Pontade 14 08 (17/06/08) - 10

Ladins: liste unitarie pes provinciâls sudtirolesis

Il moviment politic “Ladins” e il grup “Amisc dla Ladinia Unida”, che si veve dât dongje par poiâ i referendums pal cambi di regjon intai comuns storics ladins de provincie di Belun, si presentaran cuntune liste uniche tes elezions provinciâls di Bolzan di chest an. I simbui dai doi grups a sarn metûts un dongje l’altri e a saran compagnâts de scrite “Jent Ladina Dolomites – Ladins”. A vuidâ la liste a saran Ulrica Goller-Kostner, funzionarie de liste Ladins, e Pepi Dejaco, sindic di San Martin de Tor e ex rapresentant de SVP.
Font: La Usc di Ladins, 07/06/08

Pontade 14 08 (17/06/08) - 9

Grisons: ai sudtirolês il campionât european di balon des minorancis

E je lade ai sudtirolês (todescs e ladins adun) la vitorie intal campionât european di balon des minorancis che si è davuelt dai 31 di Mai ai 7 di Jugn intal Cjanton dai Grisons. Ae manifestazion, che e je stade batiade Europeada, a partecipavin disesiet scuadris amatoriâls in rapresentance di diviersis comunitâts minoritariis europeanis. In finâl la scuadre dal Sud Tirôl e à batût par 1 a 0 i cravuats de Serbie. Te finâl pal tierç e pal cuart puest, invezit, i rom de Ongjarie a àn subissât par 9 a 0 i danês de Gjermanie.
Font: Europeada, 07/06/08

Pontade 14 08 (17/06/08) - 8

Bretagne: il Gwenn-ha-Du su lis targhis

Vie libare dal ministeri francês pal interni aes gnovis targhis automobilistichis che, pe regjon aministrative de Bretagne, a previodin il non bilengâl dal teritori, ven a dî: Bretagne e Breizh. Cun di plui, te targhe, si varà ancje il Gwenn-ha-Du (Blanc e Neri), o sei la bandiere nazionâl bretone.
Font: Eurominority, 05/06/08

Pontade 14 08 (17/06/08) - 7

Gales: domande pe uficialitât dal galês intal Parlament european

La europarlamentâr dal Plaid Cymru, Jill Evans, e à indreçât un apel ai citadins e aes istituzions galesis par che a dedin une poie fuarte ae domande di rindi il galês lenghe couficiâl intal Parlament european. Il guvier galês al à za dât la sô poie ae iniziative e cumò a son in vore lis tratativis cul Consei de Europe par rivâ a di un tant. Se la azion e ves di lâ a bon fin i citadins galês a podaran indreçâsi al Parlament european inte lôr lenghe proprie e i europarlamentârs di cheste nazion celtiche a podaran fevelâ par galês in Aule.
Font: Plaid Cymru, 05/06/08; Món Divers, 04/06/08; EFA, 04/06/08

Pontade 14 08 (17/06/08) - 6

Galizie: imprescj linguistics gnûfs pal galizian

Une societât galiziane ative intal cjamp de produzion di software e à presentât un dizionari informatic galizian – spagnûl – portughês metût adun in colaborazion cu lis Universitâts dal paîs. Il program al à une base di 12 mil peraulis, al pues jessi personalizât daûr des dibisugnis di cui che lu dopre e al à un codiç viert, disponibil par ducj. In plui dai rapuarts culturâi e linguistics, la Galizie e je la prime comunitât dal stât spagnûl par volum di impuartazions dal Portugal. L’imprest informatic al à duncje chê di judâ a incressi inmò di plui i rapuarts cun chest paîs, ma ancje cul Brasîl e cun chês altris ex coloniis portughesis.
Intant la segretarie gjenerâl pe politiche linguistiche dal guvier de Galizie e à sotscrit un acuardi cu la Federazion galiziane di bale tal zei (Fegaba) par sburtâ la presince de lenghe proprie de comunitât intes scuadris che indi fasin part. La federazion si impegnarà par che il galizian al sedi doprât te documentazion e tai materiâi des societâts membris, invezit il guvier al lavorarà par meti adun un vocabolari galizian di bale tal zei e par prontâ imprescj che a judin la presince de lenghe intai sîts internet des scuadris di basket galizianis.
Font: Galiza Hoxe, 04-05/06/08

