Moldova: prime condane par ofesis razistis cuintri dai rom

Inte republiche di Moldova un tribunâl al à condanât un ex alt funzionari dal guvier, Anatol Plugaru, par vie di declarazions sui rom che a son stadis judicadis di stamp razist. L’om al è stât condanât a scusâsi pes sôs afermazions e a fâlu inte stesse suaze là che lis veve fatis, ven a dî une conference stampe. E je la prime volte che in Moldova si condane cualchidun par ofesis cuintri dai membris di cheste comunitât e si lu oblee a domandâ scuse pes sôs peraulis. Daûr dai dâts uficiâi inte republiche ex sovietiche a vivin 12 mil rom, ma lis stimis fatis dai ativiscj pai dirits umans a fevelin di almancul 140 mil personis: cheste diference e je leade al fat che la plui part dai rom no declarin la lôr partignince nazionâl par pôre di jessi discriminâts.

Font: RFE/RL, 13/01/12

Slovens: prime cjarte bilengâl a Cividât

Inte republiche taliane la leç statâl sui slovens e previôt za di agns la pussibilitât pai citadins di lenghe slovene che lu domandin di vê la cjarte di identitât bilengâl, pûr che a sedin residents intun dai Comuns che a son inte aree là che storichementri e je presinte, ancje se in forme minoritarie, la comunitât slovene. Dut câs in cierts Comuns de provincie di Udin, che pûr a son cjapâts dentri ta cheste aree delimitade, la concession de cjarte e je stade une vore faturose. Al è il câs di Resie, là che la prime cjarte bilengâl dade a di un resident che le veve domandade e je stade compagnade di polemichis une vore pesantis e fintremai di diviers ats di intimidazion. Ancje a Cividât, là che si à une presince significative di nazionaliscj talians, no son mancjâts i problemis. Dut câs dopo diviers mês che e jere stade presentade la domande e dopo no pôcs rimants e pidiments fats indenant de aministrazion locâl, ae fin ancje ta chest Comun e je stade dade fûr la prime cjarte di identitât par talian e par sloven.

Font: Novi Matajur, 11/01/12

Republiche ceche: a cressin menacis e violencis di stamp raziâl

E je simpri plui preocupazion pal aument dai episodis di violence e di intimidazion di stamp raziâl inte Republiche ceche. A jessi vitimis di chescj episodis a son dispès i rom. Il câs plui seri al è capitât pocjis setemanis indaûr a Praghe là che une femine rom e je stade sassinade di un grup di zovins di estreme diestre che a jerin za stâts responsabii di agressions e menacis cuintri di altris membris de comunitât rom e di cence tet. Dongje di Plzeň, invezit, un ativist rom al è za di timp al centri di menacis une vore pesantis e al à denunciât une scjarse atenzion de bande des fuarcis di polizie. Propit par vie des menacis simpri plui penzis, ta chestis zornadis Michal Mazel al à fat savê che nol davuelzarà plui la incarghe di perît intai procès là che a son imputâts estremiscj di diestre. Mazel al è un dai pôcs esperts di moviments di estreme diestre a disposizion dai tribunâi cecs.

Font: Roma Daily News, 10/01/12

Galizie: progjet radiofonic pai fevelants galizians gnûfs

Ai 4 di Zenâr a son tacadis lis emissions di “Proxecto Neo”, un program radiofonic che al à tant che protagonistis lis personis che a àn imparât a fevelâ par galizian. Il progjet al è stât imbastît de sezion di inovazion educative dal istitût di studis superiôrs Perdouro e di Rádio Burela, e al va in onde inte suaze di Radiofusom, une programazion comune metude adun di disesiet emitentis radiofonichis locâls che a doprin il galizian. Il prossim pas di “Proxecto Neo” al è chel di rivâ, par mieç des rêts di comunicazion sociâl, a ducj i fevelants galizians gnûfs ator pal mont. Il progjet al è partît de aree di Burela par vie che achì si à un nivel di integrazion une vore alt, ancje sul front linguistic, di personis rivadis di altris comunitâts dal stât spagnûl e dal rest dal mont.

