Galizie: si promovin cors di galizian ancje in altris comunitâts

L’assessorât pe culture e pe educazion de Galizie al à in pîts colaborazions cun 38 universitâts ator pal mont par sburtâ il studi de lenghe e de culture galiziane. Ancje in gracie di chest sfuarç a son plui o mancul 2 mil i students che a seguissin chest gjenar di cors in universitâts argjentinis, brasilianis, cravuatis, cubanis, finlandesis, francesis, irlandesis, ongjaresis, polachis, portughesis, russis, statunitensis, talianis, todescjis e uruguayanis. Dentri dal stât spagnûl acuardis dal gjenar no si àn dome cun ciertis universitâts, ma ancje cun siet centris publics catalans e cun doi istitûts de comunitât de Castilie e dal Leon là che, massime dongje dai confins cu la Galizie, si àn diviersis comunitâts che a àn il galizian tant che lenghe proprie. Cumò, cuntun acuardi tra il guvier galizian e altris sogjets educatîfs, cheste ufierte si slargje ancjemò di plui e, cul an scolastic 2012/2013, cors di galizian a son a disposizion sei alì de Scuele uficiâl di lenghis di Barcelone, sei alì dal Spazi di lenghis iberichis di Madrid.

Font: Xunta de Galicia, 20/09/12

Ocitanie: il progjet di indipendence catalan in Val di Aran

Une delegazion di aministradôrs de Val di Aran, la comunitât di lenghe ocitane cjapade dentri intal principât di Catalogne, si è cjatade ai 19 di Setembar cui rapresentants de associazion dai comuns catalans pe indipendence. I sindics de valade a àn fat savê che a metaran adun un document unitari par presentâ la posizion e lis domandis dal lôr teritori inte prospetive di indipendence de Catalogne. In ogni câs, al à zontât il dean de Val di Aran Carlos Barrera, l’avignî de valade al è leât ae forme politiche che la Catalogne e sielzarà di dâsi.

Font: Conselh Generau d’Aran, 19/09/12

Galizie: trê candidaturis nazionalistis pes elezions di Otubar

Ai 21 di Otubar si tignaran in Galizie lis elezions autonomichis che a decidaran il gnûf guvier de comunitât che cumò al è intes mans de diestre spagnoliste dal PP. Daûr dai ultins sondaçs al somee che il PP nol vedi avonde consens par otignî la maiorance assolude intal Parlament e chest al permetarès di tornâ a proponi une aleance di guvier jenfri socialiscj e nazionaliscj galizians. Ae scjadince dai tiermins par presentâ lis candidaturis però il front nazionalist si è presentât dividût in trê grups. Di une bande al è il Bloque Nacionalista Galego (BNG), il moviment storic dal nazionalitarisim galizian. Po si à la Alternativa Galega de Esquerda (AGE) che e met adun Anova Irmandade Nacionalista nassude di une division dentri dal Bloque, Esquerda Unida (sezion galiziane di Izquierda Unida), Espazo Ecosocialista Galego, Equo Galicia e il Front Popolâr Galizian. La tierce fuarce nazionaliste in cjamp e je CxG (Compromiso por Galicia), là che a son dentri ancje i grups Máis Galiza e Acción Galega, che al spere di cjapâ sù i vôts dal nazionalisim galizian plui moderât.

Font: Nationalia, 18/09/12

Jersey: la lenghe native e devente curicolâr intes primariis

La isule di Jèrri / Jersey, logade intal canâl che al divît la Normandie de Ingletiere, e je une dipendence direte de corone britaniche che no fâs part dal Ream Unît e nancje de Union Europeane. Almancul fin al sclop de seconde vuere mondiâl plui de metât de popolazion e jere ancjemò in stât di doprâ il jèrriais, une varietât normande carateristiche de isule, ma in dì di vuê dome il 3% dai isolans le fevele ogni dì e il 15% al è in stât di capîle. Intes scuelis chest lengaç al jere presint dome tant che materie facoltative, une pussibilitât cjapade sù dome di un tierç dai students. Cun chest an scolastic, invezit, il jèrriais al jentre tant che materie curicolâr in dutis lis scuelis primariis de isule, ancje se par pocjis oris. La gnove materie e permet ancje di dâ spazi a aprofondiments su la storie, la culture e lis carateristichis specifichis de isule.