Pontade 14 08 (17/06/08) - 5

Gales: 750 mil euros par un servizi informatîf pal galês

Tai prossims trê agns la societât che e publiche il setemanâl in lenghe galese “Golwg” e varà dal guvier galês un finanziament di passe 750 mil euros par infuartî la edizion su cjarte e par inviâ un servizi di gnovis dì par dì sul sît internet de riviste. In dì di vuê il setemanâl al vent dome 4000 copiis a front di passe mieç milion di personis che a fevelin par galês. Tra i ativiscj pe lenghe, dut câs, al è un fuart marum tai confronts dal guvier par vie che, intant che al à decidût chest intervent, al à refudât un finanziament di 800 mil euros par inviâ un cuotidian par galês: un progjet che si lavoravii parsore za di agns e che al gjoldeve di une poie popolâr avonde fuarte cun passe 5 mil sotscritôrs che a vevin dât il lôr contribût par inviâlu. Dut câs, cence dai bêçs dal guvier il progjet nol pues partî.
Font: Eurolang, 03/06/08; Nationalia, 06/06/08

Pontade 14 08 (17/06/08) - 4

France: riforme de Costituzion passade tal prin vôt parlamentâr

La Assemblee francese e à fate buine in prime leture la riforme costituzionâl che e permetarès il ricognossiment des lenghis minorizadis che si fevelin intal stât francês. Cumò il test al à di jessi votât ancje dal Senât. Tal câs che la riforme e passi ancje ta cheste rame dal Parlament, la modifiche costituzionâl e rivarà al esam des dôs Cjamaris parlamentârs unidis. Par meti in vore la riforme a coventaran i trê cuints dai vôts dai deputâts e dai senatôrs, ven a dî che in plui de maiorance de UMP a varan di votâ a pro dal test ancje un pôcs di parlamentârs de oposizion.
Font: Le Monde, 03/06/08; Món Divers, 03/06/08

Pontade 14 08 (17/06/08) - 3

Romanie: i arumens a domandin il ricognossiment come minorance

La comunitât arumene de Romanie e à domandât che i vegni ricognossût il status di minorance nazionâl. La domande e je stade fate indenant in maniere uficiâl ai 23 di Mai intal palaç dal Parlament rumen, a Bucarest, denant di 1500 rapresentants des associazions de minorance e di delegâts des comunitâts arumenis che a vivin in Albanie, Bulgarie, Grecie e Macedonie. In Romanie, di fat, i arumens no àn ricognossûts i dirits di chês altris minorancis nazionâls, tant che une rapresentance in Parlament o la pussibilitât di doprâ la lôr lenghe inte scuele, intai mieçs di comunicazion e in glesie. Pes autoritâts rumenis i arumens no son une nazionalitât autonome, ma dome une comunitât che e fevele un dai cuatri dialets dal rumen.
Font: Divers.ro, 02/06/08; Eurolang, 02/06/08

Pontade 14 08 (17/06/08) - 2

Romanie: par AI i Rom a son inmò discriminâts

Daûr dal ultin Rapuart dât fûr di Amnesty International, in Romanie a son ancjemò tancj i segnâi di discriminazion e di intolerance cuintri des minorancis etnichis, massime i rom. Par chescj ultins, di fat, si àn discriminazions che a rivuardin il lavôr, la salût, la cjase e la educazion. Cun di plui, tai ultins mês si àn vudis diviersis declarazions di stamp razist cuintri di lôr ancje de bande di rapresentants politics e istituzionâi di alt nivel, a tacâ dal president rumen Traian Basescu e dal ministri pai forescj Adrian Cioroianu.
Font: Divers.ro, 02/06/08