Font: Diario liberdade, 08/01/12

Gales: la Cymdeithas pronte a di un mudament radicâl

Ai 13 di Fevrâr dal 1962 un intervent radiofonic dal poete Saunders Lewis al è stât il sburt che al à puartât ae nassite de Cymdeithas yr Iaith Gymraeg, la Societât pe Lenghe Galese, che cu lis sôs campagnis e je daûr de leç pal galês e di cetancj pas indenant fats de lenghe proprie dal Gales in chescj agns. Al è ancje in gracie des azions di cheste associazion che in dì di vuê il numar des personis che a doprin il galês al è tornât a cressi, ribaltant la tindince che si veve vût di plui di un secul incà. Cul svicinâsi dal inovâl dai siei cincuante agns, i membris de Cymdeithas a son daûr a interogâsi sul avignî di cheste associazion. La presidente de associazion, Bethan Williams, e à dite che il 2012 al podarès jessi un an di mudament radicâl pe stesse struture de Cymdeithas che e à di jessi pronte a vierzisi e a jessi plui inclusive di ce che e je stade fin cumò. La sorevivence de lenghe, o sei l’obietîf dai prins cincuante agns di ativitât, e je stade garantide, ma cumò – e à dite la presidente de Societât – si vierç la bataie par decidi se il galês al sarà une culture minoritarie intal so stes paîs o ben la lenghe di ogni dì des comunitâts locâls, o sei la lenghe vere de nazion galese. Se si vûl rivâ a chest secont obietîf – e à zontât la Williams – si varà di indreçâ la azion de Cymdeithas dentri des comunitâts locâls par sigurâ che il galês al sedi une lenghe vive doprade pardabon ogni dì.

Font: Cymdeithas yr Iaith Gymraeg, 07/01/12; BBC, 07/01/12

Irlande dal Nord: sucès pal ûs dal gaelic intai bus di Belfast Ovest

Pe direzion de compagnie Translink, che e gjestìs lis liniis di bus inte aree ocidentâl di Belfast, l’ûs dal gaelic irlandês dongje dal inglês sui segnaladôrs des destinazions al è stât un sucès. La novitât e jere stade introdusude cuntun cost limitât vie pe Vierte dal an passât dopo di une prime consultazion dai citadins e cumò ducj i 250 bus in vore te aree di Bothar na bhFal / Falls Road a son indotâts di chest servizi. La segnalazion des destinazions par gaelic e par inglês si zonte a altris servizis bilengâi che la compagnie e veve inviât tant che lis informazions su la sigurece, sui percors e sui oraris dai bus. La Translink e à ancje fat stampâ diviersis vuidis turistichis bilengâls.

Font: Gaelport, 04/01/12

Tatarstan: protestis in Russie, sburt par incressi l’autoguvier

La Costituzion dal Tatarstan e ricognòs la sovranitât di cheste republiche dentri de Federazion russe e i da ai siei orghins di guvier ducj chei podês che no son delegâts in maniere esplicite a Mosche. I nivei di autoguvier di cheste republiche a podaressin però jessi cressûts ancjemò profitant des grandis mobilitazions popolârs che a interessin la Russie dopo des ultimis elezions politichis, segnadis des acusis di broi. A dîlu al è Rafail Khakimov, parlamentâr e za conseîr dal ex president tatar Mintimer Shaimijev, che al à invidât i moviments politics tatars a mobilitâsi par chest obietîf. Fin cumò i tatars a àn disertât lis protestis di place par vie che tra i contestadôrs a son ancje i ultranazionaliscj rus, ma Khakimov al invide i siei a no abadâju e a manifestâ cuintri des autoritâts de Federazion par domandâ di infuartî la sovranitât dal Tatarstan. “La democrazie e à simpri judât i tatars in Russie – al à spiegât Khakimov – e duncje plui democrazie si varà e miôr e larà pai tatars”.