Font: BBC, 17/09/12

Paîs Basc: intal 42,6% des aziendis si dopre ogni dì l’euskara

Intal 41% des impresis piçulis e mezanis de Comunitât Autonome Basche pai rapuarts internis si doprin ogni dì sei il basc che il castilian, intal 53,8% dai câs si dopre dome cheste ultime lenghe, intant che intal 1,6% dai câs si fevele dome par basc. Il dât si riferìs ai prins sîs mês dal 2012 e al diven di une ricercje inmaneade de associazion des industriis de lenghe dal Paîs Basc. Dal studi al ven fûr che il 38,2% des aziendis a stimin che l’ûs dal basc al rapresenti un vantaç competitîf. Cheste percezion si le à massime intal setôr dai servizis, là che al è plui fuart l’ûs dal euskara ancje tai materiâi comerciâi de aziende. Intai ultins agns cuasi la metât des impresis e à davuelt ativitâts di formazion linguistiche pal so personâl, ma cuntune atenzion indreçade massime sui rapuarts internazionâi e duncje cun cors di inglês, francês e todesc. Intal 14,8% des aziendis si à fat però ancje formazion linguistiche pal basc.

Font: El Correo, 15/09/12

Asturiis: cu la scuse de crisi sot atac la lenghe asturiane

Cu la scuse de crisi economiche la lenghe asturiane e je daûr a patî un atac brutâl. A jevâ cheste denuncie al è il moviment politic Compromisu por Asturies che al domande al guvier asturian di cambiâ direzion e di inviâ une politiche linguistiche serie che e puarti al ricognossiment statutari de uficialitât de lenghe. In dì di vuê, invezit, si cjatisi denant di un tai dal 60% des risorsis pe promozion linguistiche: un tai che – pal grup nazionalitari asturian – al è disproporzionât rispiet aes politichis di riduzion des spesis fatis in altris setôrs e al mostre cussì une motivazion politiche clare. Compromisu por Asturies al invide duncje dutis lis realtâts associativis e i moviments impegnâts inte difese dal asturian a dâsi dongje par fermâ chescj atacs.

Font: EuropaPress:, 14/09/12

Paîs Catalans: referendum su la indipendence te prossime legjislature

La manifestazion a pro de indipendence che ai 11 di Setembar e à puartât un milion e mieç di personis a jemplâ lis stradis di Barcelone, e à dât un sburt cence precedents aes istituzions catalanis clamadis a dâ une rispueste clare aes domandis fatis indenant de int. Cussì cualchi zornade plui tart il president dal guvier catalan, Artur Mas (CiU), al à comunicât che si larà a elezions anticipadis ai 25 di Novembar. Po, ai 27 di Setembar, il Parlament catalan cuntune grande maiorance al à votât a pro de celebrazion di un referendum su la indipendence inte legjislature che si larà a vierzi subite dopo des elezions. La risoluzion e je stade fate buine cui vôts a pro di CiU, ERC, ICV-EUiA e Solidaritat, i socialiscj (PSC) a àn sielzût invezit la strade de astension, intant che a votâ cuintri e je restade dome la diestre spagnoliste formade dal PP e de liste Ciutadans, ven a dî sì e no il 15% dai elets. Denant di cheste decision sei il guvier di Madrid, par mieç de vicepresidente Soraya Sáenz de Santamaría, sei il PP cumò al guvier, par bocje de segretarie gjenerâl María Dolores de Cospedal, a àn declarât che a son struments juridics e istituzionâi suficients par impedî il referendum e che, se si intindès procedi distès, si dopraran i struments metûts a disposizion dal codiç penâl. De bande dal esecutîf catalan la rispueste e je stade che no si pues impedî a di un popul di pronunciâsi sul so avignî.

