Paîs Basc: a Iruñea in tancj a vuelin lis scuelis par basc

Dai 3 ai 18 di Març une cincuantine di volontaris si son plaçâts fûr dai uficis pal benstâ sociâl di Iruñea / Pamplona, dulà che i gjenitôrs a vevin di lâ par notâ i lôr fruts intes scuelis de infanzie de capitâl de Navare. Ai paris e aes maris ur è stât domandât se a varessin vût gust di iscrivi i lôr fîs intune scuele là che l’insegnament al jere ancje in lenghe basche. Ae fin a son stât 466 i gjenitôrs che a àn rispuindût di sì. La iniziative e veve chê di mostrâ trop fuarte che e je la domande par une scuele basche dal moment che la aministrazion comunâl, che e je intes mans de diestre navare (UPN), e autorize lis scuelis de infanzie par euskara dome intun cuartîr par un totâl di a pene 164 puescj disponibii.

Font: Noticias de Navarra, 25/03/14

Macedonie: i albanês a domandin un sisteme presidenziâl gnûf

Il principâl partît albanês de Macedonie, la Union Democratiche pe Integrazion, e à inviât une campagne par un implant gnûf des elezions presidenziâls. La campagne eletorâl par sielzi il gnûf president dal paîs balcanic e je tacade ai 24 di Març e si sierarà ai 13 di Avrîl cul vôt pal prin turni. La Union Democratiche pe Integrazion e à fat savê che no poiarà nissun dai cuatri candidâts in corse, ma e doprarà la campagne eletorâl par informâ i citadins su la injustizie di un model presidenziâl che nol ten cont de comunitât albanese, cundut che e rapresente un cuart de popolazion de Macedonie. Dome un consens larc e multietnic al pues dâ une credibilitât vere ae figure e aes funzions dal president, in câs contrari, a zontin i rapresentants dal partît albanês, a tignaran par no legjitim un president che la sô sielte e rive dome di une part de popolazion.

Font: Balkan Insight, 25/03/14

Paîs Basc: in miârs in place in Navare pal euskara

A jerin sù par jù dîs mil lis personis che ai 22 di Març a àn partecipât a Iruñea / Pamplona ae manifestazion pal dirit a vivi in euskara in Navare. Cun di fat, ta cheste comunitât autonome, a son cetancj i pidiments che si cjatin a vê di frontâ i citadins che a àn il basc tant che prime lenghe. Il prin ostacul al è chel de division de Navare in trê areis, une là che si à un ricognossiment formâl dai dirits linguistics dai bascs, une altre là che si ‘nt ricognòs dome cualchidun, e une tierce là che cui che al fevele par euskara nol à nissun dirit. A son po lis politichis discriminatoriis metudis in at dal guvier locâl che no previodin la cognossince dal basc tant che criteri par lavorâ inte aministrazion publiche nancje inte aree bascofone, la proibizion di vê in digjitâl la radiotelevision publiche de Comunitât Autonome Basche e il dinei de licence par Euskalerria Irratia, la uniche radio a vê dute la sô programazion par euskara, cundut des sentencis dai tribunâi che a dan reson ae emitente. A son po di zontâ i tais ai finanziaments, massime a partî dal 2011, che a àn obleât a ridusi ancjemò di plui i servizis comunâi par euskara e a sierâ diviers mieçs di comunicazion bascs, e che a àn lassât cence un franc i istitûts par insegnâ l’euskara ai adults. Par dutis chestis resons i manifestants a àn domandât un cambiament radicâl inte politiche navare par garantî il dirit a vivi ad in plen par basc. Ae iniziative a àn aderît ancje aministrazions locâls, organizazions culturâls e di volontariât, sindacâts e partîts politics tant che EH Bildu, Geroa Bai, Aralar, Sortu e EA.

Font: Noticias de Navarra, 22/03/14

Cornualie: 120 mil sterlinis di Londre pe lenghe

Il prin ministri vicjari britanic, Nick Clegg, al à comunicât che in Avrîl la organizazion Cornish Language Partnership e ricevarà un finanziament di 120 mil sterlinis cun chê di svilupâ gnovis azions par promovi e svilupâ la lenghe proprie de Cornualie. Par Clegg, il cornic al è un element centrâl pe identitât di cheste tiere e vê une lenghe vive e che e cres al jude la Cornualie a jessi diferente di chês altris regjons e duncje a promovile e a clamâ dongje plui visitadôrs. L’interès pe lenghe al va dilunc a cressi, e conferme la presidente de organizazion Jennifer Lowe, e no dome framieç de int de Cornualie, ma ancje tra cui che le visite. I fonts che a rivaran di Londre a coventaran par promovi l’ûs dal cornic sui prodots e su lis marcjis tipichis de Cornualie e par slargjâ la presince di cheste lenghe intes scuelis.