Font: RFE/RL, 30/12/11; Mòn Divers, 09/01/12

Abkhazie: pe prime volte i abkhazis a son maiorance

Pe prime volte di un secul incà lis personis che si declarin di nazionalitât abkhaze a son maiorance assolude in Abkhazie, regjon che si è autoproclamade indipendente de Gjeorgjie sul finî dal 2008. La gnove e ven fûr dai dâts dal censiment uficiâl che si à tignût ta cheste republiche vie pal 2011 e che a son a pene stâts rindûts publics. Cun di fat, dai passe 240 mil abitants dal paîs, chei che si declarin abkhazis a son il 50,7% dal totâl. Daûr dai censiments uficiâi, bisugne tornâ al 1897 par cjatâ la ultime volte che i membris di cheste comunitât nazionâl a jerin maiorance intal lôr teritori. Po dopo, la rivade massive di gjeorgjians, rus e armens ju veve puartâts sot dal 50% de popolazion totâl. Daûr dal censiment dal 2011 lis minorancis plui gruessis a son chê armene, cul 17,4% dal totâl, e chê russe cul 9,2% de popolazion.

Font: Mòn Divers, 30/12/11

Di gnûf in vore

Dopo di cuasi di un an e mieç di sospension, adun cun chê radiofoniche, e torne a partî ancje la version internet di Internazionalitari, il boletin di informazion par furlan su lis nazions cence stât e su lis comunitâts minorizadis de Europe. La decision di suspindi il program e il blog e jere stade cjapade par vie des dificoltâts finanziaris di Radio Onde Furlane dopo che la Regjon e veve azerât par doi agns di file i fonts pai programs radiotelevisîfs par furlan. Cumò alc al è cambiât e si à decidût di tornâ a scomençâ cu la trasmission e, di chê strade, ancje cul blog che, pe ocasion, si presente ancje cuntune gnove muse e cun cualchi contignût in plui. Sperìn che il nestri sfuarç al sedi preseât.

La lodule e cjante inmò la sô cjançon di libertât

Ai 5 di Mai dal 1981, daspò 66 zornadis di siopar de fam, al murive inte preson di Long Kesh, in Irlande dal Nord, Bobby Sands.
Intal siopar a pierderin la vite altris nûf fantats, ducj volontaris dal Esercit Republican Irlandês (IRA) o dal Esercit di Liberazion Nazionâl Irlandês (INLA) tra i 24 e i 30 agns: Francis Hughes, Patsy O’Hara, Raymond McCreesh, Joe McDonnell, Martin Hurson, Kevin Lynch, Kieran Doherty, Thomas McElwee e Michael Devine.
Di cuant che, intal 1976, lis autoritâts britanichis ur vevin gjavât il status di presonîrs politics, centenârs di fantats e di fantatis impresonâts a vevin inviât formis diviersis di proteste, de blanket protest ae no-wash protest, prime di rivâ al siopar de fam. Dut chest par mostrâ al mont intîr che no jerin criminâi comuns come che invezit a cirivin di fâ crodi lis autoritâts britanichis: se a riscjavin la vite, o di jessi condanâts cence un procès just, impresonâts e torturâts al jere parcè che a combatevin pai dirits e pe libertât dal lôr popul.
Daûr de lote di chescj presonîrs e jere une comunitât interie: baste pensâ che, pôc prime di murî, Sands al jere stât elet parlamentâr cun passe 30 mil vôts, e che al so funerâl a jerin cent mil personis. “Se no rivin a sdrumâ il desideri di libertât no puedin crevâti; – al scriveve Sands – no mi crevaran parcè che il gno desideri di libertât e la libertât dal popul irlandês a son tal gno cûr.” 30 agns daspò, il lôr sacrifici al reste un simbul di resistence par ducj chei che a lotin pe justizie e pe libertât.