Sardegne: operative la Consulte Rivoluzionarie

Ai 14 di Setembar si è tignude a Tramatza, in Sardegne, la riunion de Consulte Rivoluzionarie dulà che a àn partecipât passe 600 rapresentants dai moviments che a àn decidût di fâ part di chest gnûf sogjet. Ae Consulte a àn aderît, tra i altris, il Moviment dai Pastôrs Sarts, la Confederazion Sindacâl Sarde e diviers partîts indipendentiscj tant che iRS, Sardigna Natzione e Sardigna Libera. Propit chescj ultins a àn dât la lôr disponibilitât a fâ un pas indaûr par meti adun un bloc unitari che al puarti indenant un progjet nazionâl sart in stât di cambiâ in maniere radicâl la vite politiche e sociâl de isule. Tra lis iniziativis anticipadis si à une manifestazion, in program intal mês di Otubar a Casteddu / Cagliari, che e ponte a puartâ in place miârs di personis par domandâ lis dimissions de Zonte e dal Consei regjonâl.

Font: Fondazione Sardinia, 15/09/12

Friûl: sielzûts i finaliscj dal festival internazionâl Suns

Si tignarà ai 2 di Novembar a Udin la finâl de edizion 2012 di Suns, il concors par cjançons in lenghe minoritarie che al cjape dentri il stât talian, Austrie, Svuizare, Slovenie e la part meridionâl dal stât francês. De manifestazion di Udin a saltaran fûr doi dai finaliscj che a parteciparan al Liet International, festival musicâl dedicât a dutis lis lenghis minorizadis de Europe, in program il prin di Dicembar intes Asturiis. Tra i 42 grups o musiciscj in concors, la jurie di Suns e à sielzût nûf finaliscj: Billy Fumey (francoprovençâl), Cha da Fö (rumanç), Claudia Crabuzza e Claudio Gabriel Sanna (catalan dal Alguer), Jean Ruaz (ladin), Jonokognòs (furlan), Mig 29 Over Disneyland (furlan), Randagiu Sardu (sart), Ruben Dimitri (cravuat dal Burgenland), e Somi de granadas (ocitan).

Font: Radio Onde Furlane, 15/09/12

Paîs Basc: voie di coletivitât teritoriâl par Ipar Euskal Herria

Ai 5 e ai 6 di Otubar i parlamentârs francês si daran adun par frontâ il teme de riorganizazion teritoriâl dal stât. Ta chê ocasion almancul cinc (trê socialiscj e doi centriscj) dai sîs rapresentants di Ipar Euskal Herria, o sei il Paîs Basc setentrionâl, a domandaran la creazion di une “coletivitât teritoriâl” par cheste regjon che in dì di vuê no à nissune organizazion aministrative unitarie. La decision e je stade cjapade ai 14 di Setembar intant di une riunion che si è tignude inte citât di Baiona / Bayonne. Dai sîs rapresentants bascs che a saran sintûts a Parîs dome un al à mostrât dai dubis su cheste forme di rapresentance aministrative unitarie, o sei il president dal Consei gjenerâl dal dipartiment dai Pireneus Atlantics (il socialist George Labazée). La nassite di un sogjet aministratîf che al meti adun ducj i teritoris bascs che a fasin part dal stât francês e je une domande puartade indenant di agns, ma che no à mai cjatât acet de bande dal guvier centrâl. A poiâle, in plui de maiorance dai aministradôrs locâi, a son ancje i partîts nazionalitaris atîfs sul teritori.

