Irlande: pal Sinn Féin alc si môf pal gaelic ancje intal Nord

Dentri de fin di Març il ministri pe culture, Nelson McCausland, si è impegnât a presentâ al esecutîf nordirlandês un progjet strategjic pes lenghis minoritariis che al invii la politiche di tutele e di svilup de lenghe irlandese (gaelic irlandês) previodude dai acuardis di Sant Andree dal 2006, ma che e reste ancjemò su la cjarte. Lu à anticipât il president dal Sinn Féin, Gerry Adams, che al à ancje fat savê che il prin ministri britanic Gordon Brown al à garantît risorsis par altris cuatri agns sei pal font pe radiotelevision par irlandês, sei par chês altris struturis impegnadis pal svilup di cheste lenghe. Pal rapresentant dal partît republican irlandês, si fevele di 20 milions di sterlinis che a varessin di zontâsi aes risorsis che il guvier nordirlandês al varà di meti par chest setôr.

Font: AP/RN, 18/02/10

Paîs Basc: sdrume di preiscrizions pal model scolastic basc

Inte Comunitât Autonome Basche a son pôc mancul dal 75% i gjenitôrs che a àn sielzût pai lôr fîs al model scolastic D, ven a dî chel cul basc tant che lenghe veicolâr. Si trate di 13.436 fameis su 18.241, cuintri di 4.077 che a àn optât pal model B, o sei chel bilengâl basc / castilian, e a pene 728 che a àn sielzût il model A, ven a dî chel cul castilian tant che lenghe veicolâr. I dâts a son chei che a rivin des preiscrizions dai fruts tra i doi e i trê agns e no son cui sa ce diviers di chei dai ultins agns, là che il model basc al è stât chel sielzût de grande part des fameis. Ce che al è cambiât al è che cumò al guvier de CAB al è il partît socialist che, ancje pes pressions dal partît popolâr, al à inviât une politiche che e volarès limitâ la presince de lenghe basche intes scuelis dal teritori.

Font: Nationalia, 18/02/10

Scozie: presentâts i detais pal referendum su la indipendence

Tun conference stampe a Edimburc, il prin ministri scozês Alex Salmond al à presentât in maniere uficiâl i detais dal referendum su la indipendence. Al sarà cumò il Parlament scozês a decidi se passâ o boçâ il disen di leç che al covente par che la consultazion e puedi davuelzisi. Dut câs, i partîts dal front unionist (Laburiscj, Liberâi Democratics e Conservadôrs), che a àn la maiorance in Parlament, a àn za fat savê che a votaran cuintri. Daûr de propueste fate indenant dal Partît Nazionâl Scozês (SNP, che al vuide un guvier di minorance) lis domandis proponudis ai citadins a saran dôs e su dôs schedis diviersis. Intune si domandarà se a son dacuardi di cressi lis competencis in man al Parlament scozês. In proposit si varan dôs alternativis: trasferî a Holyrood il control su dutis lis materiis fûr che difese, politiche foreste e control finanziari; o pûr un passaç di competencis plui limitât sul model proponût de Comission Calman. Ta chê altre schede, invezit, si domandarà se i podês dal Parlament a àn di jessi slargjâts ancje par permetii di otignî la indipendence.

Font: BBC, 15/02/10

Paîs Basc: la çampe indipendentiste a pro di une lote dome politiche

La çampe indipendentiste basche e à puartât insom il procès di dibatiment interni che al à puartât a fâ bon il document “Zutik Euskal Herria” (Paîs Basc in pîts). L’obietîf de propueste al è chel di dâ dongje lis fuarcis progressistis e democratichis baschis, tal rispiet de storie e des carateristichis di ognidun, par puartâ il stât spagnûl sul teren di un confront libar e democratic che al permeti ai citadins bascs di podê decidi dal lôr avignî. Si trate di un procès – si dîs intal document – che al à di jessi fat dome par mieç de lote politiche e democratiche. Un impegn chest, che al à cjatât il bon acet massime di Eusko Alkartasuna e di Aralar. La conferme de sielte di une strade dome politiche par risolvi il conflit basc e à puartât Eusko Alkartasuna a domandâ al guvier spagnûl di eliminâ la leç sui partîts che e à permetût di meti fûr leç la plui part des formazions politichis rapresentativis de çampe indipendentiste basche tant che Batasuna, ma ancje Azion Nazionaliste Basche (EAE - ANV) e il Partît Comunist des Tieris Baschis (EHAK - PCTV).

