La manifestazion a pro de indipendence che ai 11
di Setembar e à puartât un milion e mieç di personis a jemplâ lis stradis di
Barcelone, e à dât un sburt cence precedents aes istituzions catalanis clamadis
a dâ une rispueste clare aes domandis fatis indenant de int. Cussì cualchi
zornade plui tart il president dal guvier catalan, Artur Mas (CiU), al à
comunicât che si larà a elezions anticipadis ai 25 di Novembar. Po, ai 27 di
Setembar, il Parlament catalan cuntune grande maiorance al à votât a pro de
celebrazion di un referendum su la indipendence inte legjislature che si larà a
vierzi subite dopo des elezions. La risoluzion e je stade fate buine cui vôts a
pro di CiU, ERC, ICV-EUiA e Solidaritat, i socialiscj (PSC) a àn sielzût
invezit la strade de astension, intant che a votâ cuintri e je restade dome la
diestre spagnoliste formade dal PP e de liste Ciutadans, ven a dî sì e no il
15% dai elets. Denant di cheste decision sei il guvier di Madrid, par mieç de
vicepresidente Soraya Sáenz de Santamaría, sei il PP cumò al guvier, par bocje
de segretarie gjenerâl María Dolores de Cospedal, a àn declarât che a son
struments juridics e istituzionâi suficients par impedî il referendum e che, se
si intindès procedi distès, si dopraran i struments metûts a disposizion dal
codiç penâl. De bande dal esecutîf catalan la rispueste e je stade che no si
pues impedî a di un popul di pronunciâsi sul so avignî.
A chest pont cualis sono alore lis prospetivis pe Catalogne? Za il vôt di Novembar al permetarà di capî cuale che e sarà la rapresentance che i catalans i daran ai partîts che si son impegnâts in maniere esplicite par che al vegni fat il referendum su la indipendence. Se il consens di chest front al sarà maioritari si vierzarà duncje la strade par celebrâ il referendum. A di chel pont al sarà il guvier spagnûl a decidi cemût movisi, ven a dî se met in at la sô menace e impedî il davuelziment de consultazion popolâr. Ta chest câs, al parlament catalan i restaressin trê opzions: acetâ la decision di Madrid, ipotesi che par cumò e somee avonde improbabile; imbastî il referendum ancje cence permès; o proclamâ daurman la indipendence. Chestis dôs ultimis stradis a oblearessin il guvier spagnûl a sielzi tra la soluzion mediade, magari cuntune forme di autoguvier une vore fuarte par mantignî la Catalogne dentri de suaze statâl, o pûr cu la repression violente. In ogni câs la cuistion e sarès sot dai voi des istituzions europeanis che no podaran fâ di mancul di cjapâ posizion cun consecuencis, par dut l’implant istituzionâl comunitari, ancjemò dutis di viodi.
A chest pont cualis sono alore lis prospetivis pe Catalogne? Za il vôt di Novembar al permetarà di capî cuale che e sarà la rapresentance che i catalans i daran ai partîts che si son impegnâts in maniere esplicite par che al vegni fat il referendum su la indipendence. Se il consens di chest front al sarà maioritari si vierzarà duncje la strade par celebrâ il referendum. A di chel pont al sarà il guvier spagnûl a decidi cemût movisi, ven a dî se met in at la sô menace e impedî il davuelziment de consultazion popolâr. Ta chest câs, al parlament catalan i restaressin trê opzions: acetâ la decision di Madrid, ipotesi che par cumò e somee avonde improbabile; imbastî il referendum ancje cence permès; o proclamâ daurman la indipendence. Chestis dôs ultimis stradis a oblearessin il guvier spagnûl a sielzi tra la soluzion mediade, magari cuntune forme di autoguvier une vore fuarte par mantignî la Catalogne dentri de suaze statâl, o pûr cu la repression violente. In ogni câs la cuistion e sarès sot dai voi des istituzions europeanis che no podaran fâ di mancul di cjapâ posizion cun consecuencis, par dut l’implant istituzionâl comunitari, ancjemò dutis di viodi.
Font:
VilaWeb, 21-29/09/12; Avui, 21-29/09/12; El Pais, 21-28/09/12
Nessun commento:
Posta un commento