Font: Naiz:, 14/09/12

Paîs Basc: liberât Iosu Uribetxebarria

Ae fin la Audiencia Nacional spagnole e à decidût pe liberazion di Iosu Uribetxebarria, il presonîr basc cuntun cancar in fase terminâl, che la sô vicende e veve puartât la atenzion su la situazion dai presonîrs bascs che a patissin di une malatie mortâl o invalidante ma che no ur ven permetût di finî di scontâ la pene a cjase lôr cemût che e previodarès in câs come chescj la leç spagnole. Il câs di Uribetxebarria al è stât al centri di scuintris politics une vore dûrs, di contrascj dentri de stesse magjistrature e di cetantis mobilitazions di place intal Paîs Basc. Ai 12 di Setembar, cui dâts clinics che a confermavin la malatie terminâl dal presonîr basc, la Audiencia Nacional e à decidût di meti in vore la leç e liberâ Iosu Uribetxebarria che par cumò, viodudis lis sôs condizions, al reste però ricoverât intal ospedâl di Donostia. La decision dal tribunâl spagnûl e je stade acetade “cun rispiet” di dutis lis fuarcis politichis ancje se cun acents une vore diferents: dal marum de diestre spagnoliste fintremai al invît de çampe indipendentiste basche a meti in vore la leç ancje par chei altris presonîrs che si cjatin in condizions similârs. Par chel che si sa, di fat, a son almancul altris tredis presonîrs bascs a patî di une malatie mortâl o invalidante, ma par lôr lis puartis de preson a restin ancjemò sieradis.

Font: Naiz:, 12-13/09/12; Gara, 13/09/12

Ongjarie: la Russie al centri dal congrès dai popui ugrofinics

Ai 7 di Setembar cu la redazion di un document conclusîf si à sierât a Siófok, in Ongjarie, il sest congrès dai popui ugrofinics. Ae iniziative a àn partecipât uns tresinte delegâts rivâts di 23 diviersis comunitâts nazionâls che a vivin in cinc stâts europeans, o sei Ongjarie, Finlande, Estonie, Norvegje e Russie. La plui part dai delegâts e rivave propit de Federazion Russe dulà che lis comunitâts nazionâls plui gruessis de famee linguistiche ugrofiniche a son mordvins (cuasi 750 mil personis), udmurts (passe 550 mil), maris (547 mil) e komis (228 mil). Intal document finâl dal congrès si sburte su la cooperazion, no dome sul plan culturâl, tra i diviers popui de famee ugrofiniche e si domande un aument intal nivel de tutele dai dirits des minorancis nazionâls e des popolazions nativis, comprendût il dirit ae autodeterminazion. La cuistion dal rispiet dai dirits nazionâi e linguistics di chestis comunitâts e je cjalde massime in Russie, là che di plui bandis si denuncie politichis di assimilazion e di vualivament culturâl des diviersis comunitâts minorizadis. Il prossim congrès dai popui ugrofinics al è in program intal 2014 in Finlande.

Font: Finugor, 12/09/12

Paîs Catalans: plui di un milion e mieç in place pe indipendence

Centenârs di miârs di personis – doi milions pai organizadôrs, un milion e mieç pes fuarcis di polizie – a àn sfilât ai 11 di Setembar, zornade là che e cole la fieste nazionâl de Catalogne, pes stradis di Barcelone par domandâ la indipendence. Di là de cifre esate dai partecipants, chê clamade dongje de ANC (Assemblea Nacional de Catalunya) e je dal sigûr la plui grande manifestazion di place de storie resinte de Catalogne e, contrari di ce che al jere sucedût in altris ocasions, chest viaç la domande fate indenant e je une vore clare e ben rapresentade dal strisson che al vierzeve la manifestazion, ven a dî “Catalunya, nou estat d’Europa” (Catalogne, gnûf stât de Europe).

Stât spagnûl: boçade la propueste pe television cence frontieris

Nuie di fâ pe propueste di leç popolâr par une “television cence frontieris” che e je stade boçade dal Parlament spagnûl cul vôt de diestre spagnoliste dal PP e di UPyD. Il progjet al veve chê di permeti che lis televisions che a trasmetin intune cierte lenghe a podessin jessi viodudis in dutis lis comunitâts là che cheste lenghe e ven fevelade. La propueste di leç popolâr, che e jere rivade in Parlament cu la poie di passe 650 mil firmis cjapadis sù pe plui part intai Paîs Catalans (604 mil), e jere nassude su iniziative dal grup Acció Cultural del País Valencià tant che reazion ae decision dal esecutîf valenzian (PP) di blocâ lis emissions de television catalane TV3 intal teritori dal Paîs Valenzian.