Font: Gara, 15/02/10

Cossovo: Hammarberg al denuncie la politiche UE des espulsions

In dì di vuê, intal Cossovo, si àn 20 mil personis sfoladis; altris 10 mil a restin intai cjamps di profugance de Bosgne e de Macedonie; miârs di dispatriâts a son invezit scjampâts in Serbie. Ta cheste situazion no si pues pensâ a mandâ indaûr in maniere sfuarçade disinis di miârs di personis che a vevin cjatât acet intai paîs de Union Europeane par vie de vuere. Il Cossovo nol è inmò preparât a frontâ cheste situazion e cui che al torne achì al riscje di restâ par agns in cjamps di fortune, cence lavôr, cence servizis sanitaris e cence istruzion. A dîlu al è stât il comissari european pai dirits umans Thomas Hammarberg che, in Fevrâr, al è stât in visite in Cossovo. I rimpatris sfuarçâts a son une condizion imponude de Union Europeane al guvier cossovan par regolarizâ i permès di viaç. Dome in Gjermanie si fevele di 12 mil espulsions, pe plui part di rom. Propit cheste comunitât si cjate intune situazion une vore grivie e e denuncie dispès discriminazions e violencis de bande des autoritâts cossovanis. Intant dai scuintris tra serps e albanês, i rom di Mitrovica a jerin stâts butâts fûr dal Roma Mahala, il plui grant cuartîr rom dal Cossovo, par finî pe plui part intai cjamps di profugance di Osterode e Cesmin Lug che a son stâts tirâts sù in areis contaminadis dal plomp che al cause un numar une vore alt di muarts. Daspò agns che la vuere e je finide, i rom no puedin tornâ intal lôr cuartîr. Tune situazion di cheste fate, al è scandalôs – al spieghe Hammarberg – pensâ di fâ rivâ achì altris personis. Situazion penze ancje intes areis a maiorance serbe là che, cundut de presince di trupis internazionâls, lis autoritâts locâls a fevelin di 200 mil serps e rom parâts vie des lôr cjasis, 1.800 personis “sparidis” e 150 munistîrs brusâts.

Font: il manifesto, 14/02/10

Kurdistan: gnove ondade di arescj inviade des autoritâts turchis

E va indenant intal stât turc la repression cuintri des organizazions e dai rapresentants de comunitât curde. Cun di fat, sabide ai 13 di Fevrâr a son stadis arestadis plui di otante personis che a fasin part dal BDP (il partît di riferiment de comunitât curde), de KCK (la Union des Comunitâts Curdis) e di altris organizazions curdis. Ancje cuintri di lôr la acuse e je simpri chê di jessi leadis al PKK, il Partît dai Lavoradôrs dal Kurdistan che al è stât metût fûr leç zaromai di agns. Cualchi zornade prime dai arescj, si veve vude la condane a 21 agns di preson di Ozan Kilinc, il diretôr dal cuotidian curdi “Azadiya Welat”, acusât di vê permetût la publicazion di fotos e articui favorevui al PKK.

Font: Món Divers, 14/02/10

Gales: ancje Windows 7 disponibil par galês

La colaborazion jenfri la Microsoft e l’Ufici pe lenghe galese e à permetût di meti a disposizion la interface linguistiche complete par galês pal sisteme Windows 7. Il lavôr al è stât dut paiât de multinazionâl e il servizi si pues discjariâlu cence vê di paiâ un franc. Une vore sodisfat par cheste gnove si à declarât il ministri galês pal patrimoni nazionâl Alun Ffred Jones che le à presentade tant che un altri esempli impuartant dal interès che il mont economic al à pe lenghe galese.