Font: BBC, 21/03/14

Serbie: la minorance albanese e vûl fâ come la Crimee

Jonuz Musliu, president de municipalitât di Bujanovac, citât a maiorance albanese che si cjate inte Serbie meridionâl, al à rivendicât il dirit des comunitâts albanesis che a son dentri dai confins serps di dâsi adun cul Cossovo. Denant de anession de Crimee de bande de Federazion Russe, al à spiegât Musliu, ancje i guviers di Pristina e di Tirana a varessin di domandâ une soluzion similâr pe valade di Preševo / Presheva, a maiorance albanese ma part de Serbie. Ta cheste aree, là che a vivin uns 50 mil albanês e si cjatin ancje lis citâts di Bujanovac e Medveđa, ancjemò intal 1992 si veve tignude une consultazion no uficiâl par domandâ di passâ cul Cossovo. Lis autoritâts serbis, par cumò, no àn fat nissun coment su cheste rivendicazion.

Font: Balkan Insight, 21/03/14

Friûl: il Consei regjonâl dal Friûl – VJ al jentrarà intal NPLD

I furlans a fasìn il prin pas par jentrâ inte rêt europeane plui impuartante par chel che al rivuarde lis politichis pes lenghis minorizadis. Cun di fat, l’Ufici di presidence dal Consei regjonâl al à decidût di aderî ae NPLD, o sei la Rêt par promovi la diversitât linguistiche. Si fevele di une istituzion europeane impegnade tal cjamp de politiche e de planificazion linguistiche là che a son dentri guviers statâi e regjonâi, ONG, universitâts e associazions impegnadis inte promozion des lenghis minorizadis. La Rêt e je impegnade intal mostrâ la diversitât linguistiche tant che une oportunitât, tant che imprest centrâl pal svilup personâl, sociâl e economic di dute la Europe, in plui che jessi un jutori pal dialic interculturâl. La istituzion e lavore dongje de Comission europeane par saborâ chestis finalitâts e e jude il scambi di buinis pratichis intal cjamp des politichis linguistichis tra aministradôrs, professioniscj e esperts. In dì di vuê inte Rêt a son dentri tant che membris a plen dirit il guvier de Republiche di Irlande, i guviers dal Gales, de Catalogne, de Comunitât Autonome Basche, de Navare e de Galizie, la Coletivitât Teritoriâl Corse, la Provincie de Frisie, l’Ufici public de lenghe bretone e il Folktinget, che al rapresente la comunitât svedese de Finlande. Plui lungje la liste des realtâts associadis, là che o cjatìn, tra i altris, ancje il Parlament sami de Finlande, lis universitâts di Stocolm e Cardiff, l’istitût Mercator, l’Istitût di Studis Ocitans e la Academie Frisone.

Font: Radio Onde Furlane, 20/03/14

Asturiis: prin boletin informatîf par asturian su la RPA

Cui 17 di Març, la RPA, o sei la radio publiche dal principât des Asturiis, e à scomençât a trasmeti il so prin notiziari informatîf par asturian. Il radiogjornâl al proponarà lis stessis gnovis di chel par spagnûl, voltadis par asturian, e al larà in onde ogni dì, di lunis a vinars, a une dopodimisdì. Fin cumò la emitente publiche e veve ufiert dai programs par asturian, ma simpri limitâts a argoments culturâi. Il notiziari al è nassût par iniziative dai dipendents de RPA, ma ancje in gracie dal sburt rivât des organizazions pai dirits linguistics che di agns a domandin une presince normâl dal asturian dentri dai programs radiotelevisîfs publics.

Font: Asturies.com, 14/03/14

Irlande: la revision de leç sul gaelic e sbasse la tutele

La anticipazion de bande de stampe dai contignûts dal stampon pe modifiche de leç su lis lenghis e à jevât cetantis critichis ator pe Republiche irlandese. Tra lis novitâts che il guvier di Dublin al sarès pront a meti in vore si à, par esempli, la eliminazion dal oblic di publicâ in forme bilengâl i plui impuartants documents di interès public, il slungjament dai plans di politiche linguistiche di trê a siet agns che al puartarès a di une lôr metude in vore cetant plui lente e la fusion dal ufici dal comissari pe lenghe irlandese cun chel dal garant public. Pal partît republican Sinn Féin modifichis dal gjenar a varessin l’unic efiet di rindi plui debulis lis politichis a pro de lenghe irlandese. Critichis al test a son rivadis ancje dai rapresentants dal partît Fianna Fáil. Inmò plui dure la reazion de organizazion pe lenghe Conradh na Gaeilge che e piture il stampon tant che esempli di disinterès totâl pai dirits dai citadins che a fevelin par gaelic, formât dome di tais e di promessis no mantignudis.