Font: ABC, 11/09/12; VilaWeb, 12/09/12

UE: invît a no taiâ sul insegnament des lenghis minoritariis

Ai 11 di Setembar il Parlament european al à fate buine une risoluzion su educazion e formazion che e tocje ancje il teme des lenghis minorizadis. Denant de decision di diviers stâts membris di taiâ lis risorsis metudis pe educazion e pe formazion, il Parlament european al marche il valôr strategjic di chescj setôrs ancje inte logjiche dal superament de crisi economiche e finanziarie e al invide duncje i stâts a cambiâ direzion e a incressi i invistiments pe educazion, pal aprendiment continuât, pe diversitât linguistiche e culturâl. Cun di fat i coscj su la societât dai tais inta chescj setôrs, e spieghe la risoluzion, a saressin plui grues che no chei causâts de crisi finanziarie. Tra i invistiments che si invide i stâts a svilupâ si àn ancje chei par incressi lis capacitâts linguistichis e un tant nol vâl dome pes lenghis uficiâls, ma ancje par chês regjonâls o minoritariis. Il document dal Parlament european al sosten duncje cun fuarce dutis chês iniziativis che a favorissin l’ûs intes scuelis des lenghis nativis e che a promovin il multilinguisim.

Font: European Parliament, 11/09/12

Corsiche: division intal moviment indipendentist

Cuntun comunicât stampe dât fûr ai 7 di Setembar il grup U Rinnovu Naziunali al à comunicât la volontât di bandonâ il moviment indipendentist Corsica Libera. La decision e je stade spiegade cul fat che il grup nol veve vût la pussibilitât di esprimisi ad in plen dentri dal moviment. De bande lôr, i rapresentants di Corsica Libera a àn fat savê che al jere aromai cuasi un an che U Rinnovu nol partecipave ae vite ative dal moviment e che la diference tra i indreçaments politics e organizatîfs e jere za vignude fûr in maniere clare intal Fevrâr di chest an intant de assemblee gjenerâl dal moviment. La separazion – i àn tignût a precisâ – e je stade cjapade in maniere concuardade e cence tensions.

Font: Alta Frequenza, 07/09/12

Cossovo: finide la fase de indipendence “controlade”

Ai 10 di Setembar e je rivade insom la cussì clamade “indipendence controlade” supervisionade dal Grup di vuide internazionâl (ISG) e il Cossovo al è deventât, almancul dal pont di viste formâl, un stât ad in plen indipendent. Par cetancj osservatôrs locâi e internazionâi, dut câs, la situazion no cambiarà plui di tant. La pôre plui gruesse e je chê leade ae evoluzion dai rapuarts cu la minorance serbe concentrade inte aree dongje de citât di Mitrovica. Pal prin ministri cossovan Hashim Thaçi no dome no si previôt che cheste aree a maiorance serbe e puedi dâsi dongje cu la Serbie, ma nancje nissune forme particolâr di autonomie. Thaçi al à ancje indreçât un apel ae comunitât internazionâl par che e fasi pressions su la Serbie par che e finissi di poiâ lis azions de popolazion e dai aministradôrs di cheste aree che no ricognossin lis istituzions cossovanis e a van dilunc a guviernâsi di bessôi. Intant però il comissari pal slargjament de UE, Stefan Fuele, al à sigurât la Serbie che par jentrâ inte Union no i si domande di ricognossi il Cossovo tant che stât indipendent, ma dome di cirî di normalizâ i siei rapuarts cu la sô ex provincie.