Font: Welsh Language Board, 11/02/10

SPECIÂL: Zutik Euskal Herria / Paîs Basc in pîts

Chi disot si propon il test dal comunicât dât fûr de Çampe indipendentiste basche (Ezker Abertzalea) in mert ae aprovazion dal document “Zutik Euskal Herria” (Paîs Basc in pîts) . La version integrâl dal document si pues cjatâle achì.

Ta cheste fin di setemane, la Çampe indipendentiste basche e à clamât adun lis sôs assembleis teritoriâls di Araba, Bizkaia, Gipuzkoa e Nafarroa, tirant dongje uns 600 militants indipendentiscj in rapresentance dai passe 270 comuns là che intai ultins mês la Çampe indipendentiste basche e à davuelt il so procès di discussion interne. Cun chestis assembleis teritoriâls la Çampe indipendentiste basche e à puartât insom la discussion là che e à decidût la sô strategjie politiche.

Intant di chestis assembleis i militants a àn fate une analisi de situazion politiche intal Paîs Basc (Euskal Herria) e si à esaminât il procès di discussion interne che al à puartât a decidi la planificazion politiche de Çampe indipendentiste basche pal 2010. Ae fin, lis assembleis teritoriâls a àn fate buine la risoluzion “Zutik Euskal Herria” (Paîs Basc in pîts) che e met adun lis conclusions dal dibatit e la scomesse politiche de Çampe indipendentiste basche. Chi disot a son presentâts i ponts plui impuartants di cheste risoluzion:

1. La fase politiche che Euskal Herria e je daûr a vivi e je chê dal cambiament politic che al à di jessi fat par mieç dal procès democratic. Une volte creadis lis condizions pal cambiament e sarà la ore di metilu in vore. Duncje, l’obietîf di cheste fase politiche al è permeti chest cambiament politic cul rivâ a di une suaze democratiche che e ufrissi lis fondis par che intal nestri paîs ducj i progjets politics a puedin jessi difindûts e metûts in vore. Di maniere di rivâ cussì a di une pâs salde e continuative par Euskal Herria. Acetâ cheste scomesse di cambiament e à domandât e e domande che ancje nô o vedin di cambiâ.

2. La Çampe indipendentiste basche si cjate denant la oportunitât di un cambiament politic vêr, la oportunitât di superâ il cicli atuâl e di vierzint un altri che al sedi pardabon democratic. Cumò, duncje, la sfide e je chê di passâ cheste puarte vierte a fuarce di agns e agns di lote e di lavôr e meti in at il cambiament politic. A son condizions politichis e sociâls suficientis par fâlu.

3. O confermìn il nestri impegn pal ûs di percors e di mieçs che a sedin dome politics e democratics. A son chescj i mieçs che a permetin la mobilitazion popolâr che e covente e la unitât di azion des fuarcis democratichis e progressistis dal paîs che a son la garanzie, il motôr e la jeve par vierzi e par puartâ indenant il procès democratic. Procès democratic che al à di davuelzisi in assence totâl di violence e cence interferencis, poiantsi sul dialic e su la negoziazion tra lis fuarcis politichis daûr dai principis dal senatôr Mitchell.

4. Une union largje di fuarcis che a doprin dome la lote di masse, istituzionâl e ideologjiche e je la fonde par puartâ il Stât sul teren dal confront libar e democratic di ideis e progjets politics, e podê cussì rivâ a di une situazion dulà che i citadins bascs in maniere libare, pacifiche e democratiche a cjapin lis decisions che a vuelin sul lôr avignî.

Par chest, alore, o invidìn la societât basche e lis fuarcis progressistis, democratichis e popolârs dal paîs, tal rispiet de storie, de personalitât e des carateristichis di ognidun, a dâsi dongje par rindi chest procès ireversibil. O indrecìn ancje un apel ae comunitât internazionâl par che e poi chest procès.

O sin convints che su chest troi e par mieç dal lavôr in comun e la mobilitazion popolâr, i prossims mês nus permetaran di fâ altris pas indenant e di meti in vore gnovis situazions che a rindin chest procès ireversibil.