Paîs Catalans: presentâts doi gnûfs sogjets indipendentiscj

Il panorame politic catalan al è in moviment daspò de sentence dal tribunâl costituzionâl spagnûl sul Statût di autonomie e de boçadure de bande dal Parlament catalan de leç di iniziative popolâr par inviâ un referendum su la indipendence. Tune conference stampe tignude ai 20 di Lui i deputâts catalans Uriel Bertran (ERC) e Alfons López Tena (CiU), intune cul fondadôr di Democràcia Catalana Joan Laporta, a àn presentât Solidaritat Catalana per la Independència, un cartel là che a àn invidât dutis lis formazions nazionalistis catalanis a dâsi dongje cun doi obietîfs di fonde, ven a dî: presentâ une candidature unitarie pes prossimis elezions cul impegn a proclamâ la indipendence de Catalogne di ratificâ po cuntun referendum popolâr; e meti in pîts un guvier provisori che al puarti ae creazion di un stât catalan dentri de Union Europeane. Une setemane dopo, denant dal cidin o des reazions clipis rivadis dai principâi partîts catalans tant che CiU e ERC, i trê a àn comunicât che a laran indenant cul progjet cence spietâ chei altris. Une adesion e je invezit rivade dal president di Entesa de Progrés Municipal, Jordi Fàbrega, intant che la associazion politiche Reagrupament e à mostrât di jessi interessade a aderî al progjet. Intes prossimis elezions pal Parlament catalan, dut câs, il spazi dal indipendentisim al sarà rapresentât ancje de liste Sí – Coalició per la Independència cu la partecipazion di diviers sogjets politics extraparlamentârs e personaçs di prin plan dal catalanisim militant.

Font: Nationalia, 29/07/10; VilaWeb, 20/07/1o

Irlande: Long Kesh nol sarà sdrumât

La ex preson di Long Kesh (The Maze pai britanics) e rapresente un lûc simbul de storie resinte de Irlande dal Nord, baste pensâ ai siopars de fam dal 1981 o ancje ae funzion impuartante che e à vût pal riscat de lenghe gaeliche. Zaromai di agns si fevelave di sdrumâle jù di plante fûr par lassâ puest a gnovis areis comerciâls e residenziâls. Cumò però la bataie par fâ in maniere che e deventàs un lûc de memorie, puartade indenant soredut dai republicans, e à fat un pas indenant. Cun di fat, il guvier nordirlandês al à decidût che diviersis struturis de ex preson, tant che la infermarie e il Bloc 6, a saran conservadis e che ta chel sît si crearà un centri di nivel european pe risoluzion dai conflits e pe costruzion de pâs. Cun di plui, in altris areis ristruturadis, si darà acet ancje ai uficis de Royal Ulster Agricultural Society.

Font: BBC, 29/07/10

France: preocupazion pes misuris cuintri dai rom

La decision anticipade dal president francês Nicolas Sarkozy di disbratâ vie ducj i cjamps rom e di inviâ la espulsion massive dai rom rumens e bulgars e à jevât reazions preocupadis sedi dentri che fûr dal stât francês. Lis organizazions pai dirits umans e diviers partîts francês a àn za fevelât di iniziative di stamp razist e xenofobic. Il Centri european pai dirits dai rom (ERRC) al à dite che il guvier francês, impen di menaçâ chest gjenar di azions, al varès di rispietâ la Cjarte sociâl europeane che al è za daûr a violâ propit par chel che si riferìs aes condizions abitativis dai rom. Cun di plui, dal moment che i rom rumens e bulgars a son citadins comunitaris, no si pues intervignî cun espulsions arbitrariis e massivis. Il guvier rumen si è declarât disponibil a colaborâ cun chel francês, ma dome par favorî la integrazion dai siei citadins, cence diferencis etnichis, intal stât francês.