Pontade 14 08 (17/06/08) - 1

Cecenie: Russie condanade par disparizion di civîi

Il Tribunâl european dai dirits umans al à condanât la Russie par cinc câs di disparizion di civîi in Cecenie. I câs si riferissin ae disparizion di vot oms e di dôs feminis capitâts in diviersis localitâts cecenis jenfri il 2002 e il 2003. Si trate di personis cjapadis dal esercit o des fuarcis di sigurecis russis e mai plui tornadis a cjase. Il Tribunâl al à ricognossût lis autoritâts russis responsabilis di no vê rispietât il dirit ae vite, di vê arestât lis personis disparidis in maniere ilegâl, di no vê indagât su lis denunciis fatis des fameis des personis disparidis e di jessisi compuartadis in maniere inumane cuintri di lôr. L’unic risultât di cheste condane, dut câs, e je che il stât rus al varà di paiâ un risarciment di 429 mil euros ai autôrs des denunciis. In dì di vuê, il Tribunâl european si cjate a vê di esaminâ passe 22 mil denunciis cuintri de Russie par violazions dai dirits umans. Al è just di ricuardâ che il compuartament de Russie in Cecenie al è stât calcolât di gjenocidi de bande di cetantis organizazions umanitariis e no dome.
Font: Txetxenia.org, 29/05/08; Món Divers, 04/06/08

Pontade 13 08 (03/06/08) - 13

Scozie: polemiche pai segnâi bilengâi par gaelic

L'Ufici pe lenghe gaeliche scozese al à fat bon il plan imbastît dal Consei regjonâl des Highlands a pro di cheste lenghe celtiche. Il document al previôt ancje che la segnaletiche dilunc des stradis locâls e sedi bilengâl (inglês – gaelic). Cheste decision però no i à plasude masse a cualchi aministradôr de provincie de Caithness che al lamente il fat che si larès a spindi bêçs dibant dal moment che te lôr aree no son toponims gaelics tradizionâi. Chestis declarazions a àn jevât lis protestis des associazions che si batin pal gaelic che a àn acusât i politics de Caithness di vê doprât motivazions cence fonde.
Font: Món Divers, 02/06/08

Pontade 13 08 (03/06/08) - 12

Albanie: sindic a pro de minorance greghe a procès

Vasil Bollano, sindic di Himarë, citadine dal Sud Ovest de Albanie, al è sot procès par vê fat gjavâ dai segnâi stradâi scrits dome par albanês. Cun di fat, la plui part de popolazion locâl e parten ae minorance greghe e, duncje, pal prin citadin dal paîs la segnaletiche e veve di jessi bilengâl. Pe sô decision, Bollano al è stât acusât di abûs di podê. No je la prime volte che il sindic di Himarë al cjape posizion in difese dai dirits de minorance greghe. Timp indaûr al veve ancje domandât che la regjon là che e vîf la minorance e podès gjoldi di formis di autoguvier.
Font: Món Divers, 01/06/08

Pontade 13 08 (03/06/08) - 11

Grisons: campionât european di balon des minorancis

Si à vierzût cuntun 3 a 0 dai sudtirolês (todescs e ladins adun) sui arumens de Romanie il campionât european di balon des minorancis che si davuelç dai 31 di Mai ai 7 di Jugn intal Cjanton dai Grisons. Ae manifestazion, che e je stade batiade Europeada, a partecipin disesiet scuadris di stamp amatoriâl, ven a dî: arumens e cravuats de Romanie, caraçans de Russie, catalans, cimbris, cravuats de Serbie, danês e frisons de Gjermanie, galês, ocitans, rom de Ongjarie, rumançs, serbians, sudtirolês, todescs de Danimarcje, de Ongjarie e de Polonie. La iniziative e à chê di clamâ la atenzion su lis minorancis e di infuartî la rêt tra chestis comunitâts.

Font: Swiss Info, 30/05/08

Pontade 13 08 (03/06/08) - 10

Paîs Basc: il guvier de CAB al fâs bon il progjet pal referendum

Sêso dacuardi cul poiâ un procès dialogât di fin de violence se prime ETA e pant in maniere clare la sô volontât di finîle cu la violence une volte par simpri? Sêso dacuardi che i partîts bascs a tachin un procès di negoziazion par rivâ a di un acuardi democratic sul esercizi dal dirit di decidi dal popul basc e che chest acuardi al sedi sometût a di un referendum dentri de fin dal 2010? A son chestis lis dôs domandis che il guvier de Comunitât Autonome Basche al vûl indreçâ ai siei citadins par mieç di un referendum che al varès di davuelzisi ai 25 di Otubar. L’esecutîf autonomic lis à fatis buinis intune cul disen di leç sul referendum. Ai 27 di Jugn i tocjarà al Parlament de CAB decidi se lâ indenant cul progjet o pûr no. Su la cjarte, il proviodiment al varès di vê i 33 vôts a pro de coalizion di guvier formade di PNV, Eusko Alkartasuna e Ezker Batua, e dai indipendentiscj di Aralar. Dut câs, ancje il front dai contraris al pues contâ su 33 vôts che a rivin dai socialiscj (PSE) e dai popolârs (PP). A saran, duncje, decisîfs i 9 vôts de çampe abertzale rapresentade dal Partît Comunist des Tieris Baschis (EHAK) che, dut câs, al à za mostrât di no condividi l’implant de prime domande. Po, se ancje il progjet al ves di passâ tal Parlament de CAB, i socialiscj a àn za dite che par blocâlu a domandaran che a intervegnin il guvier spagnûl e il Tribunâl costituzionâl.