EZKER ABERTZALEA,

ai 15 di Fevrâr dal 2010

Scozie: si slungjin i timps pal referendum su la indipendence

Il prin ministri scozês Alex Salmond al à comunicât che, contrari di ce che al previodeve sul imprin, il Parlament al varà di spietâ ancjemò un pôcs di mês prime di podê votâ il disen di leç sul referendum su la indipendence. Cun di fat, ca di un pôc, la Aule e varà a disposizion un stampon dal proviodiment e si calcole che la discussion sul document e larà indenant par almancul doi mês prime che si rivi al test definitîf. Cun chest calendari, duncje, al è dificil che, ancje se il disen di leç al sarà fat bon dal Parlament, il referendum si davuelzi intal 2010 cemût che Salmond e il so partît (SNP) a volevin. Il prin ministri scozês al à dite a clâr che la decision di slungjâ i timps e je stade cjapade par impedî che il disen di leç al vegni boçât dai partîts dal front unionist (Laburiscj, Liberâi Democratics e Conservadôrs) che a àn la maiorance intal Parlament. Salmond al spere che, passade la bataie eletorâl leade aes elezions politichis britanichis (in program dentri dai prins di Jugn), la clime si cuieti e che cualchidun al riviodi la sô posizion. La decision di spostâ indenant il vôt sul disen di leç, dut câs, e je stade criticade cun fuarce dai rapresentants dal front unionist. Rispiet aes primis ipotesis, cumò si ponte a meti dentri intal referendum dôs domandis: une su la indipendence e chê altre suntun aument des competencis in man aes istituzions scozesis.

Font: Telegraph, 11/02/10; Món Divers, 12/02/10

Irlande: l'INLA al conferme il disarmament

Ai 8 di Fevrâr un puartevôs dal Irish National Liberation Army (INLA), un dai grups armâts republicans, al à comunicât che la organizazion e à puartât insom il so percors par disarmâsi. La operazion e je stade confermade di un grup di osservatôrs esternis, dal ministri pe justizie irlandês Dermot Ahern, e dal gjenerâl John De Chastelain, che al vuide la Comission internazionâl che e viôt dal disarmament dai grups armâts nordirlandês. Il rapresentant dal INLA al à declarât che la sô organizazion no à nissune scuse di fâ pe part che e à vût intal conflit, ma che in dì di vuê lis condizions ur permetin di puartâ indenant lis lôr bataiis cence di vê di doprâ lis armis. Un pas dal gjenar al è stât comunicât, simpri inte stesse zornade, ancje dai rapresentants dal Official IRA (grup armât republican di no confondi cul IRA) e dal grup autonom de UDA dal South East Antrim (formazion paramilitâr lealiste). Chê dai 9 di Fevrâr e jere la ultime zornade par disarmâsi: passade chê date dutis lis armis recuperadis a puedin jessi dopradis tant che provis intai procès e lis organizazions che lis àn dopradis a saran tratadis tant che grups criminâi.

Font: BBC, 08/02/10

Galizie: iniziative di leç popolâr a pro dal galizian

Ai 8 di Fevrâr il coordenament Queremos Galego, che al met adun cetancj sogjets impegnâts inte promozion de lenghe galiziane, al à presentât intal Parlament de Galizie une iniziative di leç popolâr par garantî i dirits linguistics dai citadins intai lôr rapuarts cu la aministrazion publiche e inte scuele. Si trate dal prin pas par partî cu la racuelte des 15 mil firmis che a coventin par che la propueste di leç e vegni esaminade de Assemblee galiziane. La iniziative e nas par fâi cuintri aes modifichis puartadis de Xunta (il guvier galizian) ae leç su la funzion publiche e ai decrets sul ûs des lenghis inte istruzion che, intai fats, a van a limitâ la presince dal galizian ta chescj doi setôrs.