Font: Irish Times, 06/03/14

Crimee: sì ae anession ae Federazion Russe

Ai 16 di Març si è tignût in Crimee il referendum pe autodeterminazion di cheste Republiche autonome de Ucraine. Dôs lis pussibilitâts che i votants a podevin sielzi, ven a dî la incressite dal nivel di autoguvier de Crimee dentri de Ucraine o la anession ae Federazion Russe. Inte Republiche, di fat, su plui o mancul doi milions di abitants, cuasi il 60% a son di nazionalitât russe, il 12% al parten ae comunitât tatare e i ucrains a rapresentin sù par jù il 25% de popolazion. Daûr dai dâts comunitâts des autoritâts de Crimee, il 96,7% dai votants al à dite di sì ae anession ae Federazion Russe. La percentuâl di partecipazion al vôt e sarès stade disore dal 82%.

Slovachie: prin candidât ongjarês pes presidenziâls

Al prin turni des elezions presidenziâls che si è tignût in Slovachie ai 15 di Març, tra i cutuardis candidâts ae presidence de Republiche pe prime volte si ‘nt veve un espression de minorance ongjarese che e vîf massime intes provinciis meridionâls dal stât. Gyula Bardos al è di fat il president de societât culturâl dai ongjarês Csemadok e un dai membris dal diretîf dal MKP, o sei il Partît de Coalizion Ongjarese. Pûr cence nissune sperance di vinci, Bardos al à spiegât che al à sielzût di candidâsi par mostrâ che i membris des minorancis no son citadins di seconde categorie e che a puedin vê un pês impuartant inte cressite de comunitât. Cence dismenteâ, al à zontât, che pe prime volte un candidât president al met al centri de sô campagne il teme dai dirits umans e dal rispiet des minorancis.

Font: Finugor, 14/03/14

Paîs Basc / Galizie: EH Bildu e BNG adun pes europeanis

Cul svicinâsi des elezions europeanis di Mai, ancje i partîts des nazionalitâts minorizadis dal stât spagnûl a son daûr a definî il lôr sisteme di aleancis in maniere di superâ i pidiments che un vôt centrât dome in ciertis areis dal stât al compuarte pe elezion di rapresentants intal Parlament de Europe. Se a nivel catalan, cheste volte, i partîts de aree indipendentiste a àn sielzût une strategjie eletorâl centrade sul referendum pe indipendence che a vuelin davuelzi dentri de fin dal an, sul front basc e galizian e je stade formalizade la aleance jenfri EH Bildu e BNG. A sburtâ par chest pat a doi tra la çampe indipendentiste basche e il Bloc Nazionâl Galizian al è ancje il fat che altris aleâts pussibii tant che i galizians di NOS – Unidade Popular e i catalans de CUP a àn decidût che no parteciparan aes elezions europeanis.

Font: Naiz:, 13-15/03/14

Ocitanie: ûs diviers de lenghe tes elezions aministrativis

Intal mês di Març ancje i comuns ocitans dal stât francês a son clamâts a rinovâ lis lôr aministrazions e inte campagne eletorâl nol mancje l’ûs de lenghe ocitane. A doprâle a son massime lis listis nazionalitariis e autonomistis che inte plui part si son dadis dongje intal progjet Bastir. L’ocitan però si fâs viodi ancje inaltrò, cun esemplis ancje une vore lontans tra di lôr cemût che e segnale la organizazion Iniciativa per Occitània. Doi i esemplis sielzûts par marcâ chestis diferencis: di une bande si à la liste Ensemble Contunhem Lairac, che si presente intal comun vascon di Lairac cuntun program di prossimitât là che la comunicazion e je ad in plen bilengâl e l’ocitan al ven doprât tant che lenghe normâl di comunicazion; di chê altre bande o cjatìn il Rassemblement Bleu Marine leât al Front National che, intal comun provençâl di Castèurainard, si presente cuntun program di stamp nazionalist francês e al strumentalize l’ocitan par messaçs chauviniscj e xenofobics.