Font: Balkan Insight, 05 e 13/09/12

Ongjarie: simpri plui alte la tension cui rom

Lis dificoltâts leadis ae crisi economiche che e à colpît ancje la Ongjarie a àn puartât a di un aument progressîf dai episodis di intolerance e fintremai di violence cuintri des comunitâts rom che a rapresentin la plui grande minorance dal paîs (si fevele di 700 mil personis o sei sù par jù il 7% de popolazion). Za di timp la Magyar Gárda (Vuardie Ongjarese), leade al partît di estreme diestre Jobbik, e sfile in maniere intimidatorie intai paîs là che e vîf la comunitât rom. Chestis intimidazions a vegnin puartadis indenant sot dai voi de polizie cence che cheste e intervegni, nancje tai câs plui pençs. No mancjin po atacs violents che intai ultins agns a àn causât sîs muarts e cetancj ferîts tra i rom ongjarês che simpri di plui a cirin di bandonâ il paîs domandant asîl politic inaltrò. Dut chest al sucêt cence che il guvier populist di Victor Orban e dal so partît Fidesz al intervegni. La esasperazion tra i rom e je cussì alte che al è ancje cui che al à decidût di rispuindi cu la stesse monede. Inte citât di Pécs, di fat, e je stade comunicade la nassite de Roma Gárda (Vuardie Rom) tant che organizazion pe autodifese di rom, ebreus e di altris minorancis che si cjatin al centri dai atacs di grups de diestre neofassiste. Al è di dî che ta chest câs la reazion des autoritâts ongjaresis no si è fate spietâ e i oms dai reparts speciâi antiterorisim a àn proviodût daurman a arestâ il fondadôr de Roma Gárda, Ferenc Bagó.

Font: Wsws.org, 05/09/12; Politics.hu, 07/09/12

Irlande: aument dai cors par imparâ il gaelic

La incressite di interès pe lenghe gaeliche e à puartât a di un aument significatîf dai cors che, ancje fûr des scuelis, a permetin di imparâ la lenghe proprie de Irlande. Cul mês di Setembar a son cussì partîts cors ator par dutis lis conteis de isule. Si trate di cors par adults e par fruts, par cui che al vûl imparâ lis fondis de lenghe, par cui che al vûl miorâ lis sôs capacitâts linguistichis e ancje par cui che al varà po di insegnâle a altris. I cors a vegnin organizâts des aministrazions locâls, des bibliotechis e di organizazions tant che Conradh na Gaeilge, Gaelchultúr o Gael-Linn. Intes sîs conteis dal Nord il sogjet plui atîf al è la organizazion Líofa. I siei cors pe dade 2012-2013 a jerin stâts pensâts par uns 2 mil personis, ma denant de domande massive si à vût di previodi almancul 5 mil puescj. Cors di lenghe a son stâts programâts ancje di Raidió Fáilte, emitente che e trasmet di Béal Feirste / Belfast. In Otubar, invezit, al sarà lançât un gnûf cors di gaelic pai utents de rêt. Si trate di un cors pensât par cui che al vûl svicinâsi a cheste lenghe e tacâ a doprâ cualchi frase par comunicâ cun chei che za a son in stât di doprâle; il progjet quickirish.com al è stât metût adun dal grup eTeanga, specialist intal insegnament dal irlandês su internet.

Font: Gaelport, 04 e 12/09/12

Stât spagnûl: proteste dai students nazionalitaris

Une disine di coletîfs studentescs indipendentiscj dal stât spagnûl a àn proclamât pai 11 di Otubar une zornade di mobilitazion par protestâ cuintri des azions puartadis indenant dal guvier centrâl. Intune conference stampe tignude a Madrid, i rapresentants di coletîfs di students indipendentiscj bascs, catalans, galizians, asturians, ma ancje dal Aragon, de Andalusie, de Castilie e de Cantabrie a àn denunciât il tentatîf dal guvier centrâl di doprâ la crisi par centralizâ i programs educatîfs e sbassâ i dirits sociâi, politics, linguistics e culturâi des diviersis comunitâts nazionâls che a son cjapadis dentri intal stât spagnûl. La strade de sovranitât di chestis comunitâts e ven indicade tant che soluzion ancje par fâi cuintri ae riduzion simpri plui fuarte dal nivel di cualitât de scuele.

Font: Naiz:, 04/09/12