Font: Vieiros Galiza Hoxe, 08/02/10

Irlande: cjatât un acuardi sul trasferiment des competencis su la justizie

Daspò di une tratative lungje e ingredeade, ai 2 di Fevrâr, i rapresentants politics unioniscj e republicans a àn cjatât un acuardi sul trasferiment des competencis su la justizie e su la polizie locâl dal guvier di Londre a chel de Irlande dal Nord. Chest passaç di competencis al jere previodût ancjemò dai acuardis di Sant Andree dal 2006, ma nol jere stât inmò metût in vore par vie dai pidiments jevâts dai partîts unioniscj. Par evitâ che la cuestion e fasès colâ il guvier nordirlandês e e puartàs a elezions anticipadis, a Béal Feirste / Belfast a jerin rivâts ancje il prin ministri britanic Gordon Brown e chel irlandês Brian Cowen. Se l'acuardi al sarà confermât de Assemblee de Irlande dal Nord, che e je clamade a votâlu ai 9 di Març, il passaç di podês al varès di jessi metût in at dentri dai 12 di Avrîl. Par garantî il plui pussibil la imparzialitât inte gjestion de justizie si varà di cjatâ fûr un ministri de justizie e un comandant de polizie che a gjoldin dal consens dai rapresentants de comunitât unioniste e di chê nazionaliste – republicane. Cun di plui, il ministri de justizie al varà une autonomie gruesse intes sôs decisions e intai rapuarts cul rest dal esecutîf nordirlandês: dut chest par garantî la plui largje indipendence e imparzialitât dal sisteme judiziari. Par dongje, si à decidût une revision dal mecanisim par decidi su lis paradis dal Ordin di Orange che, intai agns stâts, a son stadis dispès la cause di episodis di violence cuintri de comunitât nazionaliste. L'intindiment al reste chel di cjatâ une mediazion tra i dirits dai residents e chei di cui che al cjape part aes paradis, se dal câs ancje cul jutori di esperts esternis. I detais in proposit a varessin di rivâ tal zîr di trê setemanis. L'acuardi al previôt ancje che si metin sù dai grups di vore par miorâ e sveltî lis ativitâts di guvier, par cjatâ fûr dai acuardis sui ponts di contrast tra i rapresentants des dôs comunitâts, e par meti in vore chei aspiets dai acuardis di Sant Andree che a restin ancjemò su la cjarte. Tra chescj, il Sinn Féin al sburte par che si rivi cence altris ritarts a di une leç par difindi e par promovi la lenghe irlandese.

Font: BBC, 05/02/10

Paîs Catalans: scuintri sui cines forescj par catalan

Il prin di Fevrâr a son stâts assegnâts i premis Gaudì, o sei i oscar dal cine catalan, che a àn viodût il sucès dal film “Tres dies amb la família”. Inte stesse zornade, dut câs, une part des salis cinematografichis catalanis e à inmaneât une proteste cuintri de leç sul cine dal guvier catalan che e previôt che, par ogni film forest dopleât o sottitulât, si vedi une distribuzion compagne par castilian e par catalan. Pai proprietaris des salis e je une politiche che e fasarà dams al setôr, invezit pal guvier si trate di comedâ lis disavualiancis dal marcjât. Daûr di un sondaç, l'82% dai catalans al dîs che ducj i films a varessin di jessi disponibii ancje par catalan, ma a son une vore di mancul chei che ju àn viodûts te lôr lenghe.

Font: Internazionale, 05/02/10

Gales: trasferiment des competencis su la lenghe galese

Daspò di agns di tire e mole, cun Fevrâr, il Parlament britanic al trasferìs ae Assemblee nazionâl galese lis competencis legjislativis sul galês. Cun chest passaç, cognossût tant che ordin di competence legjislative (LCO) su la lenghe galese, il guvier locâl o singui membris de Assemblee nazionâl a podaran presentâ des leçs – clamadis misuris – par poiâ e par promovi la lenghe galese. Tra lis novitâts che il guvier locâl al à bielzà anticipât, si varà ancje la nomine di un comissari pe lenghe galese che al varà la incarghe di controlâ il rispiet dai proviodiments su la lenghe - ancje par chel che si riferìs a ciertis compagniis privadis che a davuelzin ativitâts di interès public (telecomunicazions, traspuarts e v.i.) - e di intervignî in difese dai dirits linguistics dai citadins. Cheste gnove figure, duncje, e cjaparà sù ancje diviersis des competencis che cumò a son tes mans dal Ufici pe lenghe galese. Propit a chest proposit, di plui bandis, al è rivât l'invît a no dispierdi il grues patrimoni di esperiencis e di competencis che l'Ufici al à metût adun intai agns.