Font: Jornalet, 13/03/14

Gales: propueste par tignî cont dal galês te planificazion edilizie

Ai 11 di Març la organizazion pe lenghe galese Cymdeithas yr Iaith Gymraeg e à presentât a Caerdydd / Cardiff la sô propueste di leç su la planificazion teritoriâl che si propon di cambiâ i indreçaments che a regolin chest setôr in maniere di protezi e di slargjâ lis comunitâts che a àn il galês tant che prime lenghe. Intal test si propon, par esempli, di tignî cont ancje dal element linguistic par decidi lis liniis di svilup dal teritori, in mût che i progjets di edilizie publiche e privade che a àn efiets negatîfs sul galês a puedin jessi boçâts e che, massime par chei plui grues, la valutazion di impat linguistic e deventi obligatorie. La logjiche che si propon e je chê di planificâ la edilizie residenziâl in armonie cu lis comunitâts locâls e no dome daûr de dibisugne complessive di alozaments gnûfs. Il responsabil de Cymdeithas pes comunitâts sostignibilis, Toni Schiavone, al à dite che cheste e je la ocasion juste pal guvier e pe Assemblee nazionâl dal Gales di mostrâ pardabon trop che i crodin al avignî de lenghe galese e di cui che le fevele.

Font: Cymdeithas, 11/03/14

Bretagne: presentadis lis 11 domandis dai Bonnets rouges

Ai 8 di Març a Morlaix si son tignûts i stâts gjenerâi de Bretagne clamâts adun dal moviment dai Bonnets rouges, là che a àn partecipât passe 5 mil personis. Intant de iniziative a son stadis presentadis lis undis rivendicazions svilupadis dal moviment in chescj mês di mobilitazions e su la fonde di uns 15 mil tescj fats rivâ di citadins e realtâts associativis de Bretagne. Lis primis cuatri a jerin za part de cjarte fondative dai Bonnets rouges e a son leadis al cjamp economic, ven a dî: mantignî gratuite la rêt stradâl bretone e abolî in maniere definitive la ecotasse sui traspuarts, sbassâ la burocrazie par favorî il svilup economic, meti fin aes distorsions de concorince in Europe, e svicinâ al teritori lis decisions su le economie. A chestis si zontin trê rivendicazions storichis dai moviments nazionalitaris, o sei di uficializâ la lenghe bretone, di infuartî l’autoguvier e unificâ dal pont di viste aministratîf la Bretagne cu la union dal dipartiment de Loire Atlantiche, e di indotâ la Bretagne di un sisteme audiovisîf propri. Chei altris ponts dal document o son po: svilupâ infrastruturis e sistemis alternatîfs di traspuarts che no penalizin la Bretagne, afidâ ae Bretagne la gjestion de rêt energjetiche di infuartî cul svilup des energjiis rinovabilis, favorî e infuartî lis politichis di comunitât, e svicinâ al teritori il sisteme finanziari.

Font: Agence Bretagne Presse, 09/03/14

Cossovo: i montenegrins a domandin il ricognossiment uficiâl

Lis associazions che a rapresentin i 20 mil montenegrins dal Cossovo si son dadis adun par domandâ aes istituzions di chest paîs che ancje la lôr comunitât e gjoldi dal status di minorance ricognossude che, tra lis altris robis, al previôt une presince garantide intal Parlament cossovan. In dì di vuê, di fat, i montenegrins a vegnin cjapâts dentri te comunitât serbe daûr di criteris fissâts ancjemò intal 1999. Il Montenegro però al à ricognossût la indipendence dal Cossovo intal Otubar dal 2008 e intal zîr di un pâr di agns a son stadis inviadis relazions diplomatichis continuativis. Dut câs lis autoritâts dal Montenegro a àn fat savê che no nomenaran nissun ambassadôr fintremai che il Cossovo nol ricognossarà i montenegrins tant che minorance nazionâl. In spiete di une leç che ur garantissi chest status, il prin ministri cossovan Hashim Thaci al à za fat savê di jessi dacuardi pal ricognossiment.

Font: Balkan Insight, 07/03/14

Galizie: Tribo, o sei il progjet par cressi i fruts par galizian

La idee e jere nassude intant dai incuintris anuâi inmaneâts dal coordenament dai lavoradôrs de normalizazion linguistiche (CTNL) e cumò e à tacât a svilupâsi in gracie di un grup di gjenitôrs di S. Jacum di Galizie (Santiago de Compostela). Si fevele di “Tribo”, une iniziative che e à chê di meti adun lis fameis che a vuelin che i lôr fîs a puedin vivi la lôr vite sociâl par galizian. Denant di cetantis aministrazions che no fasin nuie par chest obietîf o a van fintremai te direzion contrarie, une trentine di cubiis di S. Jacum e à decidût di dâsi dongje intal parc di Belvís par fâ in maniere che i lôr fîs, dai 0 ai 13 agns, si cjatin in compagnie di altris fruts e di gjenitôrs che a fevelin par galizian, in maniere di judâ l’ûs naturâl e plen de lenghe. Dai incuintris intal parc si è za passâts a inmaneâ cetantis ativitâts – des jessudis adun par concierts o mostris fin aes cjaminadis in mont – simpri cul element comun de lenghe galiziane. La iniziative e je stade ricjapade però ancje fûr de Galizie e, in dì di vuê, une vincjine di fameis galizianis che a vivin a Bilbo / Bilbao, intal Paîs Basc, e je lade daûr di chel esempli e, cun whatsapp tant che sît di incuintri virtuâl, a organizin ocasions par che i lôr fîs a puedin fevelâ e zuiâ par galizian.