Intant, ai 26 di Mai, si à fate sintî ancje ETA cuntun comunicât là che, dongje di rivendicâ cuatri atentâts fats vie pal mês di Mai, e declare che no si metarà fin al conflit ni cu la repression violente metude in at dai guviers di Madrid e di Parîs e nancje cun “fraudis vistudis di riforme autonomiche” tant che chê sburtade dal PNV, ma dome cuntun procès che al puarti pardabon ae nassite di un stât basc.

Font: Gara, 26-30/05/08; Món Divers, 26/05/08; Nationalia, 28/05/08

Pontade 13 08 (03/06/08) - 9

Sardegne: azion dai indipendentiscj cuintri des scovacis talianis

La setemane stade une gnove spedizion di scovacis campanis e je stade puartade in Sardegne. Ancjemò une volte, come che al jere sucedût in Zenâr, si à vude une mobilitazion dai partîts indipendentiscj de Sardegne che le viodin come une dimostrazion de sotanance de isule ai interès talians. In chê volte, cul guvier talian in man al centri çampe, la proteste e jere stade cjavalgjade ancje dai rapresentants isolans dal centri diestre, che cheste volte, invezit, no si son fats viodi. A cui che ju acuse di no jessi solidaris, i indipendentiscj sarts a rispuindin che la solidarietât che si domande ae Sardegne e je simpri a sens unic, viodût che il stât talian, par esempli, al dîs simpri di no cuant che i si domande di meti man aes servitûts militârs che a pesin su la isule e su la sô int. A chest proposit, i rapresentants di iRS (indipendèntzia Repùbrica de Sardigna) a domandin almancul un segnâl di ecuitât cu la sospension par doi agns des esercitazions militârs in Sardegne, là che si sperimentin ogni sorte di armis ancje chês al urani impuarît. Cussì, ai 29 di Mai, cuant che e je rivade une gnove nâf di scovacis de Campanie, Sardigna Natzione Indipendentzia e à metût sù un presidi alì dal puart, ma cence rivâ a blocâ plui di tant i camions cui refudums. A son stâts però i militants di iRS che a àn rivât a sghindâ ducj i controi des fuarcis di polizie e a blocâ par oris i camions dilunc de strade che e mene al incinisadôr. La strade e je stade liberade dome daspò che l’assessôr regjonâl pal ambient, fat rivâ di pueste sul lûc dal bloc, al à garantît l’impegn de Regjon cuintri des servitûts militârs.

Font: iRS, 28-30/05/08; Repubblica, 29/05/08; L’Unione Sarda, 30/05/08

Pontade 13 08 (03/06/08) - 8

Lusazie: la proteste dai serbians e rive a Berlin

A jerin sù par jù un miâr i serbians che ai 29 di Mai a àn manifestât a Berlin par che a sedin sblocâts i fonts pe Fondazion dal popul serbian, che e viôt di difindi e di promovi la lenghe e la culture di cheste comunitât. Cun di fat, i cuasi 15 milions di euros che i spietin ae istituzion, a son blocâts dal principi dal an par vie di un conflit di competencis tra il guvier federâl todesc e chel dai stâts di Sassonie e Brandeburc. I serbians, o sorabis, a vivin te regjon storiche de Lusazie, che e je a cjaval tra i doi Lands, e a son la uniche minorance slave autoctone dentri dal stât todesc. In Fevrâr al jere za stât fat un apel public par risolvi la cuestion e par proviodi a fissâ miôr lis comptencis dai diviers orghins istituzionâi di maniere di evitâ che cheste situazion e torni a sucedi. Dut câs, fin cumò no si à mot nuie, e cussì lis organizazions serbianis a àn decidût di puartâ la proteste sot de Puarte di Brandeburc.