Font: BBC, 04/02/10

Rep. Ceche: prins intervents cuintri de discriminazion dai fruts rom

Lis organizazions internazionâls pai dirits umans a àn dât une prime valutazion positive pe letare mandade de ministre ceche pe educazion, Miroslava Kopicová, ai dirigjents des scuelis elementârs dal paîs par invidâju a controlâ che intes classis par fruts cun disturps mentâi lizêrs a sedin assegnâts dome chei frutins che a patissin pardabon di chescj problemis. Cun di fat, in dì di vuê, cetancj fruts rom a vegnin metûts ta chestis classis dome par vie de lôr partignince etniche. Daûr dai ultins dâts, plui di un cuart dai fruts rom a saressin metûts ta chestis classis speciâls: une percentuâl che no à nuie a ce viodi cun chê dai fruts che a son pardabon disvantazâts. Lis organizazions pai dirits umans, dut câs, a invidun il guvier cec a lâ plui innà des declarazions di principi e a meti in vore politichis concretis par meti fin a chest sisteme di segregazion dai fruts rom e par judâ la lôr integrazion intal percors scolastic normâl.

Font: ERRC, 02/02/10

UE: il comissari pai dirits umans al domande il rispiet dai dirits linguistics

“I dirits linguistics a son deventâts argoment di discussion in diviers stâts europeans. La limitazion di chescj dirits e menace i dirits umans e e stice la tension tra lis comunitâts.” A dîlu al è stât il comissari european pai dirits umans, Thomas Hammarberg, che al à invidât lis autoritâts statâls a scoltâ lis domandis che a rivin des comunitâts minorizadis e a rispuindi aes lôr dibisugnis. Tra i ponts di garantî – al à zontât Hammarberg – si à la presince di mieçs di comunicazion in lenghe minoritarie, l'ûs di chestis lenghis inte scuele, il dirit di doprâ la lenghe proprie intai rapuarts cu lis aministrazions publichis, l'ûs di chestis lenghis intes tabelis e inte segnaletiche stradâl, e fintremai l'ûs coret dai nons di membris de minorance.

Font: MKP, 01/02/10

Macedonie: OSCE clipe sul anticipâ l'insegnament dal macedon

L'insegnament de lenghe macedone al pues jessi anticipât intes classis là che si dopre une lenghe minoritarie, ma dome daspò che la cuestion e je stade dibatude a fonts e che si à preparât miôr la manovre. A dîlu, intun comunicât unitari, a son stâts i rapresentants de OSCE (Organizazion pe Sigurece e pe Cooperazion in Europe), de Union Europeane, de NATO e dai Stâts Unîts in Macedonie. A stiçâ chest intervent e je stade la decision dal guvier si Skopje di anticipâ l'insegnament dal macedon de tierce ae prime elementâr ancje pai fruts che a àn une marilenghe divierse: une decision contestade cun fuarce massime de comunitât albanese, che e rapresente un cuart de popolazion totâl dal stât balcanic. Il guvier macedon, dut câs, al acuse la OSCE di vê cambiât la sô posizion, dal moment che la manovre e jere stade inviade dome daspò che i esperts de Organizazion a vevin dât il lôr parê positîf.

