e cuvierç sù par jù il 50% dal teritori de Catalogne e l’80% dai siei abitants, ma e ponte cul timp a slargjâ la sô aree di difusion.

Font: Generalitat de Catalunya, 23/04/14

Cornualie: ricognossiment tant che minorance nazionâl

Dopo agns di mobilitazions e diviers tentatîfs mancjâts, cumò ancje i cornics a vegnin ricognossûts tant che minorance nazionâl dentri dal Ream Unît. Il segretari dal ministeri dal tesaur britanic, Danny Alexander, al à confermât in maniere uficiâl che ancje pe comunitât di lenghe celtiche de Cornualie si metaran in vore i indreçaments previodûts de Convenzion cuadri pe protezion des minorancis nazionâls dal Consei de Europe che a jerin za in vore pai galês e pes comunitâts di lenghe gaeliche de Scozie e de Irlande dal Nord. Chest ricognossiment, par cumò, nol puartarà a incressi l’autoguvier de Cornualie e nancje i fonts pe sô lenghe, ma al rapresente un ricognossiment impuartant e par chest la gnove e je stade saludade cun sodisfazion sei dai grups impegnâts intal promovi la lenghe e la identitât corniche, sei dal partît nazionalitari Mebyon Kernow. Propit chest moviment, un mês e mieç indaûr, al à ancje inviât une campagne che e ponte ae nassite di une Assemblee Nazionâl de Cornualie sul model di chê galese che e permeti a chest piçule nazionalitât celtiche di incressi il so nivel di autoguvier.

Font: Mebyon Kernow, 23/04/14; BBC, 24/04/14

Irlande: prins manifescj eletorâi unioniscj par gaelic

Un altri tabù al è colât intal rapuart jenfri lenghe gaeliche irlandese e moviments politics unioniscj de Irlande dal Nord. Cun di fat, il gnûf partît unionist NI21 al à decidût di meti fûr un sest dai siei cartelons eletorâi gjigants pes elezions europeanis par gaelic. E je la prime volte che un moviment politic che al sosten la union de Irlande dal Nord cul Ream Unît al dopre l’irlandês intune campagne eletorâl. O sin un partît inclusîf e o crodìn che in Irlande dal Nord ducj a àn di vê la pussibilitât di mostrâ la proprie identitât e ancje se o crodìn che la Irlande dal Nord e stedi miôr dentri dal Ream Unît no son resons par no jessi pluraliscj e dâi spazi ae diversitât linguistiche e culturâl di cheste tiere, al à spiegât il president dal partît Basil McCrea. Cun di plui, NI21 si è declarât disponibil a poiâ la propueste di leç pal irlandês fate indenant dal Sinn Féin, ancje par vie che nol vûl che la cuistion de lenghe e vegni strumentalizade par resons di partît. La candidade di NI21 pes europeanis, Tina McKenzie, e à spiegât il concet in maniere ancjemò plui clare: “la lenghe irlandese e parten a ducj i citadins de Irlande dal Nord e nus tocje a ducj di valorizâle”.

Font: Belfast Telegraph, 21/04/14

Paîs Basc: miârs di personis in place pal Aberri Eguna

Si stime che a sedin stadis uns 25 mil lis personis che ai 20 di Avrîl a àn partecipât a Iruñea / Pamplona ae manifestazion pal Aberri Eguna, la Zornade de Patrie Basche, inmaneade de rêt Independentistak. La iniziative – là che a àn partecipât rapresentants di Sortu, Eusko Alkartasuna, Aralar, Alternatiba, EH Bildu, Abertzaleen Batasuna, ma ancje delegazions rivadis de Scozie, de Catalogne e di altris nazions cence stât – e à vût tant che teme centrâl la indipendence dal Paîs Basc.

Bretagne: manifestazion storiche a Nantes pe riunificazion

Uns 10 mil personis a àn manifestât sabide ai 19 di Avrîl a Naoned / Nantes par domandâ la riunificazion dal dipartiment de Loire Atlantiche cul rest de Bretagne. La maiorance de popolazion di chest dipartiment, che cumò al fâs part de regjon aministrative dal Pays de la Loire, al è dacuardi sul passaç di regjon, ma fin cumò il progjet nol à mai cjatât la poie dal guvier francês. Il gnûf prin ministri Manuel Valls, pôc dopo de sô nomine, al à fevelât di une revision de organizazion regjonâl e la manifestazion di Nantes e vûl duncje mostrâi une des modifichis di podê fâ. Al è po di dî che, cundut che no si trate de prime manifestazion pe riunificazion de Bretagne, chê dai 19 di Avrîl e je stade chê che e à vût il rivoc plui grant intai mieçs di comunicazions francês. Altri element impuartant de iniziative al è stât chel de presince trasversâl di rapresentants politics bretons che e leve de aree nazionalitarie e indipendentiste fintremai ai conservadôrs de UMP. Ae manifestazion, inmaneade dai coletîfs Bretagne Réunie e 44=Breizh, a àn partecipât ancje diviers grups dal moviment dai Bonnets Rouges.

Font: Agence Bretagne Presse, 19-20/04/14

Transnistrie: domandade la anession ae Russie

I ultins acjadiments capitâts in Ucraine e massime la anession de Crimee de bande de Federazion Russe a àn puartât il consei suprem de Transnistrie a domandâ in maniere uficiâl aes autoritâts di Mosche di jentrâ inte Federazion. Regjon a maiorance russe de Moldova, la Transnistrie e veve proclamât la sô indipendence ancjemò intal 1990 e, cundut che a nivel internazionâl no ven ricognossude di nissun, di in chê volte si guvierne di bessole cence che il guvier moldâf al rivi a esercitâ la sô autoritât. Par cumò il guvier rus nol à dât ancjemò une rispueste uficiâl, ma la situazion e preocupe une vore il guvier moldâf. Il prin ministri vicjari Eugen Carpov al difint la integritât de Moldova e, in rispueste aes acusis di Mosche, al sigure che no son veris lis vôs di un bloc economic de Transnistrie. Su la cuistion al è intervignût ancje il president rumen Traian Basescu domandant la poie de comunitât internazionâl par evitâ che la Transnistrie e ledi daûr de strade za cjapade de Crimee.

Font: Balkan Insight, 17/04/14

UE: diviers partîts de EFA in corse pes europeanis

Lis elezions pal Parlament european che si tignaran sul finî di Mai a cjapin dentri ancje diviers partîts che a àn il lôr eletorât massime tra i membris des comunitâts nazionâls minorizadis, tra di lôr a ‘nd è tancj che a fasin part dal grup European Free Alliance. Viodudis lis dimensions dal vôt, par tancj moviments nazionalitaris la partecipazion aes europeanis e je soredut un at simbolic, ma in cualchi câs e je ancje la pussibilitât di rivâ a vê dai elets.