Font: Praza Pública, 06/03/14

Paîs Basc: presentât il V plan gjenerâl dal euskara te CAB

La assessore pe educazion Cristina Uriarte e il delegât pe lenghe basche Patxi Baztarrika a àn presentât denant de comission pe culture e pal euskara de Comunitât Autonome Basche il cuint plan gjenerâl pe normalizazion dal ûs de lenghe basche. Cuatri i obietîfs che si proponisi di rivâ a otignî, ven a dî: garantî ad in plen i dirits linguistics dai citadins; svilupâ lis azions che a puartin l’euskara a jessi simpri di plui la lenghe doprade sul lavôr; incressi la presince de lenghe basche intes relazions tra lis diviersis aministrazions locâls; e aumentâ l’ûs dal euskara de bande di ducj i rapresentants istituzionâi dal moment che la lenghe no interesse dome i assessorâts specifics ma ducj i aministradôrs. Dal 1995, cuant che mancul di un cuart dal dipendents de Comunitât Autonome Basche al jere in stât di doprâ l’euskara, si è rivâts vuê a plui dal 60% (ancje se un 10% no ancjemò la paronance plene de lenghe). I pas indenant, invezit, a son stâts di mancul intal ûs dal basc tant che lenghe doprade tal lavôr.

Font: Euskara.euskadi.net, 05/03/14

Russie: program radio par ingrian a S. Peterburc

Su la emitente privade Folk Radio di S. Peterburc si è inviade une trasmission informative setemanâl in lenghe ingriane, che e va in onde ogni vinars in trê diviersis fassis oraris. L’ingrian (o ižoran) al è un lengaç de famee finiche origjinari de Ingrie, regjon storiche bagnade dal mâr Baltic che in dì di vuê e je part de Federazion Russe. La trasmission e propon lis gnovis plui impuartantis de Ingrie, ma ancje chês che a rivin di altris nazionalitâts de famee finiche tant che carelians, finlandês e estons. Lis informazions a son po proponudis ancje par rus. Si trate di une iniziative no di pôc se si pense che, in dì di vuê, a fevelâ l’ingrian a son sì e no uns 150 personis, o sei plui o mancul un decim di cheste piçule comunitât nazionâl.

Font: Finugor, 04/03/14

Paîs Basc: in Navare la rêt educative par euskara e ten bot

Cundut dai atacs une vore dûrs puartâts indenant cuintri des scuelis a imersion baschis, in Navare i prins dâts su lis preiscrizions a mostrin une tignude de rêt educative basche. La sielte dal model scolastic, fate cuant che i fruts a àn di scomençâ la scuele de infanzie, e à viodût passe 1.700 fameis indreçâsi sul sisteme a imersion par euskara. Plui in detai, daûr dai dâts rivâts fin cumò, si àn vudis 1.282 preiscrizions intai 70 centris educatîfs publics de Navare cun insegnament in lenghe basche e altris 483 intes 15 scuelis baschis parificadis. Rispiet al an prime, lis domandis si son un tic sbassadis inte rêt publiche, ma a son cressudis ta chê privade. Intal so complès, duncje, la rêt scolastiche basche e à tignût bot.

Font: Noticias de Navarra, 04/03/14

Paîs Basc: al cres il pês dal euskara dentri di EiTB

La direzion de EiTB, la radiotelevision publiche de Comunitât Autonome Basche, e à presentât il so plan plurienâl pal euskara che al previôt che la lenghe basche e sedi une cognossince obleade par ducj i siei dipendents e ancje pal personâl dai imprescj di comunicazion che a lavorin pe rêt publiche. Si trate di un cambiament no di pôc se si pense che dal 1995 a vuê la cognossince dal euskara e jere domandade dome al personâl che al veve di lavorâ te programazion par basc, intant che pal rest dai lavoradôrs, come chei di Radio Euskadi e Radio Vitoria, e jere dome un titul di merit.

Font: El Mundo, 26/02/14