Font: ERRC, 29/07/10; Balkan Insight, 29/07/10

Irlande: polemiche intal Nord sui fonts pes scuelis gaelichis

Un grup di parlamentârs unioniscj al à contestât la decision de ministre pe istruzion de Irlande dal Nord, Caitriona Ruane, di finanziâ cuatri gnovis scuelis là che la lenghe veicolâr e je il gaelic. Pai rapresentants unioniscj, di fat, chestis scuelis a ufrissin plui puescj di chei che a son domandâts e invezit di vierzint di gnovis si varès di proviodi a razionalizâlis. No le pense cussì la ministre che e spieghe che il numar di fruts che a frecuentin lis scuelis gaelichis al è daûr a cressi e, viodût che di struturis dal gjenar no ‘nd è tantis, si à di rispuindi aes domandis che a rivin dal teritori.

Font: BBC, 28/07/10

Gales: pal Plaid Cymru il guvier britanic al penalize il galês

Il Plaid Cymru al à domandât ai rapresentants dal guvier britanic, poiât di une coalizion tra Conservadôrs e Liberâi Democratics, dai sclariments in mert al progjet di taiâ di un cuart i fonts pe radiotelevision publiche in lenghe galese S4C. Un tai di cheste fate, al lamente il partît nazionalist galês, in plui di meti in pericul la programazion de emitente al larès a colpî cun fuarce ancje la industrie audiovisive galese. Il Plaid Cymru al segnale ancje i pericui des modifichis ae leç su la imigrazion che a previodin che cui che al ven a studiâ intal Ream Unît al vedi di dimostrâ almancul un nivel medi di cognossince dal inglês. Pal partît galês si à di pensâ des deroghis par cui che al rive par studiâ dome il galês, come tal câs dai students des comunitâts di divignince galese de Patagonie.

Font: Plaid Cymru, 23/07/10

Paîs Basc: nuie multis pes aziendis che no rispietin i dirits linguistics

L’esecutîf de Comunitât Autonome Basche, vuidât dal socialist Patxi López, al à fat savê che al cambiarà il decret sui dirits linguistics dai consumadôrs. In pratiche si gjavaran vie lis sanzions previodudis pes aziendis che no garantissin il rispiet dai dirits linguistics dai bascs. Dal moment che il procès di modifiche al domande un pôc di timp, il guvier basc al à decidût di spostâ di un an indenant la jentrade in vore dal decret che al varès vût di deventâ operatîf ai 17 di Lui. Dal moment che lis multis no saran plui in vore, al reste di capî cemût che si sanzionarà chês impresis che a cjapin bêçs par svilupâ l’ûs de lenghe basche, ma po ju doprin par altris fins.

Font: Gara, 23/07/10

Sud Tirôl: e je vuere vierte su la toponomastiche

Scuintri dûr jenfri il guvier talian e la Provincie autonome di Bolzan par vie de segnaletiche metude sù de AVS, o sei la associazion alpine sudtirolese, sui trois di mont dal Sud Tirôl. La plui part dai cartei e je dome par todesc e chest al à jevât lis protestis prime dai CAI e po des autoritâts talianis che a àn pretindût che la Provincie di Bolzan e gjavàs dute la segnaletiche monolengâl par meti al so puest dai cartei bilengâi. La Provincie e à ricuardât che la segnaletiche e je stade metude di un sogjet privât e cence spindi bêçs publics e che, duncje, no i tocjarès a jê di intervignî. Dut câs, ogni acuardi cul guvier talian al è stât impussibil ancje par vie dai timps imponûts di Rome (cuasi 40 mil cartei di sostituî intun an) e de pretese di meti formis talianis ancje là che no ‘nd è di tradizionâls. Sot vie, la cuestion principâl e somee jessi propite cheste, ven a dî la imposizion di nons talians che no son mai esistûts ma che a son stâts inventâts e imponûts intai agns dal fassisim. Propit il teme cjalt de toponomastiche al è ancje al centri di une propueste di leç fate indenant ta chestis zornadis de SVP, partît maioritari in Sud Tirôl, par cirî une soluzion al probleme.