Font: Món Divers, 29/05/08

Pontade 13 08 (03/06/08) - 7

UE: media e rapresentance i temis centrâi dal Congrès de FUEN

Dai 22 ai 24 di Mai si è davuelt a Pécs, in Ongjarie, il congrès de Union Federâl des Nazionalitâts Europeanis (FUEN) ospitât des struturis di autoguvier de minorance todescje. A son stâts doi i temis centrâi frontâts, ven a dî la cuestion dai mieçs di comunicazion des comunitâts minorizadis e chê de rapresentance de FUEN intes istituzions europeanis. Daspò de presentazion dal rapuart metût adun de rêt Mercator Media sul prin argoment, il Congrès al à domandât che i mieçs di comunicazion des minorancis a vedin dirits compagns e risorsis proporizionadis ai media des maiorancis. In mert ae seconde cuestion, il Congrès al à votât i siei rapresentants intal gnûf Forum pal dialic che si darà dongje dôs voltis al an cul Intergrup pes minorancis dal Parlament European.

Font: Eurolang, 29/05/08

Pontade 13 08 (03/06/08) - 6

Paîs Basc: finanziâts 62 progjets a pro dal euskara in Iparralde

Ai 26 di Mai i rapresentants dal Ufici public de lenghe basche (che al opere intal Paîs Basc “francês”) e dal guvier de Comunitât Autonome Basche a àn comunicât che a son 62 i progjets fats indenant di sogjets privâts a pro dal euskara che a son stâts finanziâts inte suaze dal acuardi di cooperazion transfrontaliere sotscrit l’an passât. I fonts a disposizion par chestis iniziativis a son in dut 1 milion e 340 mil euros, di chescj 460 mil metûts de CAB. Si trate di progjets che a àn chê di promovi la cognossince e l’ûs de lenghe basche in setôrs diviers che a van de comunicazion al timp libar. La plui part dai finanziaments a van a Euskal Irratiak (la rêt des radios baschis), AEK (la associazion che si ocupe de alfabetizazion in lenghe basche), e Seaska (la federazion des scuelis baschis).

Font: EiTB, 26/05/08; Ouiaubreton, 28/05/08

Pontade 13 08 (03/06/08) - 5

Paîs Catalans: campagne pe lenghe tes Baleârs

Il guvier des Baleârs, intune cu lis aministrazions locâls des isulis, a àn presentât la gnove campagne par sburtâ ducj i citadins a doprâ la lenghe catalane. Cul sproc “Ara és la teva” (cumò e je la tô) si cîr di presentâ la lenghe proprie des isulis tant che element naturâl di relazion che al jude la integrazion e la coesion sociâl. Plui informazions su la campagne si pues cjatâlis ancje sul sît araeslateva.cat .

Font: Món Divers, 27/05/08

Pontade 13 08 (03/06/08) - 4

Val di Aoste: gnove vitorie autonomiste in Regjon

Lis elezions regjonâls valdostanis dai 25 di Mai si son sieradis cuntune gnove vitorie pai autonomiscj. Rispiet al 2003, si à votât cuntun sisteme eletorâl gnûf, ven a dî un proporzionâl coret cu la pussibilitât par plui listis di dâsi dongje tune coalizion che, tal câs che si passi il 50% des preferencis, e gjolt di un premi di maiorance. La coalizion formade di Union Valdôtaine, Stella Alpina-UDC-Vallée d’Aoste e Federation Autonomiste e à cjapât plui dal 61% dai vôts. In particolâr la UV e à vût passe il 44% dai consens e e à otignût 17 conseîrs suntun totâl di 35 a disposizion. Chei altris doi partîts de coalizion autonomiste a àn vût: sù par jù l’11% dai vôts e 4 conseîrs la Stella Alpina-UDC-Vallée d’Aoste, e il 6% des preferencis e 2 conseîrs la Federation Autonomiste. La coalizion di centri çampe e à cjapât in dut il 27,4% dai vôts. Dai siei membris il grup Vallée d’Aoste vive-Renouveau al à vût passe il 12% di preferencis e 5 conseîrs, il PD il 9,3% e 3 conseîrs e la çampe radicâl il 5,6% des preferencis, ma nancje un elet. Il PdL, invezit, al à vût a pene il 10,6% dai vôts e 4 conseîrs.

Font: Corriere della Sera, 26/05/08; Repubblica, 26/05/08