Font: Balkan Insight, 29/01/10

Irlande: tensions intal Nord pal trasferiment des competencis su la justizie

Situazion di tension in Irlande dal Nord par vie dal trasferiment des competencis su la justizie e su la polizie dal guvier britanic a chel locâl. Cun di fat, chest passaç, previodût ancjemò dai acuardis di Sant Andree dal 2006, nol è stât inmò metût in vore. A blocâlu a son i rapresentants politics unioniscj che, par slungjâ inmò di plui i timps pal trasferiment, a àn peât a chest passaç une revision de comission su lis paradis, che e regole lis marcis dal Ordin di Orange in Irlande dal Nord (marcis che intai agns stâts, in plui de ande provocatorie pe comunitât nazionaliste irlandese, a àn ancje puartât a episodis di violence cuintri di cheste comunitât). Dopo di trê agns di tentatîfs, il Sinn Féin (partît di riferiment de comunitât republicane – nazionaliste irlandese) al à fat savê che se si rimande ancjemò il trasferiment des competencis al jessarà dal guvier che al condivît cui unioniscj dal Democratic Unionist Party (DUP). La jessude dai republicans e fasarès colâ il guvier e al oblearès a lâ a elezions anticipadis. Par evitâ un tant e par cirî di cjatâ fûr un acuardi, ai 27 di Zenâr, a son rivâts in Irlande dal Nord ancje il prin ministri britanic Gordon Brown e chel irlandês Brian Cowen. I doi si son fermâts a Béal Feirste / Belfast par trê dîs e a àn metût su la taule une propueste che e previôt: di trasferî i podês su justizie e polizie dentri di Mai; di meti sù un dipartiment pe justizie gnûf cun regulis condividudis intai rapuarts jenfri ministri e esecutîf; di modificâ il sisteme di autorizazion des paradis unionistis; e di meti a disposizion dal gnûf dipartiment pe justizie risorsis par 800 milions di sterlinis. Nancje cheste propueste, dut câs, e à permetût di cjatâ un acuardi. Lis tratativis a son ladis indenant, ma la tension e reste une vore alte.

Font: BBC, 25-30/01/10

Irlande: fevelâ gaelic al è un vantaç intal mont dal lavôr

Cui che al fevele par gaelic si ricjate tune posizion di vantaç intal marcjât dal lavôr irlandês rispiet a cui che no lu fevele. Al è ce che al ven fûr de prime ricercje fate sul rapuart jenfri lenghe fevelade e situazion ocupazionâl in Irlande. Il studi, publicât sul ultin numar de innomenade riviste “The Economic and Social Review”, al è stât metût adun dal professôr Vani Borooah de Universitât dal Ulster cul jutori di doi ricercjadôrs de universitât di Luimneach / Limerick. La ricercje e partìs dai dâts dal censiment dal 2006 e e mostre a clâr che, si ben che il gaelic al sedi fevelât di une minorance di irlandês e che par vivi in Irlande no sedi sante scugne cognossilu, dispès cui che al fevele cheste lenghe al à un puest di vore di nivel plui alt. Cun di fat, il 42% di chei che a son bogns di fevelâ par irlandês al à un lavôr di dirigjent, di professionist o di alt profîl, cuintri dal 27% di chei che no cognossin cheste lenghe. Cun di plui, par solit, cui che al fevele par gaelic al à un nivel di studi plui alt e si mostre in stât di svilupâ “rêts sociâls” miôr di chei altris. Ce che al ven fûr de ricercje, duncje, al è che fevelâ par gaelic al da un vantaç competitîf: un vantaç che plui de cognossince de lenghe al diven dal percors fat par imparâle.

Font: Gaelport, 26/01/10

Paîs Basc: indenant lis protestis dai presonîrs

A van indenant lis protestis inmaneadis dal coletîf dai presonîrs bascs (EPPK). Dai 25 ai 29 di Zenâr i membris dal coletîf a àn puartât indenant un siopar de fam par rivendicâ prin di dut il ricognossiment dal status di presonîrs politics, ma ancje la fin de dispersion e dal regjim di isolament. La stesse forme di proteste e je stade metude in at ancje in cetantis localitâts baschis de bande di personis solidariis cu la lote dai presonîrs. Intant de mobilitazion, il coletîf al à pandût dute la sô poie a Lorentxa Gimon, la militante basche che e je in siopar de fam dai 2 di Zenâr inte preson francese di Roanne. Ancje dilunc vie di chestis protestis si à denunciât la disparizion dal ex presonîr Jon Anza, che no si àn plui notiziis di lui di passe nûf mês. Nol è tant che une inchieste gjornalistiche e à puartât gnûfs elements che a fasin pensâ che l'om al sedi stât secuestrât di un repart speciâl spagnûl intant che si cjatave in teritori francês e che al sedi muart intant di cheste operazion di “vuere sporcje” che e riclame ae memorie lis azions dai GAL.

Font: Gara, 25 e 30/01/10; Le Journal du Pays Basque, 26/01/10