Font: Alto Adige, 22-26/07/10

Cossovo: la Cort internazionâl di justizie e poie la indipendence

La Cort internazionâl di justizie e à dite che la declarazion unilaterâl di indipendence dal Cossovo no va cuintri de legalitât internazionâl. La sentence e va a rispuindi ae risoluzion presentade de Serbie denant de ONU par domandâ che la Cort si pronunciàs su la legalitât de indipendence declarade dal Cossovo intal Fevrâr dal 2008. Cundut che no je une sentence vincolante, chel istès si trate di un at impuartant che al è stât saludât cun sodisfazion des autoritâts cossovanis e che si crôt che al slargjarà il numar dai stâts che a àn ricognossût la sô indipendence (dai 191 membris de ONU a son dome 69 chei che lu àn za fat). Reazions une vore critichis a son invezit rivadis de Serbie, di dulà che si à fat savê che no si ricognossarà la indipendence dal Cossovo. Di plui bandis si à ancje segnalât che cheste sentence e darà un sburt a dutis chês comunitâts nazionâls che a vuelin deventâ indipendentis, tant che la Catalogne o la Scozie, o che a domandin il ricognossiment de lôr indipendence, tant che la Ossezie meridionâl o la Transnistrie. Dut câs, un dai stâts plui preocupâts pe sentence al è chel bosgnac che al à pôre che cheste decision e dedi un sburt ae indipendence de part serbe de Bosgne (Republika Srpska). Al è ancje cui che al pense che daspò di cheste sentence si varà di fâ un altri sfuarç par normalizâ i rapuarts tra Serbie e Cossovo cul ricognossiment di une autonomie speciâl pe part a maiorance serbe o fintremai cuntune modifiche dai confins.

Font: Nationalia, 22 e 27/07/10; Balkan Insight, 22/07/10

Kurdistan: il PKK al propon un acuardi pe fin de lote armade

Il Partît dai Lavoradôrs dal Kurdistan (PKK) al à fat indenant une gnove propueste par bandonâ in maniere definitive la lote armade. In cambi de rinuncie ae violence, il PKK al domande al guvier turc di acetâ un fermait il fûc e di meti fin ai atacs cuintri dai civîi e ae repression in at cuintri des organizazions politichis curdis. Il procès di pâs, al zonte il moviment curdi, al varès di davuelzisi sot de supervision de ONU. Se la Turchie e ves invezit di refudâ ancje cheste propueste, al zonte il PKK, la uniche soluzion pussibile e sarà chê de indipendence dal Kurdistan.

Font: Nationalia, 21/07/10

Sardegne: evitât il tai dai fonts pe lenghe sarde

E je lade a bon fin la proteste inmaneade cuintri dal tai des risorsis pe lenghe sarde che la aministrazion regjonâl e veve pensât di meti in vore. Sul imprin, la Zonte regjonâl e veve chê di smiezâ i fonts pe lenghe (che a rapresentavin l’un par cent des risorsis a disposizion dal assessorât pe culture). Daspò des azions di proteste metudis in at dai operadôrs dal setôr la Regjon e à decidût di mantignî dome i tais previodûts pes universitâts, che a àn ancjemò di spindi i bêçs che a àn vût pe lenghe sarde. Lis iniziativis di proteste a son stadis coordenadis dal Comitât pe lenghe sarde (Comitadu pro sa limba sarda) che ai 22 di Lui al à ancje inmaneât une manifestazion denant dal palaç dal Consei regjonâl a Casteddu / Cagliari.

Font: LsU / Comitadu pro sa limba sarda, 20-23/07/10